Thursday, April 23, 2009

HLAUH NGAH!

¢ HC Vanlalruata

Tlangval pakhat hi sipai tan tumin a intlar ve a. Sipai latu (recruiting officer) chuan a chanchin a ziah chu chhiar sakin “I pa hi sipai a ni thin a, ral ramah indonaah a thi a ni maw?” tiin a zawt a. Chu tlangval chuan, “Aw, ka pu. Ka pu, ka pa pa pawh sipai a ni a, ralramah a thi a; chumi pa leh pawh chu Indopui pahnihnaah khan a thi tawh bawk,” a ti a. Sipai officer chuan, “Chutianga i pa, i pu leh i pu pu leh pawh sipai thin, ralrama thi vek an nih chuan sipai tan i hlau lovem ni?” tiin a zawt ta a.

Chu tlangval chuan, “Ka pu nang i pa a la dam em?” a ti a. Officer chuan, “Dam tawh love, mahse ani chu indonaa ram palailenga thi lovin khumah a nupui leh a fate’n kan dawm hlum a lawm,” tiin a chhang a. Tlangval chuan, “A nih leh i pu leh i pu pu lehte chu?” tiin a zawt leh a. Officer chuan, “Anni pawh khumah vek, chhungte’n an dawm chungin an thi maw le,” a ti leh a. Chutah chuan tlangval chuan, “Chuti a nih chuan ka pu nang pawh khum chu i hlau lo’m ni? I pa leh i pute ho thihna a ni si a?” tiin a zawt let a ni.

Tunhnai lawkah Kolasib District MJA chuan Bairabi atanga Sairang thleng rel kawng siam an duhloh thu leh he hna kal mek hi titawp se an duh thu resolution meuh siamin an puang a. An duhloh chhan chu khawpui hnaiha rel a lo luh chuan hnamdang an lo lut tam lutuk ang a, min chim ral mai ang tih an hlau niin a lang.

Hlauh kan ngah avang hian hmasawnna kawng hi kan tiping ta fo mai a. Kan rilru zim leh tet luat vang a ni fo thin. Mi dawihzep leh hlauh ngah lutuk chu hmasawn theilo an ni fo. Thlawhtheihnaa chuan hlau tlat chuan khua leh ram a hmu zau thei lova, motor-a chuan hlau phei chuan a hmu zim leh zual ang. Khawlaia chetsual palh leh lirtheiin a su palh ang tih hlau phei chuan hna pawh a thawk theilo ang a, in luma a tawm reng a tul ang.

Thil tha kan duhna kawngah pawh hian a hmasawn lo zawnga kal hi a awm a. Hmasawnna hian thil tha tam tak a thlen rualin thil thalo a keng tel ve thin a. Mihring tana pawi tak tak tur inven erawh chu kan tih tur a nih rualin thil thalo hlauh luat avanga hmasawn theih loh ngawt chu a dik thei ngai lovang.

Rel kawng a lo luh avanga chimral tur kan nih chuan Inner Line Permit ngaih ve thona Himachal Pradesh, tlangram ni chunga rel kawngin a chhun chek chukte khu chimral an ni daih tawh ang. Bangladesh leh Assam inkarah rel kawng a awm kan hrelo, chuti chung chuan Bangladesh atanga pem lut tam lutuk avangin Assam an buai em em a, an district tam tak tun hmaa Hindu tam zawknaah Muslim an tam zawk fe tawh. Hetianga an awmna chhan hi chu sorkar leh an kalphungah ramdangmi lo lut ngaimawh tawk lohna a awm vang zawk a ni.

Mizote hi chimral kan nih chuan ILP hlih vang emaw, rel kawng kan siam emaw vang ni lovin keimahni mawh a ni ang. Tunah pawh hian ramdangmi leh India rama hnamdang nuai khat vel kan ramah hian awm nia chhut a ni a. Hengho an awm chhan chu hnathawh tur leh eizawnna an hmuh vang a ni a. Hna hrehawm deuh kan thawh peihloh vanga kan mamawh phuhru tura lo lut an ni. Keimahni’n an thawh ai hi thawk vek ila chuan an lo lut lo mai ang. Tunhma pawhin Mizo zinga B.Sc kan neih tlem avangin School-a Science subject zirtir turin India chhim atangin an lo kal teuh mai a. Tunah chuan science subject la thei kan tam ve tawh avangin an awm tawh mang lo a ni. Shorthand lam zir chhuak kan tlem avangin hnamdang stenographer kan nei teuh thin bawk.

Chutiang zel chu a ni. Sumdawnna kawngah kan ram hruaitute’n eiruk an duh vang ni maw Pathianni-a Sunday School-a an thutpui thinte nilo hnamdang supplier hnena hna an pek tam thin avangin vai supplier kan ngah a, kan ram sum an hawn thla teuh teuh thin. Hemi kawngah hian kan ram hruaitute pawh a tul chuan kan ben harh a ngai ang a, keini pawh kan inenlet a tul ang. Kan tih ve theih-ah chuan keini ngeiin tih tum ila dik leh tha takin ti thin bawk ila, hnamdang lo lut tur danna a ni ang.

Rel kawng a ni emaw hmasawnna kawng dang dangah pawh inhumhalh dan a awm vek a. Hlauh ngah lutuk avanga hmasawnna dal ai chuan inhumhalhna dan neih thata kenkawh that hi a tha zawk a. Hmasawnna dal thei zawng leh hlauhna lantir hi chanchinbumi kalkhawm tihtur a ni em tih pawh inenlet a tul ka ring.

Related Posts :



No comments:

Post a Comment