Monday, August 31, 2009

Mizoramah Kristianna a nghing em? Mizo tawngin Hindu lehkhabu thianghlim

Mizo zinga Hindu sakhaw thehdarh tum an awm tih hi chu tun hma deuh atanga hriat tawh a ni a, tlema hawizau deuhte phei chuan a taka an hmalaknate pawh sawi tur an hre nual tawh. Tun hnaia Hindu sakhaw lehkhabu Srimad Bhagavad Gita Mizo tawnga lehlin a lo chhuah takah phei hi chuan he boruak inmun mek hi a puak keh tan ta niin a ngaih theih ta hial mai.

Mi tam takin kan hriat loh lai hian Mizo zingah Isua Krista aia Krishna thlang zawk engemaw zat an awm tawh a, Kristian sakhua bansana Hindu-a inlet an awm tawh mai a ni lo a, hindu sakhaw thehdarh tura inchher mek te pawh sawi tur an awm nual ta.

Mizote Hindu sakhuaa inlehtir tumna thawm hi a rikna chu a rei tawh a, naupang leh thalai engemaw zat chu phaiah Hindu pawl thenkhatin lehkha an zirtir a, an chawm tih te pawh sawi a ni fo thin.

Engemaw laia yoga a lo lar chiam pawh khan Kohhran tana mi thahnemngai thenkhat chuan an lo chhui zui nghal a, mipui nawlpui hriatah Hindu sakhua nen a inkungkaih dan te, thiam taka sakhaw thehdarhna hmanrua a nih thu te an sawi tak hnuah a dai leh ta a nih kha.

Presbyterian Kohhran pawhin Mizoram chhunga sakhaw dangte hmalakna zirchiangtu tur committee hial a lo din tawh bawk. Ama'rawhchu, hmalakna lian tham erawh an nei zui lo ni awm tak a ni.

Bhagavad Gita Mizo tawngin
Engemaw lai khan hindu sakhua thehdarh tuma hmalatuten an lehkhabu pawimawh ber pakhat Bhagavad Gita chu Mizo tawngin an let zo vek tawh tih Zozam Weekly-in a hria a, hun engemaw chen hnu, tun hnaiah khan he lehkhabu hi neih theih a lo ni ta. A buatsaihtute thil tum lam ngaihtuah lem lo pawhin sakhaw lehkhabu pawimawh tak mai a nih avang hrim hrim pawh hian buaipui tham chu a ni ve awm e.

'Gita' Mizo tawng hi phek 209-a chhah a ni a, a kawm khawng niin, copy 1000 chhut a ni. A kawm khawng, phek 209-a chhah chu Rs 20 man lek a ni thung!

Mizo tawnga letlingtu hi Ramthanga Khawlhring a ni a, Heritage Foundation (Guwahati) chhuah a ni. Kum 2007-a chhuah niin a bu-ah hi chuan a inziak.

He sakhaw lehkhabu-ah hian thuhmahruai ziak an awm nual a, chungte chu Nunna Lalhnam mi leh sate vek an ni. Anni bakah hian a chhuahtu Heritage Foundation aiawhin Prof. Raghudev Goswami leh a letlingtute'n an ziak bawk.

Gita hi philosophy leh literature lamah pawh duai lo tak mai, chutiang atana zir tham chu ni mah se a buatsaihtute hian chutiang chu an tum a nih lohzia leh Hindu sakhaw thehdarh tumna hmanrua a nihzia chu thuhmahruai ziaktute tawngkam atang hian a lang chiang viau a ni.

A letlingtu Ramthanga Khawlhring chuan, "...he lehkhabu-a thute hi lei leh van innghahna, Chatuan Minung Thuchhuakte an nih avangin, a neitu Chatuan Minung hnenah lawm takin ka hlan let e," tiin thuhmahruai tlang a kawm a ni.

Rorelliana, Lal puithiam, Mizo Hnam Sakhua pawhin, "Ram leh hnamin a nun kawng dik a zawh a, hnam a lo hmuingilna tur leh mihring hriatna piaha Chung Khuanu - Khuavang ram rel, hnam hnena pholan a duhnate hailanna lehkhabu chhuah a lo ni ta mai hi hnam vanneihna kawng hawngtu lo ni zel sela," tiin malsawmna a ziak.

"Gita bu hi uluk takin ka chhiar a, hnam damna tling thu hluin a khat ni berin a lang," tiin H Chawngpianga, Lal puithiam, Nunna Lalhnam pawhin malsawmna a ziak.

C Vanlallawma, President, Janajati Vikas Samiti, Mizoram pawhin 'Duhsakna thuhma' tiang hian a ziak:

"He lehkhabuah hian engkim dintu leh duang chhuaktu, thil tinrengte nih phung ruatsaktu, chatuan minung khuavang-in hring fate nun kawng a lo rel dan leh hman chhuah dan tur fiah takin tarlan a ni a. Nung tinreng hmanga inpuang 'Khuanu' chu khawvelin an hmuhfiahna tur lehkhabu tha tak ni turin duhsakna ka hlan bawk e," tiin.

Gita thuhmahruaia hnam tinte malsawmna ziaktu B Lalthlengliana, Vice Chairman, Nunna Lal hnam (Saron veng, Aizawl) chuan, "Lalpa (khuavang) chu Lal a nih anga a inpuannate chunga a ropuina chu lang zel se, hnam tinte a siam anga mahni nih dan theuhva a kohna hretute malsawmin awm se..." tiin a ziak.

A bu chhung tir lamah hian Gita ropuizia ziahlan a ni a, "...he lehkhabu ang hi a vang hle a, lehkhabu dang, sakhaw lehkhabu-a mi ngaih leh pawmte pawh hi han belhchian chuan tisa khawvel leh a piah lam nawmchenna neih theihna tura zirtirna a ni deuh tlangpui a, finna kawng zawh ai chuan rin thu a kal ngaihsanna lehkhabute an ni," tih thu awmze nei tak ziah a ni.

Gita Mizo tawnga a awm ve hi a hnawksak tihna a ni lo ang a, literature tihausatu pawh a ni zawk mai thei. Mahse, a buaipuitute leh a phena thil awm ni awm taka langte hi rawngbawltu thenkhatin an ngaimawh lai chu a ni. A buatsaihnaa hmalatute leh thuhmahruai ziaktute hi hmanlai Mizo hnam sakhua chawilar duhtu an ni, tiin thudawn pakhat chuan a sawi.

Mizoramah Hindu sakhua thehdarh an tum
Mizoramah hian Hindu thehdarh tuma thahnemngai taka beitu an awm reng a, an zingah hian sorkara mi langsar tak takte pawh an tel nia sawi a ni. Sum pawh an chelek viau nia sawi a ni a, hman deuh lawka hemi chungchang rawn lar hluai pawh kha an hmalakna nia sawi a ni nghe nghe.

India ram hi sakhaw zalenna ram a ni a, mi tu pawhin a duh duh sakhua a zawm thei. Chumi denchhen chuan sakhaw hrang hrangte hian tan an la tlang vek tiin a sawi theih ang. Chutihlai chuan state thenkhatah chuan sakhaw danga inleh khapna dan te hial an siam avang leh tihduhdahna rapthlak takte a awm fo avangin Kristian missionary-te'n harsatna an tawk thin. Nikum lawkah pawh khan Orissa-a Kandhamal district-ah chuan Hindu firfiakhoin Kristiante an sawisa nasa hle a nih kha.

Danin a phal miau avangin Mizo zinga sakhaw dang vuan an lo awm hi khap ngawt theih a ni lo ang. A nihna takah chuan pawl thenkhat phei hi chu Kristianah an inchhal lo mai a ni lo a, Mizote Kristian sakhua bansantir tumin hma an la zawk a ni.

'Hinduism' hi mi tam tak chuan sakhua leh hnam nunzia (culture) inkawp niin an ngai a, a dikna thui tak a awm. India hmarchhak pumpui leh Mizorama hindu sakhaw thehdarh tuma hmala mekte pawh hian pi pute sakhua an sawi vawng viau a, a langa paua hindu a inlehtir hi tum ber a ni lo a, hmanlai sakhua theuha kirtir leh hi an tum zawk chu a ni.

India hmarchhaka Hindu thehdarhna atana hmalatu pawlte hian fing takin hma an la a, state tinah sakhaw behchhan pawl hrang hrang (Kristian ni si lote) nen an thawkho a, sum leh thil dang pawhin an pui mai thei e. He'ng pawl hrang hrang - Janjati Faith & Culture Protection Forum, Vanvasi Kalyan Ashram, Seva Bharati, Heritage Foundation, VHP leh RSS te hian tlang mite an sakhaw hluia an kir leh theihna turin hma an la reng a ni.

Hindu pawl hrang hrangte hian India hmarchhak state tinah hian thawhpui (pawl/kohhran) 34 lai an nei a, Mizoramah pawh chutianga thawhpui chu 5 an nei a, chungte chu - Nunna Lal hnam (Mizo hnam sakhua - Nunna Lalchhungkua); Shavei Israel; Mizo Kohhran; Bnei Israel leh Lal chhungua Unity te an ni.

Heng Mizorama an thawhpuite thu ken ber hi a chunga kan sawi tak ang hian hmanlai kan pi pute sakhua leh pathian (Khuanu, Pu Vana, etc.) biak leh hi a ni. Langsar takin Isua Krista leh Bible an sawichhe bawrh bawrh fo a, an thuziakah pawh Kristian sakhua an bei viau a ni.

Gauhati atanga chanchinbu chhuak pakhat 'Heritage Explorer' hi tuna kan sawi lai - Hindu sakhaw thehdarh tumtu leh chumi atana hnam sakhua buaipuitute nena thawkho pawl pakhat Heritage Foundation tihchhuah a ni. He chanchinbuah hian Kristian missionary leh rawngbawltute chanchin a chhe zawnga ziah a ni fo a, thiam takin India hmarchhaka chengte hi pipute hnam sakhua kirtir leh tumin hma an la a, chu chu an thuchhuah thin atangin a hriat hle a ni.

Engpawhnise, hindu lehkhabu thianghlim pakhat Gita chu mi thenkhat zarah Mizo tawngin a lo awm ta a, la darhzau vak lo mah se mi tam takin an kawl fur tawh nia hriat a ni. Hemi chungchangah hian Kohhran hruaitute leh rawngbawltute ngaihdan hriat a ni lo na a, Kohhrana mi thahnemngaite chuan an enghelh viauvin a rinawm.

Mizote hi sakhuaa nghet ru ang reng tak mai kan ni a, ni tin nun leh thil dangaah chuan Kohhran mi nihna te hi ngai pawimawh vak lo tam mah se naupan teta baptisma chang leh inkhawm thinte lo nih thinna hi (sakhuana thilah chuan) a lang thuai zel a ni.

Hindu sakhua hi vai sakhua anga ngaih a nih avang leh Hindu pawl thenkhat (VHP, RSS, Bajrang Dal, etc.,) te chet dan te, India ram hi Hindu rama lehtir tuma politics hmanruaa hmang an lo awm mek bawk avang hian tuna Gita bu Mizo tawnga lehlin lo chhuak ta pawh hi mi tam tak chuan an ngai thutak viauin a rinawm. Kum tir lama chief minister-in New Delhi-a Mizoram House thar tur lungphum a phum tuma vai (Hindu) tih dan anga coconut a sawhkeh ve tum pawh khan mi tam takin an helh hle a nih kha.

Bhagavad Gita chu
Bhagavad Gita hi Hindu lehkhabu thianghlim ti ila a chiang mai awm e. Hindu scripture pawimawh ber pakhat a ni.

'Bhagavad Gita' tih hi Sanskrit tawng a ni a, 'Song of God' (Pathian hla) tihna a ni.

Hindu lehkhabu thianghlim mai a ni lo, khawvela philosophy lehkhabu lar ber pakhat a ni.

'Song of God' tih takah, he lehkhabu hi hlabu a ni a, hla 700 a awm.

Hindu-ho chuan pathian hi Krishna hmangin a inpuang tiin an sawi a, an rin danah chuan pathian hi Krishna-ah a chang an ti. Krishna zirtirna chu an zui a, Bhagavad Gita pawh hi Krishna zirtirna a nih avanga ngai ropui an ni ber.

Bhagavad Gita-a hlate hi Krishna leh Arjuna inbiakna a ni a, lal fapa Arjuna hi Kurukshetra war hma lawk khan, indona hmun pakhatah rilru lama harsatna tawkin a awm a, chutih laia Krishna nena an inbiakna tia sawi a ni.

Krishna hian Arjuna chu indomi a nihnaa tih tur leh lal fapa a nihnaa a mawhphurhna te a hrilh a, rilru lama harsatna nasa tak tawktu Arjuna chu a fuih a ni. Chutianga an infuihna vel chu he lehkhabu-ah hian a chuang a, mihring nun inkaihhruaina bu-ah Bhagavad Gita chu an ngai ta a ni.

He lehkhabu hi a ni Hindu-ho ngaihsan em em Yoga chungchang lanna chu.

Read more...

Synod-in finfiah

2003-ah khan Aizawl West Presbytery chuan "Sakhaw dang ten Mizorama sulhnu nei tura hma an la mek nia lang hi Synod-in inven dan kawng dap rawh se" tiin thu an pass a, he thu hi Synod Executive Committee-in a ngaihtuah hnuah, Synod hnuaia peng pakhat, Research and Evaluation Wing kovah nghah a ni ta a ni.

Hemi chungchang chhuitu RAEW-ah hian Rev R Lalhmangaiha chu convener a ni a, Rev Dr Zaihmingthanga, Rev Chuahthuama, Rev H Vanlalruata, Upa Dr RL Thanmawia leh Upa Biakhranga te chu member an ni.

An zingah hian Rev H Vanlalruata chu mawh la bik tura ruat a ni a, ani hian Mizo zingah Hindu-a inlet an awm ngei tih a finfiah.

Hindu hovin hmarchhakah tan an la nasa hle a, Kristian state, Meghalaya-ah thlengin Ram Krishna Mission an din tawh. Hetiang a nih lai hian Mizo zingah pawh an tawktarh nep zo lo an lo awm ve a, tichuan, mi thenkhat chuan Hindu sakhua an zawm ta a ni ber mai.

Hemi chungchang chhuitu Rev H Vanlalruata chuan Mizo Kristian thenkhat chu Hindu-ah an inlet ngei nia sawiin, therhlo uma inlet ni hlawmin a sawi.

He thilah hian Mizoram sorkar hnuaia officer lian tak tak pathum (hnam dang) pawh an inrawlh nia sawi a ni a, Synod RAEW member pakhat chuan hemi chungchanga zawhna hi dika a hriat thuin a chhang. Mizoram larsap hlui AR Kohli pawh inrawlh ngeia a hriat thu a sawi nghe nghe.

"Governor hian role a nei thui. Governor leh officer te hi an inhaw lo," a ti.

"Hindu-a inlette hi Hindu-a an inleh hma pawhin Kristian tha tak niin an lang lem lo," tiin a sawi a, "Kristiannaa loyal lo, tlangval ho leh engemaw ve mai mai niin an lang," a ti bawk.

Rev H Vanlalruata chuan Hindu-a inlette hi retheihnain a nawr ni bera a hriat thu a sawi a, chutih rualin, Hindu-a an inleh hian hlawh chu an nei ngei a, mahse, an hlim chuang lo niin a sawi thung. Hrehawm an ti hle zawk niin a sawi a ni.

Read more...

Mizoramah Kristianna a nghing em?

¢ Vanlalremruata Tonson

Mihringte hian Pathian chungchangah rin dan kan nei a, chu rin dan chu sakhua tia sawi a ni. Tichuan, sakhuana chu Pathian awm rinna tiin a sawi theih ang a, sakhua neih loh chuan Pathian awm rin lohna a kawk thei bawk ang. Pathian awm rinna chu mihring nih dan phung pangngai tura ngaih a nih laiin a awm rin lohna chu ngaihdan leh rin dan pakhatah pawm a ni ve mai lo thung. Pathian awm ber rin loh chuan hemi chungchangah hian ngaihdan a awmzui vak thei lo a ni ang. Khawvelin Pathian awm ring lo a hriat thinte chu philosophy atanga chhuta an duh dana Pathian finfiah theih a nih mai loh avang leh an duh dan leh ni tura an ngaih anga an pawh theih loh vanga pawm lo an ni ber a; Mizoram chuan media leh communication means chi hrang hrang a neihte atang pawhin philosopher ropui tia sawi tur hriat a la nei lo. Chuti chung chuan sakhaw nei lo mi 661 lai Mizoramah chuan an awm niin 2001 chhiarpuiah kha chuan a lang si a nih kha.

Mizorama sakhaw nei lote hi tlema khawsakna lama hnufual deuh leh sakhua hrim hrim la hmelhriat mumal lote an ni lo tih chu an tamna district han en hian a chiangah a ngaih mai theih. Champhai leh Aizawl District-ahte an tam ber a ni.

Champhai District-ah hian sakhaw nei lo mi 209 an awm a, Aizawl District-ah 208 an awm.

A lan danah chuanPathian chungchanga ngaihdan nei lo hnam emaw pawlho emaw ni lovin Pathian chungchanga ngaihdan thui tak nei a, chumi hnua Pathian awm rin loh leh sakhua pawh neih loh chu thlang ta zawk an nih hmel hlawm.

Kolasib district-ah pawh mi 114 an awm a, pakhat mah an awm lohna district a awm lo. Mamit District-ah paruk an awm a, Serchhip District-ah 39, Lunglei District-ah 14, Lawngtlai District-ah 32, Saiha District-ah 39 an awm.

Mihring finna hmangin Pathian a awm tih midangte hnena entir (demonstrate) theih a ni lo mai thei a, a awm lo tih pawh demonstrate theih a ni chuang lo. Rinna thil ve ve a ni. Mahse, khawvelin sakhua a hriat dan chu Pathian awm ringtute'n an rin dan chi hrang hrang hi a ni a, setana betute hi an awm tak tak a nih chuan Pathian awm rinna a nih loh avangin sakhua an nei lo tihna a kawk thei ang. Chumi avangin tuna sakhaw nei lote hi setana betute an ni tihna chu a ni lo. Mahse, Mizoramah mipuite sakhua vawn ber Kristiannaah ngheh lohna a awm tiin a sawi theih ang. Sakhaw nei lo han tih hian chhiarpuia inchhiarna form awmah an sakhua tihlan a ni lo (religion not stated) tihna a ni a, hetianga mahni sakhaw hming han sawi tur hre lote hian Pathian chu ringah an lo inngai ve viau mai thei bawk. Chu pawh ni se an pianpui emaw naupan tet atanga an hmelhriat Kristian sakhuaa nghet lo mi tam tak an awm tihna a ni. Ei leh bar zawnna kawngah Pathian reng reng ngaihsak ngai lo tur khawpin Mizoramah hian mipui dinhmun a ngelnghet lo tih chu tlanghriat a ni.

Eng vang pawhin mi hian a sakhua chu chiang fek fawka a sawi theih loh chuan Mizorama Kristian hruaitute tan chuan ngaihtuahna sen a ngai hle tawh tihna a ni. Tuna sakhaw nei lo tia census report-in a tarlante hi sakhaw hrang hrang ngaihdan zau taka pawm leh an sakhua tia sawi bik tur hre lo an nih chuan Kristianna chu sakhaw dang vangin a nghing dawn hnai tawhah a ngaih theih ang. Sakhaw nei lova inchhalte hi Pathian thu reng reng ngaihsak lote an nih chuan he ram zimte hi Kristianna chuan a tuam hneh lo tihna a ni ang a; Pathian thu ngaihsak takin uluk taka a ngaihtuah hnuah Pathian awm a ring lo a nih chuan Kristian hruaitute tan intuaithar a ngai hle tihna a ni, khawvel thiamna lo chhuak thar chu an Pathian thu hriat hian Mizoram chhungah ngei pawh a ngam ta lo tihna a kawk dawn tlat.

Setana betu ni-a insawite hian thiltihtheihna an duh ni berin a lang a, chu thil tih theihna chu Pathian hnen atanga an neih mai theih lohte a lo ni a, chuvangin, Mizo Kristian-te zingah Pathil thiltihtheihna mak tak hi zawrh bera neih reng tur chi nge ni a, thlarau khawvel atana inkaihhruaina emaw nunkawng hrim hrim inkaihhruaina atan emaw hian sakhua chu hman zawk tur nge ni ang tihte thlengin ngaihtuah theih a ni. Mizoramah hian sakhaw nei mumal lo an tam a nih chuan mipui nawlpuiin an vawn tam ber Kristian sakhua chu a inenlet ngei ngei tur a ni a, mipui 'moral' a kaihhruai dante hi a dik tawk em? A lo dik tawk lo a nih chuan hmun tam takah mipui nawlpuiin an vawn sakhuate hi an lo tluchhe tawh a, chutiang chu a hlat tawh lo tan tihna a ni thei ang. Mipui tam ber sakhaw vawn a nghing a nih chuan ram leh hnam chu a nghing lo thei lo ang.

Mizoram chu Kristian state tia sawi, mi tam takin Pathian pawhin midangte aia duhsak bik tura an ngaih, kawng hrang hrangah midangte tana entawn tlak ni tura an ngaih a ni a, mahse, sakhaw dangte chu an nghet viau nia a lan laiin Kristian sakhua ber chu kum 50-60 vel a ram pumah chuan a awm hman tawk tihah a nghing tan emaw a nghing ngei dawn emaw ni chuan a lang tlat a ni. Pathian hian amah ringtute leh ring lotute ang khatin a en lo a, tan lam nei ranin ro te hi a lo relin, duhsak bik leh duhsak loh bikte a lo nei thin emaw ni tehreng ni!

Kristianna hi Mizoramah a nghing tan em ni tia sawi theihna tur dang chu sakhaw chi hrang hrang tam lutuk hi a ni bawk. 'Statistical Handbook, Mizoram 2008' chuan 2001 chhiarpuia Mizoram mipuite sakhua a tarlan chhawnnaah sakaw chi hrang hrang eng emaw zat vuantute chu "Others" tiin a hlawmkhawm a, hetah hian mi 2443 lai an awm a ni.

He'ng - Mizo zinga Israel nia inhriate angte hian Kristian rin dan an thlauhthla hmak a, Juda rin dan an vuan a, an serh leh sangte an ti ve vek a ni, hei pawh Mizo Kristian-te zinga Israel atchilhna nghawng a ni mai thei. "Others"-ah chuan hengho hi a tam ber an ni lo thei lo ang. Aizawl District-ah hian 'Others' tia dah hi mi 1170 zet an awm a ni. Serchhip District-in an dawt a, mi 524 an awm a, Kolasib District-ah 306 awmin, Champhai District-ah 249 an awm. Lawngtlai leh Saiha district-ah an awm lo a, Mamit District-ah 96 awmin, Lunglei District-ah 98 an awm.

Sakhuana chungchangah hian mi awmherh deuh leh ngaihdan hrang nei chu awm ngai a ni a, Mizoramah pawh hian chutiang tawk chu awm ve awm tak a nih laiin heti taka mipui nawlpui sakhaw vawn vuan ve lo leh sakhaw lian dang hnaivaia awmte pawh vuan chuang lo an tam hi thil chhinchhiah tlak tak chu a ni ngei mai.

Sakhaw vawn mumal nei lote emaw sakhua hriat hlawh vak lo vuante emaw hian Mizo-Kristian identity an tibuai hran lo a, a tibuai mai kher lo ang. Mahse, Kristian sakhua chuan Mizo society-in a mamawh kaihhruaina hi a pe nge pe lo tih erawh chu thil inzawh theih tak a ni a; Kristian sakhua hian Mizo society mamawh kaihhruaina a pe lo a nih chuan Mizo-Kristian identity hloh ai mahin Mizote nun chhungrila kaihruaitu leh fuihtu nei mumal lo nih chu hnam tan hian a hlauhawm zawk fe mai thei a ni. Chu chuan hnam boralna/inchimralna bak thil dang tehchiam a thlen lo ang.

2001 chhiarpuiah khan Mizoram pumah mihring 888573 an awm a, chung zinga a tam ber 772809 chu Kristian an ni. Buddhist-in an dawt a, 70494 an ni. Hindu mi 31562 an awm a, Mosolman mi 10099 an awm. Sikh mi 326 an awm a, Jain mi 179 an awm bawk.

Buddhist hi Chakma zingah an tam a, Kristian dawttu ni awm reng pawh an ni. Hindu pawh Gurkhali vangin an tam thei ang a, Mosolman hi district council leh UT hun lai atanga sorkar hnathawk leh thil dang ti tura Mizorama rawn pem lut an ni ber ang tih a rin theih. Sikh leh Jain chu sumdawng an ni ber ang a, rawn lut thar aiin 1994-a mipui thinrimin Aizawla vai dawr an suasam hnua Mizoram chhuahsan ve ta lo leh la chambang an ni ngei mai thei. Sikh leh Jain chu an pung vak kher rih lo ang. Mizoram chu state pawn lama hnamdang tan a la inhawng tak tak lo tlat. A inhawn hunah erawh chuan kar lovah Millennium Cenrtre tiat dawn dawn dawr lian leh changkang an rawng hawng nghal zung zung thei thung ang.

Hindu pawh Mizoramin inhawnna eng emaw a neih hma chuan an pung thur thur thei lo, Mizoram leh an tamna inkarah Mosolman an la awm. Mosolman pawh sorkar hriatpuia inbengbel chu an tam lo, sakhaw lianah chuan Mizoram deptu rama cheng zingah a tam ber an nih avangin Kristian lovah chuan tam ve viau awm tak an nih laiin Hindu an zat lo tlat.

Read more...

Mimi USA kal turin inpuahchah

¢ Bcha

Mimi Lalzamliani chu USA kal tumin a inpuahchah mek a, visa a buaipui mek.

Mimi chuan, “Tunlai chu visa lak an ti khirh zual a ni awm a, a buaithlak khawp mai, kei pawh ka tum angin ka awm thei lo a, visa an tihfel theih veleh ka kal nghal maiin ka ring,” a ti.

USA-ah hian Chin-ho concert siama zai tur a ni a, Chin programme hmang hian Malaysia leh Australia te pawh a lo kal tawh nghe nghe.

Mimi music video ‘Khuanu Leng Ruat Loh Di’ chu a hit hle a, tunah hian video pakhat a siam zo leh tawh a, “Tlemin hun han rial leh deuh phawt ila, chumi hnuah video thar chu ka dah leh ang. Video siamte hi a hautak ve bawk si a, vawi khata dah nghal teuh pawh a uiawm ve duh ang reng a,” a ti.

Tunlaiin programme neiin a zin kual nasa hle a, a taksa pawhin a tuar ve deuh niin a sawi. “Ka hah ve khawp mai, ka zin nasat vangte pawh a ni ve ang, ka taksa pawh a tla rawih a, ka cher sawt khawp mai,” a ti a, a hmai te pawh a bawl deuh tawk tawk niin a sawi.

Read more...

The Hunt star Tini Mohini a lar tual tual

¢ Bcha

The Hunt star Tini Mohini Thapa chu Indian Idol atan a inbuatsaih mek a, chutih rualin inah pawh awm tha hman mang lovin programme a nei deuh reng.

Tini hian entertainer tha tak a nih zia a pholang telh telh a, a zaina hmun apiangah mipui a chawkhlim thiamin amah lawmtu a pung telh telh niin a hriat.

Tini chuan Indian Idol atan a inbuatsaih ngawrh thu sawiin, “Pathian zarah kan tling ve te a nih chuan stage sang te kan thleng a nih a nih chuan hla tam tak thiam a ngai dawn a, hla chi hrang hrang ka zir thin. Indial Idol audition hi October vel hian an nei dawn niin kan hria a, Guawahati-ah hian a tih theih dawn nge chu kan la hre lo a, mahse a rinawm chiah lo deuh niin an sawi a,” a ti.

Indian Idol a tel a chak tawh thu sawiin a mah pawh a inpeih thawkkhat tawh a, Mizoram tan theih tawp chhuah a tum thu a sawi bawk.

Read more...

Maruata album ‘Ve Dawn Lawm ni’ tlangzarh

¢ Bcha

Maruata album ‘Ve Dawn Lawm Ni’ tih chu Thawhtanni zan khan MZI President P.Lianhrima’n a tlangzarh ta.

Album tlangzarhna hi Tourist Lodge, Chaltlangah neih niin Stephen Auhum chu master of ceremony niin programme hlimawm taka hman a ni a, tunlai zaithiam hriathlawh tak tak Mathlenga, Tini Mohini Thapa leh Mimi Lalzamliani te pawh an zai.

He albumah hian hla 12 awmin, hla hlui, 70’s leh 80’s vela hit tak tak te bakah hla thar 4 vel dahkhawm a ni a, album hi Lianhmingi Pachuau produce a ni.

Album preview-tu C.Dinthanga chuan, “Maruata hian hla hluite hi a nihna leh ziarang ti bo si loin, ama style-in a rawn sa thar leh a, hetianga a rawn chhawp chhuak thei hi a hlu a, he album-ah rimawi lama hmasawnna a awm,” tiin kumin a album chhuak tawhah chuan a tha ber pawl a tling hiala a rinthu a sawi.

Album-ah hian hla hlui ‘A Tha Par’, ‘Ve Dawn Lawm Ni’, ‘Ka Vai Ruai E’, ‘Leng Lengin’, ‘Phu Loh Thahmingliani’, ‘Lenrual Hlui’, ‘Tur Ni Pui’ tihte bakah Thartea leh Thangliana Colney te hla bakah amah Maruata hla phuah pahnih a tel bawk.

C.Dina chuan tunlai Mizo mipa zaithiamte hi an aw a lai deuh zela a hriat thu sawiin, “Maruata erawh hi chu a aw a lai miah lo, Sailova kan hmuhchhuah tirh ang mai kha a ni,” a ti.

Album-a music te chu a inrem fuh thu sawiin, “Guitar perh a nalh hlawm khawp mai, music arrangement pawh a fuh e,” a ti bawk.

Read more...

"AIDS hi ka vei ang tih ka ngaihtuah ngai lo..."

Sam dum hlap mai, cher ang reng tak, hang lam, tha titu tana 'hang ngaihnobei' tih theih tur chu a ni a, a hmel han hmuh chuan ama tawkah a inringtawk hle tih a hriat theih. Nu hlim thei tak a nih hmel a, AIDS vei hmel a pu lo.

2002-ah khan a pasal AIDS vangin a thihsan a, chumi hnu rei lo teah chuan ani pawhin a kai ve tih hriatchhuah a ni. Chutiang thil chu a chungah a thleng ang tih a ring ngai lo a, a suangtuahnaah pawh chutiang a awm ngai lo.

"AIDS hi ka vei ang tih ka ngaihtuah ngai lo, ka ngaihtuah ngai lo hrim hrim," a ti a, "Hetiang thil hi ka chungah a thleng ang tih ka ring ngai lo," a ti bawk.

A pasalin a thihsan lai hian fa pahnih, la naupang te te a pawm a, chutia AIDS a vei tih a hriat hnuah pawh chuan rilru naa indawmkun mai lovin a fate nunkhua tur ngaihtuaha beih a tum ta a ni. Pasal a neih hmaa piangthar tawh a ni a, hetiang thil duhawm lo a tawn lai pawh hian Pathian a au thin. Pathian chuan a tawngtaina a chhang a, a nihna chu a pawm mai ni lovin missionary hna a thawhna tur hmunah a ngai ta hial.

Chu 'missionary' hna chu a thawk ta , tunah chuan drop-in centre pakhatah AIDS veite enkawlin a ni tin hun a hmang thin.

"HIV/AIDS chungchang hi chu ka lo hre ve zeuh zeuh thin a, amaherawhchu, ka chan turah ka dah chhin ngai miah lo a, nghawng a neih dan tur pawh ka ngaihtuah thiam lo," tih chu a sawi dan a ni.

AIDS a vei tih an hriat tirh, mangang taka a awm laiin a pain a lungngaihna tawmpuiin duat takin a enkawl thin.

"Ka pa chuan min hrethiam hle a, he natna avang lo pawh hian engtik hunah emaw chuan kan nunna laksakin kan la awm tho tho dawn tih min hrilh thin a. Hei hian ka rilru pawh a hneh hle a, ka tih tur chu ka fate lehkha thiamtir a, nakin huna dinhmun tha luah thei tura buatsaih chu niin ka hre ta ber a. Ka inti paukhauh a, ni tin mai chuan ka natna vei chu theihnghilh turin ka inpuahchak sauh sauh thin a ni," a ti.

NGO pakhat - FXB te'n AIDS veite'n eizawnna an neih theih nan ar vulh turin an pui thin a, ani pawh hian FXB hnuaiah chuan arvulh a zir thin. A zirchhuahah a bultanna tur sum leh ar note bakah a chaw tur thlengin an pen a, chu'ng hmang chuan eizawnna bul a tan ve ta a ni.

Vawiin thlengin chu hna chu thawkin a fate pawh a la chawm a, bank-ah pawh tlem a zawng chu a khawl ve tawh nghe nghe.

Kum 39 mi a ni a, a pasalin a thihsan lai, AIDS a vei tih a inhriat kumah chuan kum 32 mi a ni. Aizawl Veng pakhatah a fate pahnih nen an cheng a, drop-in centre pakhatah peer educator niin, AIDS veite buaipui hna a thawk thin. Chu nu chuan tiang hian Zozam Weekly a hrilh...

Eng tikah nge AIDS i vei tih i hriat?
2002-ah khan.

I hriat tirhah i rilru a na em?
A na han ti ila, a hma thla khat vel chhung kha ka rilru a lo na tawh a, chuvangin ka hriat tak kha chuan chuti lutukin a na ta lo.

'Thla khat vel chhung' chu eng tihna nge?
Kan pa a positive a ni tih kha kan hria a, chuvang chuan inrinhlelhna ka lo nei lawk tawh a, ka rilru pawh a na a, Pathianah ka innghat ta tawp mai a ni.

Chuan...
Ka pain AIDS a vei tih ka hriat tirhah khan ka rilru a na em em a, tin, ka vei ve ang tih kha ka hlau a, ka inringhlel em em a. Sawi tawh ang khan, Pathianah ka innghat ta tawp mai a, Lalpan chakna min pe a ni. Khatia ka positive tih ka hriat tirhah pawh khan Pathian zarah ka inpawm thiam. Ka nihna kha ka pawm a, Lalpan missionary ka nihna tur kawngah min dah a nih hi ka ti a, fanau enkawl pahnin missionary ka ni thei dawn a ni tih rilru ka pu a.

Missionary chu eng tin nge i nih tak a?
Tihian ka positive-puite hi thiam ang angin ka enkawl a, ka pui ve a.

Khawi atangin nge AIDS hi i kai?
Kan pa atangin.

Ruihtheihthil leh sex lamah te i fihlim em ni?
Fihlim e. Ruihtheihthil ka ti ngai lo a, sex lamah pawh ka fihlim. Kan pa bak sex ka hmanpui lo.

In pa chuan khawi atangin nge a kai i hria em?
Hre lo, ruihtheihthil a ti ngai lo a, a lerh bawk si lo a. Khawi atangin nge a kai ka hre lo.

A nih leh rin dan tal i nei em?
Rin dan pawh neih thiam a har; ka sawi tawh ang khan kan pa khan khawi atangin nge a kai ka hre lo tak tak a, puh tur pawh ka hre lo. Rinhlelh tur ka hre lo. A lerh lo a, ruihtheihthil a ti lo a, mahse, a tlawmngai tih ka hria. |anpui ngai an awm chuan hna laklawh a nei ngai lo.

Eng tin nge in pa chu a positive tih in hriat?
Damdawi inah a awm a, a dam thei reng reng lo mai a. Chi hrang hrangin an en a, chi hrang hrangin an test a, a tha zel sia. A tawpah HIV kha an test ta a, a lo vei tih an hmuchhuak ta a ni.

Chu chu eng tik kum nge?
2002 kha a nia...

Nang pawh kha 2002-ah i positive tih i hria a...
Nia, a thih hnuah ka hria a.

Eng tin nge i hriat?
Ka u-in min hrilh.

I hriat tirhah chuan i tap ang tiraw?
Ka tap lo. Mahse, ka hmaiah hian eng hmuh tur a awm lo. Ka tap lo han ti ila, zanah, ka fate an muthilh hlan te hian ka tap thin.

Tunah i la tap thin em?
Ka nihna hi ka pawm thlap. He natna hrik hi a reh dawn lo a, mahse, Pathianin keimah hi min tidam a, chuvang chuan ka lungawi.

A nih leh miin an thinhrik che em?
Tunah tak chuan thinhrik tawh lo e.

Tunhmain an thinhrik thin che tihna?
Tunhma te chuan thinhrik thin e. 2002, ka inhriat tirhah te khan kan in luahna atangin vawi 2 min hnawtchhuak.

AIDS vei i nih vangin an hnawtchhuak che em ni?
Ni e, Eichawp dawr ka siam a, ka inhralh thei khawp mai a. |henawm khawveng leh kan in luahna te nen pawh inpawh deuhin kan awm a, mahse, positive ka ni tih kan hriat hnuah khan min hnawtchhuak ta a.

Positive i nih vang tih chu a chiang maw?
Ka bulah chuan an sawi lo a, thenawmte bulah an sawi alawm. "Hei AIDS vei te a ni si a, dam loh nikhuaah pawh in neitu te na na na chuan kan buaipui te a tul awm sia a' tiin an sawi a.

Chu thu i hriat chuan i rilru a na em?
Aw. Ka rilru a na. A na khawp mai.

Ka rilru chu na mah se ka tuar thiam khawp mai. Dawr ka siam a, Pathian malsawmna ka dawng a, ka inhralh thei khawp mai a. Mahse, mal min sawmtu Pathian aiin a malsawmna kha ka lo Pathian telh telh a, chu chu Pathianin a duh lo a, Amah hlata ka awm a phal loh vangin khatiang khan hnawhchhuah te pawh ka tawk ta niin ka hria.

Amaherawhchu, ka fate'n an tuar ve hi chu hrehawm ka ti thin. Kei chu ka nihna a ni a, miin min lo thinhrik a nih pawhin ka nihna a ni a, sawi theih ka nei lo. Ka fate'n an tuar ve erawh hi chu ka rilru a na khawp mai.

A nih leh tunah chuan thinhrik i hlawh ta lo niin i sawi a, eng vang nge? Mipuiin AIDS hriatna lamah hma kan lo sawn tak vang a ni thei ang em?
A ni thei ang a, tin, ruihtheihthil ka ti lo a, sex lamah ka tlan hek lo a, chuvang chuan AIDS ka tidarh dawn lo tih a chiang a, chuvang chuan mi hian min thinhrik lo te pawh a ni ang. Kohhran ka bel a, ka phak ang tawkin ka inhmang a, Kohhran leh khawtlangah hian harsatna ka tawk lo. Sex leh drugs lamah ka fihlim a, hei hi a chhan ber chu a nih ka ring.

A nih leh AIDS veite hian a nasa thei ang bera midang kaidarh an tum thin niin an sawi a, hei hi a dik em?
Dik e, an inhriat tirhah chuan a nasa thei ang bera midang kaidarh hi an tum thin alawm. "A tam thei ang ber ka kaidarh ve dawn," an ti mai.

Chu chu engtin nge i hriat?
Ka hre tam mai. Tihian ka positive-puite ka enkawl ve thin a, drop-in centre-ah te ka thawk a, positive-ho hi ka kawm nasa a, midang kaidarh tum hi chu ka hre hnem alawm.

HIV kaitu an hriat phei chuan an lakah an thinrim thei lutuk. Entirnan - nangmah atangin lo kai ta se, thah an duh hial ang che. Chutiang rilru chu a put theih avangin midang kaidarh ve duhna hi chu neih a awl niin ka hria.

A nih leh AIDS veite hian hrehawm an ti em?
Hrehawm ti e, an rilru a na hlawm khawp mai. An beidawng a ni tawp mai. Dam an beisei lo a ni ber.

A nih leh i rin danin AIDS hi kan rin aiin a darh ang em?
Eeee, kan rin aiin a darh ang. Hetia kan rin ai hian AIDS hi a darh nasa ngei ngei ang.

Chu chu eng vang nge ni ang?
A bul berah chuan sex-ah kan fihlim lo. Sex-a kan fihlim loh bakah condom kan hmang tha peih lo. Syringe thianghlim lo inhman tawm tih vel hi chu a awm tak tak tawh lo, sex lamah hian kan fihlim lo em a ni. Sex vanga HIV kai an tam a, tin, drugs ti pawh an tam tho.

AIDS vei zingah mihausa nge tam ang mirethei?
Mihausa pawh an tam a, mirethei pawh an tam. Kan sawi tawh ang kha a nia, positive an ni tih an inhriat hian a tam thei ang ber sex hmanpui an tum a, mipa pawh, hmeichhia pawh, chutiang chu an ni a...

Chutiang lakah chuan engtia inven tur nge ni ang?
KS te hi chuan condom an hmang tha tlangpui a, a ziaawm lehling mai thei. KS ni lo, mi pangngai, mahse, sex lama awlsam tak tak an tam a, chutiang chu mipa pawh hmeichhia pawh an tam. Chutiangah chuan HIV kai theihna 'chance' chu a sang.

I enkawlte'n a tam thei ang ber kaidarh chu an tum ve em?
Tum thin e. Mahse, chutiang an tih loh nan chuan kan inzirtir thin a. An tum tih ka hriat pawh chuan "midang i kaichhawng a nih chuan a tuar tur chu nangmah bawk i ni, i tawrh ang hi tumah tawrhtir suh, midang i tawrhtir chuan i tan a tha lo..." ti tein kan inhrilh thin.

I fate'n an kai ve ang tih a hlauhawm duh fu lo maw?
Hlauhawm duh a, theihtawpin ka inveng thin. Mahse, pem kan nei te a nih loh chuan inkai ngawt theih a ni lo a, a inven theih khawp mai. Pan emaw pem emaw ka nei te a nih loh chuan inven vak a ngai chuang lo a.

Nia, inven chu a ngai. He natna hi tuar ve tur leh rilru hah ve turin tumah ka phal lo. Chuvang chuan midang ka kai ang tih ka hlau.

I fate chu eng rual nge an nih reng reng?
Kum 12 leh kum 9 mi.

AIDS i vei tih an hria em?
Hria e.

Engtin nge an tih?
Ka vei tih an hria a, min tawngtaipui thin.

Engtin nge i vei tih an hriat?
Ka hrilh a...

I hrilh tawp mai em ni?

Mi hi an tawng duh a, khawi khawi atang emaw hian an lo hria a. Sikul atang te leh an lenna atang te hian an lo hria a, ka hrilh ta mai.

Hrilh chu a tul hrim hrim dawn lo'm ni?
Tul e, ka hrilh ang chu ka tia, mahse, ka duh aiin ka hrilh hma. Nikhua te hrethiamin thil awmzia hre ve phawt se ka duh a, mahse, ka duh aia hmain ka hrilh lo thei ta lo a ni.

An hnem thin che a maw?
Hnem thin e. Min hnem a, chhung inkhawmah te hian min hnem nasa thin.

Anmahni'n harsatna an tawk em?
'A nu AIDS vei a nia, kawm loh tur' tih te an tawk fo a, tap chungin an lo haw fo a, an zak ve thin.

Chu chuan i rilru a tina thin em?
A tina lo a, a tihah a ni. Sawi tawh ang kha, tha takin thil awmzia ka hrilh a, anni pawhin min hrethiam a, min tawngtaipui thin hial a. Kei pawhin an hma lam hun atan a theih ang anga buatsaih lawk ka tum a, 'engtikah emaw chuan mi hmaa in sawi a tul hun te pawh a la awm ang a' tiin, chumi atan chuan ka thiam ang angin ka zirtir ve thin.

Read more...

Dan bawhchhetute huangtauna Zawl khawpui

¢ Zoa Tlau

Aizawl khawpui chu a thlir a, a hnawk tawh sa chu vaikian theih ziazang a ni lo tih a hai lo. A hrechiang bertute zingah a tel hial ang. Mahse, a hnawk belh zel tur te, a chep belh zel turte erawh ven theih a ni tih a hria, chumi hna thawh chu ni tina a beih ber a ni a, IAS pension meuh tawh mah ni se heng thilte avang hian a thluak a chawl lo.

Mizoram sorkar chuan chu IAS officer hlui ngaihtuahna hlu tak chu a chhawr a, chhawr tangkai zelin sorkar tharah pawh chief minister Lal Thanhawla chuan Aizawl Development Auhority (ADA)-in an lekkawh ADA Act 2005 bawhchhiate chungah action lak a ni dawn tiin a sawi ta hial.

ADA vice chairman Lal Fakzuala IAS (Retired) chuan khawpui chep zel tur veng turin hma an lak zel thu a sawi a, kum khat chhungin in sak phalna an pek zat chu 987 a nih thu a sawi.

"Hetiang zat hian an duh dan danin in hi sa ni sela chuan khawpui pawh hi a chep lehzual ang. Mahse dan an zawm tha em em a ni," tiin Mizote chu tun hmain mahni duh dan dana in sa thin ni mah se dan a awm hnuah dan zawm tha an tam em em tih a pha lo, mahse an harsatna tawh erawh dan bawhchhetu huangtau leh zah nei lote vang a nih fo thu a sawi thung.

"Tunah hian dan kalha in sak vanga thubuai siam sak kan neih tawh zat hi pasarih a ni," a ti.

Dan kalha in sate chu an in an thiahsak thei a, chutiang dan chu lekkawhin in pakhat chu an thiat tawh nghe nghe. A dang 32 lai chu thiat turin 'show-cause notice' an pe tawh a, 'process' a kal mek tih a sawi a ni.

Hetianga dan kalha in sa zingah hian ADA lamin an va thlithlai thenkhat chuan thuneitute zawk chu an lo vauin thawm an lo neih khum zawmah thin!

Hetiang case hi an tawn tak zeuh zeuhah chuan anni chuan dan hmangin police lamah First Information Report (FIR) an thehlut a, court-ah an khing ta thin a ni.

"A mak khawp mai, a dan bawhchhetute zawkin kan naute an lo la vau zawk a, hetiang hi chu court case-ah kan kalpui a, keini lamin innghahna kan nei tha thei bawk a, thiam kan chang zawk zel tura ngaih a ni. Thiam loh an chan hian thla thum lung in tantir leh pawisa chawitirin an hrem theih a ni," tiin Vice Chairman chuan a sawi.

Dan kalha in sa, Authority lam la vau zuitute chung chu a pik hle dawn niin thuneitute chuan an sawi reng a ni.

Hma an lakna kal zelah kum 2008 May ni 2 atanga Building Regulations hman tan a nih atanga kum 2009 August ni 21 thleng khan in sak diltu hi mi 1203 an tling tawh a, chung zinga 987 chu phalna pek an ni.

In sak phalna pek theih loh 10 an awm a, in sak dilna hnuhdawh zat chu 36 a ni bawk.

Tunah hian authority hian in sak diltu mi 169-te dilna chu an endik mek a, in sa lai chawl rih tura an tih zat chu 493 a ni tawh. Chawl tura tihna sut tawh zat pawh 189 a tling tawh bawk. Stay order la sut loh zat hi 304 a ni a, dan kalha in sa an thiah sak tawh zat chu pakhat a ni.

Dan kalha in sa, an in sak lai thiat tura an tihte an awm nual tawh a, mahse, mahni in sak thiat leh ta hi an la awm lo thung.

Heng dan kalha in sate hian an in sak hi an thiat lo reng a nih chuan ADA lam hian engkim an tihfel hnuah hlawhfa ruaiin an thiat mai dawn tih an sawi a, chung hlawhfa man chu a in neitute tum tur a ni tih an sawi bawk.

"Dan kalha in sate chu 'stay order' kan pe a, anmahni kan insawifiahtir a, chumi hnuah kan ngaihtuah leh phawt a, mumal taka kan kalpui hnuah thiat tura kan tiha an thiah duh loh chuan kan thiahsak mai dawn a ni," tiin an sawi.

Tun hnai khan ADA dan kalpuite chu thawm that ngai reng a nih avangin mipuite hnenah rawtna thehluh theih hun chhung hawn a ni a, mi thahnem tawk takin rawtna an thlen niin ADA lam chuan an sawi a, chumi mil chuan tunah hian Building Regulations her danglamna tur 'proposal' pawh an siam mek tih an sawi bawk.

"Thenkhat chu an inhmun a zim lutuk a, feet li han tawlhtir theuha awmzia awm miah lo te a awm, tin, a then chu feet li tling lo deuh pawisa chawitira ngaihdam theihte pawh an awm bawk, a then chu a hmun a nghet thaa chhawng li aia sanga in sak theihte pawh a awm, chutiang mil tur chuan herrem a ni dawn a ni," tiin Lal Fakzuala chuan a sawi.

Read more...

Zofate inpui tur Zo Inpui

Hmun hrang hranga cheng Zofate inpui tur din tuma hmalakna a kal mek a, a hming atan Zo Inpui tih chu pawmfel a ni tawh.

Zo Inpui chu India, Burma leh Bangladesh-a thendarha awm Zo hnam hrang hrangte inthlunkhawmna a ni ang a, Zo hnam aiawha roreltu tur, thendarha awm Zofate hruaikhawm an nih leh theihna tur leh Zofate'n thuneihna sang ber an chan theih nana thawktu tur a ni.

ZORO (Zo Re-Unification Organisation) huaihawtin August ni 12-ah khan I&PR Auditorium-ah Zo Inpui chungchang hi heti lam tuipuite'n an sawiho a, Zo Inpui din tha an ti tlang a, a hming atan Zo Inpui an pawm bawk.

R Zamawia kaihhruai sawihona hunah hian ZORO general secretary K Hawlla Sailo chuan Zo Inpui chungchang a sawihawng a, mi hrang hrangin an ngaihdan an sawiho ta a ni. Thusawitute chuan Zo Inpui din hi tha an ti vek.

USA-a lehkha zir chhuak, H Thanglawra chuan sap thufing pakhat - 'Lean liberty is better than fat slavery' (Sal ni chunga thau kung ai chuan zalen taka cher a tha zawk) tih sawiin, putar a nih tawh avangin engmah ti thei lo mah se Zofate zalenna chuan a lung a la tihlen reng thu a sawi a, Lok Sabha MP hlui Dr H Lallungmuana chuan hemi chungchang hi sawi zawmin, "Zalenna nei lo, tu te thuhnuaiah emaw, tu te thi awrhtirin emaw kan awm chuan kan awhawm theiin ka ring lo," a ti.

"Bawih ni chunga thau ai chuan zalen taka cher a tha zawk," tia sawiin MP hlui chuan, "Mahni ram chhungah pawh thunei thei lo, passport leh VISA tel lova inhmu thei lova thendarh kan ni," a ti a, UNO-in 'indigenous peoples' (a ram neitu dik) te tana hma a lak mek avangin rei lo teah Zofate ram thar a pian a beisei thu a sawi a, chumi atan chuan Zo Inpui din ngei tha a tih thu a sawi bawk.

September ni 13, 2007-ah khan UN General Assembly chuan a ram neitu dik, thendarh leh awpbeha awmte chhan nan thupuan an siam a, chu chu 'UN Declaration on the Rights of Indigenous Peoples' tih a ni. ZORO chuan hemi chungchangah hian tum engemaw zat UNO-ah palai intirin Zofate dinhmun an thlen tawh a, UN Declaration chu Zofate'n an chhawr ve ngei theih nan tha an thawh a ni.

"He Declaration hian UNO hian tualchhuak hnamte hi kan hnam rohlu, ram leh leilung hausakna te hi keimahni kutah a neitu nihna min pe a, humhalh leh chhawr tangkai pawh keimahni kut a ni," tiin ZORO general secretary Lalmuanpuia Punte chuan kalkhawmte hmaah a sawi.

ZORO president R Thangmawia chuan UNO dawra hma an laknaah India, Burma leh Bangladesh tea cheng Zofate thuchhuak sawilan a tul thin thu a sawi a, chutianga Zofa zawng zawngte insuihkhawmna pawl/rorelna hmun a awm loh avang chuan a buaithlak thin tih a sawi a, chuvang chuan Zo Inpui din hi an rel ta tih a sawi bawk.

Zo Inpui din tura hma la turin kalkhawmte chuan ZORO an ruat a, a kalphung tur pawh a theih ang anga inrawnkhawma duan ni an rel bawk. Kalkhawm zingah thalai leh upa lam an inpawlh tha hle a, mi langsar tak tak an awm nawk bawk.

Zo Inpui chu hmun hrang hranga cheng Zofate tana roreltu tura ruahman a ni a, India, Burma leh Bangladesh-a cheng te leh India ram state hrang hranga chengte'n an aiawh an tir thin ang. Tuna a lan dan chuan, Zo Inpui-ah hian rorelna chhawng hnih a awm ang a, India parliament-ah Rajya Sabha leh Lok Sabha a awm ang hian lower house leh upper house a awm dawn a ni. Chu'ng rorelna chhawng hnihah chuan Zofa, hmun hrang hranga chengte leh chi peng hrang hrangte'n aiawh an tir dawn a ni. Amaherawhchu, hei hi ruahmanna mai a ni a, a chi dangin an kalpui mai thei bawk.

He'ng vel ngaihtuah tur hian ZORO chuan October ni 28-ah zau zawka sawihona hun huaihawt an tum a, India, Burma leh Bangladesh-a cheng Zofate chu a zau thei ang bera sawm an tum a ni. Mizoram chhunga tlawmngai pawl hrang hrangte leh political party hrang hrangte sawm an tum bawk a, heti lam tuipuitute pawh a mimala sawm an tum. Chutah chuan a kalphung tur leh a enkawl dan tur te an sawiho dawn a ni.

Dinfel a nih hunah chuan Zo hnahthlak hnam hrang hrangte aiawhin Zo Inpui chuan UNO a dawr ang a, Zofate dinhmun leh harsatna te thlenin, hmalakpui turin a bel ang. Zofate'n 'UN Declaration on the Rights of Indigenous Peoples' kan chhawr theih nan hma a la ang. Zo Inpui din tul tihna hi 'UN Declaration on the Rights of Indigenous Peoples' hrinchhuah a ni.

"Khawvela ram leh hnamte, UNO Thupuan dungzuia an insingsak tan mek dan en hian, keimahni leh kan ram leh leilung hausakna humhalh tura Zofate insuihkhawm leh hi thil hmanhmawh thlak tak ni tawhin kan hria a ni," tiin ZORO chuan August ni 18-ah khan thuchhuah an siam a, "UNO hian tualto hnamte tan dikna chanvo thar siamsakin, Thupuan hial a siam a, inawpbehna (colonialism) te chenin kum 2001 atanga 2010 chhung hian nuai reh vek tumna a nei hi lawmawm kan ti a (Basic Facts About the United Nations phek 320 – 2004 puiblication). Chuvangin kan dikna chanvote chu Zofate’n kan chan vek theih nan a rang thei ang bera insuihkhawm hi tih makmawhah kan ngai a ni," tiin Zo Inpui chu Zofate insuihkhawm theih nana hmalakna a nih thu an tarlang.

"Zofate kan insuihkhawm leh theih nan, ngaihdan hluite hnawla phum bovin, inhnuhhniam a tulna zawna inhnuhhniam hret hreh lo turin Zofate zawng zawng kan ngen a ni," an ti a, "Kan inlungrual theih phawt chuan, UNO-in mithiam a tirh thin (Rapporteur) pawh kum 2010 chhung ngeia kohchhuah theih kan inbeisei tlat a ni," an ti nghe nghe.

August ni 12-a Zo Inpui sawihoa kalkhawmte chuan tiang hian resolution an pass:

"Vawiin August ni 12, 2009 (Nilaini)-a ZORO huaihawta International Day of World Indigenous Peoples hmanga lo kalkhawmte hian kan hnam hmakhua zel tur ngaihtuahin UN Permanent Forum on Indigenous Issues duh dan angin UN Declaration on the Rights of Indigenous Peoples (UNDRIP) zaizuiin cultural based-a traditional institution neih ve tulin kan hria.

"He traditional institution hi a hmingah ZO INPUI vuah ni se kan ti a, he ZO INPUI hi mumal taka siam a nih theih nan Zofa hmun hrang hranga chengte inkohkhawma din fel thuai ni sela, he rawtna hi tih hlawhtlin thuai a nih theih nan ZORO General Headquarters-in mawh lo phur se kan ti," tiin.

Read more...

Indigenous People-te Tana UNO Thupuan

¢ Lalmuanpuia Punte
General Secretary, ZORO

UNO chuan khawvel hmun hrang hranga mingo sorkarin an ram awpte (colony) an chhuahsan vek tur a ni tiin kum 1960 khan Decolonization a puang a, khami avang khan ram 54-in independence an hmu a; ram 14 te chu anmahni duhthlanna (self determination) pein ram 8-in independence thlangin ram 6-in anmahni awptu sorkara beh zel an thlang a ni.

Amaherawhchu, he Decolonization hnu pawh hian khawvel hmun hrang hrangah hian tualchhuak hnam (indigenous peoples) te chu rahbeh leh nawrchepin an awm reng a ni tih hriain he’ng tualchhuak hnamte harsatna ngaithlakna tur forum, UN Working Group on Indigenous Population (UNWGIP) session chu kum 1982 a\ang khan siam \anin kum tin July thla chawlhkar tawp berah Geneva-ah kar khat awh a buatsaih ta ziah a. He UNWGIP-ah hian khawvel hmun hrang hranga tualchhuak hnam palaite chuan an harsatna an thlen \hin a, UNWGIP-in kum sawm a tlin meuh chuan khawvel hmun hrang hranga tualchhuak hnamte’n harsatna tawh nasatzia hriain ngaihven lehzual tumin kum 1993 kha International Year of World Indigenous Peoples a puang ta hial a. Kumpuanah hial a hman takah chuan UNO chuan tualchhuak hnam te dinhmun zirin a’n bichiang lehzual a, kum khat (kum puan) chhung maia chinfel chi ziazang a nih loh zia hmuchiangin kum 1994-2004 kha Indigenous Decade (kum sawm chhung a zawn a kum puan) a puang leh ta hial a.

He Decade chhung hian tualchhuak hnam UNO sutpui bel an pung tual tual a, ZORO pawhin kum 1999 a\ang khan Zofate, Britsh-in khawvel sorkar pathum hnuaia \hendarha min kalsan tak avanga harsatna kan tawh te thlenin UNO sutpui hi kan bel \an ve a. Hetah hian ZORO hruaitute chu UNO expert-te chuan uluk taka interview neia thu an zawhfiah hnuah ZORO chu UNO recognized Indigenous Organization (IPO)-ah min telh ta a, heta \ang hian ZORO chu kum tin kan tel ta ziah \hin.

UNWGIP mai bakah session dang, he’ng - Human Rights Commission session te, Sub Commission on Human Rights session leh Draft Declaration on the Rights of Indigenous Peoples (DDRIP) session-ah te ZORO chuan palai kan tir \hin bawk.

He DDRIP session hi tuna UN Declaration lo ni ta duan lawkna a nih avangin ZORO chuan duh dan tam tak thlen in sawi khawmna ah te kan sawi ve \hin a ni.

UNO chuan hmalak chak leh zual nan kum 2002 atang Economic and Social Council (ECOSOC) hnuaiah UN Permanent Forum on Indigenous Issues (UNPFII) a din leh bawk a, kum tin May thla chawhnu lamah chawlhkar hnih awh session New York-ah a ko ziah bawk a, he UNPFII session-ah hian a din tirh kum 2002 khan ZORO hruaitu Pu Rozathanga chu telin, kum 2004 a\angin kum tin ZORO president R Thangmawia hi a la tel ziah \hin a ni.

He’ng session hrang hranga kalte zinga mi \henkhat hi UNO-in an senso a tumsak a, mi \henkhat hi senso mahnia intum chawp an ni. ZORO president Pu R Thangmawia phei hi chu kum 1999 a\anga kumin thlengin kum tina a kal man hi amah a la intum chawp vek bakah midang kalna senso te pawh a tumsak fo bawk.

Keini ZORO bakah hian kan unau Zo hnahthlak dang Kuki leh Chin te pawh UNO buatsaih Indigenous session-ah hian an tel ve \hin a, tun dinhmunah Chin-Mizo-Kuki te hian a hrang vek, inhrepawh tawn chung siin UNO hi kan la bel rih hlawm a, hnam hming hlawm (nomenclature) pakhat hminga lungrual taka UNO belh tlan theih hun a nghahhlelhawm khawp mai.

Tichuan kum puan lamah khan han lut leh lawk ila, tualchhuak hnamte hian UNO ngaihsak kan hlawh hma khan nawrchep leh rahbeh kan lo tawh nasat hman em avangin kum 2004 a lo zawh meuh pawhin hmalak tur tam tak an la zawh hman loh avangin kum 2005 atangin 2nd Indigenous Decade an la puan belh ta sauh sauh a ni.

Tualchhuak hnamte dikna leh chanvo chungchanga thupuan tur kum tina DDRIP session hranpa ngat kova a duan \hin (ZORO pawh kan tel ve \hin) chu peih felin kum 2007 September ni 13 khan UN General Assembly chuan a lo pass thei ta a, he thupuan hi UN Declaration on the Rights of Indigenous Peoples (UNDRIP) an ti.

He thupuan thlawp zawng hian UNO member ram 144-in vote an pe a, India, Burma leh China te pawhin a thlawp zawngin vote an pe a, ram 13-in vote pek na lam tur hre lovin an hai a, mingo hnam, mi rama va pem a, a ram neitu hnamte va awpbeta mingo sorkar va dintu ram pali - USA, Canada, Australia leh New Zealand te chauhin a dodal zawngin vote an pe a ni.

Canada sorkar chuan a dodal zawngin vote pe mah se kum 2008 khan a thlawp zawnga vote pe ram te tlan khalhin an parliament chuan he Declaration zulzuiin tualchhuak hnamte ham\hatna tur dan a pass leh lawi a, Australia pawhin kumin (2009) April thla khan tualchhuak hnamte dikna leh chanvo humhalh na tur zawngin dan a pass ve leh ta bawk.

He UNO thupuan (declaration) hian dikna leh chanvo nei ve ngai lo, khawvel hmun tina rahbeha awm tualchhuak hnamte chu 'rights' rawn pein khawvela hnam dangte ang bawk kan lo ni ve ta a; a lawmawm hle a ni.

Declaration paragraph hnihna-ah chuan ‘Affirming that indigenous peoples are equal to all other peoples, while recognizing the rights of all peoples to be different, to consider themselves different, and to be respected as such’ tiin a inziak a ni.

Declaration siam a lo nih tak avangin UNO chuan July thla tawpa neih \hin UNWGIP session kha kum 2007 khan an ti tawp a, mahse dik theia a hriat loh avangin kum 2008 a\ang khan UNWGIP aiawh tur ECOSOC hnuaiah direct-in Expert Mechanism on the Rights of Indigenous Peoples (EMRIP) a siam ve leh ta thung a, tunah hian he EMRIP session vawi hnihna hi an nei leh mek a, he session hian August ni 10-14 thleng a awh dawn a, ZORO hruaitu Pu Rozathanga pawh he session hmang hian Geneva-ah tunah hian a cham mek a ni.

UNO hriat danin khawvel pum puiah hian tualchhuak hnam matkaduai 370, hnam hrang 5000 vel; ram hrang hrang 70 ah kan awm mek a, he’ng hnam zingah hian keini Zofate pawh tel vein, ZORO pawh hi UNO recognized Indigenous Peoples Organization (IPO) zingah kan tel ve kan tih tawh kha. He UNO thupuan hian he’ng hnamte dikna leh chanvo - kan hnam rohlu min humhalhsak bakah kan ram leh leilung hausakna te chu min humhalhsakin a neitu nihna kan kutah min pe vek a ni.

Khawvel ram hrang hrang a\anga tualchhuak hnam UNO beltute harsatna tawh te hi a inang lo hlawm em em a, \henkhat chu keini ngaiha ho tak anga lang te pawh a awm a, keini Zofate anga political case lian tham tak tak nei te pawh an awm bawk.

International Year of World Indigenous Peoples an puan dawn kum 1992-ah khan UNO Secretary General Boutros Ghali chuan, “Khawvel hi chi hnihin a kal a, hnam \henkhat, awmkhawm duh miah lo awpkhawm luih te, awmkhawm duh em em awpdarh luih te an awm a, UNO hian a tawn tawnin anmahni awm duh dan ang ngeia an awm theihna turin theitawp chhuahin hma a la ang,” a ti. Tuna UNO Secretary General Ban Ki Moon pawh hi keini Zofate ang bawka hnam khat, awmkhawm duh, force lian zawkin a awpdarh, North leh South-a in\hendarh mek Korean hnam a ni.

UNWGIP din a nih atanga vawiin thleng hian UNO chuan tualchhuak hnamte tan nasa takin hna a thawk a, UNWGIP din kum 1982 khan UNO member ram 155 an awm a, indigenous decade an puan hma kum 1993 khan UNO member ram 28-a pun belhin ram 183 an tling hman a, Decade puan chin kum 1994 atanga tun thleng hian UNO member hi ram 7 an pun belh leh tawh a ni.

He UNO thupuan (Declaration) hian tualchhuak hnamte hi kan hnam rohlu, ram leh leilung hausakna te hi keimahni kutah a neitu nihna min pe a, humhalh leh chhawr \angkai pawh keimahni kut a ni. He Declaration hi kan chhawr thiam leh kan hlawkpui ang a, chhawr nachang kan hriat loh leh midangin min tihchhiat sakin a hlawkna min tel sak ang a, kan hawihai mai mai ang tih a hlauhawm hle mai. Mi tinin uluk takin he Declaration hi zirchiangin hman tangkai dan i ngaihtuah theuh ang u.

Read more...

CM ÂN HLA!

¢ HC Vanlalruata

Tun tum Independence Day lawmnaa Chief Minister Pu Lal Thanhawla’n sorkar function pawimawh, hetiang Independence Day anga sorkar hnathawk an kal tlem lutuk tha a tih loh thu leh ‘indiscipline’ chiang tak a nih thu a sawi chhuah kha a sawi chhante khan zah nachang an hria ang em aw? Zah nachang hre tan chuan zah ngawih ngawihna tur a ni. Sorkar hnathawkte hian National Day kan tih mai Independence Day leh Republic Day te ang hi sorkar chawlh (public holiday) pangngai emaw an ti tawh mai niin a lang a. Awmawlna hunah emaw fehna ni-ah emaw an hmang ta mai mai hlawm a, a fello ngawt mai.

Sorkar office chawlh hi India ram hian kan ngah em em a. Sapho phei chuan hmusit takin, “A Nation on a holiday” min tih phah a. India ramah rau rau pawh Mizoram hi chawlh ngah ber kan la ni mai thei. Krismas leh Kumthar vuakvet laite hian law and order harsatna lian tham a thleng ang tih hlauhawm tak a ni a, sorkar neilo ang chiahin kan chawl rei lua a ni. MHIP Day thlengin chawlhah kan puang tawh a, chawlh ngah tak kan ni. Chutih laiin India ram pum huapa hun pawimawh, sorkar office leh zirna inte khara kan lawm thin ‘national days’ te hi chu ‘a sorkar lai tak’ a ni a. Sorkar hnathawkte phei chuan an ngai pawimawh ngei ngei tur a ni a. Sawmna lehkha dawng chinte phei chuan rokhawlhna bik tak leh damlohna thil a nih loh chuan kal ngei ngei hi an bat a ni a. Sawmna dawng velote pawhin, sorkar hna kan thawh phawt chuan kan ngai pawimawh tur a ni.

Rambuai lai khan tihluihna ang rawngkai deuhva sorkar hnathawk leh zirlaite kal tir an ni thin a. Khatihlai kha chuan MNF-te an rammu a, India laka inlakhran kan tum hunlai a ni a. Tihluihna rawngkaia inkhawrh chhuah pawh a tul chin a awm a ni ang e. Tunah erawh chuan kan zavaiin Mizoram hi India ram bung khatah kan pawm tawh a, inlakhran tumte pawh an lo haw vek tawh a. Kan ram ‘national day’ te phur taka kan lawm hi kan mawhphurhna a ni tawh. A bik takin sorkar hnathawkte chuan he an mawhphurhna hi an hlen ngei tur a ni.

Chumi ruala pawimawh em em chu hun vawn dik leh sorkar kalphung (protocol) ngaih pawimawh hi a ni. National Day kan lawmna inkhawmah emaw official thila inkhawmna reng rengah Governor kha khuallian a nih chuan a thlen hma-in Chief Minister, Minister leh mi pawimawh dangte an thleng ngei ngei tur a ni a, sorkar hnathawk phei chu an tlai thiang lo. Khuallian kha Chief Minister a nih chuan CM thlen hma-in midang zawng chu an thleng tur a ni.

Mipui mimir chu hetiang thlap hian a thunun theih loh. Minister leh sorkara mawhphurhna neitu dangte, sorkar official-te erawh chuan an zawm ngei ngei tur a ni. An kal tlaia CM hnu-a an thlen chuan hrem theih pawh an ni. Election Commission hotute an lo kal tuma inkohkhawmnaa tel tura tih Bawrhsap pahnih tello pawh hmun leh hmunah an suspend nghal mai kha. Kha kha mi tih dan a ni a, tlai ta ringawt pawh ni sela an suspend tho mai thei a, an suspend loh pawhin na taka zilhhau (censure) tal chu an pumpelh hauh lovang.

Hetiang nikhuaa ka ngaihmawh leh em em chu hnam puanzar (national flag) leh hnam hla (national anthem) kan zah thiam tawklo leh kan ngai pawimawh tawklo fo hi a ni. Sawi tawh angin India sorkar laka zalenna kan sual lai kha chuan kan rilru chu eng pawh lo ni rawh se, tunah chuan India Hnam Puanzar leh Hnam Hla hi kan ta a ni a, kan zah thiam leh kan mawi a ni tih hi kan hre tur a ni.

India Hnam Hla an sak/rem laia zirlai rual dinna chang hrelo ka hmuh thin hian an zirtirtute’n an zirtir lo a ni ang tih hi ka rilru-ah a lo lut ziah thin. Hei hi an zirtir ngei ngei tur a ni. A zirtir ngailo zirtirtu leh sikul hi hrem dan pawh a awm hial ka ring a, dan a awmlo a nih pawhin zirtir ngei turin sorkar, education department hian a ti tur a ni ang.

Kan Hnam Hla chauh a ni lo. Ramdang Hnam Hla pawh kan zah sak tur a ni a, United Kingdom Hnam Hla “Kan Sap Lal Duhbera” tih hla an rem/sak pawhin kan din sak ngei ngei tur a ni a. Chu chu mi pangngai tihdan a ni. A nachang kan hriat loh phawt chuan mimawl kan ni. Mi Hnam Hla zah sak nachang kan hria ang a, kan Hnam Hla leh Kan Hnam puanzar phei chu kan zah thiam em em tur a nia, kan Hnam Ni pawimawh pawh kan zahin kan ngaisang tur a ni.

Read more...

Rap Chunga Thil

¢ Lalthansanga Chinjah

Hman lai chuan rap chungah bel-in emaw zu an bilh a, kum thum zet a vei hnu pawhin, a la thlum lo ve an ti a, chu chu RAP chunga THIL an ti a, uluk tak leh puithu takin an hawng thin a ni awm e!

Lal No an nei a, Nopui an nei a, Noleng an nei a, Rap chunga mi kher lo Zupui, Zufang, Buhtun Zu etc., an nei bawk a, chu'ng chuan an Khuangchawi, Sechhun, Chawn leh Kut ni vang thlaah-te hlimna a pe thin a. Zu an hman dan kha hlim nan a ni ber a, zuphawk an kaihchhuah a, an lam nikhua phei chuan nuam an ti em em a, Pu K Zawla (L) phei chuan, hetiang tluka hlimna hi khawvelah a awm bik lo ang, a ti hial reng a ni.

Kum 1920 hnu lamah erawh chuan sorkar hnathawk - Babu leh Rahsi-te an lal ta em em a, tlangval zurui, buaina siam, tlangchil tur an tihte pawh, an thiante nen an chhan ta thin a, mipuiin an zilh dawn pawhin sual rawn-ah an puh a, heta tang hian nun dan tha chu a chhe tan ta a, Mission sapte'n Kristian tan hmelma-ah min puan hnan a....zu hi buaipui a ni ta mup mup mai a....tun thlengin an heti ta a nih hi..!

He THIL, Zu, (civilisation) aia upa zawk hi sorkar pawh hian an do thin tak na a, thosi (sikserh natna pai) ang maiin an la do hneh theih mawlh lo a, khap a ni tak na a, mihur kap ang maiin ven zawh tak tak lah a ni hek lo! Upa na na na chu hneh pawh a har a ni ang!! Genesis Bu-ah Nova zu siam leh a ruih chungchang kan hmu. Babulon, Assuria, Phoenicia, Palestine, Suria leh Aigupta ramah te zu siam a lo ni tawh a, Isua thilmak tih hmasa ber pawh kha tui uain-a chantir a nih kha! (Heta uain tih hi sap tawnga wine tih atanga lak a ni, KJV-ah vawi 231 hman a ni, zu sawi nan Bible hian a hmang vek, ruih theih a ni vek bawk, Mizo tawnga uain kan tih vang hian zu a nihna a bo chuang lo, a chak lo deuh a ni mai.) Persian ho thawnthuah phei chuan, Lal Jemshed-a'n kel vun-in, ip a siamtir a, chutah chuan grape zu a bilh a, pumna damdawi atan a hman thu a lang a, 600 BC laia, Europe rama an bilh ve erawh chu chhinphui nachang an hriat loh avangin a hang a, chumi hnuah Puithiam Dom Perignon-a'n om chhinna (cork) a hmuchhuak a, tha takin an dahtha thei ta a ni. Zu hi han chhui han chhui chuan sakhuana nen a inzawm deuh tlat a, chuvang chuan a ni ang piantharna tak tak nei lo ringtu intite pawhin ringtu tan chuan sacrament peng (zu hi) thlahthlam tak tak theih a ni lo an tih fiamthu reng thin ni!
CHAWLTUININGZU...Chu chu Pi leh pute tawngkam a ni lo'm ni kha? Archaeological-ho chuan kum 8000 liam daih tawhah khan zu hi awm tawhin an chhut. Gaelic-ho chuan zu sawi nan Uisge betha an hmang a, chu chu sap-hovin Whisky an ti a, nunna tui (water of life) tihna asin! Damdawiah an hmang thin tlat alawm! Aigupta-ho chuan zu hmingah Al-kohl an ti a, sap hovin 'alchohol' an tih tak hi niin powder fir tihna a ni. Russian-ho chuan an zu thulkhung hming atan Vodka an ti a, tui thiang (little water) tihna a ni. A hming a mawi leh that vang hian zu an nihna a bo chuang lo.

ZU hi a bo ang em?
Greek-ho chuan zu hi thudik puanchhuahna a ni an lo ti daih tawh a, miin a harhfim laia a sawi duh loh, a thup tlat hi a ruih hnuah a puang fo reng a ni. Misual dawp nan pawh hian hmang zauh zauh thin sela, hriat belh tur a awm nual mai thei asin ! Winston Churchill-a pek khan, 'zuin ka hnen atanga thil tha a lalkchhuah aiin zu atang hian thil tha ka lachhuak tam zawk' zuk ti pek a! A hmang tangkai thiam hle ni tur a ni. Intihhlim nan te hian zu hi a serh zinga a mei ni mai hialin a lang tawh. Thuhriltu ( 10:19)-ah pawh uain hian mi a tihlim thin a ti hial reng a ni. Mi tihlim thintu a nihna pawh a awm ve reng a nia! Sapho pawhin 'ni khat hlim i duh chuan zu in la...' an lo ti reng a ni ! Damdawi tam zawkah hian tun thleng pawhin pawlh a ni reng a ni.

ZU hi buaipui a ni ta viau, intuten an buaipui a, a zuarte'n an buaipui bawk a, a mantute'n an buaipui hle bawk a, roreltuten an buaipui bawk a, Kohhran hian kut kuangkuah chungin a buaipui bawk. Mahse, heti taka chimawm leh tihbaiawm hi ni mah sela, sual tinreng bul erawh hi chu ni berin a lang lo, (a tha ber ka tihna erawh a ni hran nek love!) Zu in miah lo, hlemhle, eiru, thenawmte ram nek ching, hna hmuh nan a midangte tlawn ching, thil man tih to thut hreh miah lo, dawt sawi leh thamna lak hreh miah lo, Kohhran-a inhmang tak tak, pawisa khelh leh eiruk pawisa miah lo, rilru uire an tam si hi! Zu in thinte hian a Zuartute an hmusit a, a zuartuten a In thinte an hmusit let a, khap a nih poh leh a pung tual tual a, a neiten an hawn sen deuh a,a neih lo deuh ten an hawn; dup deuh a ni ber e.

Zu..Milian inkawmna chahbi pawimawh ber, mi chhe zawk te kawmkar hrut tirtu, a thenin damdawi atana an hman, a thenin sual tih nan an hman bawk, a thenin sum tuak nan an hman, a thenin lung in bang zut phahna, a maka mak hrim hrim zu hi...

Vanram kaina chu a ni hauh lo a, mahse, Vanram kai loh phahna pawh a ni bik chuan a lang lo! (Mission sapte pawn an in tho an tia lawm an ti!!). Ram changkangah chuan thingpui ang maiin an ngai a, an rui zauh thin tak na a, an hmang thiam tawh a, an 'problems' a ni ve lutuk lo.Ram hnufual leh thuanawp apiangah sual tinreng bula ngaih a ni thin a. Zu hian buaina leh thil tha lo tinreng a kaihhnawih tih chu history atang hian a lang reng mai. Zu vang hian nawhchizawhna te (KS), hurna te, rukruk te, tualthah te, accident te, buaina te, hlemhletna etc te hi a kaihhnawih ngei mai. Sual tinreng bul an tih pawhin a dikna lai a awm, mahse, sual tinreng chhuahna (seeds) erawh chu a ni bik kher lo. Eden huanah pawh khan zu a awm kan hre lo, (Nova hunah a lang chauh). Mahse, sualna zawng zawng zinga sualna lian ber a chhuak tho tih chu Hindu leh Mosolman te'n hre lo mah se Kristian (inti) te chuan kan hre awm e. Sualna kan tih ang sualna chi reng reng hi chu mihring rilru leh thinlung atanga chhuak a ni a, chuvang tak chuan chutiang sualna tih chingte chunga rorelna chak chu sorkar hian a kenkawh a ngai zawk mai a ni. Tualthah hi sual lian a ni a, a hremna pawh na tak a ni a, sakaw zirtirna nen pawh a inkalh tlat a,chuvangin mi tam takin tual an that ngam lo thin. Zu vanga sualna kawng hrang hrang ti thinte pawh hi a hremna dan khauh tak awm hran leh mai sela, a dik mai lo'm ni ?

Entirnan - miin thinrim vang liau liauva tual a thah chuan tuna a hremna hi a tawk, zu vanga a thah chuan tun aia hremna dan khauh zawk hi awm sela, chutiangin, sual tihna kawng hrang hrangah pawh zu vanga tisual an nih chuan a hremna dan chu khauh lehzual zawk mai sela, heti lutuk hian Zoram hian zu hi a buaipui lo tur, ka ti thin. Dik tak chuan zu in ngai lo leh duh lote'n a thuin zu ngawl an vei a, a duhhoin a practical-in zungawl an vei ni ber hian a lang.

Zu khap burna dan (Total prohibition act ) hian dan zah lohna leh pawisak lohna a thlen tih chu America rama Prohibition period atangin a chiang hle. Chutiangin, kan ramah pawh hian khap bur tih hian a zuartute tan a laktir sauh a, a inte'n in tur neih loh hlauin hma an la bawk a, dan khauh tak awm reng si hi hlauhawm awm tak, mahse, hlau miah lovin thlirliam a ni ta mek zawng a nih hi. Total Prohibition Act hi hi hlih duh lo tam tak an awm, a dik lo lo e. Hlih ni tak ngat se, hun engemaw chen chu sualna chi hrang hrang a punlun hle ngei ang. Chhungkua, khawtlang, Kohhran leh sorkar pawh a buai ngiang ang, mahse, buai zualpui hun kan pelh/thlen meuh hunah chuan hmanlai kan ngai kher lo ang. Hei hi zu a tha tih vang hrim hrim ni lovin, khawvel thang zelin a nawr mek a ni zawk a, tunah ti lo mah ila, tih hun a la thleng tho tho dawn. Tin, Total Prohibition Act hlih a nih vang hian zu hi phalrai tur tihna a ni lo a, dan hnuaiah dan angin a leng zawk mai tur a ni.

Hemi kawngah hian Kohhran pawh hi a inenchian a ngai, a lu len lohna turah a ring a rawlh fo a tul fo em ni? Kohhran hian Kristian tih hi sakhaw pawl pakhat a ni a, Krista ringtute tih hi sakhaw dang, pawl pakhata inzawmkhawm a ni tih hi a chian a ngai. He Kohhran huang chhunga Kristian tam takte hian zu hi an in duh chauh ni lovin an mamawh a ni tih pawh a haider fo tur a ni bik lo. Lal Isuan buh lem leh buh tak a sawi hi Kohhran hian a chawm reng, pakhat huain pakhat mal a sawm bik anga maw? Zu hi ka fak awzawng bik lo, kum 30 liam ta atang khan ka hmel hriat tawh, khang hun atang daih tawh khan zu-a Mizote ngaihdan hi tun ang ni lovin zalen takin khuahkhirhna hnuaiah awm chu ni sela, Seven Nights in Hospital lamtluang zawh a ngai lo tur.

Zu hi khuahkhirh ni sela, dan hnuaiah ralti takin leng ve mai rawh se. A duh chuan in sela, a duh lo chuan in lo mai rawh se. Hurna kawng te, uirena kawng te, rukrukna kawng te... chutiangin, a ti ngam leh duh chuan an zawh mai a, a ti duh lo chuan an zawh lo mai. Thil dik lo leh tha lo titute chu dan a awm alawm, dan chuan hrem mai rawh se. Sual,
sual kan tih hian zu-ah chauh pet goal i tum lo ang u. Kan rilru leh thinlung hi a pawimawh zawk. Dik tak chuan, hemi kawngah hi chuan Kohhran pawh hi ka thiam loh asin, zaa za Kristian awmna tiin kan chapo a, kan rilru leh thinlung hneh turin an thawk zo leh si lo, nge Bible dang hi an keu zawk? Pastor hi lirthei nei hrim hrim turah an inngai ta em ni? Nge, officer-ah an inngai ta zawk? Fate eiruk leh sawn pai/thlak zepbona bung leh chang hi Bible-ah a awm chiah maw? Kohhran hruaitu zu leh pawisa khelh, eiruk pawisa lo, mahni hna a rinawm lo, mipat-hmeichhiatna kawnga zu in mi aia hleihluak taka kal dan hi Bible-in mi hrilh chiah em?

Kohhran hian a huang lo a dai hnem lutuk a, chu chuan YMA-ah hri chhia a tuhlut a, khawtlangah a kai a, chhungkua, mimalah a kai let ni ta ber hian a lang. Kohhran hi kawra hman chi a ni lo e. Zu hi in haw tak taka in duh lo tak tak a nih chuan zu in te, zu rimnam te etc hi phuar (ex-communicate) ngam ula, thawhlawmte pawh hi khawn lo ngam rawh u. Pathian ram hi sum thianghlim lo tel lo pawh hian a zau dawn tho tho.

Sorkar pawh hian zu chungchanga Total Prohiobition Act hman hi chu paih ngaihtuah tha ngei sela, Control Act lampang siam tur hian huaisen takin hma la ngam mai rawh se. Tunah hian ti lo mah sela engtik niah emaw chuan kan la hmang ngeiin a rinawm tlat (India Constitution chu rigid and flexible a nih hi). He dan chungchangah hian mipui rawn kher tulin a lang lo, mithiam rawn a fuh zawkin a rinawm, anni'n uluk leh ngun takin ngaihtuah zawk mai rawh se. Zu thlarau hian Mizote hi min run khawlo zo tawh a, a bilhah a tho tawh lo a, chumi ngei mai chu siamthat a ngai ta zawk a ni.

Zu hi total chuan prohibit lo ila, duh huna va lei zauh tur hi dan hnuaiah awm reng mai sela, hemi thleng thei tur hian sorkar hian dan siam law law se.!!! Hei hi mi tam tak ngaihdan a ni miah lo, engtik hunah emaw chuan a thleng tho tho ang (after 2500 AD?). Huaisenna tel lo chuan hlawhtlin hi a har teh a nia ! Abraham Lincoln chuan kum zabi 19-na daih tawh khan zu chungchang sawiin 'used by everybody, repudiated by nobody' zuk ti daih tawh a! (Mi zawng zawng hman, tuman an hnawl duh loh!)

Sualna leh zu sawi zawm tlat tumtute hian sualna leh TV, sualna leh computer, sualna leh mobile phone, sualna leh eiruk leh rinawm loh chauh pawh hi sawi zawm ve sela! TV hi hman thiam loh chuan sualna thlentu a ni thei, computer leh mobile handset phei hi chuan sawi chhuah ngam loh khawp sualna a siam mek, a la siam zel ang. Thafamkimpa, i bulah khan langchhuak mai lovin i fate khan eng sualna nge heng technology-a sanna hian a siamsak chiah i hriat hun chuan i ha i la thial ngei ang a, a hnem nan zu hi i la lem khulh mai lo ang maw? Engpawhnise, zu hi chu i fak lo ang u, zu permit pek pawh hi i sawimawi lo ang u, mahse, hunin min nangching a nih si chuan, a hun thliar thiam ila a finthlak ngei ang. Kan thlir dan hi a dik tawk lo fo thin. Party reng reng pawh hi rulling an nih chuan Pathian ruatah an pawm hmak zel a, opposition an nih erawh chuan Pathian ruatah an pawm duh si lo fo. Opposition Pathian hi a nep deuh bik thin emaw ni tehr eng le!?

Sualna chi hrang hrang hi Pathian lo kal thlengin a awm dawn tho tho, chung zinga member upa ber zinga mi chu zu hi a ni chiang alawm. Misual chu a awm ve reng dawn, i khuahkhirh theih erawh chuan buaina i pumpelh a ni mai. Zu chungchangah hian a tha ber kan tlin ngang loh chuan a dawttu kan thlan mai a tha ang. Kan ram hruaitute hi 'lawless guardian of laws' an nih tuma'n kan phal lo ang, chuvangin, kan ram siam nan leh hmasawn nan hian dan rorelna ( rule of law) a awm tak tak theih lehzual nan he dan (Act) kan sawi tihbo emaw siamthat emaw kawng zawh tur hian 'to be or not to be' an tih thuai a hun ta. He thlarau vakvai hian Isua lo kal hi a hmuak ve reng reng dawn a, rip chhungah kan khung thei lo a nih rau rau chuan hnungkhirh chunga kan sezawl chhuah mai hi a tha ta lo'm ni? That hi chu a tha thlawt lo, mahse a awm reng dawn si!!!

Zu thlarau tak hi chu maw! Kohna hming lem i nei lo a nih pawhin Setana Dawi ka ti teh ang che..i lo rapthlak lutuk! Mahni chhia leh tha hriatna mi rukbosaktu tur rukru chu ka kaah ka tulh lutin pumchhungah ka khawi thin ang maw? Ram sakawlh anga min siam thei chu tha tho lungsi takin ka lawm thin ang maw? A va han rapthlak em! -William Shakespeare. [Othello].

Read more...

A Hmingin Phaiah Te Ka Kal Ve Tawh, A Hming Mai Maiin

¢ Stephen Auhmun

Pawl kua kan zir kum a nia, ka la hrereng mai, December thla a ni nghe nghe, kum 1994. Kohhran programme-ah Guwahati kal a ngai a, kal hma ni chiahin kal ve turin min ti a, ka va han phûr tehlul êm!! Kolasib-ah kan chhûngte an awm nual avangin he hmun thleng hi chuan ka kal ve fo a, chuti tih lohvah chuan ‘Phairam’ awm dan tur hi suangtuah pawh ka suangtuah thiam lo a, Bhaga phai phei kawng chu engtiang taka ngîl nge a nih hre turin truck driver hmelhriat pakhatmah ka nei lo bawk. Ka vawi khat vairam hmuhna tur a nih ve tak chu.

Ka châk et et a ni.

“Engatinge night bus hi zânah kher an tlân thin le?” ti thintu kha a seat dûpah ka thu thâwp ve ta sat mai. Bus chhûngah chuan ka mu mang lo a, mumang pawh ka nei lo. Kan kal thla zel a, mi’n ‘Meghalaya chu a vawt lutuk’ an tih ka hriat ve tawh avangin mi an ve ngei ka duh si a, Sonapur lei kan han thleng chu vawt ta riau hian ka han hre ve bawk a, mi ningkhâwng chu man ve tak ka ni.

He lei (bridge) kan han pel fel chu, awi karei karei! Kan bus min suam ta mai. Kan bus suamtute lah chu henglaia ‘vai’ kan tih ang, an hmêl kan hmuha kan duh theihna tura hmel mawina reng nei lo te an ni hlawm a, thinrimthlak tak a ni. Bus hnunglamah kan chuang a, kan vannei ngawt mai ka ti. A hmalama thuho kha chu an neih zawng zawng an laksak vek hlawm a; ‘zawng zawng’ tih lemah an thil hlu neih zawng zawng. Kei chuan engmah ka chân ve hauh lo. Bus hma darthlalang chu heng vaichhe ho hian an vawchhe bawk a, driver an hliam bawk. Theiriat an tia mawni, Melriat an tia mawni, Khleihriat an tia mawni, Chhûra ûmpui mu hriat an tia mawni? Chumi khaw police station-ah chuan kan in-report hnu chuan kan kal leh ta poh a, kha’ng kan chuanpui te thil hloh kha hmuhkir sak leh tak maw?

Shillong chu a mawi ka ti hle mai; a vawt ka ti kher mai bawk. Bus-a kan chuanpuite zawng zawng chu he hmunah hian an chhuk phiar a, keini pali chauh chu Guwahati thleng tur kan awm ta, driver pakhat chauh nen. Bus darthlalang keh leh zan khawvawt avangin a tlan chak theih si lo a, Shillong leh Guwahati inkâr pawh dârkâr ruk zet kan tlan a, zan a nih tawh avangin Borapani pawh ka hmuh loh phah.

Guwahati-ah chuan ni li kan châm a, kan haw leh a, kan tluang lo leh pek. Direct bus a awm loh avangin Badarpur thleng ticket kan nei a, he hmun kan thlen hian vaihovin min khawih an lo tum a nih chu!! Hemi kum hi driver Lalsangzuala thah a nih kum kha a ni a, Aizawla vai dawr tam tak suasam a nih kum kha. Ka la nau ve bawk a, ka hlau teh asin! Kan awmna hotel an rawn hual khup khup mai a, kan thianpa pakhat phei chuan sawi se, ‘vaiho chu an tam khawp a, a thimin an rawn thim mup mup’ a ti hial awm e. Kan vanneih asiamin kan hotel thlenna pa-in min lo chhan hlauh a, a lawmawm dangdai teh asin. ‘Mizoram ni ta se kha vaipa’n kan chunga a tih ang kha ka ti ve ngam ang em aw?’ ka ti hnuhnawh fo mai. Zuk zawnchhuah leha Grape Wine khilai hial tur a ni - a rui kher nâng!

Ka damchhûnga a vawi khat na’n kum 2001 khân rêl ka chuang ve chauh. Kohhran zârah bawk. “Kerala kal tawh zawng thingthi rawh u” ti ta se a khûp bâl zingah ka tel ve thei reng tawh mai. December thla bawk a ni a, chhim kunah khuan kan zuk kal a, thla khat zet kan thang. Min hruaitute an fel a, kan kal lamin harsatna engmah kan tawk lo.

Haw lamah a ruala kan haw theih tak loh avangin chinchâng hre lo thah mi pariat kan haw tlâng a, kan buai angreng khawp mai. Guwahati thleng tur rêl direct kan neih loh avangin Chennai leh Kolkata-ah rêl thlak a ngai a, a manganthlak hle. Rêl nan loh palh te kha kan han hlau lailêng khawp a, a chhuah hun hma darkar li-ah chuan station-ah kan thu rân tawh zel. Hemi tum hian alawm, hmun tlawh tam nih ka duh avang khan rêl din apiangin ka chhuk a, Salem, Vishakapatnam, Coimbatore, Bhubaneshwar leh khaw lian dang dang ka kal tawh ka tih ve zuah zuah theihna chhan pawh ni. Insawitheih nuam ti mi, kei ang tân chuan a tihchi zêk asin.

Ka nu laizâwn te nena Kolkata kan kal zet kha aw! Rêl bawkin. Vai milian choka anga mawm hmak mai vek hi an ni a, rêl kal laiin zunram an thiar ngam silo; stationah toilet hman phal a ni bawk si lo! Buaithlak hlawm tak an ni. Hmeichhe bazar pui chu a hahthlak em mai, nupui pawh hi neih loh tawp mai a nia ka duh rum rum ni!

2003 kum kha ni ta-in ka hria, zirlai hruaitute hnung zuiin Guwahati-ah bawk kan kal a, motor kan keng a, nuam kan ti hle. Mizoram House kawtah tak mai khuan kan motor chu maruti car-in a rawn su nghing lawih pek a, Badarpur ang mai khan phai vai hmelchhe rimchhe tawngkam chheho an rawn pung khawm leh chiam pek. Ka thiante zawng leh kan driver kha chu Mizoram House-ah an tlan lut hman a, motor seat hnunga chuang ka nih avang khan an tih ang chu ka ti ve hman ta lo! Vaiho kuttum leh kutphah leh pheikhawk chu ka bek te, ka dâr te, ka biang te, ka mawng te leh a remchang apiang chuan ka lo block ta siah siah mai lo thei lova, ramdangmi hmusit mai lova thiana siam har ka ti ngei mai, khami tum zet kha chuan. Anni, ka hmai leh taksa pêng danga an kuttum rawn thlahdah tute pawh khan an harsat niin ka hria, min tihdan êm êm kha!

PCO pakhata min hnuklut tu kha i titha e! Tikhan min lo ti lo la chu Vairengte atanga Aizawl inkar YMA ten kawng tluanin min lo hmuak mai thei a ni. Ka duh hleinem, rih ana; pawndum a tel ngei dawn si a! Ka neih zawng zawng Rs. 500-in ka inkhulchhuak ta a nih kha. Tu berin nge ka pawisa kha chang ta ni?

Tlemlai deuhva Bagha phei chhiat êm êm lai khan ka thianpa Hruaia nen kan kal ve bawk tak e. Dholai-ah kan chuanna bus a tâng a, loh theih lohva zan riah a ngaih avangin mi dawr bathlâr-ah kan riak tawp. Nge bus chhûng a lum viau vei. Thosi seh hi thak kher lo se, natna hrik te hi paipawn khanglang lo se, thlawk ri vê vê kher lo se chuan an khamkhawp thisen thehchhuah hi a lo uihawm hauh lo tih hemi zan atang hian ka hrechhuak chiang khawp mai.

Mi thenkhat chuan phai kal te hi eng he hu-ah an ngai lem lo. “Naktuk enge i tih dawn?” han ti ila, “Delhi ka zu kal lawk teh ang,” te hi an ti sam leh êt thin; chu mah mah thlawhtheihna in. Keia phai kal ve tur hi chuan |huampui ka pan tlângpui a, midangin Lêngpui an pan laiin. ‘Pui’ theuh theuh kan in pui hleih hlawm ngawt mai. A la kal ve lo te lakah chuan ka intithei ve em em reng tho nia. Tih tak êmah chuan ka thian thenkhat, night bus chhûng pawh la hmulo leh Silchar a awm tak tak pawh ringlo an awm ve tho êm! Ka thianpa pakhat chu a vanneih a siamin (?) serious vak lovin a damlo hlauh a, Guwahati a hmuh ve phah tak e. Chuti ni lo se khawiah!

Keimah Ramfangzauva.

Read more...

Nghilh loh nghilh ni

¢ Lallenmawia Jongte

"Di lenmawi, ka hmangaih tak zet che asin. Ka hmangaih ngawih ngawih che. Rei lo te i hmel hmu lova ka awm pawhin ka nun khua a har vawng vawng thin. I tan, i tan chauh ka rinawm zel ang ... Enchim loh Parte, nang nena kan inhmangaihna kuhmum hi mawi takin par vul se ka va ti em!"

Chu sik khawthiang zan duhawm chuan ka tan, ka tan ngei hian malsawmna thuah za tam a rawn thlen mawlh mawlh hian ka hria a. Thangvanzawla chhawrthlapui pawh chuan mawi theihtawpa mawina zia chhuahin Bung zar phen atang chuan min rawn thlek duk duk a, "Hlim tak leh am takin hmangaihna par chu tlan rawh u," tiin duhsakna min hlan mawlh mawlh hian ka hria. bung hnah, zo dai thlifim ngei maiin a chhem chet laih laih lai chuan ka Angel thianghlim sam chhawlleng chuan ka hmai a rawn zar a. Ka enchimloh Partei sam chhawlleng hui mam sak pah chuan ka kai dak a, duhthawh em emin ka fawp vawng vawng a.

Ka en nin loh, ka fawh ban theih loh Partei hmel chu ka en nawn leh thin a, "Aw! He bawhchhiatna khawvel hri chhiain a chim, ka hip ang boruak tho hip chu i ni tak si a le! Chuai leh mai tura vul atan chuan i va'n pamhmai tak em!," ka ti vawng vawng a.

A ni reng a ni. Angel thianghlim rualte pawh khian, "Aw Pathian, engah nge Partei anga hmeltha leh duhawm khuan min siam loh le?," tiin Pathian hnenah an vui thu an thlen hial ka ring thin.

"Parte, kan tan hian thenna kawl eng lo se ka va'n ti em! ka han ti a. Ani chuan "A ni gnawt mai tiraw Duhber. Mahse hringnun khawvel hi zawng kan duh dan loh pawhin a her fo zawng a nih hi," tiin min chhang. A ni, Partei hi zawngin hmangaihna tuipui thuk takl atang pawhin hring nun khawvel hi a thlir thiam a, kei erawh hi zawngin hmangaihn avangin Siamtu No ruat hi ka hrethiam lo fo thin a. Mahse, Partei avang bawkin hringnun hahthlak zet mai hi lungdam takin ka chhiar leh thin.

Tunah chuan zan pawh a lo tairek ta e, tlai mah var ila kan inning chuang lo'ng e tih hla kha kan sak a tul ta si. Vahrit duhin iak iak mah ila, Chepa kan thlan a tul tho tho si. "Parte, ka tana i rinawm zel tur entirna leh hmangaihzia entir nan min fawp rawh le," ka han ti a. Ani chu a kum tlat a, ka sawi nawn leh a. Muangchangin a rawn dak chhuak a, maimitchhing diar diara min fawh tuma a rawn hnai lai chuan kei chu ka lo awm kiang a, a hrilhhai rawn mengphar lai chu duhthawh em em in ka fawp ta zawk a.

Ka duhthawh em em a ni. A chhan ka han hrilh ang che. Kumpui linglet tehmeuh zirna avangin khawpuiah min awmbosan dawn a ni. Ni e, zanin hi kan inthlah zan a ni tlat a ni. Aw, a mak ka va'n ti em! Hmangaihna zunin mi a zam hnehzia hi chu aw! A pawi ta ber zawk erawh chu hmangaihnain retheih leh hausate min thliar hrang ve tlat lo hi a ni. Mahse, Partei erawh hi zawngin a dinhmun avangin min chungdelh ngai lo. Tichuan, chu inthlah zan hlimawm chul ruih bawk si chu kan hmang zo ta a. A tuk zingah chuan kar hla chang turin khawpui lam chu min pansan ta a ni.

Aw, 'tiang reng hian a ni maw enchimloh Partei zun hian min lo phuar ngeh le. A zunzam min phurna hi engtiang pawhin tal mah ila ka tal chat zo chuang lo vang a, engvang mahin ka hmangaihna hi a dai leh tawh lo vang. Lungngaihna leh manganna chhum dum chhah tak karah pawh ka hmangaih zel ang a, chhiatna chhe tawpkhawk a chungah pawh thleng se ka hmangaihna hi a dai dawn chuang lo. Engvang in? E le, hmangaihna dik tak hian ramri a kham ve lo va, huam chin a nei ve lo. Chatuan a hawlh tlang rak asin.

Thiante pawh chuan ka nunkhua ngui ta ruih chu an hrethiam a ni ang, min fiam chhen a, "Sakhmel tha chungchuangte zun chauh hi a lo zam lo a nih hi maw le," an ti thin. A dik mai thei. mite chuan ka enchimloh Partei chu tha an ti chiam lo pawh a ni mahna. Kei ka tan erawh chuan khuavang note aiin a duhawm a, Hmeltha Lalnu el phak loh hialin a duhawm a ni. A ... a duhawm chungchuanzia chu kei tehlula tawngkan thiamna hian a sawifiah zo chuang lo vang.

Tlai ni tla tur chu a sen suar a. Ka lungleng lutuk tuar lo chuan inthlah zan kan hman dunna Bung hnuai pan chuan ka chhuak a. A hmun ka han thlen chuan ka han hawi kual a, thil engkim mai chu a lo la ngai vek. Mahse, ka lunglai hnemtu Partei a awm ve tawh si lo. Tlai ni tla tur chu ka han thlir nawn leh a, ka hriat hman hmain ka biangah chuan mittui chu a lo luang ngiai ngiai a, "Parte, ka va'n ngai tak che em! I zunleng zam mai maw min hnutchhiah le? Kei zawngin kar hla dy zun ngaih hi ka thiam ve lo va, ka tlin ve lul lo a ni. Aw Pathian, engah nge hetiang teh hrepa hring nun hi i lo duan le?" tiin ka phun mawlh mawlh a. Beidawng em emin in lam pan chuan ka haw leh ta hna hna a.

Zing tiana kan han thang harh chu ka lehkha tur ka lukham bulah chuan ka hmu a, chu chu ka nauin a lo dah a nih ka ring mai a. Lehkha ip kawma kutziak atang chuan Partei thian tha ber, Kimtei ziak ngei a ni tih ka hria. Phur ru tak chungin lehkha ip chu ka hawng a, ka chhiar ta a. Ngawiteh ... ka mit ka nuai a, ka chhiar nawn leh a. A ni thei lo! Ka ring pha lo! Parte, aw ... Parte, a thin a va na em! Ka mittui chu a tla zawih zawih a. Tlangval dang nen Partei chu an inru a nih chu! Ka lung nona chu a rawn chhuak a, ka tap ri ta hial a.

Ka lungchhiat zualpui ka hrikthlak hnu chuan Kimtei lehkha chu ka'n chhiar nawn leh a, "Thiana, he thil rawn hrilh che hi ka hreh hle mai. I la na hle ang tih pawh ka ring .. a a... Partei zawng, lemchanna khawvelah hian a chang thiam pawl a lo ni e," tih chu ka zu chiar a. Ni lo, ni lo, Kimte, ni lul love, Partei khan min hmangaih ve tak tak asin. Kan dinhmun inthlauh luat vanga bansan mai ka tum laia ka thinlung chiah zawptu a mittuite kha. Duhthawh em em a min awhna hmuite kha hmui anchhedawng a ni ang maw? Vanduai chuang tur reng hian em ni he khawvelah hian dinchhuaha ka awm ve le?

Kimtei lehkha chu ka chhiar zel a, ".. ka tuarpui tak zet che a ni. mahse, lungngai duh reng reng suh. Partei lo pawh nula tha tak tak an tam em!" Ni e, Kimtei thlirna tlang atang chuan a dik mai thei. Mahse, mawi taka pangpar vul nazawng hian ka mit an la lo va, ka tana thliahah ka awt hek lo. Uar taka par kher kher hian asin ka mit6 la chu ni. A rim a tui tel tlat vang te pawh a ni ang e. Ka Enchimloh Partei chu ka thliah lohin a chuai ta a nih chu!

Aw eng vangin nge min phatsan mai le? Sum leh pai avanga nawmsak duhna hian a hip bet ta che em ni? Ka hrilh tawh che kha. "Nawmsak duh luat vanga hmangaih loh hmangaih chawp beiseia neih hi zalenna kan hralh mai a ni a, tuma'n an tifuh ngai lo," ka tih kha, "I mawina leh duhawmna rei lo tea chuai leh mai tur chauh thlahlela i neih chuan i la inchhir ang," ka tih te kha Mite chuan hmangaih takte nen chuan bahra khur pawh an ti ngai asin! Retheihna khurpuiah pawh hmangaihna diktakin par a vul chuan damlai pialral a din theih asin! A... ka inphun lungawi zo chuang lo vang; ka ngawi tawh mai dawn em ni?

Ka tuar ang tuar, ka chan ang chang val dang awm ve maw?Nghilh loh ngaihhrui nan tia Partei'n zungbun min pek chu ka'n en a, "Parte, 'i tan ka rinawm zel ang' i tih thangkhawk pawh kha a la reh em lo asin! Mi i awhna hmui pawh kha a la hul em lo asin! Aw Parte, rinawmna hi eng nge maw a lo nih a, kumtluang pawh hi engtiang chiaha rei eng maw a lo nih reng le,?" tiin ka phum mawlh mawlh a. Aw hlim lai ni zawngte kha! Nun hlui ngaihawm tak takte kha kirtiang rel lovin hunin a her liampui ta si! A pamhmai ka ti!

Tunah chuan Parteite pawh insawiremin an inneita a. Ani chuan ngaihzawng satliah enin min en a ni mai thei. Mahse, kei erawh chu partei min hliam, ka thinlung ser hi engtikah mah a reh dawn lo. A tan rinawm turin ka lo intiam tawh a, ka tan rinawm lovin min phatsan mah se kei chuan ka thutiam ka hlen dawn a ni. He bawhchhiatna khawvel zin kawng zawh tur hian mi pangngai angin dinchhuahin ka awm a; chhia leh tha hriatna tha tak pekin ka awm bawk. Chu ka chhia leh tha hriatna chuan mi dang pawm turin min thiam tawh ngai lovang. Chuvangin nula tlangval inngaizawnna hi chuan ka nunah hmun a chang leh tawk ngai lo vang. Ni, a chang leh tawh dawn lo a ni.

Hun leh nite chu a chatuan danin a her zel a. Kei pawh lu-ah kelsam toin ka tha a lo thum ta. Mahse nun hlui ka chhui kir a, hun hlui ka dawn kir chang chuan ka lunghlui a leng vawng vawng thin. Ka mittui a lo hnam leh thin a, tah zai rel a tul leh thin. Mahse, hmangaihna lamtluang ka zawh sual avanga min buaipuitu tur tu leh fa ka nei lo gnawt hi chu a chang chuan atthlak ka ti thin. Ama'rawhchu, hmeichhia hian ka hnunah hmun an chang thei tawh hlawl si lo!

Aw... Parte, min va'n tirethei tak em! Ka hringnun zin kawngah hian hmelma tawrhhlelhawm ber i lo nih hi. Mahse, ka hmangaih ber i ni si. Engah ngei i lo pian ve kher le! A... keimah hi lo piang lo lek ila tha zawk tur! Nghilh loh Parte, nang ka nghilh ni che hi a her chhuak a nih ngai chuan ka lei hi ka dangah bet tlat se la, ka kut dinglam hian a thil thiam zawng zawng theihnghilh mawlh rawh se.

Read more...

Inthingharh hram hram rawh

Loneitu pakhat hian sabengtung a nei a, a sabengtung chu a tar ve ta hle.

Vawi khat chu, a sabengtung chu tuichhunchhuahah a tla palh hlauh mai. A tlakna tuichhunchhuah chu loneitupa ta a ni.

Sabengtung chu a mangang em em mai a, a rak ta chel chul mai. A pu chuan a thawm chu a lo hre thuai a, a tih dan tur a ngaihtuah ta a ni.

Ngun taka a'n ngaihtuahin, a sabengtung chu a tar tawh hle tih leh a tuichhunchhuah chu a chhawr tangkai lem lo tih a ngaihtuah a, a khawi zawk zawk pawh chu thapui thawha hum tlakah a ngai ta lo.

Thenrual tha a sawm a, tuichhunchhuah chu chhilh mai a rawt ta. Tuichhunchhuahah chuan leivung an paih ang a, an chhilh ang. Chutianga an tih chuan sabengtung pawh a thi thuai ang a, a khawngaihthlak loh zawk ang tih chu a ngaihdan a ni.

Tuichhunchhuahah chuan leivung an paih ta a, sabengtung chuan a pu rorel dan chu mak a ti hle.

Leivung chuan sabengtung hnungzang te chu a tlak ta mawlh mawlh mai a, sabengtung chuan na ti thei hle. Mahse, leivungin a hnungzang vel a tlak apiang chuan a lo inthing a, leivung chu a tla nghal zel.

Loneitu leh a thiante chuan leivung chu an paihthla mawlh mawlh a, sabengtung chuan amah delhtu leivung chu a lo thingtla zel bawk. Chutia leivung a tlak apiang chuan a chungah chuan a ding nghal thauh zel a, a lawn sang ta tial tial nghe nghe.

Leivung rawn tlathla thlawrh thlawrh chuan a delh na thei hle a, mahse, "Inthing la, lawn zel rawh... inthing la, lawn zel rawh... inthing la, lawn zel rawh!" tiin amah leh amah chu a infuih sauh sauh mai.

A dinhmun hlauhthawnawmzia a ngaihtuah lo a, leivung delh natzia a ngaihtuah hman hek lo. Ngawi rengin a lo dawh a, chutah a'n inthing a, chutia a tih apiang chuan a ding sang sawt zel.

Chutia a tan tlat avang chuan a tawp a tawpah chuan tuichhunchhuah kotlang a thleng ta hial mai!

Amah phuma chhilhtu tur leivung chu malsawmnaah a chantir hlauh mai a nih chu! Beih dan dikin a hmelma a bei a ni.

('Shake It Off and Step Up' tih lehlin a ni. A ziaktu hriat a ni lo.)

Read more...

Football tana inpe RC Khuma

¢ Hmingsanga

Mizoram football tournament neih mumal ber leh upa ber pawl Independence Day Celebration Football Tournament 2009-ah rinkai lo RC FC chu I Division-a an season khat awmnaah champion ni thei nghal khawpin an chetha tlat mai. Hei hi Mizoram football chanchin-ah thil chhinchhiahtlak a ni ngei ang.

Independence Day Celebration Football Tournament-ah hian I Division-a inhlangkai hlim club, champion ni nghal thei hi an la awm ngai lo. RC FC chuan I Division-a rei tei lo awm tawhte khumin final-a an khingpui, I Division-a season hmasaa kai thar ve tho SSA FC chu 2-1-a hnehin champion an ni ta a ni.

RC FC Leitan bihchianna
He club hi Mizoram club hlun leh upa pawl, kum 1977 daih tawha din, chawl lova kal zel thei club tlo berte zinga pakhat a ni. A danglamna chu veng chhung sporting club emaw pawlho enkawl emaw a ni lo a, mimal thahnemngai, VIP Tailors neitu RC Khuma leh a nupui Thiangi te'n anmahni sum leh pai leh tha leh zung senga an din leh enkawl chhoh ngar ngar a ni. An club dinna'n hian cheng nuai tel fe an sen tawh thu Pu RC Khuma chuan a sawi.

A tir takah chuan RC FC Leitan hi football club mai a ni lo a, sporting club niin, football chauh ni lo infiamna chi dang te pawh hma tel an ni. Football bakah boxing, badminton, table tennis leh hockey thlengin an kalpui vek a; Mizoramin mipa boxer a neihte zinga thlengsang ber Zoramthanga pawh kha an club member hlun, an hnuai atanga seilian a ni. Durtlang Leitan boxer duhawm, sub-junior category-a Mizoram tana national gold medal la hmasa ber Lalchawimawia pawh kha he club member bawk hi a ni.

Infiamna dang dangah pawh he club atanga chhuakte hian tunhma leh tun hun thlenga Mizoram sorkar hnuaia team tha - MAP, Power Deptt., PHE leh PWD team-ah hna an lo hmu nual tawh a, tunah chuan football lamah hian an insawrbing ta a, hlawhtlinna sang tak changin first division team an ni pha ta hial a, an football player-te zing atangin sipaia lut leh hna nghet dang hmu tawh panga lai an awm tawh nghe nghe.

Infiamna dang an kalpui tak loh chungchang sawiin RC Khuma chuan, "Infiamna discipline hrang hranga kan player tha engemawzatin tunah chuan eizawnna hna nghet an neih tak nual hlawm avangin tunah chuan football lama insawrbing hi kan thutlukna a ni ta rih a, mite tan malsawmna kan ni ve thei kha lawmawm kan ti. Mizorama team tha ber ni turin theihtawp chhuah chhunzawmin kan tih theih zawng zawng kan ti ang," a ti.

RC KHUMA KAWMNA

Independence Cup ah champion in ni ta a...
Kan champion tih ka hriat khan thinlung tak takin ka lawm a. Pathian hnathawh keimahni kaltlanga rawn inpuangchhuak ni hian ka hria a. Kan chakna leh theihna a ni lo tih kan player-te en khan ka hria a. Pathian hnathawh lo langchhuak leh kan tawngtaina chhanna niin ka hria a, ka lawm tak zet a ni.

Football club tan hian sum leh pai tha leh zung tam tak in seng a, hei hi channaah in ngai em?
Keini chuan channaah kan ngai lo reng reng. Sum leh pai tam tak chu kan seng ngei alawm. III Div, II Div, I Div thlenga kan kai theihna tur atan hian sum leh pai chu kan seng ve nual mai. Mahse, heng sum leh pai ka sente hi keini chuan missionary hnaah kan ngai a. Kan player thenkhatte hi chu sawi a mawi lo mai thei nachungin, camp chhuak hlim te te, inkhel lo se kawng dik lo lam zawh tur te pawh an ni mai thei a. Hengho nun chhanchhuahna atana sum leh pai kei nin kan lo seng ve te hi chu channaah kan ngai thei lo.

Missionary rilru pu chunga ka din te pawh a ni ve a. Kan insenna zawng zawng hi Lalpa tana kan insenna veah kan ngai a ni.

Mi hausa tak tak an tam a, club an din ve chuang si lo a?
Sawi tak ang khan keini chuan heng thil hi missionary rilru pu chunga kan tih a ni a. Midangte pawhin hetiang zawng hian ngai se chuan an ti thei lutuk ang. Keini aia nei an tam ang ka ring.

RC Khuma hi football tui ve hrim hrim nge Sports tui ?
Sports hrim hrim hi ka tui phak chiah lo mai thei a, mahse, football chu ka tui ve thin khawp mai. Kan tlangval laiin Shillong-ah kan khel ve nasa a. Veng khat aiawh leh club khat aiawh tih ang velah khan goal keeper ka ni ve thin a, a nuam ka ti ve thin khawp mai. Sports-ah rau rau chuan football bakah badminton , table tennis te pawh ka khel ve thin bawk a. Mahse, football ka tui ang em chuan ka tui phak lo deuhvin ka hria a. Amaherawhchu, sports ka tui dan chu kan khelh ve phak ang tawk kha nuam ti takin ka khel ve a, ka tui phak te pawh niin ka hria.

Football ni lo game dangah pawh in hming hian club a ding niin kan lo hria a?
Ni e, aw, kan phak tawk a tlem a, mahse, Mizo thalaite sports lamah kan promote ve theihna a nih beiseiin football club bakah hman deuh khan boxing club te pawh kan din ve a. Kan Boxing club atang hian Lalchawimawia te leh Zoramthanga te hian mite hmelhriat an hlawh chho ve a. Zoramthanga te phei chu khawvel huap inelnaah bronze medal a dawng ve ta hial a nih kha. Kan chhuangin kan lawmpui tak zet a. Chawimawia leh midangte pawh Mizoram aiawhin national championship-ah an khel ve bawk a. Kan chhuang khawp mai. Badminton club te pawh kan din a, Pahnianga te leh tuna sports department-a badminton coach ni ta |anpuia te pawh hi kan club-ah khan an khel ve hman.

Football club hi engtika din nge?
Football club hi Mizoramah chuan mimala din hmasa ber kan ni mai thei a ni, kum 1977 vel khan kan lo din ve tawh a. Kan club secretary hmasa ber chu tuna excise department commissioner ni ta Labiakmawia hi a ni nghe nghe asin.

Eng rilru puin nge football club chu in din ?
Kum 1975/1976 bawr velah khan football club awm kha chu department club deuh vek an ni a, chungho zinga khel ve phak chiah lo player tha tak tak kha an tam a, hengho tana inkhelh ve theihna remchang siamsak kha tul riauva hriatna kan nei a. Veng hrang hranga a thiam leh tha nia kan hriatte lawrkhawmin department club te el phak ngei tumin kan din ve ta rawih mai a ni..

Tun tumah hian veng mipuite tawiawmna in dawng tha hlein kan hria a...
Leitan Veng mipuite tawiawmna kan dawng tha hle a. Keini chhung te hi chu heti zawng hi kan ni mai a, veng mipuite'n min tawiawm tha lo se chu hetiang dinhmunah hian kan din phak pawh kan ring mang lo hial a ni. A neitu rilru an pu a, duhsakna nen tanpui kan ngaihna apiangah min tanpui a. A club hming tumtu te chu ni mah ila Leitan Veng mipui te ta a ni zawk mah mai thei a ni.

Sports chauh nilo zai lamahte pawh in inhmang niin kan hria a.
Zaithiam phei chu ka ni lo a, zai chu ka tui khawp mai. Kum 1958 khan Zampui tlangdunga zirlaihote nen group kan din a, AIR Shillong-ah te pawh hla te pawh kan khung ve, zai hi chu nuam ka la ti reng mai.

Zaithiamte pawh in pui nasa hle a ni lo'm ni?
Ni e, zaithiamho hi an fel hlawm a, kan theih tawk tawk chuan tanpui ngai nia kan hriatte chu kan tanpui ve thin a. Eng tham mah tihsak phei chu kan nei lo a. Kan tih theih a tlem viau chung hian tanpui ngai tanpui ngai ngawih ngawih nia kan hriatte tanpui chu a hlimawm riau asin.

Tun tuma in club inkhel kha vawi khat tal i en ve em ?
A en lam hi chu ka ti vak lo. Ka hnaah hian ka buai tawk em a, a hmuna ka en ve chuan ka tang dawn lutuk a, chuvang chuan dawr lo nghah mai hi tha zawkin ka hria a. Ka en ve ngai lo. Kan nu hi ka aiawhin a thawkchhuak ve zauh zauh a, ka ai a awh zo khawp mai.

Read more...

TAKSA HRISELNA

¢ Debbie Chawngthu

Mi thenkhat chuan vitamin kan mamawh ang bawkin minerals, iron, calcium leh zinc te hi kan mamawh tih kan hre kherin a rinawm loh. Minerals hi kan taksain hna a thawhna chi hrang hrang atan a pawimawh a, kan taksain a siam chhuah theih loh avangin tui kan in leh chaw kan ei atangin kan hmu thei thin a ni.

Calcium hi ha hrisel nan leh ruh chak nan kan mamawh a. Bawnghnute, bawnghnute atanga ei tur siam te leh thei pilsak (nuts) atangin calcium hi a hmuh theih a. Tin, iron hi mipa aiin hmeichhiain ka mamawh zual a. A hmuh theihna te chu sa thin, sa leh wheatgerm atangin a ni a. Zinc hi chu sa, sangha, thlai hring, thei pilsak leh thlai chi atangin a hmh theih a ni. Heng te hi naupang thang lai tan a tha lehzual a ni.

Kan taksa zaa sawmhnih vel hian protein a mamawh a. A pawimawh avang hian thanglai te phei chuan an mamawh lehzual. Vun, sam, tin, tihrawl leh taksa bung hrang hrang tan a tangkai em em a ni. Protein kan hmuh theihna te chu artui, bawnghnute, sa, sangha, buh(whole grains), bean etc. te an ni a. A engemaw tal hi chu kan nitin chaw eiah tel thei se a tha.

Taksa chak tur chuan carbohydrates hi kan mamawh bawk a. Chhang, alu leh cereal-ah te a hmuh theih a. Mahse a tha tih vanga ei tam lutuk chi a ni lova, i ei tam lutuk chuan chaknaa kal lovin thauah a kal zawk daih thei a ni. Biscuits leh cake-ah te pawh a awm tho na a, heng te hi chuan taksa a ti thau duh a ni. Beans leh thil chi (seeds) chiah puam ah hian vitamin leh mineral a tam em em a. Chakna a tam avang hian infiammi te phei chuan an ei uar hle a, naupang thanglai tan pawh chakna petu tha tak a ni bawk.

Exercise hi taksa nalh tur leh hrisel tur chuan a pawimawh em em a. A hnuaia mi ang hian ti la, i hriselin i nalh phah ngei ang..

KAWNG LEH DUL TAN :

1) Leg Lift: Mu zangthal la, i kut suihin i lu hnuaiah dah rawh. I ke pahnih ngil takin dah la, zawi te te a ti chhoin ti thla leh riai riai ang che, i ke artui kha lei sik tir ang che. Hetiang hian vawi nga ti ang che.

2) Toe Touch: Thu la, i ke ngil takin dah rawh. I ban i lu chungah ngil takin phar chho la, i ke zungpui khawih pahin thawk la la, zawi muangin thaw chhuak leh ang che.

3) Swivel: I ke kakin ding la, i taksa ngil takin awm tir la, i ban inzawn chiahin ngil takin phar chhuak rawh. I ke tawm che lovin, i kut ding lamin i ke vei lam zuk khawih la, hetiang bawk hian i kut vei lamin i ke zungpui ding lam zuk khawih leh la, vawi sawm ti ang che.

DUL TIH THEP DAN :
Chhuatah mu thluang zar la, i ban tlemin phar chhuak la, i kutphah van lam hawi zawngin dah la, i ke ngil takin dah bawk rawh. I ke pahnih chu chhuat atanga inches tlemte a sangin ti chho la, i tihsan lai khan lei thleng si lovin i ke ding lam ti thla la, vei lam tichho thung rawh. I ke vei lam ti thla leh la, ding lam tichho ve leh la, i hah hma chu ti ang che.

KAWNG TIH FEK DAN :
Ke kakin ding la, i ban dah thla rawh. I taksa ding lamah awn la, hetih chhung hian i ban veilam zawi zawiin ti chho la, i beng dinglam va khawih rawh. I tih zawhah ngil takin ding leh la a hmaa i ding lama i tih ang chiahin i vei lamah ti ve leh rawh.

HEALTH TIPS;
• Thlai hring leh thei ei tam la, thei tui leh tui in tam ang che.

• Chaw i eiin puar lutuka ei lovin pai nuam tawk chauh ei thin ang che.

• Carbohydrate tamna-wheat leh buh(rice) ei tlem la, thil thlum ei tlem bawk ang che.

• Sa ei ngai lo i nih pawhin i taksa mamawh tawk protein i hmuh theih nan bawnghnute leh paneer tal ei thin ang che. Artui chhum leh sangha ei tam hi a tha bawk.

• Balhla leh theihai hian thau a siam thei a, ei tam lutuk loh a tha.

• I chaw ei inkara i ril a tam anih chuan riltam hnemah carrot emaw fanghma ei thin la, i taksa tana a that mai bakah riltam hnemtu tha tak a ni bawk.

• Cher duh vangin chaw nghei lo hram ang che. Buh(rice) i ei lo anih chuan atta kan te pawh hi a tha viau mai, artui pum khat leh bawnghnute pawh hian kan taksa mamawh ang chu chakna a pe thei bawk.

Read more...