Monday, September 28, 2009

Kalvari Hospital: Setana beih letnana thiltihtheihna mak

¢ Vanlalremruata Tonson

Synod Revival Speaker nupui a ni a, a hun tam zawk chu nunkawnga harsatna tawk leh tanpui ngaite tanpui nana an din Mission Foundation Movement-a hna thawka awmte leh missionary training-a awmte zingah a hmang thin. Ama theihnaah chuan rawngbawlna hrang hrangah a inhmang ve tihna a nih chu. Mipui nawlpuiin an hriat hma daih 1995 atang tawh khan damlote tana tawngtai rawngbawlna chu a lo kalpui tawh thin. Damna beiseia pantu pawh an awm fo. Mahse, tihdamna mak tak mai lo lanchhuah tak takna chu April ni 5-a Lalremtluangi a tawngtai atang khan a ni.


Wheelchair hmanga chesawn tur pawha midang puihna mamawh Lalremtluangi chuan B Lalremtluangi tawngtaina avangin damna a chang a, tunah phei chuan Arunachal Pradesh-ah Missionary hna thawkin a kal daih tawh nghe nghe. Mahse, chu pawh chu chawlh hahdamna hun pawh nei hman lo leka mipuiin an bawh buai intanna tak chu a la ni chuang lo.

"Chanchinthar han ngaihthlak hian Pathian hnathawh ropui aiin a chhe lam hi a lang tam lutuk a," tiin B Lalremtluangi chuan a rilru nat thin thu a sawi.

Pathian hnenah a tawngtai thin a, Pathian ropuina lanchhuahna turin a dil thin. Zoram pumah Pathian ropuina langchhuak se tih a duh ngawih ngawih a, a tawngtai thin lai chuan Setan-a betu nia insawi tleirawl pakhatin zanreh, mi awm loh pawh ni lo, chhun engah Vaivakawn biak in a suasam leh chiam a, chumi thuin a han deng chu a rilru a na leh zual a, Roreltute 16:28 thu "Aw Lalpa Pathian, khawngaih takin mi han hre reng langin, khawngaih takin tun tumah chauh hian mi han ti chak la..." tia Samsona tawngtaina thu hmang chuan a tawngtai ve leh ta a ni.

Mu thei lo hial khawptea a tawngtaina chu chhanin a awm a, Pathian aw chuan eng tianga tanpui nge a duh a zawt niin a hria a, a chhan leh hma chuan Pathian aw bawk chuan tihdamna hmanga a tanpui a, a tihchak tur thu a hrilh leh niin a hre bawk.

Zinga a tho chu nula pakhat hian a lo nghak a, tawng thei lo, doctor-te an beidawn tawhna, a hming Beireidi a ni. A tawngtai a, a kut chuan a hrawk chu a lo hiah sak a, damna chu a chang ta a ni.

Chumi ni chuan mak tak maiin mi dang pawhin an pan a, rawngbawlna chu an chhunzawm zel a, a tuk leh zinglam dar 3-ah chauh chawlh hahdamna hun a nei thei. Tichuan Kalvari Hospital chu a intan a ni ta mai.

Bawngkawn Hmarveng Presbyterian Kohhran Hall-ah, tlema dawhsan carpet sen a inkhuh, han en mai pawha tlawm tak, a hnung lama Kraws-a khenbeh Isua lem, a chunga INRI tih inziak intar chu operation table a ni mai a, a bulah thutthleng sei char khawng tak tak, hniam te te a inrem that bawk. Chutah chuan operation nghaktute an lo thuin an lo mu thin.

Tihdam rawngbawlna chu kar lovah midang pawhin an hre ve chu a ni nghal mai a, thil dang zawng zawng tlansanin tihdam rawngbawl hna chu a thawk ta a ni. Pathianin tihdam rawngbawlna a pek a, mak tak maia a tawngtaina avanga mite an lo dam tak hnuah chuan Synod tirha revival rawngbawl hna kalpui mek, a pasal R Vanlalzauva pawh a rang thei ang berin chanchin an han hrilh a, ani pawhin hmanhmawh takin amah tawiawm tur chuan in lam a pan ve a, a programme duan lawksa dangte pawh a thulh ta vek a ni.

"Khawsak a inthlakthleng vek," tiin B Lalremtluangi chuan damna mamawhin an chimbuai zui tak dan chu a sawi nghe nghe.

MFM hmalakna hnuaia hnathawkte'n hna an thawk thei tawh lo a, damna duha B Lalremtluangi pantute an lo buaipui ta ringawt mai a ni. Ni khatah mi 400-500 vel tawngtaiin a lo khawih thin a, chuti chung pawh chuan an chenna, Bawngkawn-a Ngama Building hmun awl lai zawng zawngah amah nghaktute an khat deuh reng a ni ber.

Eng tin nge rawngbawlna chhawrtu mipui an tam ber theih ang tih an ngaihtuah a, hming ziak phawt mai thain an hria a, mahse, mi tam takin tawngtai sakna hun chu an chang leh thin lo a, hmun hla tak atanga Pathian tihdam beiseia pan tang tangtute a thlawna haw tir leh mai chu an ngam si lo. Kar lovah 30,000 an tling a, chawlhkar khatah ringawt pawh 25000 te hming ziak an awm hman.

Hming ziak pawh chu tihchi niin an hre leh ta mang lo a, a serious apiang te, a thleng hmasa apiangte khawihin a tawngtai a, hming ziak lo bawk chuan an ti leh ta a ni. Tlaiah an han bang chiah a, a tuka mi turin an riak lut nghal a ni zel mai si. Riahchilh tawpte an awm takah chuan an hmunhmain a tlin leh ta si lo a, card an siam ta ngawt mai. Chu chu Bawngkawng Hmarveng Presbyterian Kohhranin an buaipui a ni.

Mipuiin an han chim tak tak chuan puitu a mamawh a, mihring chu an awm mai. A rawngbawlnaa tihdamna chang hmasate chuan an buaipui deuh chawt a, chu bakah MFM-a an naute pawhin an buaipui thei. Dik chiah chuan khatia mipuiin an chim hnuah kha chuan missionary training hna pawh kalpui ngaihna a awm tawh lo.

"Tui kan indaih lo nghal," tiin Lalremtluangi chuan mipuiin an chim hnua harsatna an tawh chungchang a sawi a; inthiarna a buaithlak nghal phawt a, chutah thenkhat chuan commode an lo hmang thiam lo a, ek in chu a hnawh ta der mai.

Chaw ei tura in lama haw leh hman lo te, haw ngaihna awm lote an ni hlawm. Engmah ei leh lo leh in lova indah ngawt chu thil theih a ni lo. Amah puitute tan pawh in lama haw hman a ni lo. Rei lo teah anei tur neih zawng zawng pawh an ei zo chu a ni der. Hnathawh ngaihna a awm der si lo.

Chaw ei duh lo pawh thingpui ilo tal pek a lo ngai a, "Khawmpui kan thleng reng ang hi a ni ringawt mai," Lalremtluangi chuan a ti nghe nghe.

Duhthlan tur dang vak a awm thei lo, anmahni ngawtin an tlin loh chuan Kohhran pun mai a ngai a, September ni 4 atang khan Bawngkawn Hmarveng Presbyterian Kohhran Hall lamah an insuan ta a ni. Kohhran pawh chuan inthiarna pawh pathum ngawt an siam belh nghe nghe a, thil a kal fel zawk beiseiin tumah riah loh ni se an ti bawk.

Kalvari Hospital chu Bawngkawn Hmarveng Kohhran hall lamah chuan sawn a ni ta a, Kohhran chuan engkimah an buaipui zui ta a ni. Zinglamah rawngbawlna tan dawnin zing dar 9.30-ah Kohhran Upa-in hunserh a hmang phawt a, chumi hnuah Synod Revival Speaker R Vanlalzauva chuan damna sermon a thlak leh te te a, a changin Lalremtluangi pawhin damna sermon han tuihnih chang pawh a nei a, amaha Pathian thu a lo chhuah dan a ni ber. Tichuan, tihdam rawngbawlna chu tan a ni ta thin a ni. Tlaiah Kohhran Upa bawkin rawngbawlna chu chumi ni atan chuan a kharna hun a hmang thin.

Kohhran Hmeichhe bultumin biak in lamah damna tawngtai an nei reng a, choka lamah damna mamawhte thingpui lo lum sak leh thil tul dang buaipuiin mi thahnemngai an lo hnatlang reng bawk. "A… 30-40 vel chu kan hnatlang ni tin maiin ka ring," tiin he hnatlanga kal thin nu pakhat chuan a sawi.

Kohhran Upa panga chauh awmna, member tam vak bawk si lo chu an hah hle a ni.

"Sorkar hnathawkte tan hi chuan awmpui reng theih a ni lo a," tiin Upa Rinthara chuan midangte chuan hna an thawk hman meuh lo niin a sawi.

Tihdam rawngbawlna kalpuitu ber chu mihring taksa chau thei a nih avangin a hriselna chu a tlahniam ve a, Kohhran chuan rem an han ruatpui ta a, chawlhkara khatah Nilaini leh Inrinni chuan rawngbawlna hi chawlh a ni ang a, chumi ni chuan tawngtaia khawih turte hnenah card sem a ni thin dawn a ni.

Card hi mi pakhatin pakhat a lak theih ang a, damlo kherin a lak a ngai lo. Mahse, mi pakhatin pakhat lak tur a nih avangin inlak kep theih a ni lo a, laksak tur nei chu intlar ngei a ngai bawk.

Zing dar 6.30 atangin card hi an pek chhuak thin nain Nilaini atang chuan card hi chhun dar 1 atangin an pechhuak chauh tawh dawn a ni.

Riah chilh an tam thei lutuk a, chawhnu lam atanga an pekchhuah chauh chuan riahchilh hi a rem tawh dawn lo a, damna beiseitute tan pawh riahchilh em em lova tih dan a awm thei dawn niah Kohhran chuan an ngai niin Upa Rinthara chuan a sawi.

Card semchhuah nana Nilaini leh Zirtawpnia an chawlh dawn bakah tun hmaa ni khat atana card 300 an pek chhuah thin chu 200-ah an titlem dawn niin Upa Rinthara chuan a sawi a. A mamawhtu damloten tan tihdam rawngbawltu a hrisel hi a that zawk an rin avanga hetiang hi ti an nih thu Upa Rinthara chuan a sawi bawk.

Upa Rinthara chuan card siam ringawt pawhin anni Kohhran tan chuan thil awlai tak a ni lo niin a sawi a, an dinhmun hrethiamin Upa L Ramthanga, Mission Vengthlang-a mi chuan chhut fel sa thlap engemaw zat a pe tawh niin a sawi. Thilpek neuh neuh an dawng nual niin a sawi a ni.

Rawngbawltu hian damlo chulh atan Olive Oil a hmang thin a, chu pawh Bawngkawna mi Pu Liana te chuan engemaw zat an pe tawh niin a sawi bawk.

Hei bakah hian Kohhran chuan 'Lawmthu sawina Thilpek' bawm an siam a, chutah chuan dama chang leh chang lo, a duh apiangin rawngbawlna atan sum an thlak thin a ni. Tam tham leh sawi uar tham tak phei chu a tla lo. "Rs 10 a tam ber a, Rs 1000 te pawh a tla tho," tiin Upa Rinthara chuan a sawi. Ni khatah Rs 3000-5000 a tla deuh ber niin a sawi bawk.

Bawma pawisa tlakhawmte chu Kohhranin Kalvari Hospital atana an senso atan an han hmang phawt a, chumi hnuah a chuang a awm a nih chuan rawngbawltute chu an pe ve leh a ni.

"Kohhranin rawngbawltu kan rawih pawhin thawhlawmte kan khawn sak thin tho a, anni pawh hnathawk hman miah lova awm an ni a, a awm e, kan ti mai," Upa Rinthara chuan a ti.

Kalvari Hospital rual hian thlarau chhandam rawngbawlna kalpui a ni a, non-Mizo Christian pastor John Sharma leh Synod Gospel Team-a mi Upa Rualkhuma te'n counselling mamawhte hi counselling an lo neihpui thin a ni.

Kristian ni lo sakhaw dang zawmtute zingah Kalvari Hospital avanga Kristian-a inlet ta an awm nual, inlet turte hi an thlem ngai lo a, Kristian nun dan an hrilh hnuah an duh tho a nih chuan inlehtirin Baptisma te an chantir thin niin Upa Rinthara chuan a sawi.

Sakhaw dang atanga inlet hi mi pasarih an awm tawh a, chung zinga thenkhat chu Buddhist atanga inlet an ni. Amar Sindhu, Marpara chu Buddhist puithiam ni tura training zo tawh a ni a, tihdamna a chan hnuah a puithiam puansen pawtthlerin Kristian-ah a inlet niin Kalvari Hospital chuan an chhinchhiah.

Kaichia Chakma, kum 65 mi chu pumpui cancer, bawk lian tak awm a ni a, pawn atang pawha hmuh theih khawpin a bawk hi a lian. Damna changin Kristian-ah a inpe a, a bawk chu an zawn ngial pawhin an hmu tawh lo.

P Arita Chakma, staff nurse, Chawngte-a mi pawh khup na avanga kal thei lo, AIIMS, New Delhi te pawh lo pan tawh niin, doctor-te pawhin a dam leh an beisei loh a ni a, a dam a, baptisma changin Kristian-ah a inpe.

Agogi Chakma, Sodip Priyo Chakma leh Suprio Pudi Chakma te pawh tawngtai sak an niha damna an chan hnuah Kristian-ah inpein damna an chang.

September ni 22-ah khan Chakma, Buddhist atanga Kristian-a inleta Baptisma chang mi 12 an awm a, an vaiin Kalvari Hospital rawngbawlna avanga Kristian-a in let mi 19 an awm ta a ni.

Kalvari Hospital-a damna chang hi eng zat chiah nge hriat theih an ni lo a, a then chu a hmuna chawp leh chilha dam an nih laiin a then chu a hnu fea damte an ni. Cancer natna vei, dam ta 300 chuang an awm a, bengngawng leh tawng thei lo 300 chuang fe leh zeng lam chi 200 chuang fe an dam tawh niin a buaipuitute chuan an hria.

Doctor beidawn tawhna Kalvari Hospital-a damna chang sawi tur an awm nual a, doctor- thenkhat chuan an damlo thenkhat chu Kalvari Hospital pan turin an lo rawn niin a buaipuitute chuan an sawi bawk.

Saldar Suren (50), Chhiahtlang Chhimveng-a mi chu lirthei accident avanga spinal cord chhia a ni a, doctor chuan a damchhunga a kein lei a rah leh tawh a rin loh thu a lo hrilh tawh. Mahse, Kalvari Hospital atangin dam takin a haw leh.

Rabindra Kumar pawh thluak TB avanga zeng kawm vek tawh a ni a, a kal leh beisei ngaihna a awm lo. Kalvari Hospital-ah a tiang hawl paihin step 100 lai kein a kal nghal.

Tetei, Chalrang khaw mi, Dinthar, Aizawla awm mek chu thluak sawng niina doctor chuan ram dangah kalpuiin cheng nuai 50 vel sen chuan a dam leh mai thei tiin a lo hrilh tawh a, Kalvari Hospital-ah damna a chan hnuah hun eng emaw ti chhung chu B Lalremtluangi a pui a, chumi hnuah an khuaah hawngin rawng a bawl ta.

Hmeichhe that lohna – thi put reh thei lo, thi nei thei lo leh nau pai thei lo engemaw zatin an dampui tawh a, nau pai thei lo tawngtai sak mi pahnih nau an pai thu an va hrilh tawh niin B Lalremtluangi chuan a sawi.

K Lalremsanga (13), Durtlang Leitan-a mi chuan 'sachin' a hak a, Durtlang leh Civil Hospital-ah an en hnuah an hmu lo a, Civil Hospital lam chuan natna dang neiin an hria. Zanah thaw hlei thei lo tein a awm thin a, Kalvari Hospital-a an va hruai chuan B Lalremtluangi chuan a chuapah bawlhhlawh a awm niin a lo hria a, a chhuah tur thu a lo hrilh bawk. Zanah a chuan sachin tlang chu a chhakchhuak a, a tukah sikul kalin a dam ta a ni.

Lalramchhana, Dinthar-a mi chu kal tha lo a ni a, thuah reng ngai a ni. A nuin harsa tak chungin a kal thuahna tur inhlawhin a ngaihtuah sak thin. Mahse, ral atangin Kalvari Hospital damna a lo chang a, inhlawhin a chhuak thei tawh niin Kalvari Hospital chuan report an dawng.

Zokima chu a kephah chung lam pan chhe vek tawh, uih hial a ni a, Kalvari Hospital panpui a nih hnuah B Lalremtluangi chuan a kut pawha khawih lovin pheikhawk bun chungin a kein a lo rap a, a tawngtai bawk a, a dam mai. ITI venga Lalrengi chu khawih a nih khan khur hlawk hlawk a mit a var mai bawk.

Setana betu zingah pawh Kalvari Hospital chu dampui an awm tih report an dawng niin Lalremtluangi chuan a sawi. Mi pakhat chu Setana sakhuaa nghet taka awm niin, sap rama mite nen pawha Setana thiltihtheihna hmanga inzawmna nei thei nia insawi a ni. Mahse, chu chuan Kalvari Hospital-ah hian damna a chang tih an hria a, Setana ram thiahna nia hriain a lawm hle.

Kalvari Hospital chuan Mizoram leh India ram pawn lamah pawh hriat a hlawh hle tawh a, Burma, Malaysia,Australia, USA, Delhi, Korea, Bangladesh, Manipur leh hmun hrang hrang atangin tawngtai pui tura ngenna an dawng nasa hle a, an chhinchhiah dan chuan hetiang hi 50000 a tling tawh a ni.

B Lalremtluangi chuan damlo a khawiha a tawngtai hian an natna te hi a sawi chhuak zung zun thin a, an tun hma hun thlenga sawi zung zung chang a nei thin. Hetiangah hian inngaihtuah lawkna hun a nei lo a, a kaah hian chu'ng thil te chu a rawn chhuak mai niin a sawi.

Kalvari Hospital vang hian amahah danglamna a awm a hre lo a, ropui intihna emaw han chhuan tur emaw a neih a hre lo. Pathian chhiahhlawh, 'steering' anga duh duha herhkawi mai tur niah a inngai tih a sawi. Tihdam rawngbawlna chu ama ta ni lovin amah kaltlanga Pathian inpuanna-ah a ngai a ni.

Kumin kum tir lam khan a ngaihtuahna chu chawmawlh vekin a hria a, thil kal tawh hnu pawh engmah a hre mumal lo a, thil tih tur tul pawh a hre vak lo niin a sawi.

"Bazar tur te ka theihnghilh thin a, ka fapa phei chuan mi nute chu an bazar thin, chawhmehte an lei thin a, ka nu chu bazar nachang pawh i hre ve lo, min ti a. Tih ve chu ka duh lutuk, mahse, ka mawl vek a, a nachang ka hre thin lo a ni," a ti.

"Ramthar-ah kan va kal a, kum sarih zet kan awm tawhna a ni nain kan awm lai thil engmah ka ngaihtuah chhuak thei lo," a ti bawk.

A thian pakhat hnena a awm dan a sawi chuan Pathianin a hmang dawn a nih a rin thu a lo hrilh a, "Ka mawl em em mai a, Pathian thlarauin min awmpui hi chuan ka fing leh em em si niin ka hria," Lalremtluangi chuan a ti.

Read more...

Eng vangin nge Traffic a jam? Duat hlawh lo Aizawl Khawpui

¢ Vanlalremruata Tonson

"A pawi ngawih ngawih a ni, sorkar leh mah ila tih ngaihna ka hre tawh lo. Lir lo nghing se mi tam tak an thi ang a, a rapthlak lutuk. Kei zawng chutih hunah chuan ka dam tawh kher lo ang. Kei chu ka upa tawh a, ka thi mai dawn a. |hangthar lo awm turte hi an ni…," tiin Brig T Sailo chuan a sawi a, a hmai zut thuak thuak mai.


A ban vei lam phar chhuakin, a in chhung atangin a in a kawk a, "Kei chu hei in ka lo nei hman hlauh mai a, ka vannei hle," a ti.

Aizawl khawpui chu Luangmual lamah tawlh thlain, ram leilung rualrem zawkah a awm ang. Bairabi Hydel Project kalpuiin Tlawng lui khuah a ni ang a. Tichuan Sairang chu port (Lawngchawlhna) tenau a lo ni ang a. Bairabi-ah rel a lut dawn bawk a, Mizorama bungraw thiar velna man pawh a tlawm hle dawn a ni. Khawpui lah chuan Sairang-a lawng chawlhhmun chu a hnaih hle ang a, kawngpui lah chu tha tawk takin sial a ni bawk ang. Chu chu PC sorkar laia chief minister Brigadier Thenphunga Sailo thlir dan a ni. A hlawhtlin loh zia chu a chiang hle awm e.

Aizawl khawpui chu kham karah an uai tang a ni ber a, kham kara in sak chu a hautakin a rit lo thei lo tih chu tlang hriat a ni. Kum tin furpui a lo thleng a, lei min vangin chhungkaw tam tak an buai thin. Tih ngaihna a awm lo chu a nih ber hi. Lir hi a nghing a nih vaih chuan in nei lian leh nei tha apiangin an chan nasa mai dawn ni awm tak a ni. Thenawm nei changkang apiang tan a hlauhawm bawk ang. Zar inzo rau rauah a hlauhawm pawl tak a ni awm e.

Chung zawng zawng pumpelh tura beih chu kum 100 kal taa zirna pangngai hmelhriat ve chauh leh 'civilised society' nena inhne (contact) ve chauh tan chuan thil theih a ni lo a ni mai thei. Tuihawk luankawr mumal lo chuan ram a tichhia a, mahni ram chin humhalh tumin silpoline-in lei an khuh a, a khuh phak loh chinah chuan leimin tur a insiam leh thin.

Kawngpui a tawt a, kawngpuiah ngei chuan hnathawhna tur hun tam tak a ral thin. Mipui punkhawmna lian deuh chu Aizawl khawpui lunlaia Assam Rifles lammual leh Vaivakawna YMA field-ah te hman a ni thin. Khawiah pawh ni se, chutiang punkhawmna puithamah chuan mihring traffic
thlengin a 'jam' tawh. Sumdawnna thlenga nghawng lo thei a ni tawh lo. Kawngpuite chu han zauh dawn ila, sorkar pawhin an zah tur leh sorkar siam tura party khaidingtute chu kawngsirah an ding khup a, tu tan mah han tawh chet ngaihna a awm tawh lo. A pherh vel vek.

Sipai officer hlui Brig T Sailo chuan thui tak a lo thlir a, a hun lai boruak ni lovin khawvel hmasawnna avanga thil danglam chak dan a hmu a ni. Engtin nge mipui kha zozai Luangmual lama an tawlh thlak duh ang? Chu ai chuan tuna Aizawl khawpuiah hian inbengbel ila, sum sen pawh a tlem zawk ang. Civic amenities awmsa tam tak i chhawm nghal thei dawn si. Mahse, a chiang chho ta zel a, khawpui tawt hahthlak tak karah kan innek nulh nulh a, in hmun rualrem lo zet zet pawh kan awt ngawih ta chu a nih hi.

"Kum 1982 velah khan Aizawl khawpui than dan tur ka thlir a. kha tih lai kha chuan Chanmari-Dawrpui-Kulikawn tlangdung mai hi a ni a. Kan thang chho zel dawn a ni a. heti hian kan awm kumkhua thei dawn lo, zauh a ngai a ni, ka ti a. Hmar lamah chuan Durtlang kham a ni mai a. Chhim lamah Ngaizel kham a ni leh mai a. Zemabawk lamah Zemabawk piahah hmun a awm lo a. Tanhril lam chu a awm chhun a ni mai," tiin Brig T Sailo chuan khawpui zauh tura ruahmanna a siam dan a sawi.

"Pawisa Delhi-ah zuk sawiin, central minister, urban changtu ka sawm a, khawpui awm dan tur ka thlirpui a. 'Go Ahead' min ti ta a. 'Estimate in siam ang a, pawisa kan provide thei ang che u' min ti a," tiin Brigadier chuan hna an tan zui tak thu leh ram pawh a tul anga an lak thu a sawi.

"Mi an tha a, 'ram tan' an ti a, compensation pawh an phut tam lo," tiin sorkarin ram a lak (acquire)-ah pawh harsatna an tawk lem lo niin a sawi.

"An ti tawp ta hmiah a. A mak hle mai!" tiin a ruahmanna leh bul an lo tan tawh, Aizawl khawpui thawl tha taka a awm theih dan tura a ngaih, kawng pawh thui fe an laih tawh hnua 1984-a an tlak avanga chhunzawm tak loh chu a ui thu a sawi.

A tawp chhanah hian 'mi pakhat chiah' mawhphurtu an awm a ti a. Chu mawhphurtu erawh a sawi lo.

Chu chu vision ropui tak neitu vision a ni. Ani chuan a hun laiin mite pawh an tha hle niin a hria.

Mahse, PC sorkar thlaktu Congress ministry-a minister pakhat chuan town expansion project kha a that rualin sorkar hmasa khan ram an 'acquire' pawh a ram neitu nihna an la tel lo, sorkar hmun han bun tak tak dawn chuan ram a hrana lak (acquire) leh a ngai thin niin a sawi.

Department hrang hrang awmna tur hmun te pawh an ruahman a, tuna Home Guard hmunte pawh a ram neitu te lak atangin an lei a ngai leh tho niin a sawi bawk.

Sorkar hnathawkte awmna tur quarters engemaw zat sorkarin a sakna hmun, Aizawl khawpui zauhna tur, Government Complex tia hriat lo ni taah chuan tumah an awm duh lo a, a awm chhunte pawh thingtlang atanga khawpui lut, khawpui chhunga in luah ngam lote an ni zawk a, kum 1983 khan a luah tur an awm meuh lo. Mahse, khami kuma Sihpui a min vak avanga awmna tur in nei lote leh Vaivakawn khi vak avanga hmun him zawng te sorkarin a dah chiam atang khan mumala luah tan chauh a ni. Chhiattawh avanga complex-a inbengbelte chuan he hmuna awm hi an hreh hle nia sawi a ni nghe nghe. Tam tak chu a hnuah an chhuak leh a, chhuak leh ta lo an awm a, anmahni belhchhahtu an awm bawk a, tunah chuan chhungkaw 150 chuang fe an awm ta.

Government complex-a sorkar hnathawk ni lo awm hmasa ber T Laldikzuala chuan Complex-a sorkar in tur PWD-in an sak khan an hotute chuan thingpui dawr siamsak turin an sawm thin a, an awm nghet theih dan tur te pawh ngaihtuah pui an inhuam hial hnuah thingpui dawr siam
tur chuan an chhuk ta niin a sawi. Tichuan sorkar hnathawkte awmna hmun tura siam complex-ah chuan tumah an awm duh lo a, hnathawkte'n thingpui dawr tal mamawhin an inhre bawk si a, sorkar hnathawk lo chu a awm hmasaah an tang ta a ni.

Chhiat tawh vanga tlankhawmho chu mahniin an inrelbawl ve a, 1987-a Luangmual VC-a nominated seat pakhat pek an nih hnuah 1990 khan VC puitlingah hlankai an ni. Sorkar hnathawk rual awm khawmna turah chuan chhiattawh vanga tlankhawm hovin khua an din a, political party a ding ta bawk!

C Pahlira, Mizo Union sorkara Executive Member (EM) ni thin pawhin Aizawl khawpui leh Mizoram tan thlirna leh ruahmanna thui tak neiin, chu ruahmanna tih hlawhtlin tum chuan hma a lo la chiam tawh thin.

Aizawl khawpuiah hian mi nuai 5 vel tal cheng khawm se, chutiangin khawpui dang engemaw zat pawh awm se, mihring nuna ni tin mamawh hrang hrang (civic amenities) chu sorkar hian tha tawk takin dah se, mipui tan khawsak a awlsamin eizawnna pawh a remchang zawk em em dawn a ni, tiin a ngaihtuah thin.

Mi nuai 5 vel chen theih nana Aizawl khawpui ruahmanna siam tum chuan ni tin tukthuan pawh ei hman lovin a thawk chhuak thin, a hlawhtling ta lo mai pawh a! Mi nuai 5 vel lo la cheng turte tana inkalpawhna kawngpui tha tak a awm theih nan kawng zawngin a thawkchhuak ni tin a, ram sem dan tur ruahmanna te chu a buaipui hle.

Ram an sem a, a kawng tur an ruahman bawk. Chu ram sem feet 100X60 chu kawngin a pawh a ngai. Ram neitu chuan jeep kal theihin ama kawng tur a insial tur a ni. A ram thleng kawng a sial hnuah district council sorkar chuan 'pass' siam sakin a lo pe chauh thin. Sorkar sumbawm a hranpaa sawk hek lovin kawng engemaw zat chu sial zawh a ni ta hial mai. Mahse, harsatna dang a la awm ta cheu; ruam leh kawrin kalkawng a dangchat a, inkalpawh mumal theih lohna hmun a awm nual. Sorkar atangin chung ruam leh kawr chunga lei dawhna tur sum chu beisei ngaihna a awm si lo. Lei tel lo chuan kalkawng hi kalkawng a tling lova, chutah pawh, thing dawh kai ringawt ni lo, hautak zawka siam te a la ngai leh ta nghal. Kawng siala ram neitute hnenah chuan 'cheng 50 zel rawn thawh rawh u le' an ti ta ringawt mai. Anni pawhin phunnawi lovin an thehkhawm liam liam ve mai bawk. Mahse, sorkar sumbawmah erawh an thehlut phal lo. "Sorkar sum chu hman leh dawnin dan zawm tur tê tê a lo awm a, a buaithlak," tiin thlirlawktu C Pahlira chuan a sawi. District council-a an head clerk hnenah an pekhawm a, ani'n him takin a lo vawng a, chu chu ruam leh kawra inkalpawhna tur siam nan an hmang ta a ni.

Mi nuai 5 pawh an len halh halh theihna tura riruat Aizawl khawpui tur chu a zau tham hle; chhim lamah Melriat, Hmar lamah Sihphir, chhak lamah Tuirial, thlang lamah Sairang. Mahse, chu chu riruatna mai a nihna chen a awm, kawng zawnna chin chu chu ai chuan a zim zawk deuh. Zim zawk deuh e ti lovin kawng zawn chiah lohna hmunah pawh ngaihruatnain kawngpui tur chu ruahman a ni tho. Dik tak chuan kawng zawnchhuah sa tam tak chu sial pawh sial zawh loh a ni a, a then chu hnawhpin leh te a ni bawk. Chutih laiin, kalkawng sira kawngpui la zauh zelna tur feet 15 reserve thin pawh kawngthlang lam chuan an nek lui ve zel bawk si. Kawngpui anah In a ding fur a, motor chesualin a su leh bur thin a ni. Venghnuai field atanga kawngpui rawn kala, Republic-a rawn phei, Venghlui rawn tan tlanga Babaji venga kal zel a, Lammual hnuaia kal zel, Modern English School bul kawng kawi lai taka chhuak tur pawh tun thlengin a la lang tlang lo a nih hi.

Sorkarin Lammuala Jawaharlal Nehru Sports Complex sak a tum lai khan chu kawngpui ruahmanna awm sa zui chuan, mahse, Babaji Venga chhuk thla lova Dak Inpui sira Treasury Square pawh turin kawngpui siam chu a tum ngei. Mahse, chu pawh chu engmah a ni leh ta chuang lo. Tlak lampang kawngpui, CP Road tia vantlangin a sawi mai, Khatla kawna chhuak tur pawh Assam Rifles lamin an hnawhping leh tawh bawk.

Rambuai hma chuan New Market a awm lova, Nilaini leh Inrinni-ah te Sabji Bazar a awm thin. C Pahlira chuan chawhmeh zawrhna bazar neih tulin a hria a, Delhi khuan Aizawla sipai ram zau tak mai chu chuti teh luain a ngai pawimawhin a hre lo bawk nen, Aizawla Assam Rifles commandant a dawr ta a ni:

"Sakawrpu lane hi in sawnchhuak tur a ni. Sipaiah lal ber i ni a, kei civil-ah ka thu ber bawk. Keini pahnih kan inrem chuan a tawk mai," tiin a sawi.

Sipai lal pawh chuan a lo aw ve mai bawk. Assam Rifles-te chuan tuna New Market-a an sakawrpuho chu Babaji Veng lamah an sawn thla ta a, Sakawr inte chu chawhmeh zawrhna tura chei a lo ni ta a ni. Dawrpuia dawrkaite chuan tih rih loh an duh a, mahse, nakinah a la tawt thuai dawn avangin sabji bazar neih chu a tul si. Chu chu New Market intan dan a ni. Dik tak chuan New Market hmun tur pawh tun aia zau fea ruahman a ni. Mahse, sorkar tharte a lo piang chho a, ram an inpe darh zo ta a ni awm e. Aizawl khawpui hi ruahman anga a kal a niha, a thang zel a nih chuan bazar pakhat chu a tawt lutuk dawn a, tiin Thakthing khamah pawh bazar in ropui tak sak turin ruahmanna siam a ni a, mahse, ruahmanna chu a piangchhuak zo lo, mimal in a ding ta fur mai.

Thil thenkhat chu tawngkaa tihfel mai theih a ni, a thu a zirin. Tunhma chuan Shivaji Tilla leh Khatla kawnte pawh sipai ram vek a ni a, mahse, Aizawl khawpui tana ruahmanna siamtute chuan tawngkain an va dawr a, an ram zau tak, luah sen loh chu an dil chhuak mai. Civil ram a lo ni ta mai a nih hi.

Chutiang teh nuai chu he Aizawl khawpui hian a paltlang a, duat a hlawh lo hle. Chu khawpui chuan traffic jam vanga harsatna namen lo a tawk ta pawh hi a mak hran lo e!

Read more...

ziakmite khawvel : Mafaa Hauhnar

Tunlai huna kan ziakmite zingah ani kutchhuak aia hralh nuam hi an awm bik awm lo e. Essayist a ni a, poet pawh a ni. Creative writer a ni a, critic a ni bawk. Literature lamah chuan a tih lam apiang hi a englo thenna lam ngei a ni a tih ngam zel mai. Tunlai hian short story lam a luhchilh leh a, heti lamah pawh a kutchhuak pahnih khat, chanchinbu-a chhuak tawh chuan ngainat a hlawh nghal hle. Lehkhabu pahnih - "Chawlhna Tuikam" leh "Thlaler Aurawl" a tichhuak tawh a, a pathumna tur a pai mek. Rei lo teah a vei ang a, a hring mai ang. Amah chu Mafaa Hauhnar a ni. Chu mi chuan tiang hian a sawi a...


Literature hi i naupan lai atangin i tui reng nge i puitlin hnuah i tui chauh?
Naupang dangte ang bawkin thawnthu hi ngaihnawm ka ti a. Pawl 5 pawl 6 kan zirlai vela English poems leh Mizo zirlaibua Pu JF Laldailova'n Shakespeare-a "Hamlet" leh "Romeo and Juliet" a lehlin chhumbung angreng taka an dah leh essay thenkhat an dah Lalzuia Colney ziah "Khuailui Ral leh Turnipui" tih ang chiho kha thu mawi min ngainattir tantu chu a ni awm e. Kan hunlaia kan rualpui dangte ang bawkin Pu PL Liandinga Sherlock Holmes lehlin leh midang dangina "cowboy bu" kan tih mai an lehlinte kha ka chhiar nasa ve hle a. Kha'ngte erawh kha chu a thu leh hla ngaihhlutna avang ni lovin a ngaihnawmna avang liau liauvin ka tuipui a ni. Pawl 6 kan nih khan class bil chanchinbu, typewriter-a chhut ngat kan chhuah ve lauh lauh tawh a ni. Pawl 9 ka nih kha Shakepeare-a keu ka chin tanna leh English poetry-a ka tui tanna chu ni ta berin ka hria

Eng nge i tui chhan ber? Eng tia tui tan nge i nih?
Mi lungleng mi ka nih vang a ni ber awm e.

Ziakmite zingah nangmah han hneh deuh biktute?
Mi inkarakik tak tak Shakespeare atangin John Keats, Mark Twain, GB Shaw, Arundhati Roy, Dave Barry, Khushwant Singh, TS Eliot, JD Salinger, a, han sawi chhuah dawn ralah chuan an tlar a thui duh khawp ang. Mizote zingah pawh JF Laldailova, L Keivom, C.|huamluaia, A.Thanglura, Jimmy L.Chhangte, a, an tam mai. Mimala min hneha min kaihhruai nasatu ber ka sawi dawn chuan JF Laldailova ka ti lo thei lo vang.

Ziakmi nih hi i tum thin reng em?
Tum ngai teuh nang, Pastor alawm nih ka tum ngar ngar. Ka tlin ta lo mai pawh a nih hi!

I kutchhuak chanchinbu-a lang hmasa ber eng nge? A chhiarte'n eng tin nge an tih?
Pawl 9 ka nihin kan vengchhung YMA chanchinbu-ah Sports column ka ziak thin a. Ram pum huap periodical-a ka ziahna hmasa ber chu YMA chanchinbu-a "Sap Sitail Asin" tih kha a ni ta awm e. Ka ka thuziah kha ka rin phak baka nasain chhiartute'n an lawm der thiam.

A tir lamah, i kutchhuak chanchinbua a lan changin i zak thin em?
Zak ru tehreng e. Naupan laia ngaihzawngte ang deuh khan hmu chak em emin kan han en tha ngam lo vel thin chu a nih kha.

I kutchhuak zingah miin an hlut hmasak, nangmah an hriat tanna che eng nge?
Chu chu a ni ti-a zungchala han kawh fak tur bik chu ka hre hauh lo mai.

I kutchhuakte hi nangmah i inpuanna a ni hlawm em? A nih leh eng nge puanchhuah i tum ber?
Ka thuziakah hian keimah ka inhriat loh lai pawhin thui tak ka lo tel hman zel mai a, mahni inthuhruk bo hmak chu a lo har a ni ang e. Hei vang hian kan rilrua thil awm han bunchhuah hak hak mai hi, ruih lungpuama tah ang deuh niin ka hria a, a zahthlak viau na a, a nuam ru riau asin. Engmah puanchhuah tum ren run ka nei ngai lo va, ka thinlung hi ka phawrh ve hmiah mai a ni. "Art for art's sake" thurin vawng tluttu ka ni.

Eng hunah nge i ziah thin? Eng vang nge?
Ka thinlunga thu sawi thintu aw-ina min tur chhuah hun hunah a ni mai. A tlangpui thuin mi thawm reh hnu, zanrei lam a ni chawk.

A nih leh Mizo mipui hian literature fir hi an hrethiamin i hria em? An hlut em?
Tun hmate ai chuan kan hrethiam ve teuh tawh hlein ka hria a. Zuk varpawh tak tak tur erawh chuan kan kawng zawh tur chu la thui tak a ni. Zuk tuipui phak anga lan tum kan tam tawh danah hian ka hmabak chu a eng thawkhatin ka hria.

I kutchhuakah hian thu hlimawm lam leh hlimawm loh lam a inpawlh thin a, hei hi eng nge a awmzia?
Thuziak mite hi kil khat chauh nei tura beisei hi an awl hle a. Critics pawhin chutianga va hmuh phet kan tum thin avangin kan thlirna pawh a sir-he thin. Thuziakmite pawh hi mihring dangte ang bawka a changa lungngai em em, a changa lawm em em, a changa lunglenga kaikun tlawk tlawk, a changa hlima zuangtum zawk zawk.

A nih leh thu hlimawm lam nge hlimawm lo lam hi mipuiin an duh?
Mizo mipui nawlpui chuan thu holam leh lolam deuh, han nuihpui dar dar chi hi kan bawh fe zawk a. Thu khunkhan deuh, kei pawhina ka chhuan ruk ve em em ai chuan kalpah mai maia ka ziahte avanga chibaitu ka tawng hnem mahin ka hria.

English Literature-ah i tui hle a, hei hian thuziak kawngah a pui che em?
Literature hlun leh un, kawng hrang hranga fiahna leh thlitfim lo tawk tawh a nih avang hian English literature hi bulthut leh innghah chhanah hian a rintlak a, chuvang chuan ka pur chawkna leh ka chak lakna ber a ni.

Engatinge tawngkam tualleng bakah tawng upa leh tawngkam un chi i hman thin?
Kan Zo tawng hi tunlai khawvel atan chuan a hausa tawk tawh lo hle chung hian kan tawngkam tha tak tak a ni telin kan hluihlawn chho mek zel bawk a. Tuna a bik takin khawpuia kan tawng chelek (kan vocubulary) chu a tlem tawh em em a, hemi avang hian kan tawngkam tha tak tak kan vuiliam mekte tharthawh a, hman lar leh hi kan tawng hausak nan pawh tul sa lovin a tul niin ka hria a. A thiam lo a thiam lovin tawngkam puichang leh hramchang deuhte pawh ka han rawlh ve thlazen ta thin a nih hi.

I poetry te hi miin an tuipui em?
A nawlpui chuan tuipui awzawng lo mai. Ka thu tluangtlam ziah an tuipui tluk tal hi chuan poetry min hlutsak se chu Zofate literature hmelhmang hi a danglam dawrh tawh ang. Thu leh hla lama pa chan chang inti fe fe zingah pawh thluk nei lo hla 'poetry' han tuipui phak chu kutchang thliaka chhiar tham lek an ni ang.

An tuipui lo chungin engatinge bansan lova i tih zel?
An tuipui lo ka tih hian a nawlpuia sawina a ni a, khawi lai kil kil emaw atanga lo tuipui a, lo kurpuitute thawm hi ka hriat zeuh zeuh bakah, poetry lama ka sulhnu hian no engemaw zat a hring ve tawh a. Lehkhabu pawh, ka hriat theih chinah sawm dawn chu a hring ve ta. kei pawhina ka hriat chhuah fumfe tawh loh ka poetry bahlah map lova min chhamkhum zat zat thei ka tawng fo mai. He'ngte avang hian ka chilper hi a lothlawn lo tih ka hria a, tunah "Mumangneitua" tiin min sel mah se ka zai an zawm ve hun chu a la thleng chek ang chu tiin beiseina nen ka la ziak ta zel mai a nih hi.

I kutchhuak thenkhat hi chu lungawi lo chunga i ziak niin a lang a, a dik em?
Dik tehreng mai. A then phei hi chu ka thinrim ngawltawt inhrikthlakna a ni a, a then chu mi a ang ang maia sumkar nei tit tet lova ka rik bawrh bawrhna a ni.

Tawrhna hi ziakmite tan a pawimawh em?
Nunkawng tluangtlam pangngai lutuk zawhtute ziakfung atang hian a literature zawnga thu tihtlak a la hnamchhuah ngai meuh loh danah hian ziakmite tana tawrhna a pawimawhzia chu ka chiang awm e. Lungngaihna, lusunna, vanduaina, manganna leh beidawnna no kha tak atang hian literature fir tha ber ber a lo luang chhuak thin a nih hi.

A nih leh lunglen a tul em?
Ziakmi tan 'lunglen a tul em?' tih chu, 'Sangha tan tui a pawimawh em?' tih ang deuh a ni awm e. A tel lo chuan 'creative writing'-ah sulhnu chhinchhiahtlak hnutchhiah ngaihna a awm lo a ni ber e. Mi thenkhatin lungleng lo fahrana an han hel nuai thin han hmuh hi chuan lunglenna duhawmzia hi hmu tharin ka inhre thin.

Sum leh paiah a hlawk em?
A sumpai zawng chuan, hla phuahtuin, "Teuh lo mai, a teuh lo mai," a tih kha ka chhanna a ni. Mizoramah chuan kuhva zawrh pawh a hlawk zawk ang chu!

Nangmahah literature hi eng nge a nih chiah?
Tun dinhmunah chuan ka hnukpui inthlunna a ni ti ila, thu ka uar deuh a nih paw'n lo ni mai mai teh sen!

Read more...

Vairengte-ah Police leh Mipui innawr

September ni 17 zanah rorel lai party office-ah gelatin nia hriat a puak a, a hnu lawk - September ni 21-ah Mizoram kawtchhuah Vairengte-ah police leh mipui an innawr. Hliam tuar te pawh an awm nghe nghe.


Vairengte Police Station thuamthatna tur sum chu Mizoram sorkar Saitual Police Station thuamthatna atan hman a tum a, Vairengte lamin chu chu duh lovin, Mizoram sorkar chu Vairengte Police Station thuamthatna tur sum, sorkar laipuiin a 'sanction' tawh chu hmun danga pawt peng lo turin an kar ta a ni.

September ni 10 chhun dar 12 thleng sorkar an nghak a, an duh anga thil a kal tak loh avangin September ni 20-ah Total Bandh an huaihawt ta a ni.

Vairengte-ah hian NGO Co-ordination Committee an din a, anni hian hma an la a, mahse, sorkar lam nen an thu a inhmu thei lo. September ni 10 hmain sorkar chuan thil awmzia a sawifiah a, NGO Co-ordination Committee lam chuan sorkar insawifiahna hi an pawm lo. September ni 10 hnu lamah an indawr zui lem lo niin NGO C-ordination lam chuan an sawi.

Chutianga an duh anga thil a kal tak lohvah chuan Vairengte NGO Co-ordination Committee chuan ni 20-ah Vairengte-ah Total Bandh an huaihawt ta a ni. Total Bandh huaihawtnaah hian duty mipui leh police an innawr a, Vairengte khaw mi 8 leh police 5-in hliam an tuar a ni. Vairengte khawmi, hliam tuar zingah hian hmeichhe 1 a tel. Vairengte SDPO Lalhunliana chu police lama hliam tuar hmasa ber nia hriat a ni. Ani hi damdawi inah kalpuiin, a lu an thui. A hmain NGO Co-ordination Committee hruaitu 4-te chu police te'n lain Kolasib-ah an lo thawn tawh a, nimin khan an hruaitu 3 an lak belh leh a ni.

___________________________________________________

Mizoram Police chuan September ni 7, 2009 khan thuchhuah siamin, "Vairengte Police Station sakna tur Saitual Police Station sak nana 'divert' hi a building sak that a tul zawk vanga sorkarin ngun taka a ngaihtuah hnua thutlukna a siam a ni a, mi tlem te kawhmawh bawl avanga sawn leh mai theih a ni lo," an ti.
"Vairengte Co-ordination Committee chuan Vairengte Police Station building sakna tura sanction Saitual Police Station sak nana sorkarin a divert duh loh entirnan tukin zing dar 6 atanga tanin darkar 12 chhung Vairengte khawchhungah Total Bandh an huaihawt a. He Total Bandh avanga Zoram hmun dangte chakkhai mamawh leh zinmite lut leh chhuak a khaihlak loh nan zing atangin police-in motor kal duhte an escort a. Hetianga motor kal a lo awm takah hian bandh huaihawttute chu a hmei a pain an lo chhuak a, motor kal tur dang turin kawng laiah an pungkhawm a," tiin nimina police thuchhuah chuan a sawi.
"He'ng pungkhawmte hi dan anga kal darh tura thupek an nih awih duh lova an awm luih avangin police-te chuan tharum hmangin an hnawtdarh ta a. Mittui tlakna hlo (tear gas) te pawh hman a ni. Hmun hnih hmun thuma road block an siam leh pawh police te hian an hnawtdarh zel a. Chhun dar 11"30 vela thalai rualin nasa taka police duty-te lunga an vawm avangin tear gas, lathi charge bakah van vawr zawngin silai pawh hmeh puah a ni. Hemi hnu atang hi chuan harsatna thleng zui em em a awm lo a, motor pawh police escort-na hnuaiah a pangngaiin a kal thei a ni," tiin mipui an hnawhdarh dan thuchhuah chuan a sawi.

___________________________________________________

Vairengte-ah hian sorkar chuan mi 5 aia tam awmkhawm a khap a, police pawh he khuaah hian an duty ngawrh hle. Mahse,Total Bandh huaihawtnaa duty turin zing kar atangin mipui an chhuak khawm tha hle a, Bangla Veng-a SBI office kawtah mipui hi an chhuak khawm a ni.

Tuakthuan eikham - dar 9 velah Silchar lam atanga kal lirtheite chu police te'n escort-in, kaltlangpui an tum a, Venglai Pengthuamah mipui duty lamin an lo dang thung. Police an rawn thlen belh a, mipuite chu tiang hmanga hnawhdarh an tum ta a ni. Hei hi police leh mipui inbeih tanna a ni.

A hnu deuhah Venglai Pengthuam piaha SBI office kawt velah an innawr leh a, tichuan, an innawr ta zeuh zeuh a, vawi 5/6 vel hetiang hian an innawr niin Vairengte atanga thudawn chuan a sawi.

Police te hian tiang leh tear gas hmangin mipui hi an nawr a, mipuiin lung leh tiang te an hmang thung.

Chhun dar 11:30 velah Salvation Army biak in bulah an innawr leh a, hetah hian silai a puak ta. Police te hian mipuite chu hnawhdarh tumin, 'Kawng kan clear dawn...Warning kan pe tawh che u, in kal darh loh chuan kan che dawn...' tiin an au a, chung lam hawiin silai an hmet puak zui. Silai hi vawi 20 vel a puak niin he hmuna awm ve pakhat chuan a sawi.

Mipui lam an kal darh duh chuan loh avangin "Charge..." tia au chungin police te hian mipuite chu an tawn ta a, tear gas leh tiang hmangin an bei a, mipui lamin an lo chhanglet ve bawk.

Mipui lam chu an tang rei thei ta lo a, an darh ta. Mahse, police te chuan mi ina awmte chu mahni ina haw vek turin an hrilh a, inchhungah pawh tear gas hi an vawmlut niin Vairengte atanga thudawn chuan a sawi a, inchhunga hmeichhe naupang pakhat bekah a fuh nghe nghe niin a sawi bawk.

Mipui an darh hnuah hian police te chuan lirtheite chu hruaiin an kaltlangpui a, mahse, lirthei hi an tam lem lo niin thudawn chuan a sawi. "Total Bandh hi zing dar 6 atanga tlai dar 6 thlenga neih tura kan tih a ni a, mipui kan tin hnuah pawh khawlaiah tumah kan chhuak lo a, police te hian min duty sakah kan ngai mai. Kan bandh chu hlawhtling kan ti," tiin NGO Co-ordination Committee hruaitu pakhat chuan a sawi.

NGO Co-ordination Committee hruaitute sawi dan chuan, khawtlang an inlungrual a, total bandh-a duty pawh an thahnem tham hle. Hmeichhia leh nu leh pa pawh an thahnem viau niin an sawi.

Ngaihdan a tam, pawm dan a tam
September ni 7-ah khan MPCC chuan thuchhuah siamin, "Police Station tha zawk Zoram puma kan neihna tur dal zawnga tute emaw hmanruaa hmanga sorkar hmalakna dodaltu an awm hi MPCC chuan vanduaithlak a ti," an ti.

Vairengtea SDPO office sakna tur sum chu Plan Budget-ah dah a ni tia sawiin, "Hetia changtlung lehzuala Vairengtea police awmte thuam that sorkarin a tum avangin Vairengte P/S-ah hian building thar sak nan pawisa dah a ni a. Building sakna tur hmun thlithlaiin home department official-te pawhin Vairengte hi an tlawh a, PS hmunah hian building thar han sakna mai tur an hmu ta lo a, kum 2003 maia sak, tuna Vairengte PS building thiah chu tih chi-ah official-te hian an ngaih loh avangin an dinhmun chu thuneitu sang zawkah an thlen leh ta a ni," an ti bawk.

"Home deptt. official-te chuan State Level Empowerment Committee-ah an thu chu thlenin, State Level Empowerment Committee chuan sak that ngai ngawih ngawih, Saitual P/S building, UT laia sak tawh chu sak that nan Vairengte P/S building sakna tur pawisa chu pawhpen a lo remti ta a ni," tiin thil awmzia an sawi a ni.

Hemi ni vek hian Mizoram Police te pawhin thuchhuah siamin, Vairengte Police Station chu la thar tha tak a nih thu leh thuamthat ngai zawk Saitual-ah pawisa pawh pawhpen a nih thu an tarlang.

NGO Co-ordination Committee chairman Lalrintluanga Renthlei chuan thuneitute leh rorel lai party thuchhuah hi an pawm loh thu a sawi.
"Vairengte Police Station hi thuam that a ngai lo a nih chuan engah nge thuam that a nih theih nan project an siam? Hman ni lawka thuam that ngai kha tunah thuam that a ngai ta lo thut tihna em ni?" a ti.

"Vairengte hi ramri dep-a awm kan ni a, he khuaa police te thuam that hi Mizoram tan a tul tih hrechiangtute kan ni. Ramri-ah police an inep fo a, Assam lam chu an changtlung lutuk. Keini lam chu engah mah kan indaih lo a, Vairengtea police officer rawn awm tawhte pawhin an rualawh thu an sawi deuh zel. Tin, tuna Vairengte Police Station building hi a chhe tawh lutuk kan ti a ni lo, a te a, sak belh te pawh a ngai alawm. Vuak thiah chi a ni lo tih te kha an sawi a, vuak thiah kha kan phut reng reng lo. Vairengte Police station thuam that hi kan phut chu a ni. Police an indaih lo a, building-in a zo lo a, lirthei leh hmanruaah an indaih hek lo a, chu chu kan khaw tan mai ni lo Mizoram tan a pawi a, chumi siamtha tur chuan sorkar kan ngen a ni. Tunah chu'ng vel atan chuan central sorkarin sum a rawn 'sanction' a, pawhpen a ni hi pawi kan ti a ni," a ti bawk.

Police lam thu leh hla
Mizoram Police chuan September ni 7-ah khan tiang hian thuchhuah an siam:

Vairengte Police Station hi kum 2003-a sak kha a ni a, Police Station kan neihte zingah chuan a tha ber pawl a la ni. Luah tlak, tha tak a la nih avangin han vuak chhiat ngawt chu thil tih chi a ni lo a. Vairengte-ah hian Police Department-in ram pass a neih fel thlap chu he Police Station ram, 3.03 Bighas, Pass No. DPL.118 of 1990 dt. 25.10.1990 hi a ni a. Police Station awm lai mek hi thiah a nih loh chuan a thar sakna tur hmun a awm lo a ni.

Mizorama Police Station kan neihte zingah chhim lamah Lunglei District-a mi Lungsen Police Station hi kum 1981-82-a sak a ni a. Hmar lamah chuan Aizawl District-a Saitual PS hi 1985-86-a sak a ni bawk a. Hengte hi a hlui tawh zualte an ni. Mizoram chhim lamah chuan PWD Scheduled of Rates hi a san zawk avangin tuna PS sakna tur atana pawisa awm hian a daih lo bawk si a, chuvangin Saitual PS, a sakna pawh rei tawh tak leh, a building te pawh tha tawh lo tak hi sak that ni mai se tih chu ngun taka thil hrang hrangte ngaihtuah a nih hnuah Police hotute’n an rel a. Hei hi central sorkar kaihhruaina ang thlap zui a, fel taka rel a ni. Hetianga her rem hi tunhma pawhin a lo awm tawh a. Sorkar hmasa lamah te pawh khan, quarter sakna tur sum chu Police Station leina atana hman te, office sakna atana hman te pawh a awm tawh a ni.

Vairengte MZP ten hmun danga divert lo tura dilnate an siam avangin Home Minister, Parliamentary Secretary, Bialtu MLA leh DIG Northern Range-te chuan ni 27.8.2009 khan Vairengte-ah MZP, sorkar hnathawkte leh khawtlang hruaitute kawmin thil awmzia an hrilhfiah a. Hetah hian Home Minister leh thusawitu dangte chuan Vairengte mipuite thahnemngaihna fakin an thil ngen chu an hriatthiampui thu an sawi a; rualkhai zawka Mizoram chhunga hmasawnna kalpui tuma sorkarin hma a laknate erawh ngaichang thiam tur leh pawm thiam turin an ngen a.

Vairengte hi hmun pawimawh, ramri depa awm a ni tih sorkarin a hriat avangin SDPO thuthmun ngheta siamsak tur pawhin file a kaltir mek thu te, SDPO office ngei pawh sak a nih theih nan kumin plan-ah khung anih thute sawi lan a ni bawk a. Police Check-Gate sak thatna tura bul tan a nih tawh thu te, Vairengte daia CRPF awmnaa IR engemawzat dah an nih theihna tura a hmun cheithat tum anih thute hrilh an ni a. Phaisen-a IR Platoon khatin temporary-a Police Outpost an luah pawh Armed Force Out-Post-a dah a nih tur thu leh a theih anga an awmna tur in te pawh sak that a nih tur thute hrilh an ni bawk.

Chutianga sorkarin hma alak dan te chipchiar taka an sawi hnu chuan Mizoram pum puiin an tawrh phahna tur zawnga buaina chawk chhuak zawng leh Road Block te siam lo turin ngen an ni nghal bawk a ni.

Heng ngenna te hi engah mah ngai lovin buaina chawkchhuak turin Vairengte MZP te kaihhruainain hmalak chhoh zel a ni a. Ni 10.9.2009 chhun dar 12 hmaa Police Station sakna tur hnuhkir leh a nih loh chuan a tul dan anga hma la turin sorkar chu ULTIMATUM a pe ta a ni.

Heng hi Vairengte mipuite hian ngun taka an ngaihtuah chuan an thlawpin a rinawm loh. Zonun ze mawi tak ‘Sem sem dam dam, ei bil thi thi’ tia pi pute an lo induhsak thinna rilru kha Zoram mipuite hian hre nawn fo ila. Sorkar hmalakna tithuanawp zawng leh epna hmanrua atan NGO hming hmatheha thil tih hi awm lo se a duhawm hle.

Sorkarin kumina Police Department hman tur pawisa a pek hi kum dang ngaihtuah chuan a tam hle a. Mahse, Committed Liabilities avangin hma thar lakna tur chu cheng nuai sawmruk leh pasarih vel chauh a ni. Chutiang chu thil nihphung a nih avangin tuna hmalak tumna hi sorkar tih theih sang ber chu a ni rih a ni.

Read more...

Inrenchemnan Cell Phone Hmanga Street Light Tihen

¢ Lalthlamuana Ralte

Pathian siam nunna nei zingah mihringte hian mamawh kan ngah ber a, tul leh pawimawh kan insiam hnem a, kan tangkaipui lem lohte thlengin kan mamawh a, kan chenna khawvel tichhetu ber pawh kan ni a, thilsiam zawng zawng zingah kan pung chak ber bawk. Hma kan sawn tial tial a, kan khawsak a changkan deuh deuh lai hian kan chenna leilung leh nungcha dangte tan harsatna kan siam tam tial tial a, lei tuamtu boruak thlengin kan tibawlhhlawh zo ta. Mithiamte chuan heng avanga chhiatna lo thleng tur pumpelhna atana ha ber chu chet hautak loh leh mamawh neih tlem hi niin an sawi. Chutiang hawi zawnga mi rama an hmalak dan chu han tarlang ta ila.

Germany rama khaw pakhat Dorentrup-ah chuan zan dar 11 a rik chiahin streetlight an tithim vek thin a, zan reiah chuan an kawtthler zawng zawng chu a thim ruih thin a ni. Sum renchemna atana tualchhung thuneitute'n kum engemaw zat kal ta atang khan hetiang hian lo ti thin tawh mah se Dieter Grote-a leh mi thenkhat tan chuan a buaithlak chang a awm fo mai. An nupa chuan zan khaw thima an fate lo haw ngaihtuah reng renga an awm chang a tam hle a ni.

Grote-a hi advertising agency-a thawk a ni a, an harsatna tawh thin chu an nupa chuan an lungkham bawk a, tih dan tur tha deuh mai an ngaihtuah chhuak ta a. "Kan nupain kan sawi dun a. Tichuan, mamawh hun taka streetlight tihen theih dan tur chu kan ngaihtuah chhuak ta a. A nihna takah chuan kan nu ngaihtuah chhuah hi a ni zawk mah hi a ni," tiin a sawi.

Grote-a chuan an nupa titi chu a taka tihhlawhtlin ngei tumin an khuaa computer leh a behbawm dawr Lemgo chu tlawh a, a sawipui ta a. Anni chuan an lo tuipui phian mai a, tichuan telephone hmanga streetlight tihenna tur chu an buaipui zui ta nghal a. Thla rei lo te hnuah chuan Lemgo leh Grote-a te tangdun chuan modem (telephone line hmanga computer thlun zawmna khawl) thar leh software thar an siam chhuak ta thuai a. Chu hmanrua chu 'Dial4Light' an vuah a, Europe khawmualpuia chutiang project hmasa ber chu a ni ta nghe nghe.

Chumi hnu atang chuan Dorentrup khuaa chengte chuan eng hunah pawh an duhna lai taka mi streetlight chu an tieng thei ta a ni. A tihen dan lah chu a mawlmang hle lehnghal a, mahni phone (mobile phone/landline) kha va register mai kha a tawk a. Zan thima kawtthlera an kal laia eng an mamawh a nih chuan Dial4Light number an bia a - tawngkaa sawi emaw code number paruk (6 digit code) chhut mai emaw a theih ve ve - tichuan an duhna hmun taka mi chu a lo eng nghal pup mai a ni.

Khaw chhunga streetlight zawng zawng chuan code hran an neih vek avangin an duhna lai tak kha code kha an hrilh rualin a rawn eng nghal mai a ni. Mahse, rei vak lo a en hnuah amahin a thim leh a, duh chuan a tihen leh theih zel bawk a, mi pakhatin zan khatah vawi thum chutiang chuan an ti thei.

Nikum khan he project hi khaw chhung hmun thenkhatah enchhinnan an hmang a, a hlawhtlingin mipui pawhin tha an ti hle a, Dorentrup khaw hotute chuan an khaw pum puia hman turin an ti zui ta a ni. He khuaah hian mi 9,000 vel an cheng.

Zankhuaa streetlight tihen hian carbon a pek chhuah hnem avangin boruak a tibawlhhlawh hle a, Utility company Lemgo-in an chhut dan chuan he hmanrua an hman atang hian kum tin carbon pekchhuah (carbon emission) ton 12 laiin a tlem phah dawn a ni.

Lemgo-a he project-a an hotupa Frank Brauer-a chuan, "Khuaa chengte hian zankhuaa khawlai tihen reng hi an mamawh kher lo a, chuvang chuan kan khua leh a chhevelah hian he hmanrua hi kan hmang tangkai hle a ni," tiin a sawi.

Hetihlai hian mipui himna atan zankhuaa kawtthler tihen reng duh pawl an awm a, chu'ng mite chuan na takin thuneitute an nawr ve reng bawk a. Mahse, mayor Friedrich Ehlert-a hi thil tha leh dik nia a hriatah chuan nghet taka ding tlat mi a ni a, hemi chungchangah pawh hian sawiseltu awm mah se a ngaihdan a sawhsawn duh chuang lo.

"Inah pawh TV ka en lai pawhin pindan dang ka tithim ziah tho a. Tuma awm lohna hmuna streetlight tihen reng hi mipui pawhin an beisei bik tur a ni lo," a ti hmiah.

Chutih lai taka Dial4Light project an siamchhuak thei hi a lawm hle nghe nghe a, he hmanraw hmanga streetlight an tihenna man hi council-in chawi mah se zankhuaa kawtthler tihen ai chuan senso a tlem fe zawk tih a sawi bawk.

"Electricity bill kan tihniam mai a ni lo a, environment chhe zel kan venghim bawk a. Chumi atan chuan mi tin kan tangho a ni," tiin Ehlert-a chuan a sawi.

Lemgo hian an hlawhtlinpui bawk a, ram hrang hrang pangaah he scheme hi tih zel an tum mek a, heng bakah hian Dubai leh US lamah pawh an duh ve thu an hrilh tawh bawk.

Khawvel pumah sum leh pai lama tlakchhiatna a thleng a, a sawhkhawk ram hrang hrangin a tuar mek a, sorkar hrang hrangte budget pawh a nghawng na hle. Khawvel lumna tizualtu boruak chhia carbon lah chu (thilsiamna khawl, lirthei, etc. vangin) a nasa tial tial bawk. Dorentrup khuain inrenchemna leh environment venhimna atana hetianga hma an la hi an entawntlak viau niin mi tam tak chuan an ngai a ni.

Read more...

Karizma Chhuak Thar Pho Chhuah A Ni Ta

Bajaj-in pulsar thar a ti chhuak a, Yamaha-in Fazer a tih chhuahna pawh a la rei lo, TVS-in Apache 180, Hero Honda pawhin Karizma a tih chhuah thar Karizma ZMR chu September ni 18, 2009 khan Gurgaon, Delhi-ah a pho chhuak ta.

Aizawl-a Hero Honda dealer Khaia & Sons Managing Director H. Lalfakzuala chuan hemi chungchanga Zozam zawhna chhangin, “Karizma ZMR hi a hma-a Karizma te ai chuan tha hle tura ngaih a ni a. A chhan chu tunlai thiamna thar ber ber leh thalai te lawm zawng tak tura siam a nih bakah PGM FI engine hmang a nih avang hian a dang zar ang,” a ti.

“Aizawl-ah engtikah nge a rawn thlen theih tih chu ka sawi mai thei lo a, mahse booking te chu a tih nghal theih tho ang chu. A man pawh Rs.10000 chuangin a hmaa mi aiin a to hret ang,” a ti bawk.

Karizma ZMR-ah hian a ke hma leh hnunah disc brake hman a ni a, a tail light-ah hian LED hman a ni bawk. Headlight hi chi thar hman a ni a, a ke-ah pawh tubless ve ve hman a ni ta bawk.

Engine SPECIFICATION
Type : 4-Stroke Single Cylinder OHC, Oil-cooled, PGM-FI
Displacement : 233 cc
Maximum Power : 13.15 KW (17.6 BHP) at 7000 RPM
Maximum Torgue : 18.35 N-m @ 6000 rpm
Maximum Speed : 126 KMPH
Acceleration : 0 - 60 KMPH in 3 - 7 Secs

Read more...

Phailama Hnazawn A Him Em?

Kan ram kilkhawr leh intodelh lo zet mai hi, tunhnaiah sumdawnna khawvelin min rawn hrut ve tan a. Kan ram pachhe tak chuan thangthar zawng zawngte hna a pek theih tawh miau loh avangin kan mangang a, kawng dang kan dap tan ta ruai mai a ni.

Hemi hrinchhuah chu ram pawn lama hna zawn kan intihhmuh ta viau hi a ni. Globalization kalchho mup mup chuan kimchang lo takin remchang min rawn hawnsak chu ngaihtuahna thuah hnih hmang hman lovin kan bawh rum rum a, mi tam tak chu kan inchhuih tlu pheng phung mek a ni.

Mizo thalaite'n harsatna an tawk a, chu chu hna van vang a ni. He harsatna sutkian theih a nih beiseiin mi thenkhatin hma an la thin. Mizo thalaite tan hna ropui tak tak an thawk thin ngei mai. Hetih lai hian mi dang thenkhat chuan remchang an lo melh ru ve ru ran bawk. Phai lama zirna emaw hnathawh tur emaw kawhhmuhtu consultant agency an tih ang hi Mizoramah pawh an awm ve ta fur mai.

He'ng consultant agency-te hian call centre-a hnathawk turte leh security guard tur te, foreign rama hnathawktu tur leh thil hrang hrang atan an inzuar mek zel. Anmahni kaltlang hian thalai tam takin hna tha tak tak an hmuh mek laiin inchhuih buai sawi tur tam tak an awm mek bawk.

Tun hnai lawkah pawh hetiang chi ‘agent’ pakhat chu Aizawl khawpuiah ngei hian man a ni. Chuvanga timna erawh a awm chuang lo niin a lang, chanchinbu lama inzawrhnaah chutianga hna hmuhsak thei chu an la awm zel, an awm tur pawh a ni bawk a.

Kan tih ai min tirh sak turin consultant agency hrang hrang an awm. Hengho kaltlang hian awlsam zawkin engkim mai a tih theih ti tih tawh. He'ng zinga kan hriat lar ve mek chu hna pe thei nia inzuar thinte hi an ni.

Job placement agency-te chuan company hrang hrangte mihring mamawh an lo thlithlaipui a, hnathawk tur mihring an lo zawnsak thin a ni. Hna zawnsaktu an nih avangin company atang chuan hlawkna engemaw zat an lo tel chhawng ve leh ta thin a ni.

Phai lamah leh khawvel ram tam takah chuan hna zawn dan kalphung hi consultancy service kaltlang deuh veka tih a ni fur tawh. Phai ram khawpui lianah chuan hetiang consultancy service hi kawtthler tin deuhthawah an awm a, thalai tam tak tan pawh hna zawn a awlsam phah em em.

Hetih lai hian consultant agency rintlak lem loh engemaw zat an awm tih hi kan hriat a tul. Thiam takin mipui hnenah an inzuar a, pawisa an duh zat zat an deposit tir hnuah customer-te duh ang tak pe leh si lova thamral mai mai ching an tam hle. He'ng mite avang hian thalai tam takin harsatna an tawk a. India ram chanchinbu hrang hrangah pawh hetiang buaina hi hmuh tur a awm fo thin. Tlem lai deuh khan Mumbai khawpuiah chuan company 62 ngawt mai te chu labour law dan kalha private security agencies atanga security guard la an nih avangin thubuai awrhtir an ni.

Hemiin a hrinchhuah pakhat chu Human trafficking hi a ni. 'Globalization' atanga inkalpawhna tha zawk hian kentel a neih chu mihring tawlhrukna (Human trafficking) a ni. Kan thenawm ramah, a bikin Manipur leh Nagaland-ah te sawi tur a tam hle tawh. Meghalaya-ah pawh a nasa a, tlem lai deuh khan Naga nula pakhat chu Malaysia rama nawhchizawrhna hmun atanga chhanchhuah a nih kha.

Hetiang thil a thlenna chhan ber chu ram pawna hna zawn leh a kaihnawih thil a ni. Hna tha tak pek tiamin tlema hriatna nei tlem zawkte bum an ni thin. An hnathawhna tur hmun an hruai thlen meuh chuan mi thenkhat chu nawhchizawrhna hmunah an lo hnuklut lui tawh mai thin a ni. Delhi-ah pawh Mizo nulate ngei chu hetiang hian hnuhluh tawh an ni tiin thudawn pakhat chuan a sawi.

Kumin kum tir lam khan Mumbai khawpuiah Mizo nula tleirawl parukte chu hna tha tiamin Mizoram atangin hruaihlak an ni. An hnathawhna hmun an thlen hnuah an beisei ang an hmu lo a, nawhchizawrhna hmun lamah hnuhluh tumin room chhungah an kalhkhum hmiah a, thil pawi a thlen thui hmain Mumbai Mizo thalai thenkhatin an va chhanchhuak hman hram!

Mizoram chhungah ngei pawh Job Placement Consultant an awm ve ta nual. A lo buaipui tur pawhin Mizo ngei an nei ve fur tawh hlawm. Rintlak an awm, rintlak hauh loh pawh an awm tih hre ta phawt ila.

Heti lam zirchiangtu research scholar H Vanlalhruaia chuan, “Mizorama Placement consultancy firm lo awmte hi din theihna license / phalna emaw registration fel tak nei an ni em tih te, an nei lo a nih chuan dan kalh a ni thei mai em tih te a ni. Legally correct leh legally incorrect hriat chian hmasak a tul a ni ber mai,” a ti.

“Consultancy firm leh hna hmuhsakho hian eng contract / inremsiamna nge an neiha, documentation tih a ni thin em? Tih lo ni ta se, an contract / inremsiamna leh an awm dan emaw thawh dan a inmil em? Inmil lo ni ta sela, document proof a awm ngei em? Tin, hei bakah India ram state dangte hi population hrim hrimah an tam bakah human resource/labour lamah an sang hle a. Hetih laia labour/HR nei tlem zawk tura ngaih Mizoram state-te tak te atanga mihring an duh tan viau mai hi eng nge a chhan ni ber le? Labour tlawm lehzual an umna mai a ni thei ang em?” a ti bawk.

Vanlalhruai chuan sawi belhin, “Sum hmuh theihna tur a nih dawn phawt chuan, kan Mizo-pui ngeite inchhuih palh theihna turah pawh chetlak kan hreh meuh tawh lo. |henkhat phei chu nawhchizawrhna hmunah hial kan intir mek a nih hi. Hetiang khawvel tawp taka awm kan nih miau avang hian Mizo nih vang hrim hrim vanga inrin nghal em em hi a him ber tawh em aw tih hi ngaihtuah tham a ni ta. Mahni Mizo-puite rin loh tur tih lam sawimawina a ni lo, fimkhur a tulzia tarlanna mai a ni e,” a ti.

Phaia hnazawng tura kal zingah harsatna hrang hrang tawk tawh leh tawk mek hi sawi tham fe mai an awm. Tun hma lama harsatna tawkte'n tlawm leh zaha an lak thin avangin an sawichhuak tha duh meuh lo. Mumal taka chhinchhiah fel vek a harsa hle a ni.

H. Vanlalhruaia chuan, “Tun hnai lawk khan Hyderabad Mizo buaina nei mekte chanchin mumal zawka document theih beiseiin video camera nen kan va veh a. An remti ngang lo a, an awmna hmun remchang apiang kan cover ta ringawt a. Nikum lam khan Manipur-a Zohnahthlak unau pakhat, security guard thawk mek chu an awmna hmunah chesualin a boral phah hial tawh a. An awmna hmun kan va kal tlawh ni chuan, slum area aia hmun chhe zawkah an lo awm a ni,” a ti.

Hman deuh lawkah khan Hyderabad hmunah security guard tur an tirhte chu nasa takin an che buai tawh bawk nia sawiin, “|henkhat phei chuan kut an tuar a, phuar hlawm chungin inchhungah kalhkhum an ni. Hyderabad Mizo Association leh MZP hmalaknain Mizo tlawmngaite'n an va chhanchhuak thei hram a ni,” a ti.

Hemi hnu pawh hian Hyderabad hmuna security guard tura Mizoram atanga an hruaithlakte chu an che buai leh niin a sawi bawk.

Foreign ram thenkhat - Singapore leh Malaysia-ah te pawh Mizo chebuai fe fe an awm tawh. Delhi, Bangalore, Mumbai, Hyderabad Mizote phei chuan tualchhung chanchinbu-ah press release siamin fimkhur a tulzia an tlangaupui nasa hle tawh. Mahse, kan harhchhuah zo lo nge, kan mamawhnain min nawr thlu ngang tih hriatthiam a har hle.

Sorkar pawh a fimkhur hle a tul nia sawiin Vanlalhruai chuan, “Phai lam atangin Job Placement Consultants nia insawite'n an dawr reng rengin engkim chiang taka an hriat chian ngei loh chu rin mai tur a ni lo ang. Tin, kan thalaite an chetsual lohna turin engkim chiang tak leh indelhkilh thlapna (document mamal tak) hmangin contract an lo sign ngei tur a ni. Engemaw a kalsual a nih pawhin document hmanga siamrem lehna chance a awm dawn a ni,” a ti.

Sorkar department thenkhat hmalakpuinain India ram mai ni lo, foreign ram thlengin lehkha zir tura thawnchhuah kan awm ve nawk tawh. Mahse, beisei ang leh an lo tiam ang hmu zo si lo hi tam tak an awm a ni. Institution tha tak sawihmuha a hmun an thlen hnua institution chhe deuha dah leh si pawh sawi tur an awm. Hetianga tang laklawh tawhte hian a buaipuitu sawisel an hreh leh tawh si thin. Tin, chhungte'n pawisa an sen hnem avanga inthlahrun avanga tui lo tak chunga lehkha zir pawh sawi tur an awm nawk mai.

Sorkar kal ta hun lai pawh khan call center-a thawk tur tiin thalai rual a sang tel teh meuh pawisa tam tak sengin department pakhat kaltlangin training tir an ni a, hlawk thlak loh tak a ni. Thawhna tur mumal an hmuhsak thei lo a, an hmuhsak chin te pawhin buaina namen lo an tawk zui.

Mizo thenkhat, hnathawk tura phai lama kal, haw leh hreh emaw zak tawh si hna duhawm lo deuh deuh thawh zawm ta an awm leh zel bawk. Heng zawng zawngah hian kan sorkar hian kalphung felfai a neih a ngai. Job Placement Consultants-te Mizoram-a lo chuang chhuak te pawh sorkar pawmpui thlap ni thei se.

Hna zawng tura thawnchhuah tawh kutbenga haw leh zawng zawng hi bumna vang an ni kher lem lo tih erawh hriat a tul. Consultant-te dem vek tur pawh a ni lo ang. Consultant te'n an tiam ang an puitlina, placement-a an lungawi loh vang emaw an thiam tawk loh avang emaw a ban ta mi tam tak an awm ngei mai.

Hemi chungchangah hian Vanlalhruaia chuan, “Mizo hi kan taima kan ti thin, mahse, hna sang emaw vawi-leh-khata hlawk thut theihna tur um ching kan tam em em. Phai rama hna nei thawk tha peih lo, an ban leh tak Mizo ka hmu nual tawh. An ban chhan hi anmahni chuan an insawi thiam em em thin. Hnam dang an nih avanga duhsak an nih thin loh thu te, hrehawm an tihzia hlir te a ni mai thin. Zep thu awm suh, kan thatchhiat vang leh Mizorama kan hnathawh dan anga hnathawh kan tum tlat thin vang a ni fo. Hnam dang kan nih avanga min lo duhsak ta lo deuh a nih pawhin, eng nge sawi theih kan neih chuan le? Kan hnathawhna khawtlang mil hna thawh kan zir hma chuan eng kan ang tak tak ngai lovang,” a ti.

“Kan society hrim hrim hi hnam dang kara tlatlum taka khawsa thei nghal tur chuan Mizorama kan inenkawl dan hi kan tihdanglam hmasak a tul. Zorama kan thalai tam takte khawsa zia leh nunphung hi phaia inhlawhfa pangngai ni tur chuan a no lutuk hret thin. A bikin hna hniam deuha ngaih tan phei chuan kan hlawhchhuah leh an nunphung a inmil thei meuh thin lo. Vai leh Nepali-te khawsak dan hi entawn tlak tak a ni. An inren em em a, an thawh tawhnaah chuan rinawm takin an thawk a, zurui chung leh zelthel takin an thawk lo a, hei hi kan Mizo thalai tam zawk hian kan la tlin meuh lo a ni mai thei. Zelthel taka ti thinte tan chuan chance a awm rei lo hrim hrim mai,” a ti bawk.

Nula thenkhat, call centre-a thawk tura lak, thla hnih khat hnua thawhpui vai laka rai haw ta mai mai pawh sawi tur an awm.

Vanlalhruaia chuan, "Phai lama chebuai zingah a lehkhathiam leh degree sang zawk nei ai chuan, tlema degree nei hniam leh 'unskilled labour' rawn tlan thla te hi an chebuai zual chawk. Hriatna lamah kan lo pechhe zawk nge nge thin hian humsual min dai tir thin a ni,” a ti.

“Buaina kan tawh tawh hnu hian khawngaih thlak chan an chang zo vek tawh zel si. Amaherawhchu, Mizoram atanga thil kan lo hriat hi a famkim tawk lo tih erawh i pawm ngam teh ang u. Mi thenkhat, mahni qualification leh nihna pawhin a phak reng reng loh beisei lui tlat te pawh kan awm zu nia!” a ti bawk.

Kan tunlai khawvel kalphungah chuan Mizo pa tawngkama “pianpui degree nei” tih te chu tih mai mai a ni. Mahniin sumdawnna din thei khawpa pawisa kan nei a nih ngawt loh chuan degree puitling tak nei lo tan kawng a kaw meuh tawh lo. Unskilled labour hna thawk tur tan phei chuan Mizoram tluka hlawh thatna hmun a awm lo. Hlawh tlem tawh nak laiin ram dangah chuan Tax kan pek a la ngai zui nen. Mizoram atangin hlawh zat tur an sawi thin pawh tax pek hnuah chuan a tlem kuar tawh mai thin.

Khawpui lianah phei chuan in luah man (electric bill, Tui bill) hautakzia hi kan hriat a tul. Unkilled labour tan phei chuan accommodation tha lutuk beisei chi a ni lo. Phai lama unkilled labour tam tak paw'n an nei miau hlei nem, hengho dinhmun kan tawmpui theih loh avang hian alawm, Mizo tam tak chu an hlawhchham fo thin ni le. Pawisa nei mumal lova ram danga chhuah phei chu kawng a ping duh hle.

Vanlalhruaia chuan, “Mahni dinhmun kan hriatchian mai bakah ram dang dinhmun hi chiang zawkin i zir ve teh ang u. Kan mamawhna a inchen hauh lo ang, mahse, hna hniam lam zawnga phai rama kal hi a hrisel ber lem lo tih hi i hre ve tawh teh ang u. Hrehawm tawrh te, vai artui zuar anga hnam dang tihduhdahte tuar thiam zel te kan la zir thiam a nih ngawt loh phei chuan, Zoram pawnah hian hna zawn hi intihmuh chi a ni ber em tih hi i inngaihtuah ngun ang u," a ti.

"Engpawhnise, invenna kawng hi kan ngaihtuah a hun a ni. Hnazawn hi thil pawimawh tak a nih avangin kan uluk a tul. Thil hrechiang hmasa zet lova thil bawh rum rum hi kan sim tur a ni. Kan hna zawn hrulah thil tam tak a awm tih kan hriat a tul. Kan hnathawh tur mai ni lo, kan va awmna tur khawtlang ziarang leh an hnathawh dan kalphung thlenga uluk taka kan zir a tul. India ram khawpui lian leh foreign ram thlengin Mizo/Zo hnahthlak khawtlang pawl an awm deuh zel tawh. Thil chinchang hre lo tan phei chuan kan kal hma ngeiin hengho hnenah in-report hi a him ber a ni. Mangan hunah kan pur buai leh ziah tho. A hma lamin chanchin inhrilh hi chin thin a tha hle, “ a ti bawk.

Read more...

HNA ZAWN

- H.C. Vanlalruata

Mizote chauh pawh hi kan ni lo, khawvel hmun hrang hrangah hian mahni ram chhung ni lova thawh tumna hi a lian a. A hlawk leh tha zawk a nih chuan a tha mai a. Thiamna a taka hman theihna a nih a, hlawh tha tak thawh chhuah chuan a tha. Mahse, hlawh tlem leh hnathawh dan dinhmun chhe taka awm theih a ni a, chu ai chuan mahni rama him taka hna hrehawm deuh pawh thawh a tha zawk a ni.

Khawvel ram changkang, system fel taka inkaihhruaina ramah te chuan hna zawn leh hnathawh kawngah a hnu-a buaina tur a tamlo deuh a. Keini India ram leh thenawm ramah te hi chuan hna zawnna kawnga harsatna namenlo tawk a, an tira duh dan reng pawh ni lova nawhchizawrhna lamah emaw hlawh hniam lutuk leh hrehawm lutuk thawkin bawihah an tang thei fo a. Human Trafficking kan tih mai, mihring hmanga sumdawnna leh inrahbeha inbawihna hi hmun danga hlawh tha zawk leh hna tha zawk beisei-a kal thinte’n an tuar duh hle.

Mak ve ang reng chu Mizoramah hian Mizo tam takin kan thawh duhloh hna thawkin Myanmar atanga lokal-te leh Bangladesh mi an nih rinhlelhawm tak tak Assam-a Karimganj, Hailakandi leh Cachar district atangte-in an lokal a. An nupui fanau an chawm thei mai ni lovin Muslim phei chuan nupui pakhat aia tam leh fate an chawm thei a ni. Kan Chief Minister thusawi hi a dik a nih chuan chutianga Mizorama khawsaa ei hmute chu mi nuai 2 dawn an nih hmel a. Mikhual hrawk kan chawm hnem hle a ni.

Mizoramah hian thawh hreh nei lova kan thawh a hun tak meuh a. Chutih rualin state pawn leh ramdang thlenga kan inzar pharh pawh a tul. Chutiang ti tur erawh chuan thiamna neih a tul a, kan kalna tur hnam tawng emaw, khawvel puma hman saptawng emaw kan thiam a ngai tel bawk. Thiamna bik nei chuang silo, tawng pawh thiam chiang bawk silo emaw thiam hauh silo a hna kan state pawna hna hahdam leh zahawm ve nia kan hriat kan zawng lutuk hian harsatna min siam fo ta mai zawk a ni.

Tunhma atang tawhin hetianga phailama hna thawk tura chhuka harsatna tawkte chanchin hi tualchhung chanchinbu-ah a chhuak fova. Sorkar neilo ang maiin kan sorkar lah chu a ngawi daih bawk si thin a. A khua leh tuite harsatna tawk buaipuia tanpui turin kan au harh zo meuh lo fo thin a nih hi. Chutianga phailama hna hmuhsak theia insawi-a sumdawng thinte pawh chu Aizawl-ah hian an awm nual a; kan sorkar leh dan kengkawhtute hian chhui chiana a diklo hremna pek tak tak tak pawh an neih kan hre hek lo.

A bik takin kan hmeichhiate hi Mizo mipa aiin an kawlhrawng (adventurous) zawk a. Chutih rual chuan human trafficking kan tih mai-a sexual exploitation lakah hian an himlo zual thung a ni. Sawi tawh angin thiamna nei tha bik, an kalna state emaw ram emaw-in a mamawh ang chi thiamna nei, tawng lama harsatna neilo an pawimawh fo thin. Chuti a nih loh chuan kan che chhe fo a, kan la che chhe dawn chauh pawh niin a lang. Hmun danga kal hrim hrim duhna te, hna changkang nia hriat bawh lutuk-te hi a takah chuan kan hisap ang a lo ni leh lo fo thinte pawh ni hian a lang a. Kan fimkhur hle chu a tul a ni. Chumi ruala kan hriat tel tur chu keini Mizote leh ‘Vai’ kan tih maite pawh hi kan hnathawh dan phung (work culture) a inanglo em em a. Keini’n zel thel deuhva sorkar hnathawha thawh kan tum ang hi hmun dangah chuan a theih ngawt loh fo tihte pawh hi hriata kan inzirtir a tul ngawt mai.

Keini’n Zotlang Ram Nuam kan tih mai, Vairengte leh Vaseitlang inkarah ringawt inekbeng vek tum hi a changkanglo tih chu kan hai lo. Mahse, kan Chhawrpial Run chhuahsana hnathawka thlangkawrvai emaw mingo emaw bula hnathawh kan tum dawn chuan ngaihtuah tur tam tak a awm tih hre hmasa i la. Fimkhur i la, zuan hma-in kan zuanna turah inchhuih bah palh theihna a awm em tih en chik i la. Mahni inbuatsaih tha i la, ‘tichuan kan buaina leh harsatna hmachhawn theih tam tak hi kan pumpelh ngeiin ka ring a. Human Trafficking laka kan fihlimna tur pawimawh tak pawh a ni ngei ang.

Hemi kawngah hian kan sorkar hi dem loh theih loh niin ka hre fo thin. Mahse, sorkar kan tih hian mimal tuemaw thilti thei deuh an ni duh chawk a. Inhriatthiamna Thuthlung han ziah pui maite hi kan awlsam lua a. A hnu-ah kan thalaite’n an tuar a. Buaipui zui an ngaih laiin kan sorkar chuan a ngaihven leh hman silo fo a ni. Hetianga kan kal zel chuan nakin lawkah sorkar laipuiin ‘Look East Policy’ a tih mai hi a taka a chantir chuan mihring hmanga sumdawnna hi a kawngkapui kan hawng ang tih a hlauhawm ta takzet a ni.

Pawimawh em em mai chu hriatna hi a ni a, thil i hriat chuan buaina i pumpelh fo ang. Chu hriatna chuan bawiha tang pawh a chhanchhuak thei a ni tih hre rengin thil hriat tum i la, hre zau i la, bum theih loh khawp turin i inbuatsaih ang u. Chu hriatna chuan bawih atang chauhvin min ban lo anga, chimralna lak atang thlengin min veng dawn zawk a ni.

Read more...

Tawn leh ni awm tak ang maw?

Engtik lai maha ka theihnghilh tawh ngai loh tur, ‘leng zawng zingah Chhawkhleipari’ ka lo tih ve thin Thanpuii kha.

He khua, kan khua hi a nuam ti pawl tak ka nih ka ring. Mi khawpui te ang luai luaia pui ni em mah suh se, a chenga te kan hlim a, mahni tawkah hnam dang awt bik lovin kan khawsa thin. Mite anga nuamchen thei te ni ve lo mah ila, thenrual tha te ka ngah a, khawi hmunah pawh a tlangtla pawl tak ka ni ve thei zel bawk. Chu'ng zawng zawng aia ka sawi tum zawk chu - nula hmeltha, angel thianghlim ni hiala mawi, 'ka Thanpuii' kha a ni.

Chhungkaw hung tak an ni a, tin, an khawsak pawh a sang viau. Mi zah pawh an kai hle. Khawpui daifem, tlang bawk nuam takah an khawsa a, an in chu pui iaih uaih ni lo mah se, a kal pelte hian ‘a va nawm hmel em’ an ti deuh zel. 'Holiday' te pawh hmun dangah ngat an hmang thin.

Malsawmna zawng zawng te hi a dawng vek bik emaw tih hial tur a ni. A pian nalh tak leh a vun rawng paw pheu mai te chu tu tan mah hian han thlir liam mai mai phal rual a ni lo. Chu ai mah chuan a nungchang chuan mi ngainat a la hlawh leh ta nghal. Kan college-ah pawh lut thar leh tlangnel vak lo reng reng hian nel hmasak tehah an neih thin reng a ni. In lamah ni se pawl hniam zawkte tution pe reng reng hian a buai a, amah pawh a inngaihtuah hman meuh dawn emaw’n le, te ka lo ti ve mai mai thin. Kan college-ah pawh chuan miss-ah kan thlang ta hial reng a; mi reng rengin a phu kan ti em em vek mai. Ka la hre reng.

Thanpuii nena kan inbiak hmasak ber chu kan college library kawtah a ni. Inpelh paha, "I tha maw?" han inti satliah mai zawng kan ni na a, ka tan chuan kha'ng hun te kha a hlu em em mai. Phak ang tawk tawkin zirlai pawlah te ka inhmang ve a, tin, infiamna lam ka lo ti thei ve zul bawk nen, a hriathlawh pawl tak ka ni ve a, chu'ng vel bak chu han vei em em pawh ka nei lo. Hmeichhe han chhai vel te phei chu ka zei lo a ni tih hmuchhuak tur khawp pawhin ka la tawngsang lo hrim hrim. Chuvang chu a nia, khami tum pawh khan ka zam a, ka khurh ruk der der ni.

BA kan zo a, Gauhati University-ah zir zawmin kan khua ka chhuahsan a, Thanpuii erawh chu an khawsak te'n a tlin bakah an khawhawi te a zau bawk a, hmun hla zawk, Delhi lam a pan thung. Chutiang vel avang chuan kan awm hrang ta a ni. Ka ngai thei em em.

Remchang hmasa berah ka haw a, thiante nena kan han inhmu chu kan hlim hle. Zan khat chu, nipui lai a ni a, thian te birthday lawmnaah ka kal ve a, chutah chuan a ni, hun engemaw chen ka hmuh tawh loh, hmuh leh ka chak em em, ka zawn ruk reng thin, Mengmawii ka tawn leh ni.

Kan han inhmu chu kan hlim dun em em. Kan inchibai a, chuta a kut nem nel thep mai leh han huma lum thar thar mai te chu ka la hre reng mai. Lampuiah min sawm a, 'min sawm a' ti ila lamtualah min pawtlut a ni mah zawk awm e. Chu chu ka lam hmasak ber tum a ni a, ka chhunzawm leh tak ka hre lo. Tichuan kan su ve ta dep dep a.

Hmeichhe sang pawl tak a ni. A vun tuihnai zet mai leh a ha var rual that mai te, a hmel ngainatawm tak te chu hmuhnawm ka va'n ti tak em! A sam bu chhah hlap mai te chuan a dar vel an vaw siau siau mai. A kawr var, ban nei lo hak te chuan chutiang inchhung eng vak lo, ni deuh chiaiah pawh a tilangsar vuah mai. A thawmhnaw khuh baka lo lang, a taksa pengte chu han en ila, nula hrisel bungrua ni awm rengin a khal deuh talh hlawm. Kan hlim dun em em. Music ri riai riai karah te chuan kan inbia a, kan phun sep sep mai. A chang leh an hla sak te chu kan lo zawm ve ang zat zat bawk a.

Kan ti dawn chauh emaw tih laiin tin a lo hun der mai. An in a hla lutuk lo bawk a, ka va thlah a, kan han inkai phei hnek hnek mai chu kan hlim dun hle. An kawtkai kan thlen chuan bang nghengin ka lam a rawn hawi a, kan insi lo chauh a ni. Min en danah chuan a beisei mai ni lovin a sawmin min sawm a ni tih ka hrethiam a, mipa ka ni tih ka hrechhuak zawk mai!

Ngaihtha har tak mai ka ni a, a chang chuan Thanpuii thinlung hi ka luah zo meuh lo ni te'n ka hre thin. Amaherawhchu, min chhuang em em a ni tih erawh ka chiang. College kan kal lai te khan ka tana tanpui vartu hnai reng, 'guardian angel' nih a duh thu te min hrilh siam siam thin asin. Exam dawn leh ka inkhelh dawn te pawhin duhsakna thu mawi tak tak te min thawn thin a, mi te pawh a rawn phone tak lawm lawm thin a nih bawk kha.

Mipa dangte hian eng nge an tih ka ngaihtuah lo, Thanpuii a dama kan inawm heuh heuh theih chuan a tawk mai. Duhthawh taka ka fawh a, lawm taka min lo chhang let te kha ka tlangval ve ta a ni tih min hrilhtute a nih kha!

Mak ka tih ruk ang reng thin chu ama chanchin leh a nih tum te a sawi ngai hauh lo kha a ni. Vei leh harsatna te hi a nei ve vak lo a nih dawn hi, te ka ti mai mai thin. Pawl ruk a nih laia a ke khing hnih a tihtliah thu leh chuta tanga harsa taka kal zir tha leh a nih thu te kha min lo hrilh thin sela ngaihnawm ka tih theih dawn tehlul nen.

Engpawhnise, ka atchilh a ni thawthang mai, a chanchin sawi chu ka chaw tui ber a ni. Amaherawhchu, thupui han vai tak tak dawn hi chuan a tlanchhe deuh tlat zel thung. Beisei nei tak chung hian, "Hun a ti lo a ni ang e," ka ti mai thin.

Zan khat chu, ka dinhmun anga ding, khawilam mipa mahin an lakzam theih bik loh tur thu thinthawng zet mai min hrilh pek a, "|hian tha nih hi a tawk mai lo’m ni?" tiin min zawt a nih chu!

Ka lungawi lo em em. Min lo fiam mai mai avanga ka lawm lohzia leh a rin ang em ema mawl chu ka nih bik loh thu te'n ka chhang a, tin, kha chen ka lo hrethiam lo kha nep ka intihzia ka hrilh bawk a, ka tlan hawsan ta a ni. Rilru fim hnu, a tuk zingah erawh chuan ka inchhir a, ngaihdam dilna te ka thawn a, a thian nih ka pawm thu te pawh ka thil tel nghe nghe kha.

Kan inkawm chho zel a; tunah chuan zirlai thar ka nei a, a tak talh mai lehnghal. A laka mihrang ka nih tak thu chuan mi run em em mai. Thup ka'n tum ngial thin na a, ka thup zo ngang lo ni tur a ni, min zawt ta chawt mai:

"Thil dik lo a awm a ni tiraw?"

"Eng thil dik lo teh chiam nge awm ang?"

"Nangmah kha i ni tawh tlat lo, i danglam tlat, eng emaw lai atang khan."

Khatia mei nei deuha ka chhang khan a run em em mai a lo ni a, chumi tum chu a thinrim ka hriat hmasak ber a ni nghe nghe.

"Kan pahnih tana a that zawk ka rin vang a nia. Ka zirlaiah insawrbing ka duh a, tin, media lama ka luh phei chuan hetiang lam hi chu ngaihtuah loh law law ka duh a," a ti a, kei chu ka ngawi reng.

Ka mang a ang em em mai. Aw-ka vin phuh chhuak hmasa tu-a ka tang kha ka inchhir a, ani paw’n inthiam lo hmel chu a pu ve tho. Ka sawi tur haihchham chuan a kut ka’n vawnsak ngawt a, tin, min lo chhang a.

Kan ngawi dun vang vang a, thawm hriat tur dang a awm lo, thingkung insawi ri te leh sava chiar nek nek ri te mai lo chu.

Hun a kal zel a, nipui chawlh a ral, ka kal a lo hun leh ta reng mai. Lungawi lo burin kan khua chu ka chhuahsan ta ni.

Hostel-ah te chuan amah ngai reng rengin ka kur a, zanah te hian kan khaw lam hawiin tukverhah ka'n dak chhuak ngawt a, tih theih dang vak a awm lo. A awm lo tak tak, engkim mai hi a tawp tawrh vek mai a ni! Ani paw'n min rawn vei ve thinin ka ring; mahse, a bul tan leh hmasatu nih erawh ka tum hauh thung lo. Ka theih rei leh rei loh chu thuhran ni se.

Ni khat chu a thiannu Julie nen an rawn lang hlawl mai. Delhi-a an chhukthla tur Guwahati-ah an cham a, inhmuh leh hram an duh avangin min rawn tlawh zawk a ni awm e. Tin, rel station atanga amah thlah liam turin min phut bawk. Kei chu ka tang lo, ka phur em em zawk. Tichuan kan inzui chhuak ta a ni.

Ka insiampui a, bungrua te ka telpui a, keia hostel lut tur nen chuan kan bungrua pawh a inchangkan hleih ngei mai. Phu zawng ka phu mawlh lo che mawle, ka ti rilru rauh rauh mai.

"Nang ai chuan ka tuar thei lo zawk a ni ti raw," a ti a, kei chu ka nui ringawt. A kut han vawnsak te chu ka chak em em mai; tin, chu lo deuh te pawh! Mahse, ka tum lo.

An kal a hun a, an inpeih ta at mai. "Mangtha le," ka’n tih chuan, "Chu ringawt zawng a tawk lo, ‘kan inhmu leh vat dawn nia’ ti tel rawh," a ti ta tlat mai.

Tichuan kan invai liam ta a.

Kei pawh hostel lamah ka let a, zirna lam a ni emaw, infiamna lam a ni emaw, tumah ka aia sang an awm tur a ni lo tiin rilru ka siam a, keima tawkah ka insehruh ve hle. Amah vangin ka tih peih loh tur tam tak ka ti a, ka nih phak loh tur tak tak ka nih phah fo bawk. Tin, amah zawk chuan min rawn bepawp hmasa a, phone-a kan inbia te chu kan no dun thin hle.

Chutiang chuan beisei reng rengin ka khawsa a, ka thla a muang em em. Ka hma lawkah hian tlang mawi tak, hnim hring leh pangpar te vul chukna hmun a awm a, chu hmun chu la thleng mai tur niin ka inhria a, mite’na min thik loh tluk zet hian kei pawhin thik leh han awh ngawih ngawih ka nei bik lo.

Khawvel hi zawng a mak teh e, thil ni thei lo tak tak pawh a awm lo a nih hi. A chang phei chuan a rawng lutuk mah mah ni te'n ka hre thin. Thanpuii khan tawn-thar-di a tawng a, tlangkam leh thiante titi atang tea ka lo hriat danin, an zirpui tlangval hmeltha leh ruakhau tha tak, mi neinung tak fapa nen tlai ni tla tur te hi hlim takin an thlir dun thin a ni awm e!

Lehkhazira phaia awmte chanchin thenkhat, chhungte hmuh phak lohva inngaizawngte khawsak dan ka lo hre ve zauh zauh tawh a, chu'ng te ka ngaihtuah chang phei chuan tirilah min man a, ka thaw halh halh thin. Ka ngaihtuah thui ngam lo.
Engkim hi kan chunga thleng thei vek a ni. Lungngaihna te pawh hi kan pumpelh ngawt thei si lo a, a tawrh lam tal kan chak mai a ngai a ni. 'Hmeichhia reng reng ka ring tawh ngai lo ang' tiin rilru ka siam a, ka zirlai ka bei ngawrh zual sauh bawk. Amaherawhzawng, nghilh ni reng ka nei ngai dawn lo a nih hi.

Thiante an tha a, ka hlimna tur ngawt an ngaihtuah a ni ber mai. Ngaihzawng te hi chu, thian tha ber te laka kan beisei ngam loh pawh an lak atangin han phut thin mah ila, inphatsan hun a lo thlen changa min buaipuitute chu thian tha te bawk an ni leh thin, ti te’n ka ngaihtuah a.

Vawi khat chu a birthday-ah ka va phone a, lawmpuina te ka va fah ve luam. |ha tak chuan min lo chhang na a, a tlanchhe aw deuh tlat. Ka ngaihbel emawni, phone atang chuan mipa aw, thu nei taka tawng vel te pawh ka hriain ka hria e ka ti!

A chang chuan phurna leh huphurhna te hi a lo thleng rual thin. Khami tuk, kan hostel-a phone-ah min be duh an awm thu tu te'n emaw min rawn hrilh pawh khan, chak ang reng tak, huphurh deuh bawk siin ka awm a, Thanpuii a nih loh pawhin a lamhnai te tal an nih ka ring a nih kha.

Ka va la ta a.

A thiannu, Julie kha a lo ni a, thla leh maia pasal nei tur a ni a, a thiannu pawh inneih hmangin a lo haw dawn a ni tih vel a rawn sawi dawn a nih ringin ka lo fiam hlut mai. Mahse, chutiang a lo ni lo.

Khawvel nen hian kan inrem ve ngang lo a nih hi, Thanpuii kha motor accident-ah a thi! Chu chu Julie’n huphurh tak chungin min rawn hrilh a ni. Tin, a vuinaa tel tur leh a rang thei ang bera haw turin min ti bawk.

Kawngka ka khar ri thuai a, haw tur chuan ka intintuah ta. Mahse, ka’n inngaihtuah chiang a, a vun tuihnai tak te kha a lo da bei ang a, a pangti lum hiam thin te pawh rial angin a lo dai tawh ang; tin, biak pawhin min chhang tawh dawn si lo. Chu’ng chu ka hmu duh lo, Thanpuii, nula hmel nung sarh mai kha ka mitthlaah cham reng se ka duh zawk. A thuhrimah nupa chu sawi loh, inkawp lai pawh kan ni lo a, ka tel ve chuan zahpuiawmna chin ka nei ang a, tute emaw tan phei chuan hnawksak mai pawh ka ni thei ang tih te ka ngaihtuah a, a hmuna va tuar ai chuan hostel-a tuar chu ka thlang ta zawk a ni. Kei zawng ka tlei zo ve tawh ngai dawn lo a nih hi.

Thlasik chawlha ka haw chu, karei! He khua hi! A hmunhma leh engkim mai chu a lo la ngai a, chu ringawt pawh chu ka tan chuan a rit lutuk mah mah a ni. Mi min sawi dan tur ka ngaihtuah lo a, ka thatna tur ka ngaihtuah thei hek lo. Kei zawng ka na a nih hi. An in leh a vel pawh ka hmu ngam lo. An kawmthlanga lui te luang ri ker ker te hi hlim takin kan lo beng per dun ve thin asin.

Chawlhkar hnih emaw lai ka awm hnu chuan, lan loh ngawt zawng tiin, zan khat chu ka va lut ve ta rawih mai. Chuta a chhungte nena kan han inhmu chu, fapa zin haw ang mai hian min lo lawm a, tin, kan tap bawk a! Thil dang sawi a thiang lo, Thanpuii chanchin chauh lo chu.

Chhungkaw tha tak an ni, kei pawh min khawngaih tak zet niin ka hria; an fanu an ngaihzia chu thuhran ni se.

A nu chuan, "A chhuang em em thin che asin, nang hi chu i chanchin pawh a sawi nasa," min ti a, insum har a ti ve hle. An lungchhia tithartu niin ka inhria a, tin, kan inkawp laia vanduai an ni bawk si lo nen, awm ngaihna tak pawh ka hre lo a, sawi awm leh awm loh pawh ka hre lo.

Banga a thlalak an tar chu ka en vang vang a, hemi ni, a thla lak ni hi ka la hre chiang ngang mai. An kawt thingbuk hnuaiah thuin, thli thaw vuk vuk karah kan inkawm a, kan phone number a theihnghilh thu min hrilh a, chu chuan min run em em mai. Ka lungawi lo chuan min biaknate pawh chu ka chhang duh ta hlek lo mai a ni. Chutah nui har har chung hian, "Chutiang te ka theihnghilh theih tak tak i ring em ni? Ka uang mai mai a nih kha," a ti a, kei chuan ka tel lova a awm theihzia lantir nana a tih pawh a nih theih thuin ka chhang a, min tih nuih talh a tum a.

A nu chu pindanah lutin thlalak dang, kan pahniha lan dunna a va la a, “En teh.....”

Ani chu chair-ah a thu a, kei a hnungah dingin, a dar dinglamah chuan ka khabe ka nghat a, tin, kan nui dun a.

Chu’ng zawng hlim lai ni a ni, hmanlai a chang zo ta. Tawn leh ni a her chhuak tawh ngai dawn si lo.

(Kum 5/6 kal taa ka ziah a ni a, Zozam Weekly-ah pawh kum 3 vel liam taah khan a chhuak tawh. Mahse, a 'naupang kutchhuak' riauvin ka hria a, ngaihthat nan ka siamtha a, kan han tichhuak leh a ni. Hetia ka siamthat hian a 'puitling kutchhuak' ta khawp e, ka tihna phei chu a ni chuang lo.
- Lalhruaitluanga Chawngte)

Read more...

Tanpuitu mitmeng

Kum tam tak a liam ta, Virginia hmar lamah chuan chawhnu tlang her a ni tawh a, khawvawh hun lai a ni nghe nghe. Chu putar chuan lui ral lehlama phurkaitu tur a lo chang ve tawp mai a, a khabe hmulah chuan vurte chu a kai luai mai a. Eng tik khaw tikah mah a nghakchhuak zo dawn lo niin a ring rum rum tawh hial a. Hmarlam thli vawt vin tuk mai thaw vuk vuk avang chuan a taksa chu a chawmawlh zo vek tawh a ni.

Sakawr lo tlan ri tuk tuk thawm a hre ta a, kalkawng vurin a khuh vek chu an rawn zawh a, an lo hnai zel a. A awm hmun atang chuan nghakhlel takin a lo thlir a, an chuanpui ve duh mai beiseiin kawng kual laia sakawr chungchuang rawn inzui duah duah chu a lo en reng a. A hmasa ber chuan ngawi rengin a rawn kalpel a, en pawh a en lo hrim hrim. A dawttu pawh chuan a rawn kalpel leh a, an hnunga mite pawh chuan ngaihsak miah loin an kalpel ta zel a. A hnuhnung ber chauh chu a awm tawh a, a bul hnaia a lo kal lai chuan putar chuan a mitah tak lo en kal chungin, "Ka pu, ral lehlamah sawn kei putar hi min phur kai ve thei ang em? Kea han kal kai rual a ni si lo a," tiin a lo bia a.

Sakawr pawhdin pah chuan a chunga chuang chuan, "Tehreng mai. Rawn zuangkai rawh," tiin a chhang a. Mahse, vawt tih vanga khawng lek lek tawh putar tan chuan zuankai chu sawi loh lawn pawh a lawnkai thei dawn lo tih a hmu nghal a, amah zawk chu a chhuk a, putar chu sakawr chungah chuan a hlang ta a. Sakawr chungchuang pa chuan putar chu lui a kanpui mai bakah mel engemaw zata hlaa a chenna thleng chuan a phur ta zel a. A in te tak te, felfai ang reng tak an thlen dawn chuan sakawr chungchuangpa chuan a rilru kap rengtu leh mak a tih ruk em em chu a zawt ta hlawl mai a.

"Ka pu, ka hmaa mite kha inphurhtir turin tumah i ngen lo a, ngawi renga i in kalpelh tir zel kha ka lo hmu reng a. Keiin i bul ka lo thlen veleh khan lui rala phur kai turin min lo ngen nghal mai bawk si a. I chet dan kha ka hrethiam thei lo, khatiang thlasik tlai khaw vawt takah khan kei, a hnuhnung ber min lo nghak kha mak ka ti ang reng khawp mai. Kei hian lo phur duh loin kalpel ve ta che ila engtin nge i awm tak ang?" tiin.

Muang changa sakawr atanga chhuk pahin putar chuan chu pa mitah tak chuan a en kal a, "Helai velah hian ka awm rei tawh viau a. Mi chi hrang hrangte pawh hi ka hre chiang tawk tawh viau bawk," a han ti phawt a.

Putara chuan a sawi chhunzawm lehnghal a, "Sakawr chungchuang min rawn kalpeltute kha an mitah tak ka lo en zel a, tumah khan ka dinhmun kha an ngaihtuah lo a, min ngaihsak reng reng lo tih chiang takin ka hmu zel a. Min phur tura lo ngen khan awmzia a nei dawn lo tih pawh ka chiang a ni. Mahse, nang kha chu i mitmeng ka han en khan, zaidam leh nunnem tak, tanpui ngaite pui thin mi i ni tih ka chiang nghal a. I rilru that avangin lawm takin min tanpui thei dawn tih ka hrechiang em a ni," a ti a.

Chu thu chuan sakawr chungchuangpa chu a hneh hle mai a. "I thusawi avang chuan ka lawm tak zet a ni," tiin putara chu a chhang a. A ngawih hlek hnu chuan, "Mi dangte puih duhna thinlung ka pu zel ang a, keimah ka inngaihtuah vang leh ka mimal thila ka buai vang ngawtin tanpui ngaite ka hlamchhiah ngai lo ang," tih thu hi a sawi zui nghal a. Tichuan Thomas Jefferson chuan a sakawr chu a pawt her a, White House lam pan chuan a tlankir leh ta nghal a.

(A ziaktu hriat loh, Brian Cavanaugh's 'Sower's Seeds' tih lehlin a ni. Thomas Jefferson hi United States President pathumna a nih bakah Declaration of Independence duangtu ber a ni a, US president ropui ber pakhat a ni.
- Lalthlamuana Ralte)

Read more...

Nunhlui Ngaihawm Lo

¢ Ruatsanga Ralte

Kan laichin unau leh kan khuaa ta chu hotute'na ram min la en tir tur lam pan chuan kan chhuak ta a. He no hian mi pel lul se tih chu ka duh dan ni teh meuh mah se, in thu ang zelin ka chungah thleng rawh se, tia hotute thu awih a ngai si. Zep nak emaw, 'Eih!!' pawh ka ti hman lo a chha chu a ni ber e.

Hetih lai na na na hi chuan ‘Mihring fapa hi engemaw a nih a, hotute hian an hriat reng ni’ ka ti a, kan neih zawng zawng, sabengtung, sebawng chal, sakawr, beram leh ran rual tam tak te nei ve mah suh ilang, kan neih tlem a zawng leh thenrual thate duhsakna namen lo nen kum 2006 Vawkhniakzawn thla chawhnu lamah chuan kan inphekphelen phei ta bung bung mai a. 2nd IR Bn,Khawzawl-ah chuan kan hna chu kan zawm ta a.

Counter Insurgency and Jungle Warfare School(CIJWS)Vairengte/Lailapur-ah chuan
He CIJWS kan trainning-na tur hi khawvel hriathlawh khawpa training-na thaa an sawi a ni a, Asia-ah phei chuan pahnihna ngat a ni awm asin. A dik emaw ka hre law, ka hriat chian erawh hei hi a ni, kan lu a hai a, CIJWS hotute lu pawh kan ti hai hle, tih hi. Asia number 2 pawh kan chawk zero a ni ber e.

Phai ram rila thawnchhuah tur nafam chu a phai chin Lailapur-ah chuan a Battalion chu kan inkulh rup mai a, ramri chungchangah Assam (Cachar)nen intihbuai thulh pawh lo thleng se VAI-hoin tanhmun an laka an bawh phek thupna turah chuan kan puan in te kan kaipharh a. Heta kan awm lai tluka ni khat rei ni hi a awm paw'n ka la hre lo a, a awm leh pawh ka ring tawh chiah lem lo. Kan naute ho hian ni khi an pawt ding a, a rei em em a, ni lah chu a let tam taka tih sat a ni vei bawk nen, a lum uap churh mai a, lung hi a leng lo ngawih ngawih mai asin. Lung chang a ni nem keini pawh kan leng hman hek lo, kan nauteho erawh an lung a leng lo a, anmahni an leng zawk si. Chumi buaipui a ta lang chuan mawngvawm ba ang maiin kan phe kual vel. Khami thla hlawh kha ka phu viauvin ka hria. Phainuam (lower/upper)rama sipai nungchan han zir meuh kha chu a namen lo hle. Mizo hi kan ropui vein hming han phuah mai te hi kan thiam ka ti, a lum a, hrehawm kan tih tehlul nen kan awmna lah chu hmun dang ni lovin Phainuam ngat a ni si. Mizo hi pa deuh chu kan lo ni, ramhnuaia riahbuk kan han sual, kan naute an pil vang vang an rawn haw leh hi chu mautuai leh rawtuai me pawh me tak tur a ni tih hriat hliah hliah hi hnanga thil tlar tuarhin an rawn awrh haw hnuang hnuang mai chu JOHN RAMBO meuh paw'n pa a ti ve ngeiin ka ring.

Guwahati-Chhattisgarh lamtluang Special train-in
Kan tawng tu'n lo ngai haw lo se, kan naute tam zawk hi kan Zotlang ramnuam la pel mang lo an ni hlawm bawk a, Guwahati chin pawh kan kal dan chanchin a ngaihnawm asin. Kan chuanna tur rel (train)chu a rawn vuaicha nek mai a, Mimkut Thla ni 28, 2006 zana kan thleng thla chu a tuk tlaiah kan awmna lamah a rawn kiu ruai ruai thei chauh mai. Kan naute zauthau hlim lawm leh han ‘saw le!!!’ vel thawm chu(h) ropui deuh asin.

Rel luin a pindan hrang hrang a'n hnuk kual vel pawh an nghak zo tawh lo, Mizo tlangval sang dawn deuhthaw mai chu chuan chakin, sakawrpa intlansiak tur tlan chak ang maiin an ter et et tawh mai, inkhap sen ni hek suh, an lo han pakai thul, an thiante an aia thutna nuama thu tur zawk pawh an Bye Bye, Battalion haw haw hian an haw haw ruih ruih mai a. A inpeih dawn ta, kan bungraw neih zawng zawng bakah, ui chuangtlai vak rawlai, a remchan huna ei tur kan naute man khawm nen tlai ni nemah min thlahtute nen invai liamin chu rel chuan a duh lam hawiin min phur liam ta vut vut mai a. A hnua kan hriat leh danin kan naute thenkhat tuantha fal bik deuhte chuan an ui vuakthluk chu bawlhhlawh eng ilo leh lehkhakhawng chhia an hmuh theih ang ang hmangin an lo rawh thial thual hman hi a ni awm e. Mahse train/rel-ah chuan duh thala ei rawng bawl pawh a har si, an chhum hman ta meuh si lo a, a zan khatna leh ni khatna vela an chil tiput em em chu a ni thumna leh ni lina velah chuan a thehthang dan an ngaihtuah nasa mai hi a lo ni awm a. Faduat tak anga puana lo tuam tawk lah bo lo, lo fun uih ta hum hum lah awm bawk, eitur tui lutuk chan bawk, an puan chan ta bawk pawh an awm an tih pek chu.

Chu special train chuan kan beisei leh rinlawkna lam pawh ni miah lovah min hnuhkual min hnuhkual hnu pawhin keini sorkar sipai-te chu kan phun nawi lo. Zoram lamah chuan khua a thiang nuam tan tawhin hmun thenkhatah te phei chuan zan pawh a vawt lam lek lek tawh ang tih hun September (Mimkut thla) thla ni 27/2006-a Zoram chhuahsan kha kan ni a. Chhawrpial run iang ve lo na fam vai ram zet chu a la hrangin a la lum namen lo hle. Train (rel) la chuang ngai lo tih takah kan naute chu an hlimin an chiau chel chul mai. Kan naupan lai, rel chanchin a rim a ra pawh kan hriat hmaa (han ti ve khanglang ila) rual U te'n an sawi thin rel kawng ngil turuzia leh kawi hlek pawh a awm loh thu, a kawng mam takah chuan duli tlang pawh lo tla palh se rel chu a accident mai theih dan an sawi kha kan lo la vawng nghet tlang ni hmiang, kan nau thenkhatte lah chuan rawra-a rel lo kam din tumin a rel-ah chuan an lo dah thul, engtin takin nge chu an dalna lung chuan khawlhkham a siam tih thaw dep depa thlirin an en ran mai bawk a, an rin ang lo deuhin nge an rin ang chiahin an dalna lung chuan eng he hu a thawk lem hlei law!

Kan naute lo chuan than tawhna motor chi hrang hrang, Zoram lama kan lo hmelhriat tawhte nen chuan rel zawng a lo danglam deuh a, thir chang leh thir chang inthial tih takah a ri buk buk mai. Chhe mai tur awm ang hrim hian a ri rum rum mai bawk si, kan nau thenkhat ngaih a ngam thei tlat lo. A accident ngei dawnin an hria a, pakhat phei chuan a nupui fanaute dam taka a hmuh leh theihna awm chhun nia a hriat chu rel tlan chak lai tak atanga a rang a ranga zuanthlak chu nia a hriat avangin Rourkela hmuna kan tlan laiin a zuangthla ta mai. Kan rual pawhin kan tum ram chu thleng ve hman lovin a hnu feah a hlauh em em REL tho chuan a lo thleng thla ve leh ta lawi a!

Rel kan chuan tan ni chuan, an chuan vawi khatna te a ni bawk a, zauthau leh hlim leh nuam tiin kan la inawm tlei thei thaw khat. Kan han chuang rei ta deuh a le...Kan naute chu an tlei lo tan ta viau mai, Chhattisgarh lah chu chil pik phak lek a lo ni mang si lo, a ni thum ni-ah te phei chuan, Mosian Israel fate khawizu leh hnute tui luanna ram pana Aigupta atanga a hruaichhuak a, Tuikha hmun te, Thlaler hmun te a hruai a, an phun nawi ang khan, kan naute chu an chiarhiar ta hle mai a. Rel chuan nuam ti em em mai khan an ning leh ta em em mai a, chuanna tur dang lah nei der hek lo i, ning ila ning suh ila kan chuan a ngai tho tho si.

Rel a kal muan deuha a'n chik deuh tuarh tuarh chuan kan naute chu rel atang chuan an zuangthla sup sup mai a, rel chu an beisei ang ngei chuan a ding ta ngei reng e, mahse a din rei dawn leh din rei dawn loh thuah an ngaihdan an lo kal pui thui deuh a ni teh chek ang chu, tlema hla deuhah te an lo va petek hman, kan in tlansan thul, rel tlan chak lai um ta chiam chiam lah bo lo, kan chikim khawp mai.

A then lah mahni chuanna compartment-a chuang hman lovin a tawp ber, bungbel kan dahna, chaw te pawh kan chhumna hmun thleng thlenga lo va kal, lo va tawm zankhua ta mai tawk lah bo lo. A ropui lem lo na a, sawi tur a ti tam ta a nih hi le.

Kan sawi tawh ang khan kan chuanna hi Special Train a ni kan tih tawh kha, a 'special' dan erawh a dangdai deuh. Thil dang 'special' chu a chi rau rauah a tha deuh, a bik deuh a ni ngai a, kan chuanna rel 'special' erawh chu Pu Vawnga khawchhak ar sualhuai hawn ang deuh a ni a, "Khawhnai ar han mawl zia chu, ar sualhuai ka hawn a, sualhuai a ni tih an hre lo a, Khawhnai ar chuan an um an um mai a," a tih ang deuhin, midangte chuan special train-ah Mizo sipai chhuanvawr kan chuang a ni tih an hre lo a ni ang min tlan khalh min tlan khalh ta mai a!

Rel dangin min nghak thup ang a, hmai zangthal hain kan tlan pel fua fua ang chu tih nak a lai a, rel dang tlan zawh vek kan nghak a, an tlan fel vek hnu deuhah kan tawlh ve tual tual thin si!

Read more...