Monday, October 26, 2009

Lepse Tute Lepse Ve Duhtu An Awm

PRISM chuan beihlet a tawk a, mita khanchhuk awm renga midangte mita hmawlhte awm ngaimawh tlattute an ni, tia puh an ni.

“Eiru nia rin thlanna buatsaihtu PRISM leh an thawhpuite chu mahni mita khanchhuk awm renga midangte mita hmawlhte awm ngaimawh tlattute an ni,” tiin K Laldinthara, social worker chuan a sawi.

MSU president hlui, Indian Confederation of Indegeneous and Tribal People (ICITP) Mizoram Chapter, general secretary ni lai, Citizens Forum on Human Rights (CFHR), ram pum huap Human Rights pawla co-convener ni bawk K Laldinthara chuan he thu hi October ni 17 khan MSU Office-a thuthar lakhawmtu thenkhat a kawmnaah a sawi a ni.

K Laldinthara chuan, “Eiru nia thlanna buatsaihtute ngei hian an ngum khak an hmu lo niin ka hria a,” a ti.

PRISM president chu Human Resource Development Society (RESO) a kaihhruai laia pawl sum tichingpen a puh a nih avanga chhuifiah turin kum 2007 khan First Information Report (FIR) chu ama lakah Anti-Corruption Branch (ACB) hnenah thehluh a lo ni tawh niin a sawi.

Kum 2001 khan ralthuam nena man a ni a, jail-ah khung a ni a, hel pawl anga ngaih ‘Mizoram Reformation Force’ (MRF) dintu leh president kha a ni, tiin PRISM president Vanlalruata chu a puh.

YMA-in ruihhlo do beihpui an thlak lai khan ‘Drinkies’ tih hming phuah, Grape Juice siamnaa a bul tumtu ber a ni a, rakzu nena pawlh nen lam zawrhchhuah a nih avangin Grape-Juice pawh zawrh phal loh deuh thaw a lo nih phah tawh, a ti bawk.

K. Laldinthara chuan, “Eirukna Do pawl anga ngaih theih PRISM hruaitute chhan atan heng zawhnate hi ka zawt,” tiin hetiangte hi a sawi - “Hruaitute eizawnna leh sum lakluhna hnar, Office luahman leh hnathawk an chhawrte hlawh engtin nge an pek? Computer leh Office Furniture-te engtia an neih nge? High Court kalna senso zawng zawng hi tu tumsak nge? An zinna senso te hi engtia an neih nge?” tiin mipui hriata chhang turin a ngen a ni.

K Laldinthara chuan hetianga hmalakna hi politics thila hamthatna zawn vang emaw a nih loh thu leh eiru nia rinhlelhte thlavang a hauh vang ni lovin, amah ngei pawh a fel vang leh dik bik vang ni chuang lovin, Mizo ram leh hnam tan, kan sakhaw him zelna atana pawimawh a tih vanga hetianga hmala a nih thu a sawi bawk.

Hemi chungchangah hian PRISM presient Vanlalruata chuan K Laldinthara chungchang sawiin, “Duh a nei a ni mai. A tih chhan hlawkna kha hmu ngei turin ka duhsak,” a ti.

PRISM hmalaknaa eiru list chungchang sawiin, “He thil hian kan hmalakna a ti thuanawp lo ang. Mipuitling leh rin ngamte'n kan thil tih hi min pawmpui tlat tawh,” a ti bawk.

K. Laldinthara puhna chu dawt a ni em tia zawhna chu chhangin, “MRF chungchang kha thudik a ni a, ka zep lo. A bak kha thudik pakhatmah a awm lo, tharum thawh hial duhna kha kei chauh lo pawh nei an awm fur ang,” a ti.

Drinkies chungchang sawiin, “November ni 15, 2004-ah inhmukawmin pawl din a ni a. Share Capital Rs 1 lakh a ni. Kan firm hming chu Biofood International a ni a, kan fatory address pawh K – 44/B, Republic Hmar Veng, Aizawl a ni,” a ti.

“Partnership angin kan kal a, RF/Mz – 7 of 2004 – 05 dt. 9.2.2005 a ni a, Industrial niin 150300691 Prov. Tin dt. 1.2.2005. 3)Legal Metrology : LM – 0025/MP of 2005 dt. 9.2.2005 tihian fel thlapin engkim kan nei,” a ti.

Managing Director: S. Hrangluaia, Republic, Technical Director: Vanlalruata, Republic (presently Maubawk) Accounting Director: Lalchhanhima, Venghnuai tiin kan invuah a ni, a ti.

“Kan product pawh Drinkies & 50 – 50 a ni a,” tia sawiin, “750ml- Rs 60.00, 500 ml- Rs 40.00, 250 ml - Rs 20.00, 100 ml- Rs 10.00” a ni a, 50 – 50 pawh 750 ml kan siam chu Rs 75.00 in kan zuar bawk,” a ti bawk.

“Kan technology hman hi CFTRI, Mysore-ho hman a ni a, kan phuahchawp a ni hek lo,” a ti bawk.

Vanlalruata chuan sawi belhin, “November ni 30, 2004-ah PIB Media Centre, Tuikhuahtlang, Aizawl-ah Pu K Sapdanga, Vanglaini editor-in a tlangzarh a. He hunah hian excise department leh industries department atang tein aiawh lo kalin ruihtheih grape wine luahlan thei tura grape atanga siam soft drink awm lawmawm an tih thu an sawi hlawm a. Media hrang hrang atanga lo kal an awm a. November ni 30, 2004 zana LPS, Skylinks leh Zonet-ah te Headline News a chan bakah ZONET-in programme pum pui a telecast a. December ni 1, 2004-ah Vanglaini, Newslink, Romei, Mizo Aw, Mizo Express leh Aizawl Thupuan-ah te hemi chungchang hi ziah a ni a. A hnuah Huapzo (Magazine)-ah ziah a ni bawk,” tiin Zozam Weekly a hrilh.

Harsatna an tawh thu sawiin, “Grape wine duh lohna a len zel avangin market-ah harsatna kan tawk a. Chanmari VC te'n an veng chhunga grape wine zawrh an khap chu 11.12.2004 khan VC te nen kan inkawm a, kan product te an in chhin hnu-ah ziakin an veng chhunga zawrh phalna min pe a," a ti.

"November thla laihawl velah tho Central YMA hruaitute nen an office-ah kan inkawm a, kan product chu tha an tih thu min hrilhin marketing-ah min tihbuai an tum lo tih min hrilh a. Grape Juice dang an mana an paih fo hnu-ah pawh kan product hi man leh paihsak a awm ve lo,” a ti bawk.

Mahse, an company chu tihtawp a nih thu sawiin, “August ni 23, 2005 khan DIC, Ramhlun atangin kan industrial provisional registration tih tawp a nih thu kan dawng a. A tul anga thuneitu hrang hrang dawr a nih hnuah 27.8.2005 khan production leh marketing tihtawp a ni a. Stock zawng zawng tihchhiat vek a ni bawk a. Cheng tam tak hloh phah a ni,” a ti.

MRF chungchanga Zozam Weekly zawhna chu, “Thudik a ni a, phuah belh hlak chu an nei. Pawi ka ti lo," tiin a chhang.

‘Tlema la naupan leh thisen lum lai a ni a, corruption-in kan ram a tihchhiat nasatzia hmuin mi corrupt te hi talh mai duhna thinlung puin MRF kha kan din a ni. Kha'ng lai khan tuna kan hman lar RTI hi a la awm lo a, eiruk hmangte lakah khan mipui kha kan thinrim tlang tawh tho a nih kha. Mahse, kan chetchhuah hman hmain min man hlauh a. A vanneihthlak ta phian a nih hi. Thluak te a nem chho ve zel a, tharum thawh aiin dan chelek a tha zawkah ka ngai chho ta a. RTI lo awm nen PRISM hi dinin hma kan la ta zawk a ni. Misuaksual, ram tichhetute chet duh dan ka hmuh hian a chang chuan tharum thawh ka la duh fo thin a. Bible thu te ka ngaihtuah avangin tihian ka la kal zel zawk a ni,” a ti bawk.

Officer hnenah sum khawn thin anga ngaih an nihna pawh sawifiahin, “Officer zingah pawisa rawn thawh dil an awm pawhin kan la mai duh lo a, mi tha deuh nia kan hriatte hnen atang chuan thawhlawm chu kan la thin,” a ti.

PRISM chuan sum lakluhna an neih hriat a ni lo, mahse, an nghei bik lo. Chu chu vantlang titi a ni a, an chungchang sawi dan pawh a ni.

Vanlalruata chuan, “Project Report te ka siam thin a, quotation te pawh ka contact firm te hnen atangin industry din tum leh sumdawng te tan ka call sak thin a, chu chu kan ei ber a ni thin. PRISM dina hna kan thawh tak tak hnu hian chu'ng chu ka buaipui hlei thei lo a, eitur chham ti tih chang pawh kan nei fo a. |hian tha leh kan hmalakna tuipui te'n buhfai leh eng ilo min pek kan rin chang a tam thin a. Tunah hi chuan inchhungah dawr kan siam tel ta a, kan ei ve tawk tawk thei zel e,” a ti.

Office luah chungchanga Zozam Weekly zawhna chu, “PRISM-in office kan nei lo. Kan office anga a sawi hi RTI Help Centre, a hminga INFORMA kan tih hi ni turah ka ngai a. Hemi bultan nan hian kan sawi fo tawh angin social welfare deptt-in Rs 30,000 min pe a, kan adviser pakhatin Rs 2,000 a thawh bawk a. Chu chuan computer leh furniture kan puitlin thei hram. In luah man leh a enkawlna senso hi chu member leh adviser zawng zawngin thla tin thawhlawm kan thawh hmanga kan kalpui a ni,” a ti.

“PRISM-ah hlawh neia thawk pakhat mah kan awm lo,” tia sawiin, “Kan zinna leh PIL kan file-na te hi eiruk duh lo te thawhkhawm a ni,” a ti.

Vanlalruata chuan, “Thil tha kan duh a, he ram hi thianghlim se, dik se kan duh a. Theihtawp kan chhuah a, min puih a hnekin beihlet a ni kan tawh ni,” a ti a, “Eirukna hi kan do a nih loh chuan he ram hian hmabak a nei lo,” a ti bawk.

“Dawtin tum tam min bei ta a, kan ngawih mai thin avangin min zuam niin a lang a, kan ngawi mai tawh ngai dawn lo a. Tun thil pawh hi engtin emaw chuan kan bei dawn a, meeting-ah kan la ngaihtuah ang,” a ti.

Thlemna an tawk fo ni-a sawiin, “Sum leh paiin vawi tam min thlem a, kan la duh ngai lo a. A lian ber ber pahnih chu Rs 50 lakh fai leh construction contract Rs 100 lakhs man a ni," a ti.

Vau leh harsatna tum tam tak an tawk tawh ni-a sawiin, “Telephone hmangin vawi tam min vau a, thahah hial min vau fo. An number ka chhinchhiah ru vek, a tul hunah chuan ka phawrh mai ang,” a ti a.

“February 2006 khan heroin No 4 zuar anga puha man min tum a, thang an kam a. Ka in bulah saranga heroin ni awm tak, powder var fun an lo dah a, tlaia ka leng hawin ka hmu a. A tuk zing dar 8 velah police pathum ASI pakhat leh constable 2 lo kalin ka in vel search min rawn dil a, kan inbiak zawh veleh ka thilfun chharna an pan ding chat a, an zawn an hmuh loh avangin an hrilhhai hle,” a ti.

Rikrap a tawk thin ni-a sawiin, “February leh March, 2008 chhung khan vawi thum ka kawngkharah geletine bomb an tawn bet a, a hmasa ber hian handle-ah hruiin an tawn bet a, a hnuhnung pahnihah chuan kawngkhar bul leiah an dah a. A hnuhnung pahnih hi chu a fuse pawh hal a ni a, Pathian zarah a puak lo hlauh a ni,” a ti.

“Eiruk hmang ve tak official pathum chhung te'n vawi thum lai silaia tin chungin kan hmalakna chawlhsan turin min vau tawh,” a ti bawk.

“Tuna min puihna hi thu diklo deuh vek zawk a ni. Hetiang thil vang hian kan hmalakna kan chawlhsan chuang lo ang,” tiin chawlh an tum lo niin a sawi.

“Hetianga min ti thintute hi tute nge ka hre deuh vek a, a bultumtu te pawh ka hre thawi ang. Mahse ka sawi dawn rih lo. Sawi lo thei lova min nawr chep erawh chuan ka sawi ang,” a ti.

“Tuna hetiang titute hian an tih chhan an beisei hi an hmuh ngei ka duhsak a ni,” tia sawiin, “Kan chungah eng pawh a thleng thei. In lo hriat reng atana ka duh chu mahni intihlum tur khawpa dawihzep ka ni lo tih hi a ni. Eng ang pawhin thiin ka thih danah thuhretu sang tam pawh awm angin lang se mahni intihlum anga min sawi an tum chuan awih miah suh u,” a ti bawk.

Read more...

Mizoram Budget Chu Hei Le

Kum 2009 -2010 Mizoram Budget chu cheng vaibelchhe 3867.41 a ni a, heng zinga cheng vaibelchhe 2391.33 chu Non-plan sum niin, cheng vaibelchhe 1476.08 chu Plan sum a ni.

Mizoram sorkar chuan Planning Commission of India-in a hun pangngaiah Annual Plan 2009-10 a ruahman fel hman loh vanga Annual Budget 2009-10 pharh hmain sum lo hman lailawkna tur Vote on Account-in tum hnih - March leh July-ah khan thla li chhung ve ve atan a lo pharh tawh.

Planning Commission of India chuan Mizoram sorkar Annual Plan atan Rs. 1,250.00 crore a ruahman a, chu chu department hrang hrangah semdarh a ni. Hetah hian sorkar scheme pawimawh tak NLUP atan Rs 100.00 crore ruahman tel a ni.

Planning Commissiion-in sum a ruahman bakah hian NEC, NLCPR leh CSS leh thil dang hnuaia sum hmuh belhte nen Plan hnuaia sum hman tur zawng zawng chu Rs. 1,476.08 crore a ni a, Non-Plan hnuaiah Gross Expenditure tur Rs. 2,391.33 crore ruahman a ni bawk. Tichuan kum 2009-10 chhunga sum hman tura ruahman zawng zawng (Plan leh Non-Plan belh khawm-Gross Expenditure) Demands for Grants-a tarlan chu Rs. 3,867.41 crore niin, Net Expenditure tur chu Rs. 3,687.39 crore a ni. Budget bu (Annual Financial Statement)-a tarlan dan chuan, Account hrang hranga sum hmuh leh hman tur chhut khawm hnuah 2009-10 Budget bik chu ‘Surplus Budget’ niin, surplus Rs. 13.00 crore awm tura tarlan a ni a, 2008-09 kumtawpa deficit Rs 70.45 crore lo awm tawh vangin, 2009-10 kumtawpa sum indaih lohna (deficit) tur chu Rs. 57.45 crore nia tarlan a ni.

Budget pharh paha thu sawiin finance changtu, chief minister Lal Thanhawla chuan, kumin sorkar kum chhungin chhiah thar lak a ni dawn lo tih a sawi a, "Kum 2005-2006 atanga VAT lâk a nih avangin Mizoram sum hmuh than chhohna chu 24.67% a tling a, khawvel pum pui huapa economy dinhmun a tlachhe chung pawhin nikum chhunga than dan chu 22.06% a tling. Mizoramin chhiah la tura harsatna a neihte hrethiamin, ADB tanpuina hmangin sum tam zawk hmuh dan sorkar chuan a ngaihtuah dawn a ni," a ti.

Lal Thanhawla chuan, kumin sorkar kuma sum indaih lohna awm tur chu cheng vbc 57.44 a ni tih sawiin, March ni 31, 2010- a sorkar kum tawpah chuan Mizoram sorkar leiba chu cheng vbc 3368.38 a kai dawn tih a sawi.

6th Pay Commission Report anga Mizoram sorkar hnathawkte hlawh pek ve tum a nih avangin, heta tana sum mamawh tur pawh chu budget-ah hian dah a nih thu a sawi a, "Hei vang hian Non-Plan sum atanga hlawh atana pek tur ruahman chu cheng vbc. 1034.77 a ni a, Plan sum atanga hlawh atana pek tur ruahman chu cheng vbc. 205.39 a ni; a pahniha belhkhawm chu cheng vbc 1240.16 a tling," a ti.

Finance changtu chuan Kum 2008-09-a khawvel sumpai dinhmun buaina nasa tak chuan Indian Economy pawh a tibuai hle tih sawiin, hei vang hian Crude Oil leh mamawh chi hrang hrang ram dang atanga lakluhna man pawh a san phah hle tih a sawi. Hei vang hian kum 5 chhung (2003-05-2007-08) chhunga India Economy thanna 8.9% pawh chu Central Statistical Organization (CSO) chuan 6.5% chauh ni turin a chhut phah hial reng a ni. CSO-in kum 2007-08 a GDP 9.0% chauh an beisei a, chutih laiin kum 2006-07 kha chuan 9.7% daih a ni thung a ni.

Union Finance Minister pawhin Budget Speech July 2009-a neihah khan Indian Economy tlema a hnufual chhan chu khawvel Economy buai vang a ni a, hei hian inflation, employment leh investment thlengin a khawih a ni a ti. Chuvang chuan India sorkar chuan economic package tam tak a siam phah reng a ni.

Directorate of Economics & Statistics, Mizoram pawhin kum 2006-07 GSDP leh 2007-08 atana beiseina bakah 2008-09 abeisei tur a tichhuak. Chuta a lan dan chuan kum 2006-07 khan GSDP chu a thang nasa hle a, 8.59% lai a ni a, 2007-08 a thanna beisei pawh 7.13% lai a ni bawk. Mahse, kum 2008-09 atana beisei erawh 7.0% a ni thung.

Beisei dan chuan kum 2008-09-a GSDP chu Rs 3809.16 crore ni tua ngaih a ni a, chu chu nominal leh real growth-a chhut chuan 11.6 leh 7.0% vel a ni. Per capiat income pawh tuna thil man anga chhut chuan Rs30292.00 ni tura chhut niin constant price-ah erawh Rs21549.00 a ni thung.

Agriculture sector-in kum 2007-8 a a thawh zat chu 15.51% a ni a, kum 2008-ah erawh 15.49 niin kum 2009-10-ah phei hi chuan 14.32% chauh beisei a ni. Industry lamah pawh kum 2007-08 khan 19.32% a ni a, 1998-09-ah 20.09% a nih laiin 2009-10-ah chuan 19.39 a nih rin a ni. Service sector chuan GSDP-ah an la thawh hlawk leh ber a, kum 2007-08 ah 65.17% an thawh laiin kum 2008-09 ah chuan 20.09% an thawh thung a, kum 2009-10-ah chuan 66.29% vel an thawh tura ngaih a ni.

Agriculture leh allied sector-a 4% tala pun chu sorkar laipui policy a ni. Kum 2007-08 leh 2008-09 a Agriculture lama thanna chu 2.86 leh 2.85% a ni. Kum 2009-10-ah chuan 3.0% a chho thei tura ngaih a ni. Industry sector-ah a pung nasa hle a, kum 2007-08 ah 7.42% a nih laiin 2008-09-ah chuan 7.09% a ni thung a, kum 2009-10-ah chuan 7.48% ni thei tura ngaih a ni bawk. Service sector a thanna chu kum 2007-08-ah 8.11 a ni a, 2008-09-ah 7.95% niin kum 2009-10-ah chuan 8.07% ni tur ngaih a ni.

Directorate of Economics & Statistics chuan a vawi khatna atan District Domestic Product (DDP) a tichhuak a, chuta a lan dan chuan Aizawl District-a chengte per capita income a sang ber a, Rs 27,625.00 lai a ni a, Champhai District chu a tlem berna a ni a, Rs 18,462 a ni.

Hetih lai hian Mizoram chu investment climate-ah dinhun tha takah a la ding reng thung. Mizoram-ah World Bank sum hmanga hnathawh mek a ni a, tun hnaiah Asian Deelopment Bank nen inremna siam a ni bawk a, ADB nen hian ‘North- Eastern Region Capital Cities Development Investment Programme (NERCCDIP)’leh ‘Mizoram Public Resource Management Programme (MPRMP)’ah inremna ziah a ni.

Budget pharhtu chuan, socio-economic development a awm theihnan sorkar chuan thil pawimawh tih theih te ti turin a inpeih a, infrastructure lama hmasawnna chu sorkar chuan kan mamawh a ni tih a hria a ni, a ti.

Chumi tihhlawhtlin nan chuan hmalakna chak taka kalpui mek a ni a, a hmasa berin Tuivai Hydel Project chu Public Private Partnership (PPP) anga kalpui tum a ni a, chumi atan chuan sorkar laipui atangin sum hmuh beisei mek a ni, central scheme hrang hrang leh ram dang atanga tanpuina awm tei ang chi pawh beisei a ni, a ti bawk.

"Kumin budget hi khawvel economy-in buaina a tawh laia mi a ni a, Mizoram chuan tuar nasa lo angin lang mah ila India sorkarin a tuar nasa em em a, chu chuan central a state share tam tak a tlem phah lo thei lo a ni. Mahse, sorkar chuan central nen thawk dunin State in recession avanga harsatna kantawh te chu tih tlem tum a ni ang," tiin a sawi.

Tax atanga chhiah lak tura hisap chu Rs 509.6-0 crore a ni, hetah hian state-in tax kan lak bikna liau liau atangin Rs 116.29 crore hmuh beisei a ni a, central nena tax kan intawm atangin Rs 393.40 crore beisei a ni.

"Non-tax revenue atanga beisei chu Rs 24998.52 crore a ni a, heta tang hian State non-tax revenues chu Rs 181.14 crore ni turah kan ngai," Hawla chuan a ti.

"Central atanga grant-in-aid kan beisei chu Rs 2318.38 crore a ni a. Chuta tang chuan (i) Non-Plan Grants ah Rs. 1004.88 crore, leh (ii) Plan Grants ah Rs. 1313.50 crore a ni," a ti bawk. Capital receipts atanga kan beisei zat chu Rs 278.96 crore a ni. Capital receipts hi sorkarin hmun hrang hrang atanga sum a pukna angah a sawi theih.

Public debt atangin Rs 248.95 crore beisei a ni a, hetah hian internal debt Rs 223.74 crore leh loans and advances, central sorkar atanga beisei Rs 25.21 crore a tel.

Hei mai bakah Non-debt capital receipts-a ngaih loans and advances hnuaiah tho Rs 30.01 crore beisei a ni bawk.

"Fiscal Responsibility and Budgetary Management hnuaiah sorkar chuan sum a puk a. Kan innghahna ber akhat chu central atanga sum kan puk te hi a ni a, hemi hmang hian hma kan la thin a ni," Hawla chuan a ti.

Kum 2009-10 chhunga Mizoram sorkarin sum a pukna turte chu: (i) Net State Provident Funds- Rs. 58.98 crore, (ii) Market Borrowings- Rs. 167.63 crore, (iii) Negotiated Loans- Rs. 56.11 crore, (iv) Block Loan (loan portion of Externally Aided Projects)- Rs. 25.21 crore tihian avaiin Rs. 307.93 crore a ni.

Kum 2009-10 budget
Kum 2009-10 chhunga sum hman chhuah tur zat nia ngaih chu Rs 3867.40 crore a ni a, chuta tanga revenue expenditure chu Rs 2833.44 crore a ni ang a, capital expenditure chu Rs 1033.96 crore a ni ang.

Consolidated fund-a sum hmanna tur chu Rs. 3687.39 crore ni tura ruahman a ni a, chuta tanga net revenue expenditure chu Rs. 2831.69 ni tura ngaih a ni a, net capital expenditure pawh Rs. 855.70 crore ni tura ngaih a ni.

Plan expenditure hnuaiah hian Centrally Sponsored Schemes (CSS), Central Plan Schemes (CPS), leh Special Schemes heng North Eastern Council (NEC), Non Lapsable Central Pool of Resources (NLCPR) te hi a tel a, heng te hi State Annual Plan pawna mi vek a ni.

Kum 2009-10 chhunga interest pekchhuah tur chu Rs 239.90 crore a tling a. Interest payment kum 2007-08 kha Rs. 208.01 crore niin Revised Estimates 2008-09 ah Rs. 229.29 crore a ni bawk.

Sorkar hnathawk hlawh atana ruahmanna chu a pung leh hluai dawn a, hei hi a chhan ber chu Sixth Pay hman tura ruahman vang a ni.

Hei vang hian Non-Plan Account a expenditure chu Rs. 1034.77 lawih a ni a, Plan Account hnauia salary expenditure pawh Rs. 205.39 ah kai dawrhin hlawh atan hrim hrima sum hmanchhuah tur chu Rs. 1240.16 crore ni tura ngaih a ni.

Kum 2007-08 a pension fund atana sum sen zat chu Rs. 97.14 crore a ni a, kum 2008-09 Revised Estimates-ah khan Rs. 106.01 a ni leh dawrh a, kum 2009-10-ah chuan Rs. 163.11 crore ni tura ngaih a ni. Hei bakah hian normal pension payment chu Rs. 148.41 crore a ni ang a, Voluntary Retirement of School Teachers avanga sum sen tur chu Rs 14.70 crore a ni bawk a, hetianga a san leh chhan hi sixth pay hman dawn vang tho a ni.

Sum hmanna hlawm lian tur capital expenditure atan Rs 855.70 crore ni tura ngaih a ni. Capital expenditure han tih hian loan rulhnan te a hman tur a ni tel bawk.

Rotling siamna tur capital outlay atan Rs 393.88 crore dah a ni. Capital outlay hi capital ssets siamnaatana ruahmanna a ni a, infrastruture siamnan te leh nakin zela rolting thil siamna tura ruahmanna a ni.

Kum 2009-10 chhunga loans lak rulhna tura hmanchhuah tur atana hisap chu Rs 236.65 crore a ni. Loan lakna tura pawisa dah a tam chhan hi ADB atanga MPRMO atana sum puk rulh thenna tur nia tarlan a ni a, loan hi R 143.55 crore vel lak tura ruahman a ni a, mahse loan rulh nghalna tur atan Rs 93.10 crore chu ruahman a ni nghal. Hei hi nakin zela sorkar tana tha zawk tura ngaih a nih vang a ni.

Sorkar hnathawk leh mipui mimir tan sorkar chuan loan a pechhuak thin. Kum 2007-08-a loans and advances-a sum sen chu Rs 6.12 crore a nih laiin kum 2009-10-ah chuan Rs 25.17 crore ni tura ruahman a ni. Chutiang bawkin, plan expenditure hnuaiah pawh loans and advances hiu Rs 5.05 crore nuti tura ngaih a ni a, Non-pna-ah pawh Rs 20.12 crore ni tura ngaih a ni.

Contingency Fund of the State of Mizoram Act, 2009 hnuaiah corpus fund atan Rs 200.00 crore dah a ni bawk.

Kum 2009-10 atana Non-Plan expenditure atana ruahman chu Rs. 2211.31 crore a ni. Chuta tang chuan Non-Plan Revenue Expenditure atan Rs. 1845.74 crore ruahman a ni a, Non-Plan Capital Expenditure pawh Rs. 365.57 crore ni tura ruahman a ni. Kum 2007-09 khan Non-Plan expenditure chu Rs. 1459.86 crore a ni a, Revised Estimates 2008-09-ah khan Rs. 1777.49 crore a ni bawk.

Non-Plan Revenue Expenditure hnuaiah General Services hnuaiah Rs. 949.34 crore ruahman a ni a, General Services hian non-plan revenue expenditure 51.43% lai pawh pen a ni. Kum 2008-09-a revise estimate-ah khan Non-developmental expenditure chu Rs. 776.44 a ni a, chu chu Non-Plan Revenue Expenditure Developmental Expenditure awng zawng atanga 43.68% lai a ni.

Non-Plan Revenue Account hnuaiah Social and Economic Services a awm a, he'ng sector pahnihte tan hian Rs. 516.07 leh Rs. 380.33 dah a ni a, tichuan a vaiin Rs. 896.40 crore a ni. He sector pahnihte hian Non-Plan Revenue Expenditure Fiscal and Debt Sustainability-a an thawh zat chu 48.57% lai a ni.

Mizoramin leiba a neih zat finance accounts-a a lan dan chuan Rs. 3062.46 crore a ni. Heng zingah hian internal debt chu Rs. 1468.86 crore, loans & advances, Central Government atanga puk Rs. 558.50 crore leh Public Accounts atanga loan lak Rs. 1035.10 crore.

Kum 2008-09 a revised estimate-ah khan leiba Rs. 3276.09 crore a ni a, Kum 2010-ah chuan leiba hi Rs. 3368.38 crore-a tlahniam tura ngaiha ni a, chutiang zelin 2011 leh 2012-ah chuan Rs. 3530.38 leh Rs. 3710.38 ni tura chhut a ni.

State leiba hi GSDP atanga chhut chuan 2007-08, 2008-09 (RE), 2009-10 ah chuan 89.76%, 86.01% leh 78.95% a ni. Tuna a lan dan chuan kum 2010-11-ah chuan 73.88% leh kum 2011-12-ah chuan 69.32% ni tura ngaih a ni.

Leiba chungchangah Finance Deptt. chuan hmasawn a tum hle a, ADB-a loan lak pawh 9% aia sang a nih dawn vangin pre-payment an buaipui nghal a ni. Hei hi nakin zela state tana pawimawh zawk tura an ngaih a nih vang a ni.

Finance minister budget speech-a a sawi pawimawh tak chu salary expenditure chungchang a ni. Capital investment siam nasat zawk theihnan salary expenditure chu tihtlem zel tum a ni tiin a sawi a, hetih lai hian salary expenditure-a sorkarin kum 2007-08-a a sen zat chu Rs 734.61 crore lai a ni a, chu chu total expenditure atanga chhutin28.43% lai a ni. Kum 2009-2010 chhunga salary expenditure atana ruahman chu Rs. 1240.16 crore a ni vung a, chu chu total expenditure atang chhutin 32.07% lai a ni.

Salary expenditure a san chhan tur hi Mizoram sorkarin sixth pay man a tum vang a ni a, chuta tan chuan budget atanga pawhpen a ngai ta a ni.

Kum 2009-10 annual plan chu Rs 1250 crore a ni a, hei hi nikum khan Rs 1000 crore a ni a, 250 crore-in a pung a ni.

Rs 1250 crore chu sector 10-a thendarh leh a ni ta a ni. Sector hrang hrang (i) Agriculture & Allied Activities – Rs. 161.97 crore, (ii) Rural Development –
Rs. 48.80 crore, (iii) Special Areas Programme – Rs. 71.25 crore, (iv) Irrigation and Flood Control – Rs. 58.21 crore, (v) Energy – Rs. 69.11 crore, (vi) Industries and Minerals – Rs. 17.60 crore, (vii) Transport –Rs. 66.22 crore, (viii) Communications – Rs. 5.40 crore, (ix) Science, Technology & Environment – Rs. 2.04 crore, (x) General Economic Services –Rs. 64.44 crore, (xi) Social Services – Rs. 553.32 crore and (xii) General Services – Rs. 131.64 crore.

Finance minister chuan budget speech-ah Annual plan 2009-2010-a sorkar ngaih pawimawh tur a sawi zingah NLUP chuan hmun pawimawh a chang a, thil dang zawng aiin NLUP chu dah pawimawh a nih tur thu a sawi.

Rural economy siamthat a nih theih nan NLUP chu hmachhuan a nih tur thu leh tlangram loneih bansana huan nghet sum chang thei uar tur a nih thu te a sawi. NLUP chuan agriculture, horticulture, minor irrigation, soil & water conservation, animal husbandry, fisheries, forest, sericulture, cottage & small scale industries etc. te a huam vek tur thu a sawi bawk.

Finance Minister chuan socio-economic development chu ngaih pawimawh a nih tur thu leh NLUP hnuaiah chhungkua 1.2 lakhs lai mai chu kum 5 chhunga dinhmun tha zawka hlankai tum a nih thu a sawi. Sum changtlai chin uar tir tur an nih thu leh chu chuan nasa taka rural economy-a siamthat rin a nih thu te a sawi bawk.

Chief minister, sinance changtu chuan power development chu sorkar tum ber a nih thu a sawi. Tun atanga kum 7-8 chhungin Mizoram chu kawlphetha lamah a intodelh hman beisei a nih thu a sawi. Hydro project 25mw chin chunglam chu PPP anga tih vek tum a nih thu a sawi a ni.

Hei bakah hian Land Reforms & Settlement chu sorkarin a ngai pawimawh dawn niin a sawi bawk. Chumi atan chuan dan thar duan mek a nih tiin, India ram tribal chenna state zinga land reforms nei hmasa ber nih kan tum, a ti hial a ni.

Finance minister chuan Mizoram chu India ram state zinga comprehensive forest and soil conservation and management policy nei hmasak nih tum a nih thu a sawi bawk.

Mizoram-ah Oil leh Natural Gas a awm ngei nia a lan vangin survey pawh phalsak a nih thu leh Mizoram state 55% lai mai chu Oil&Natural gas awmna nia hriat a nih thu a sawi. Hei vang hian Oil & Natural Gas Policy pawh duan vat a nih tur thu a sawi bawk.

Sports & Youth Services chungchangah pawh ‘Catch them Young’ policy chu kalpui mek a nih thu a sawi. Sports lama hmasawnna atan Sports Academy din a nih tur thu leh district headquarters tinah Sports Promotion Centre din a nih tur thu a sawi bawk.

Mizoram chu India ram state zinga Medical College, Engineering College nei lo awm chhun kan ni, a ti a, economic development a chak zawknan Human Resource Development kan mamawh a ni, a ti a, chumi atan chuan ndian Institute of Information Technology, National Institute of Technology, Institute of Medical Sciences leh Agriculture University te pawh neih a nih theih nan hmalak a ni ang, a ti bawk.

Finance Minister chuan World Bank-in Third Technician Education Project’ kum 2007-08-ah zawh a nih tawh hnuah Mizoram State Roads Project chu kalpui mek a ni a, kum 2010 thleng kalpui a ni ang a, kawngpui siamnan hian Rs 60.50 crore chu dil belh a ni, a ti.

ADB nen North Eastern Region Capital Cities Development Investment Programme’ chungchangah inremna an ziah thu leh hemi atan hian $68 million sen a nih tur thu a sawi a, sum hmanna tur zingah sewerage, water supply, solid waste management leh capacity building te a ni dawn a ni. He inremna hian kum ruk chhung a awh dawn a, Aizawl khawpui chu nasa taka changkangah a siam theih beisei a ni.

ADB nen hian ‘Mizoram Public Resource Management Programme (MPRMP)’ chungchangah pawh inremna siam a ni a, heta sum pukte hi ‘Structural Adjustment Loan’ hnuaiah puk a ni thung ang a, heta tan hian $100 million chu kum thum chhung atan ADB-in a puk tir dawn a ni, tiin a sawi.

MLA Local Area Development Scheme chu kalpui zel tur a la ni dawn a, hemiu atan hian Rs. 1000.00 lakh chu constituency khata 25 lakh zel atan ruahman a ni bawk.

State plan scheme thenkhata central puihna pawh chhunzawm zel tur a la ni dawn. State plan 266.17 crore atangin Additional Central Assistance (ACA) atan Rs. 266.17 crore dah chhuah a ni a. ACA atana 266.17 crore hmanna tura ruahmante chu (i) Accelerated Irrigation Benefit Programme (AIBP) – Rs. 55.55 crore, (ii) Control of Shifting Cultivation – Rs. 5.50 crore, (iii) Border Area Development Programme (BADP) – Rs. 24.95 crore, (iv) Roads & Bridges – Rs. 5.79 crore, (v) National Social Assistance Programme (NSAP) – Rs. 4.23 crore, (vi) Nutrition Programme for Adolescent Girls (NPAG) – Rs. 0.15 crore, (vii) Grants-in-aid under Article 275 (1) – Rs. 8.82 crore, (viii) Jawaharlal Nehru National Urban Renewal Mission (JNNURM) – Rs. 50.33 crore, (ix) Backward Region Grant Fund (BRGF) – Rs. 24.98 crore, (x) National e-Governance Action Plan (NEGAP) – Rs. 3.94 (xi) Rashtriya Krishi Vikash Yojana (RKVY) – Rs. 4.15 crore and (xii) One-time Additional Central Assistance – Rs. 77.78 crore. te a ni.

Hei bakah hian AIBP atangin sum Rs. 55.55 crore hmuh belh a ni a, JNNURM atan sum hmuh Rs 14.77 crore pawh tihpunsak niin Rs 50.33 crore-ah a pung dawrh bawk.

Kumin Anual Plan-a thil chhinchhiahtlak tak awm chu RKVY atana fund kan hmu ve hi a ni. Tun hma chuan agriculture & allied sector-a duhthu kan san loh avangin RKVY hi kan dawng ve thei thin lo. Kum inah chuan Rs 4.15 crore hmuh a ni.

One-time Additional Central Assistance hnuaiah Rs 77.78 crore hmuh a ni bawk a. Heta sum hmuhte hi (i) PWD (Roads & Bridges) – Rs. 20.00 crore, (ii) Public Works (Govt. Housing) – Rs. 0.70 crore, (iii) Power – Rs. 35.87 crore, (iv) School Education – Rs. 7.70 crore, (v) PHE – Rs. 1.60 crore and (vi) Sports & Youth Services – Rs. 11.91 crore ah te hman a ni ang.

Mizoram sorkar chuan Central Financial Institutions atangin loan a la dawn bawk. Finance minister chuan Life Insurance Corporation of India (LIC) atangin Rs 20. crore leh National Bank for Agriculture and Rural Development (NABARD) atangin 30 crore lak a nihtur thu a sawi a. LIC atanga loan lakte hi (i) Government Housing – Rs. 6.90 crore, (ii) Police Housing – Rs. 4.55 crore, (iii) LAD Housing – Rs. 5.05 crore, (iv) Public Works (Buildings) – Rs. 3.50 crore. atan hman a nih tur thu a sawi nghal bawk.

NABARD atanga loan pukte chu thingtlang kawng siamthatna atan 20 crore hman a ni ang a, drinking water supply atan 8 crore hman tura ruahman a ni bawk.

Read more...

KHAW’NGE JUSTICE?

¢ HC Vanlalruata

Ka thianpa Hmingdailova Colney, IFS (Fam) kha tum khat chu kan Governor hlui Pu Amolak Rattan Kohli khan chawimawi a duh tlat mai a. Sorkar thil tak tak pawh ni lem lovin phuahchawp ang reng tak hian City Park-ah function kan han nei rup mai a. Governor meuh a lokal a, band party-in India Hnam Hla an ham rem chuan a ropui chho ta fu a. Keini thiandun titi-ah erawh chuan, “Mizoram dung leh vang fanga sorkar hnathawkte hauh kual hna bera nei kan Larsap-in a chawimawi chhun chu a ropui a lawm,” tiin thu kan han vaw thlu ve ngawt a. Mahse, dawn a ti sei ve ngawt mai.

Kan sorkar han tih hian Congress, MNF emaw PC emaw tih bikna ni lovin Mizoram sorkar hi kan vai hmer lo thei lova. Tunhma atanga ka an-hla chu hnathawk thalo, eiruk hmangte hrem tak tak ngam lova, chawimawi phute chawimawi theilo sorkar hi kum tam kan lo nei tawh tih hi a ni. Hnathawk thate ‘Nopui’ dawm tir a, thawk thalote (Mizo danah chuan pawnfen fentir kan ti dawn nge, tunlai mila hremna chu a awm ngei ang) kan diriam hma loh chuan Mizote hian ngaihsan tur dik kan hre thei dawn lova. Eng anga sorkar chak pawh nei ila a mipuiin chumi lama takna kan neih loh chhung chuan hnam tak takah kan inchher chhuak chuang lovang tih hi ka ngaih dan nghet tak a ni.

Chanchinbu-ah kan ziak kur ngiai nguai a. Misual tak tak hrem a midik chhuah theihna thuneihna nei Pu K.L. Liana te pawhin dikna tak tak a awm loh zia an ziak ve tho mai a. Zu funte hnih/khat kawl kha ‘crime’ a nih miau avanga (MLTP Act vangin) chutiang kawl hmeithai rethei te te tanin-a an thawn hnem hle laia a zu tha ber ber kawlte man hleih theih an nih loh dante, man an nih pawha tanina an tan ve ngailoh dante leh pawikhawih nasa zawka ngaih mipui sum eirutute hrem an awm siloh thu an ziah thinte hi kan chhiar liam ve mai mai a ni thei. Mahse, kei chuan mangang au aw ni hian ka hre fo thin.

Pu K.L.-a te an-hla hi dik deuh a sin. A saptawngin han phuah ve ta ngawt ila - kan Mizo ‘social justice system’ te hi rapthlak deuh a nia. Ar pakhat ru khawtlangin kan phingchil a, kan that a (hei hi Aizawl ngeia thil thleng a ni), tunhnai lawkah naupang rualbanlo mobile ru chu Aizawl khawpui chhungah ngei kan khawih hlum leh niin a lang a. Kum hnih/khat kalta maiah khan pawisa tlemte a ruk avangin tlangval pakhat chu a awmna veng YMA phur zualin an vawhlum tawh bawk. Chutih lai chuan mipui chanai tur cheng nuai chu sawi loh vaibelchhe tam tak eiru nia puhte chu hrem an nih kan la hre lo.

Hei hi India ram kalphung a ni a, keini Mizoram chauh pawh a ni lo. Ram changkang kan tih mai-ah chuan an President/Prime Minister-te ngei pawh an thiltih dikloh leh eiruk avanga hrem tak tawp tawp an awm a. An nihna ropui tak an nih tawhloh hnu-ah pawh mipui chanai eiru na na na chu an hrem tho thin tih chanchinthar chhiar, ngaithlaa en thin chuan kan hriat vek hi. India ramah chuan eirukna lian thama puhna nasa tak awm, kan rama eirukna chungchanga hnuchhui thiam bera ngaih CBI-te’n an chhui ngeite pawh thuneihna changtu leh chang thintu an nih phawt chuan a taka hrem kan la hre lo.

Jain Hawala thubuai kha kan la hria em aw? Khatihlaia Prime Minister Pu Narasimha Rao atanga eptu pawl lian ber BJP hruaitu hlun Pu Lal Krishna Advani thlenga puhmawhna eiruk thubuai a ni a. Tumah tak tak an hrem tak kan hre lo. A taka bawhzuitu journalist Veneet Narayan te, ukil hmingthang Prasanth Bushan, Anil Devan leh midang thawkthate hming pawh a dai tep tawh zawk a ni. Chumi hnu-ah Bihar Chief Minister ( a nih lai) Lalu Prasad Yadav te, thubuai an siam laia CM hlui Jaganath Mishra leh midangte bawngchaw leina tur eirukna (fodder scam)-a chiang taka puhna, Comptroller and Auditor General of India (audit) report-ah pawh chiang taka ziahte chu tun thlengin an hrem kan la hre lo.

Tamil Nadu Chief Minister hlui Pi J. Jayalalitha eiruk thubuai pawh politics ngaihventute tan chuan a lar hle a. Mahse, an state-a politics-a nu lian tak, a khingpuite an nin deuh apianga an thlan tlin leh thin a nih miau avang ni maw, tuma’n tun thleng chuan a takin an la hremlo chu a ni a. Kan sawi tak zingah chuan Lalu hi tanin bang zut hnai ber a ni awm a, mahse chu pawh chu a nupui hnena chief minister nihna hlan thei khawpa a mipuite’n an duh lai hun a lo nih vang nge, a nupui (CM) ngatin taninah pawh an vai buhchangrum (roti leh a chawhmeh) a barh thin zu nia.

Mizoramah pawh hei hi a takin kan hmu mek a. Chumi avang tak chuan thuneihna hi a chuhin kan inchuh a. Sorkara nihna pawimawh neite chu hrem theihloh thawkin an thaw a, India Danpui-a ‘Mi zawng zawng dan hmaah chuan an intluk vek a ni’ tia ziah hi kan pawm hleithei tawhlo chu a nih hi. Central YMA president thuneihna chu a sang khawp a, sorkar officer a nih chuan a duhna hmun hmunah a awm theiah ngaih a ni a. Chutiang chu kan kalpui dan a ni a. Chuvangin democracy ram invuah ve-ah hian dikna (justice hi a taka awm lo ang a ni a. Mao Zedong-a thupui thiltihtheihna chu silai kawhmawrah a awm tih hi kan hnaih sawt khawpin ka hria.

Read more...

Mizo Idol 2009 Bihchianna

¢ Hmingsanga

Zonet Cable TV buatsaih Mizo Idol season 2 chu zawh fel a ni ta. Mizo Idol 2009 atan H Lalchhanchhuaha, Sumsuih khawmi, Bungkawn Aizawl-a thleng chu thlan a ni a, pahnihna Rebeki Vanlalpeki Sailo, Tanhril-a mi niin, pathumna chu Rk-a Bawihtlung, Mission Veng-a mi a ni. Mizo Idol atang hian mipuiin zaithiam tam tak kan hmelhriat thar phah a, hei hian Mizote zai leh rimawi lamah kan duai lohzia a pholang chiang hle awm e.


Mizo Idol thlanna leh show neih a nih changin mi pawimawh tak tak, TV-a hmuhnawm ti taka kan lo thlir theihna turin a phenah mi tangkai leh thawh hlawk tak an awm thin. Chung mite thawhrimna leh inpekna bakah an ngaihtuahna, finna leh remhriatna avangin Mizo Idol kha a hlawhtling pawh ti a ila dik awm e.

Mizo Idol organising committee chairman Vanneihtluanga chuan "Season hmasa kha chu a vawi khatna a ni a, tha leh tul nia kan hriat ang khan kan kal a, kuminah erawh chuan a hmaa kan tih thin tha lo leh tul lo te kha paihin, tha zawk nia kan hriat angin thil kan kalpui thei a, a tlangpui thlir chuan hlawhtling thawkhat viau chuan kan inhria," tiin Zozam Weekly a hrilh.

"Kum hmasa ai khan kumina mite hi an kum chhawhrualin an naupang deuh zawk a, a intihsiakna hrim hrim leh a show kalphungah duhthu sam lo lai deuh te awm bawk mah se kan lawm viauin kan inhria," a ti.

"TV show a nih angin a thlirtu mipuite kan ngai pawimawh a, a programme a buarchuar kan hlauh vang pawh a ni bawk a, sponsorship lam chuti takin kan uar lo lui," tia sawiin, "Sum leh pai lam ngawr ngawr um lam ni loin show hmuhnawm a nih theihna turin chan pawh huamin sponsor ang chi kha kan ti ta vak lo a ni," a ti bawk.

"Kan naute pawhin kum dang ai chuan duhsakna thil pek pawh an dawn tlem phah mai thei a, mahse zaithiam zawnna a ni miau a, chan pawh kan huam ta deuh zawk a. Kan chan kha kan ui lo lam a ni lo, a behbawm vela inham buai vak ai chuan a competion leh show kha hmuhnawm se kan duh ber," tiin a sawi zawm a ni.

Mizo zaithiam zingah sex video vanga hmingchhia leh nun dan phung hrim hrima han dai sual zauh zauh hriat tur an awm leh zauh thin. Mizo Idol-a pahnihna ni ta Rebek Vanlalpeki Sailo, Tanhril phei chu result puan zana amah lo hmuaktu an veng mipuite hriat turin an khawtlang hruaitu pakhat chuan Rebeki chu sex vedio leh mipat hmeichhiatna lamah fimkhur taka nung turin an chah hial a nih kha. Hetiang hi thil thleng thei a nih avangin Mizo Idol Organising Committee chu theihtawpa an fimkhur thu sawiin Vanneihtluanga chuan, "Top 10 chin kha chu kan theih tawkin kan hrilh a, zahawm taka nung tur leh awm dan mawi leh dik nia kan hriat te a hrilha hrilh mai duh tawk loin a ziakin kan pe a, anmahni chauh pawh ni lo an chhungte nen kan tan tlan theihna a nih beiseiin an chhungte chhiar tur lehkha pawh kan siam sak vek a ni," tiin a sawi.

"Top 3 chinte phei kha chu pindan hrangah a mal te tein kan kawm a, an chanchin chhia leh tha zawng zawng te min hrilh ngam tur leh tanpui theihna kan neih apiangah tanpui kan inhuam thu pawh kan hrilh a ni," a ti bawk.

Vanneihtluanga chuan an experiance atanga a ngaihdan sawiin, "|ha kan ti a nih chuan Idol thlan lehah chuan Top 10 chinah hian Gospel leh Lengzem-a inthen mai te pawh a tha mai thei a ni. Tunah chuan Gospel singer ni chunga lenglawng hla saktir an tul chang a awm a, lenglawng hla sa thin Gospel hla sa tura intih a ngaih chang a awm bawk a. Buaithlak chang a awm zeuh zeuh a, hetia kal mai a tul hun te pawh a awm mai thei a ni," a ti.

"Tun season-ah hian tih fuh tam tak kan neih rualin tihfuh lo pawh kan nei nual a. A intihsiak leh intihsiak inkar kha a zau deuh a, a boruak inchhem alh tur kha a dai hman deuh zel," tia sawiin, "Rehershal pawh duh ang tawkin kan nei tha thin lo deuh bawk niin ka hria," a ti.

"Result puan hma khan result kha kan zep lutuk deuhin kan hre bawk a, result puan zan khan a puangtu leh khuallian minister pawh khan an hre lo a. Hall chung lamah khan Top 3 te thlalak kha dah sa vek a ni a, ribbon pawh tur kha rawng chi hrang pathum a awm a, Idol-a thlan tak Chhantea thlalak awmna kha a sen a ni a, a sen kha pawh tur tih kan hrilh hnuah thlalak a rawn tlak thlak khan Minister leh Host te pawhin Idol kha an hre ve ta chauh a ni," tiin Vanneihtluanga chuan a sawi bawk.

Mizo Idol tih hlawhtlingtute zinga pawimawh takte chu endiktu te kha an ni awm e. Tarlan tawh angin Idol thlanna hmasaah kha chuan endiktu mi hrang hrangin tling leh tha an tih kha endiktu dang Lalrammawia, Rinliana, Rebbeca Saimawii te'n a hmawr bawk thlengin an endik chho kha a ni a. Tun tumah chuan a bul atanga a tawp thlengin heng mi pathum Lalrammawia, Rinliana, Rebbeca Saimawii ten an endik a a ni.

Mizo Idol endiktu pathum -Rammawia, Rinliana leh Rebbeca te chuan hetiang hian Zozam Weekly zawhna an chhang:

Season hmasa leh a hnuhnungah Top 10 chinah eng nge danglamna i hmuh?

Rammawia: Perfomance lam kawng a hniam tia sawi theih a awm a, contestant-te chu an zai thiam hlawm viau a, mahse, an musical teh chiam hran lo a, interview leh thil dangah chuan a hmaa mite kha an tha viau mai.

Rebbeca: Season hmasa khan contestant zingah originality nei chu ka hmu hnem zawk a, mahse, tun season-a mite zingah hian zaithiam chu an tam deuh zawk emaw ni chu aw ka ti deuh.

Rinliana: A zai hrim hrim chu sawi thiam a har ang reng viau a, mahse, tuna mite hi an perfomance a tha deuh zawkin ka hria. A zai thu loah 2007 kha chu a hmasa ber a ni bawk a, a thlirtu mipui pawh an tam hle a. Tun tumah pawh hian a hma ang em kha chuan sawi ni tawh lo mah se ka beisei aiin Idol hian boruak a lo neiin Zonet pawhin show hlawhtling tak an huaihawt niin ka hria a, ka lawmpui khawp mai.

Top 3-a langte kha an hma lam hunah eng nge beiseina i neih dan?

Rammawia: An zir hle a ngai ang. Chuti a nih loh chuan an intei te thei ve thei bawk.

Rebbeca: Beiseina sang tak chu ka nei vek a, chutih rual chuan hla thlang thiam leh mipui mar dek thiam thiam an ding chang ang a, entertainer a nih tih inhre theuh sela, beiseina sang tak ka nei vek. Chu bakah chuan taimak leh thawhrim a pawimawhzia hi theihnghilh lo se ka duh khawp mai.

Rinliana: Beiseina sang tak kan neih vanga thlangchhuak kan ni a. A hma lam hun atana pawimawh nia ka hriat chu thurawn an lakna, anmahni kaihruaitu an neih that leh that loh te, hla sak tur an thlan thiam leh thiam lohah te an hmalam hun thui tak hi a innghatin ka hria.

Top 3-a langte khan album siam theuh dawn se, thurawn pakhat theuh pe dawn ta la eng thurawn nge i pek ang ?

Rammawia : Hla sak tur thlan kawngah fimkhur se. A awmzia chu miin 'sa rawh' an tih nazawng sak loh ngam te pawh a ngai ang. Tin, mipui duhzawng hla eng nge maw ber an telh ngei turin thurawn ka pe ang.

Rebbeca: Idol Chhantea hian Gospel leikapui lam hi sa uar ber se, a remna lam pawh machine lam aiin acoustic lam uar deuh zawk se. Rebeki hi chu R&B lam leh contemporary lam sa zel turin ka ti ang a, RK-a hi chu rock leh comtemporary Mizo sentimental lam hawi sa turin thurawn ka pe ang.

Rinliana: Gopsel hla sa an nih chuan Gospel leh hla lenglawng sa pawlh turin ka ti ang. Lengzem sa an nih chuan lengzem sa mai se ka ti ang.

Thangthar zaithiam te tlakchham nia i hriat ?

Rammawia: Physical fitness an thlachham a, engvangin nge nizana zai tha, zaninah a zai chhiat chuan a fit tawk loh vang a ni thei. Idol-ah pawh show a rei tial tial a, an chau viau hlawm a. An fit tawk lo a ni. Physical fitness an tlacham vekin ka hria.

Rebecca : Thangthar zaithiamho hi ka kawm tam em em lo a, sawi thiam a har viau a. An thatchhia ka tihna ni loin rim tak thawk se, zaithiam leh entertainer nih kawp phei chuan thawhrim a tul a. Mipuiin anmahnia demand an neih hi a chak thei ang berin bawhzui se, facility an nei tha tawk bawk a, ticket awmna hmuna an zai a nih phei chuan ticket leitute demand kha an hmuh theihna turin tang se a that ka ring. Rim takin thawk se, taimak pawimawhzia hi hria se ka ti khawp mai.

Rinliana: Physical fitness bakah, vocal fitness an tlachham a. Heng bakah hian Vanhlupuii te, Vanlalruati te zai hi ka ngainain ka ngaisang thin a. Anni hi an lar reng theihna chhan nia ka hriat chu zaia an sawmna zawng zawngah an kal lem lo a, eng ang 'audiance' nge awm dawn, eng hla sakna chi nge tih te an ngaihtuah thiam vang niin ka hria a. Tunlai thangthar zaithiamte chu zaia sawmna an hmuhna hmun apiangah an kal a, eng ang hla sakna tur chi nge tih an ngaihtuah lem lo a, tute nge awm dawn tih pawh an ngaihtuah lem lo. Hei vang hian an hlu tawk lo niin ka hria a. Chuvang chuan hla sak tur thlan leh tute hmaah nge zai tur tih ngun tak ngaihtuah na chang hriat a hun in ka hria a, hei hi an tlak chham tak pakhat niin ka hria.

Eng music nge i ngaihtlak tam?

Rammawia : Soft Rock leh country music lam ka ngaithla tam khawp mai.

Rebecca: Queen leh ABBA te hi kan ngaihthlak tam a ni a, kan zai ve lai leh tun thleng pawhin min la khawih deuh hian ka hre thin a. Queen ka duh tawp thei lo a. An music ang deuh chi hi chu ka duh deuh zel. Jazz leh funk lam te pawh ka duh khawp mai.

Rinliana: Ka ngaithlak loh lam leh ka nin deuh zawk ka'n sawi daih teh ang. Country leh blue grass ang deuh chi hi chu ka ngaithla ngai meuh lo a. Jazz chu a enin ka en peih a, ka mood a zirin genre hrang hrang chu ka ngaithla thei, country leh blue grass lam tel lovin.

Mizo Idol H Lalchhanchhuaha kha eng round ah khan nge zai tha bera i hriat?

Rammawia: Elimination Round ah khan a zai tha ka ti khawp mai. Amahah khan potential a awm tih ka chiang khawp mai.

Rebecca: Elimination round-ah khan a hanga an zai lai khan zai tha ka ti khawp mai. A zai khan ka rilru a hneh a, thiam ka ti a, ka bengah pawh a cham zui deuh nghe nghe. Chumi hnuah Top 3 intihsiak zana hla pathum theuh an sak tum khan contemporary leh leikhapui style-ah khan a zai tha ka ti hle bawk.

Rinliana: Top 3-a an awm hnuah intihsiakna ah khan zai tha ka ti khawp mai.

UNSUNG HEROES
Idol show hlawhtling taka neih a nih theihna chhan, a lang lo lama mi pawimawh tak chu Lalrinzauva Sailo leh Lalnghinglova Hmar te hi an ni awm e. Anni pahnih hian show kalphung tur leh time table an siam a, show zanah phei chuan zai indawt dan tur te, eng hla nge an sak ang tih zawng zawng an duang a ni.

Top 20 chinah phei kha chuan an hla sak tur an thlang a, group-ah thenin, an hla key tur thlengin an thlanpui a, a thlirtute hre reng chungin eng hla nge sak tur tih chenin an ngaihtuah thin. Show kha an ngai pawimawh a, show tan tir lamah college naupang te an show en turin an sawm a, mahse, fuh tawk lo deuha an hriat hnuah khawpui chhung sikul naupangte an sawm leh a show boruak a an ti thain an ti hmuhnawm thei hle a, ti fuh an inti hle. Mizoram-ah hian event management lam thiam leh ti thang deuh an awm lo chu pawi an tih thu sawi pahin hetiang lam a inzir te pawh awm se an duh a, loh theih lohin a zei lo a zei loin cheography te thlengin contestant te zir tir a, awmzia a neih phah hle niin an ngai.

RAMMAWIA RAWLRUK
Mizo Idol a season hnih endikna hna lo thawk tawh leh Mizo pa zingah chuan zai chungchanga tawnhriat ngah leh hre thuk tak chuan Mizo zai thiam te chu Musical intrument eng emaw ber khawih thiam turin a chah a. Solfa pawh thiam tum ngei bawk se, solfa kan sawi hian thenkhat chuan zaipawl lam hlir an rilru ah a lo lang a. Hei hi a nilo, mimal a zai chi te tan pawh solfa hi thiam ngei ngei tur a ni. Solfa thiam loh chuan music ah a thlen thui theih loh tiin zai mi zawng zawng te Zozam kaltlangin a Rammawia'n rawlruk che u ni.

Read more...

Cry 4 Justice Beat Contest Chhunzawm Dawn

MICAH Challenge, Active Sound & Zonet tangkawpin a buatsaih Cry for Justice tih thupui hmanga Beat contest buatsaih chu top 10 chin te inelna chhunzawm a ni leh dawn ta.

Top 10 competition hi 26th & 27th October zanah LIVE telecast-a tih chhuah a ni dawn a. He Beat contest-ah hian band sawmhnih leh pahnih lai an tel a. Chanmari YMA Hall-ah intihsiakna hi neih niin, Elimination round-a band hrang hrang zai te chu ni 23 - 24 Oct zan hian ZONET Zawlbuk-ah tihchhuah a ni ang.

Mizoram-ah tunhnai hian Beat contest hi mumal deuh taka neih a vang hle a. Hetianga MICAH challenge, Active Sound leh Zonet ten hetiang an buatsaih thei hi rimawi lama tuite tan inpho chhuahna kawng a inhawng a, a lawmawm hle. Icon Idol thlanah chuan mimal zai deuh ngawr ngawr a nih laiin Beat contest thlir tur a lo awm leh ta hi a lawmawm hle.

Elimination round ah hian Band tel zawng zawng ten Rorelna dik lam hawi hla an phuah an sa theuh tawh a. He intihsiaknaah hian endiktu tan Hmingpuia Albatross guitarist, PB Lianzama, Hmachhuana (Hauhnar Records) ten an endik leh ang.

Endiktute hian intihsiakna hmunah comment hi an pe zui thin tawh bawk ang. Intihsiak hmachhawn tur band te chu.

Top 10 :
32nd November
Annexe Milestone
Cassandra
Dawn Era
Downfall
Fat Larry
Freddy's Nightmare
Gravity
Jubilian
S'Cube

Read more...

Mipuite nghah - Comedian Search

"Comedian Search an tia mi kha, fiamthu inthawhsiak kha? An ti leh dawn an tia, kan nghakhlel lutuk," tiin Bazar-a chawhmeh zuar pakhat chuan a sawi a, a thiante pawhin an lo zawm ve sap sap hlawm.

"Nilengin hah takin hna kan han thawk a, tlaiah kan haw a, chaw eikhamah fiamthu kan han en a, a hahdam thlak hliah hliah hian ka hria a, chu chu ka thlahlel a ni," chu chuan a ti.

Officer nupui pakhat pawhin, "Kei hian ka nghakhlel. Ruihtheihthil hian kan chhungkua min tibuai a, mahse, Comedian Search lai kha chuan chhungkuain hlim takin TV kan enho thei. Khatiang kha kan thil tawn ngai loh a ni a, keini chhung tan chuan a hlu em a ni," tiin a sawi.

Tlangval pakhat, Zara ve thung chuan, "Ka pa hi a tawng tlem tawp a, mahse, Comedian Search lai kha chu a riin a nui ve hawk hawk thin. Ka nu leh ka farnute'n kha kha nuam an ti a, tunah pawh an nghakhlel," tiin a sawi.

Comedian Search ni October ni 27-ah tan a ni dawn a, tan hun tur puanzar a nih atang phatin nghahhlelh a hlawh nghal hle. A huaihawttute pawhin zawhna hrang hrang an dawng nghal a, a kalphung tur leh rei deuh ti tura ngenna te an dawng nasa hle.

Tunah hian tel turte tan form lakchhuak hun hawn a ni a, lachhuak chu an tam tawh. Mahse, lachhuak ringawt an nih avangin tel tum an tam leh tam loh sawi a har rih thu Zephyr Mapuia chuan a sawi.

"Forma lachhuak hi chu an tam a, thehluh theih hun a la tam avangin a lachhuak zawng zawng hian an thehlut rih lo. Mahse, tel tum ni-a insawi chu an tam khawp mai. A tel zat hi Icon leh Idol thlannaa tel zat nen chuan khaikhin chi a ni lo. Mipui hmaa fiamthu thawh thei hi chu a sang rual tlin thu a awm lo a, mahse, a tel zat tam leh tam loh aiin a tel-a te fiamthu thiam leh thiam loh hi a pawimawh zawkin kan hria. Nikumah khan 100 bawr an tel a, a hlawhtling em em tho. Kuminah hian nikum aiin tel an tam dawn a ang," a ti bawk.

"Hmun hrang hrang atangin Comedian Search ti leh tura ngenna hi chu kan dawng nasa khawp mai. Foreign-a cheng Mizote pawhin min rawn ngen nasa a, kum a lo thar khan ti leh turah min ngai ve hrim hrim bawk," a ti bawk.

Comedian Search chief judge Mafaa chuan, "Nikumah khan he show hi a hlawhtling hle a, kan vannei khawp mai. Kuminah hian nikum aia hlawhtlinga tih kan tum a, kan theihtawp kan chhuah ve," tiin a sawi.

"Nu leh pa leh mi hrang hrangin lawmthu an rawn sawi thin. A fiamthu vanga an nuih nasat thu te chu thuhran ni se, 'kan fa te'n one liner te an hriat phah a...' ti te, 'word play leh humour awmzia te, fiamthu awmzia hrim hrim te ka hriat phah' ti te kan tawng nual a, a lawmawm kan ti khawp mai," a ti bawk.

Nikumah khan Comedian Search hi a hlawhtling hle a, show neih lai chuan Aizawl khawpuia kawngpui dung pawh a reh huai thin. In tin-ah nui hluah hluah thawm hriat tur a awm thin a, jail tangte hlei hlein an lawm emaw tih tur a ni. Kumina neih tur pawh hian nghahhlelh a hlawh hle a ni.

Read more...

Vawk vulh tanpuinaah party mi duhsakna?

Mizoram Assembly Session neih mekah October ni 20 khan ZNP MLA Lalduhawma chuan, "Kumin chhung hian Agriculture Department hian NLUP hnuaiah vawk vulh tanpuina pek a nei em?" tia a zawhna chu department changtu minister H Liansailova chuan Mizoram Intodelhna Project (MIP) hnuaiah chhungkaw khat zelah cheng 8120 man hu pek an nih thuin a chhang a, hei hian House-ah boruak a siam nghal hle.

MNF MLA B Lalthlengliana chuan zawh belhin, Aizawl West-I, West-II leh South-II biala chhungkaw engemaw zatte hnena sem tur chu Congress Unit hruaitute hmingin lakchhuah niin a sawi a, Dr R Lalthangliana pawhin vawk vulh tanpuina semtute list thenkhat a chhiarchhuahah Congress mi leh sa te vek an nih thu a rawn sawi ve bawk.

Minister chhanna atanga a lan dan chuan Aizawl North I, Aizawl North II, Aizawl North III, Aizawl East I, Aizawl East II, Aizawl East III, Aizawl South I, Aizawl South II, Aizawl South III, Aizawl West I, Aizawl West II, Aizawl West III leh a dangte-a chhungkaw 900 chengte hnenah vawkvulh tanpuina hi pek an ni. Heta sum senral zawng zawng chu Rs 73,08,000.00 a tling. Heng sumte hi kumin chhunga sem niin MIP pawisa bang atanga sem niin minister chuan a sawi.

A chunga tarlan tak, party mi leh sate induhsakna leh Congress party mi leh sain pawisa an sem hial anga sawi a awm chu house leader, chief minister ni bawk Lal Thanhawla chuan a zahthlak a ti a, tenawm a ti bawk niin a sawi.

House leader Lal Thanhawla chu house-ah hian dingchhuakin, "He thil hi a tenawm a, a zahthlak a, sorkar hmasa anga hetianga list awm hi kan hua a, party letter head hmanga sorkar officer dawr hi khap a ni a, hetiang thil bawlhhlawh hi kan haw em em a, a awm leh tawh loh nan kan fimkhur tlang tur a ni," tiin a sawi.

Vawk vulh tanpuina sem chungchangah hian Congress party unit hruaitute hming a lan chungchang sawichhuah hian Congress hruaitute ngaihven pawh a hlawh hle. House speaker R Romawia pawhin pawisa sem chungchanga unit hruaitute hming a lang chu ngaimawh thu a sawichhuak ve bawk a, unit tih lam lang chu tha bera a hriat loh thu speaker hian a ngaihdan pawh a rawn sawi chhuak nghe nghe bawk.

Hemi chungchangah hian ZNP president Lalduhoma pawhin vawk vulh tanpuina sem chungchang chu a changtu minister-in a hriatpui leh hriatpui loh a zawt a, action lak dan a awm leh awm loh thlengin a tlangaupui nghal bawk.

Agriculture minister H Liansailova chuan vawkvulh tanpuina sem chungchangah a unit ang zawnga lo chhuitu tan chuan a ziakte pawh hmuh tur a awm a nih theih thu a sawi. NLUP Implementing Board-in an chhinchhiahna buah erawh chuan a dawngtute chu an awmna unit lam ni lovin mihring hming, an awmna hmun leh dawn zat chiah tarlan a ni, a ti. |anpuina pawisa sem danah a huam chhunga VC te'n an ruahman angin anni'n midang 'authorised' an nei a nih chuan thil dik lo a nih an hriat loh thu a sawi bawk.

"Hetiang thil a lo awm a nih chuan pawi kan ti a, kan party leh kan chief minister ngei pawhin min kaihhruai a tum dan a ni lo hrim hrim a ni," a ti.

Minister-in vawk vulh tanpuina dawngtute hming inziakna a tarlanah hian a dawngtu thenkhat address chu mumal takin a inziak hlawm. Entirnan Laldinpuii d/o Thantluanga, Maubawk Unit tia annexture phek 29-a a dawngtu hming leh a pa hming chiang taka a inziak laiin hemi phekah vek hian a hnuai deuhah a dawngtu dangte chu Nante Maubawk Unit II, Shiv Kumar Maubawk Unit II, Anand Kumar Maubawk Unit II han tihte hi an nu emaw, pa emaw hming pawh tarlan a ni lo thung.

Hetiang deuh bawk hian phek 16-naah chuan vawk vulh tanpuina dawngtu hming intarlang chu Mary tih a ni a, 'Mary, Bethlehem' tih chauhin a intarlang a ni. Hetiang deuha hming phel, nu leh pa hming awm lo hi vawk vulh tanpuina dawngtuah hian an awm deuh zeuh zeuh a. Nu leh pa hming tarlan loh hrim hrim hi a tam hle bawk.

Minister chhanna atanga a lan dan chuan mi pakhatin vawkvulh tanpuina hi Rs 8120 zel an dawng a, mi 900-in dawngin, an dawn zawng zawng belhkhawm chu Rs 73,08,000.00 a ni.

A zawttu hian tanpuina dawngtute hming leh address a dil a, minister chuan an hming leh address hi House a hrilh a ni. Minister chhannaah hian mi engemaw zat chu an address (veng) pangngai tarlan a nih laiin mi engemaw zat chu an veng tarlang lovin, an unit tarlan a ni thung. Chu chu House-a boruak siamtu, eptu member-te'n mahni party unit hmanga tanpuina sem ti-a rorel lai party an beihna chu a ni.

Vawkvulh tanpuina dawngtu unit-te
Unit Dawngtu zat Dawn zat
Zotlang Unit 6 Rs 48,720.00
Zonuam Unit 6 Rs 48,720.00
Tanhril Unit I & II 8 Rs 64,960.00
Chawlhhmun Unit 1 Rs 8120.00
Chawnpui Unit 2 Rs 16,240.00
Sairang Unit 8 Rs 64,960.00
Luangmual Unit 4 Rs 32,480.00
Maubawk Unit I & II 44 Rs 3,57,280.00
Bungkawn Unit 45 Rs 3,65,400.00
Mission Vengthlang Unit I & II 45 Rs 3,65,400.00
(Hei hi Minister chhanna-a 'address' tih zawna unit hming inziak zawng a ni.)

Read more...

SEX AND THE CITY

Aizawl-a nawhchizuarte dawrtu zingah pa, pawm lai nei an tam a, nawhchiazuarte pawhin pawm lai neite kawm an duh zawk tih zirchianna-ah hmuhchhuah a ni.

New Life Home Society project manager N Samuel-a chuan nawhchizuar 294-te chungchang chu survey neiin a zir a, chutah chuan Aizawla nawhchizuarte dawrtu zingah pawm lai nei an tam hle tih a hmuchhuak a ni.

Zirchiannaa a lan dan chuan, nawhchizuar dawrtu zinga za zela 80 chu pawm lai nei an ni a, heng zinga 60% chu Mizo niin 20% chu hnam dang an ni. Dawrtu zingah tleirawl chu 5% an ni a, heng zinga 4% chu Mizo niin 1% chu hnamdang an ni. Pathlawi/Pavalai hi 15% an tling a, 10% chu Mizo niin hnam dang chu 5% an ni.

"Nawhchizuar dawrtu, pawm lai neite hi pa pangngai tak tak an ni, pa tawp tak an ni lem lo," tiin N Samuel-a chuan Zozam Weekly a hrilh.

"Contractor te, engineer te, lecturer te, hna tha tak tak thawk an ni nawk," tiin hemi chungchang hi a sawi zawm a ni.

"Nawhchizuarte pawhin pa hi an duh zawk reng reng, a chhan chu a sum nei zawk an ni a. Kan enkawl mekte hian pa an duh zawk; 'tleirawl chuan min risk an ching,' an ti thin. Sum an neih avang hian anmahni dawr turin pa an duh zawk tih hi chu a chiang," a ti.

"Sum an neih zawk bakah pa chuan an sawichhuak ve lo a, nawhchizuarte hian mi hriat nih an duh lo a, pawm lai neite chuan an dawr a nih pawhin an sawichhuak ve lo a, chu chu an duh chhan pakhat a ni," a ti bawk.

N Samuel-a hian New Life Home Society te enkawl mek nawhchizuar 294-te dinhmun a zir a, he'ng mi 294-te zinga mi 68 chu an dam tawh. "An thachhuak a, mahni thiam ang angin ei te pawh an zawng ve a. Pasal neiin chhungkua te pawh a then chuan an din ve," tiin a sawi.

An nawhchizuar enkawlte dinhmun sawiin, nawhchizawrh chu an ning ve hle niin a sawi a, "Mi pangngai nun-a nun an chak ber. Insitna te, inthiam lohna te an nei a, sim hi an chak em em a ni," a ti.

"Ti lo thei lo dinhmunah an ding a, an chak em vanga hetiang ti hi an ni lo," a ti bawk.

Nawhchizuar pakhat chanchin sawiin, tleirawl te a nih laiin chu nu chuan pasal a nei a, a pasal chu a nu leh a pa chuan an duh lo em em; chuti chungin a nei lui a, an tuithlar ta a, mahse, a pasal chuan a ma leh si, chuta tang chuan nawhchi a zuar ta niin a sawi.

A pasal te chhungkua kha a rin ang an lo ni si lo a, an inngeih rei lo hle ni-a sawiin, an mak hnu-ah a chhungte a pawh ngam tawh si lo, a tei kual vel ta a, dinhmun harsa taka a awm laiin nawhchizawrhna khurah a tlu lut ta niin a sawi a ni.

Harsatna hrang hrang vangin hetiang khurah hian hmeichhia an tlu lut thin tih sawiin N Samuel-a chuan, "Thingtlangmi, Aizawl-a awm, fate chawm ngai se, inhlawhna tur hmu mai si lo te pawh an awm. Ti lo thei lo dinhmuna ding an awm nawk," a ti.

Aizawlah hian nawhchizuar chi thar an chhuak tiin a sawi theih ang. Chutiang mite chuan nawhchizuar ti-a sawi erawh an duh hauh lo. Pawisa hlawha mipat hmeichhiatna hmanpui tur an hmuh changin, an hlawh turah an lungawi chuan hmeichhe thenkhat chuan an 'aw' mai thin. Chutiang chu tun hnaia hriat thar ni-a ngaih a ni.

"Thawmhnaw te, nawmsakna lam thil eng engemaw awh vanga inhralh ta mai tun hnaiah an awm. Chutiang mite chuan inhralh an tum hran lo a, anmahni dawr tur pawh an zawng chuang lo. Mahse, remchang an hmuh khan an 'yes' ta mai thin," tiin N Samuel-a chuan hemi chungchang hi a sawi.

"Tleirawl zingah an tam. Chhungkaw pangngai tak taka mi te an ni a, khawlaiah hmu ila chutiang ti tura kan rin lem loh tur te pawh an ni ang. Ruihhlo te pawh an ti thin. Pawisa hlawhna tur a nih chuan tiin sex hi an hmang ta thin ni berin a lang," a ti.

"A man chu a pawisain an dawng a, pawisa an dawn rual rualin sex an hmang ta pawh a ni chuang lo, an inkawp phawt te pawh a ni thei. Tin, a pawisaa dawng lovin phone emaw top up zawng te pawhin an dawng a, thil tha tak tak dawng te pawh an awm mai thei," a ti bawk.

N Samuel-a chuan top up man tuaka vai mistiri hnenah inhralh te pawh an awm tih a sawi a, sikul naupang zingah nawhchizuar ni chiah lo chunga hetianga hlawh neia sex hmang thin hi an tam niin a sawi bawk.

"Ngaihzawngte pawh an nei ve tho a, remchangah midang an lo kawp thin. Ka kawm tawhte chuan an ngaihzawngte nena an awmho lai chuan anmahni dawr duhtute'n rawn phone mah se an chhang duh lo thin tih an sawi," a ti.

"Hetiang ti thin zingah tleirawl an tam a, hnathawh nei pawh an awm tho," a ti bawk.

Aizawlah hian nawhchizuar 'demand' a sang ni-a sawiin nawhchizuarte dinhmun zirchiangtu chuan, "Demand hi a sang; customer tur han zawn vak pawh a ngai lo. Tleirawl phei chuan zan khatah pali/panga te an kawm thei," a ti.

Aizawlah hian nawhchizuarte inzawrhna hmun bik a awm hran lo a, tun hma deuh kha chuan kawngsir lun laiah te an awm mai thin. Mobile phone chhuah hnu-ah erawh phone hmangin anmahni dawrtute nen an inko mai thin. Amaherawhchu, khawlaia awm tawk pawh an la awm tho.

Nawhchizuar zingah hian nu, pawm lai neite pawh an awm nual a, mahse, an pasalte hriat lohva a ruka ti vek an ni tih zirchiannaah chuan a lang.

New Life Home Society te hian, tarlan tawh angin, nawhchizuar 294 an enkawl mek a, AIDS natna hrik an kai loh nan leh an tihdarh loh nan te an pui a, he khur atanga an chhuah theih nan an pui bawk.

Mi 294 zingah hian HIV Poisitive 3 an awm a, 1 phei chu hman ni lawka hriatchhuah a ni. 294 zinga a tam zawk AIDS laka an fihlim a nih chuan he natna do kawngah Mizoram chu kawng engemaw chenah a hlawhtling tiin a sawi theih ang a, chutih rual chuan hmeichhia- nawhchizuar ni lo leh mipa- nawhchizuar dawr ngai lote zingah mipat hmeichhiatna hman khawloh a hluar hle thung a nih chuan Mizorama AIDS veite zingah mipat hmeichhiatna atanga he hri vei an tam hle mai hi thil mak a ni lo ang. Nawhchizuar ni lo leh nawhchizuar kawm ngai lo te'n he hri hi an tidarh hle tihna pawh a ni thei ang.


Aizawla nawhchizuarte chu
Aizawl khawpui chhunga nawhchizuar 294-te dinhmun zirchiannaah chuan, mi 294 zingah khawlaia teikual thin chu 156 an ni a, mobile phone leh a ruka mi dawr thin chu mi 110 an ni a, mahni chenna in lama pan theih 28 an awm.

Kum 10 -15 inkar mi 3 an awm a, kum 16-20 inkar 68, kum 21-25 inkar chu 94 an awm. Kum 26-30 inkar 79, kum 31-55 mi 40, kum 36-40 inkar 6, kum 40 chunglam 4 an awm bawk.

Zirna lamah chuan primary school thlenga zir mi 43 an awm a, middle school thleng chin 89, high school chin 118, higher secondary chin 42, graduate chin 2 an awm.

Pasal nei lo mi 142 an ni a, pasal nei lai 25 an awm a, inthen 127 an awm bawk.

Mi 294 zinga 46 chu thingtlangmi niin, 248 chu khawpuia cheng an ni.

Chhungte nena khawsa 221 an nih laiin mahni ina awm lo chu 73 an ni.

Ruihhlo duh vanga inzuar an tam ber a, mi 120 chuan ruihhlo an duh vanga inzuar niin an insawi. Incheina duh vanga inzuar chu 65 niin mi 56 te chu chhungkaw harsatna (broken family) vang a ni a, retheih vanga insawi 31 an awm a, awmtha duhlo hrim hrim 13, pasal nena inthen 5 an awm a, kumtlin hmaa pawngsual vang nia insawi 4 an awm bawk.

Dawrtu an neih zingah pawmlai nei chu za zela 80 an tling a, heng zinga 60% chu Mizo niin 20% chu hnam dang an ni. Dawrtu zingah tleirawl chu 5% an ni a, heng zinga 4% chu Mizo niin 1% chu hnamdang an ni. Pathlawi/Pavalai hi 15% an tling a, 10% chu Mizo niin hnamdang chu 5% an ni.

Zirchianna an neihna mi 294 te hian nawhchizuar an nih hmain sex an hmang tih an sawi vek.

Read more...

Thuthmun thlak hnu-ah "CHANGE"

Sorkar hmasa hun laia National Rural Health Mission hnuaia health deptt.-in Mobile Medical Unit van (MMU) 27 an leite chu a hlui ni-a sawi a ni a, politics-a inbeihna tling khawpin a thu a lian a nih kha. Nikum May thla chawhnu lamah khan khatih laia eptu party Congress chuan an aupui nasa hle. Mahse, Congress chuan tunah sorkarna an han chang a, kha'ng motor-te kha a hlui a nih leh nih loh finfiah a la nih loh thu anmahni ka ngei atangin a richhuak ta mai si! An thuthmun an thlak hnu-ah anmahni-ah 'Change' a thleng ta a ni mai em?

October ni 16-ah khan Budget Session-ah zawhna leh chhanna hunah Lunglei West bialtu MLA Dr R Lalthangliana zawhna - "Health Deptt.-in Mobile Unit Motor hlui a lei tih thin kha, a hlui a lo ni reng em?" tih chu health minister Lalrinliana Sailo chuan, "Health Deptt.-in Mobile Unit Motor hlui a lei tih kha official-in prove a ni lo a, enfiah mek a ni," tiin a chhang. Nikum kum chawhma lamah khan a hlui a ni tih an hrechiang viau emaw tih tur kha a ni bawk sia, tunah a chiang leh ta si lo!

May ni 23, 2008-ah khan Mizoram Pradesh Youth Congress Committee chuan thuchhuah an siam a, "Mizoram hmun hrang hranga pekchhuah tur Mobile Unit Motor te chu Congress Party Driver Cell te'n mipui hmakhawngai tak chunga enthlithlaiin a hlui a nihzia Zoram mipui hriatah tunhnai lawk khan an puangzar a, he thu hi health minister leh MNF |halaite chuan chhangletin, a hlui a nih loh thu leh mipui bum tumna mai a nih thu an sawi a. He an thusawi thangkhawk pawh a reh fel hmain May ni 22 2008 khan Congress Thalai te chuan MMU Van te hi a hlui a nihzia leh thudik pholan a nih theih nan repair tura an dahna hmun TATA Engeneering Works, Zemabawkah kalin kan enfiah a, heng kan thil hmuh atang hian Mizo mipuite hian a thar a nih an pawm theiin kan ring thei lo a ni," tiin MMU te chu a hlui niin an sawi.

Motor thenkhat deskboard te chu a hlui rawng hnawih that tih hriat tak niin an sawi a, motor herh nunna chahbi vuahna (self) bawrte chu mimawl ber tan pawh a hlui a nihzia hai rual a ni lo niin an sawi bawk.

"Motor exhaust pipe (cylinder) khaina chu thirzai leh tyre zai sin nia sawiin wind shield tuamna rubber channel chu keu kauin a lo tuiek a, popular shaft pawh a thawl avangin a ri ruk ruk," an ti.

May ni 22, 2008-ah khan Kolasib District-a hman tura thawn Mobile Medical Unit khat (motor 3) chu TATA Service Center, Zemabawka dah tura sorkar hotute'n an hriattir angin Aizawl thlenpui a ni a, MPYCC te chuan he'ng MMU motor te hi Selesihah lo dangin a hlui cheithat a nih leh nih loh an enfiah a ni. MMU motor chahbi te lain an danna hmunah hian heng motor enfiah ve tur hian chutih laia health minister R Tlanghmingthanga koh an tum a, minister hi an biakpawh theih loh avangin driver te hnenah chahbi hi an pe let leh a, motor dah an tumna TATA Service Center Zemabawkah an zui thla ve nghal a ni.

TATA Service Center-ah vek hian Serchhip District tana pek MMU Unit khat dahluh a lo ni tawh a, heng motor-te hi uluk taka en-a a hlui cheithat a ni em tih an ennawn hnuah MPYCC hotute chuan Congress Party Driver Cell te'n a hlui a nih thu a lo puan tawh chu "a lo dik ngei a ni," an ti.

Hetianga sawi a hlawh tak em avang hian health department leh MPCC Drivers Welfare Cell leh thuthar lakhawmtuten MMU van-te hi an enfiah ta a; health department, MVI leh lirtheite supply-tu P&Sons aiawhte'n thuthar lakhawmtute an kawm zui bawk. Anni chuan a hlui a ni lo niin an sawi a ni.

MPCC Drivers Welfare Cell aiawhte chuan lirthei a hmuna enfiah a nih danah an duhkhawp lo tih confrence hall-ah hian an sawichhuak a, an zawhna thenkhat chu chhan mumal a ni lo bawk.

Mahse, hun a liam a, Congress chuan sorkarna an chang ta. Sorkarna an chan hnu-ah erawh MMU te hi a hlui a ni tih finfiah a lo ni leh lo!

"Official-a a hlui tih prove-na a la awm rih loh avangin tu chungah mah action lak a la ni lo," tiin health minister chuan House a hrilh.

Read more...

Kha Pa Kha

¢ Lalhruaitluanga Chawngte

Chu pa chu ka'n en thin a, a va han lungngai tak em!

Kekawr tlawn a ha a, a rawng chu a pawl, van dumpawl rawng aia tak hret a ni. Jeans niin ka hria. A tlang a arh danah kekawr tlang arh uar lai a nih ka ring.

Incheina hi a inthlak chak em a, keini ang duang chuan ka umpha lo; han um ve mah ila thli thaw um ang deuh a nia, rei lo teah a lo liam hman zel. Kan intih tlangval ve hnu-ah hian kekawr tlang arh leh a zuih chi te hi kan hmu ngun tawh em a, chuvangin, chu pa pawh chu hmanlai mi a nih ka ring chuang lo. Kekawr tlang arh an uar lai kha hman ni lawk a la ni tlat.

A kekawr rawng ang chiah chu kawr a ha a, kamis niin ka hria. A pheikhawk chu ka hmu chiang thei lo; mahse, a uk niin ka hria a, sahmul pheikhawk a nih ka ring.

Thing thutthleng varah a thu a, a lu chu a thur bam mai. Mi lungngai em ema chu.

A ke chu a dawrh deuh suah a, mahse, a lu a kun chal avangin a lungngai em em a ni tih a hriat theih. Nihawi par angin van lam hawi vah se chu, a thu dawrh ang reng bawk sia, hahdam takin a thu tihna a ni thei ang. Mahse, lei lam a bih ngar a, chu chuan khawvel a thlir ngam ngang lo a ni tih a lantir. A ban chu a malpui leh khup velah a nghat a, a zawi hnuang mai. Mi lungngai em ema chu.

A awmna hmun chu a ni nuaih mai; a bu ang thlapin a hnawk. Engkim mai chu a awmna tur hmuna awm lo leh a awm lohna tur hmuna awm vek ni berin a lang. Chhangchhe in ang maiin a hnawk a, zu zuar in ang maiin a tawp bawk.

A sir ding lamah chuan thingkung lian ang reng deuh mai hi a awm a, mahse, a kakpui chungah tute'n emaw an kih avangin a bul tawh. Tunlai khawvelah miin thingkung a hlut teh reng nen, tute inhlei phiangsenin nge maw lo kit pek ni! Ni lo, tute inhlei emaw kih a ni lo ang, a kihna hnuhma han enin a mam tlat. Uluk taka kih a ni tih a hriat. Thing kih mai mai te hi kan la pawisa lo khawp a, ram ruak tawh phawtah chuan chuan in sak emaw, eng emaw thil dang tih kan tum ngawt zel a, thingkung lo ding tha hle hle te hi ui miah lovin kan kit thawr zel a nih hi. Chuvangin, chu thingkung pawh chu, tute inhlei emaw kih a ni lo ang, thu deuh deuh te'n inti remhre takin an lo kit leh pek a ni ngei ang. Lo kit thawt thawt lo se chu a zar peng hrang hrang te chuan pharh takin thla a'n zar ang a, chu tlangval chu ni sa lakah a hliah thei tur.

Mahse, tute'n emaw lo kit thawt thawt mah se chu thingkung chuan a tuar tang tang a, vawiin thlengin a la ding ran mai. A bula tlangval thu pawh chu a hmu chiang khawp ang. Mahse, amah atangin thing hnah a chhuak tawh lo, thil hnawk mai lo chu.

Chu thingkungah chuan thil eng engemaw an kilh bet a, chu'ng chu a ni hnawk chu.

An thil kilh beh chu thingzai te, chartin te leh chartin phelsin te niin ka hria. An han kilh uluk em em mai lehnghal a, perek naran pawh ni lo, bawltu an tia'mawni, a herh-a herhluh chi ngatin a ni an kilh ni. Hetiang te chu phawi a har a, phawina lamah a thing-a te pawh tihkeh a awl asin mawle.

A chhehvel te chu a hnawk nuaih a, a hnawk mai pawh a ni lo, a ipik a ni. Politician thawveng thenkhat, an party-in sorkarna an chan avanga intithei em emte tal hrepna hnu ni awm a ni!

Chutiang vel karah chuan chu pa chu a thu ran mai. A ding lam atang te, a vei lam atang te leh a hmazawn atang te, kil hrang hrang atangin ka'n thlir thin a, hmuh tur dang a awm lo, mi lungngai em em mai lo chu.

Ngun lehzualin ka'n thlir a, tin, a thla ka la mawlh mawlh bawk. Mahse, thil pakhat chauh hmuh tur a awm, mi lungngai em ema chauh.

A chhungah ka lut mai ang tih hlauhawm khawpa chu lemziak ka bih vel lai chuan a ziaktupa tawngkam hrang hrang, he milem a ziak dan te leh a rohzia a sawi te chu ka bengah hian sana pui inkhawng ri tluk tluk ri ang maia chiangin a lo ri tluk tluk mai.

A ziaktupa chu pa lian pui mai, mahse, dam duai si a ni a, pa tuan rang hmel a pu lo. A hmuihmul leh khabe hmul te chu a inzawm deuh chuat a, a buk chhup bawk. A hmui hmul leh a sam te chu a var vo a, a hmel han en chuan in chhungah aiin ramhnuaiah thu se a inhmeh zawkin ka ring. Ramhnuaiah, thingbuk hnuaiah thu se, meizial lian pui fawp khu vang vang se, thawmhnaw man to tih velin a rilru a luah lo a ni tih hriat takin ral lehlam thlir veng veng se, amah mamawhtute'n va rawn thin se, chutiang chu ni se a inhmeh ka ring.

Mahse, ramhnuaiah ni lo in chhungah kan thu dun a, kan titi a nih kha.

"Lemziakmi i ni a, i kutchhuakah hian eng nge puangchhuaka i inhriat? Eng nge puanchhuah i tum?" tiin ka zawt a, chu thu min chhanna atang chuan a ni mi lungngai em ema nena kan intawn tak ni.

"Ka kutchhuak pakhat, roh deuh mai ka nei a," a ti a, a chil a'n lem leh rih, chutah, kuhva a'n hmawm leh te te a, a hmazawn thlir vang vang pah chuan a chhunzawm ta a:

"Thil hnawk deuh mai hnuaiah mi pakhat, beidawng deuh mai a thu a, a lungngai em em mai a. A bul vel chu a hnawk nuaih mai a..." tiin.

Chu pa chanchin chu min hrilh ta a, mi lungngai em ema chu. A sawi thiam vak lo, mahse, a sawi tumah a chiang.

A hmuihmul a'n tuai deuh thuak a, tin, a sawi chhunzawm leh ta a: "Miin an fak leh fak loh ka ngaihtuah lo a, chutiang pawh ka beisei chuang lo. Mahse, kei chuan ka duh khawp mai a, ka roh ve khawp mai. Hralh pawh ka hralh phal lo, foreigner te pawhin lei min dil tawh a, mahse, ka phal lo..."

Amah chu lemziakmi mai a ni lo, rimawi tum thiam pawh a ni a, hlaphuahthiam pawh a ni. Chu'ng thil hrang hrang avang chuan hriat a hlawh a, sum leh pai erawh a hlawh lem lo. Khawvelin a ngaihsan em em thil hrang hrangah talent ropui tak a dawng a, mahse, he khawvela 'ka chipui' tia a sawi vete teh dana teh chuan a hlawhtlinpui lo tihna a nih chu.

Mihring thinlungah hian thil engemawni hian thu a rawn sawi thin a, chutiang puangchhuak thiam, mi bik chu an awm. Chu'ng an thu puanchhuah chu khawvel timawitu leh tinuamtu a ni a, kan sawi thiam loh min sawi sak thintu an nih avangin kan aiawhtu an ni. Chutiang mite chu 'artist' ti ila a huam kim mai awm e. Khawvel hian a ngaisang a, a zah bawk. Chutiang puanchhuahna hmanraw hrang hrang - literature te, music te, lemziak te, milim ker te leh thil dang dang te pawh a la awm, mihringte tana a hlutna hi kan mawl poh leh kan hre pha lo ang a, kan fin poh leh kan hre seng lo thung ang. A thiamte chu mi chungchuang an ni a, a hrethiam phate pawh mi chungchuangte hlutna hre pha an nih avangin an chungchuang lo bik lo ang. Engpawhnise, lungngaih leh lawm lai, tah lai lei hlim lai, tin, awm mai mai lai thlenga min awm tlei thintu, kan mamawh thin chu pawisa leh car man to te ni lovin artist-te kutchhuak zawk hi a ni a, chuvang chu a ni khawvelin artist a ngaihsan ni.

Ka kawm mek-a chuan a rilru chhungril hi rimawi hmangin a puangchhuak thiam a, hla hmang pawhin a puangchhuak thiam. A sawia sawifiah chawp ngai lovin a lem nen thlap pawhin a puangchhuak thiam, lemziakmi a ni ka tih tawh kha.

Lemziakah eng nge a puanchhuah tih ka zawt a, "Chumi khami chu ka puangchhuak..." ti lovin a kutchhuak pakhat chanchin min hrilh teh daih a, chu chu ngaihnawm ti takin ka lo ngaithla a ni.

Eng engemaw ka zawt ka zawt a, ama chanchin kilkhawr deuh thlengin kan khawrh ta nual mai. Chutia a titi ka ngaihthlak hnu chuan a kutchhuak pakhat, a inpuanna chu hmuhnawm ti takin ka thlir a, mahse, mi lungngai em ema chu eng vanga lungngaia kun reng nge a nih tih erawh ka ngaihtuah chhuak pha ta chuang lo. A bul vela thil hnawk awm nuaih mai erawh van atanga rawn tla thla ni lovin, tu tute emaw phiangsenina an siamchawp ni ngeiin ka hria.

Mi lungngai em ema chu harsatna hrang hrangin a hual vel a, chu'ng harsatna te chu inkilh bur khawpa nghet a ni ngei ang. Chu'ng thil chu tu kilh nge ka hre lo a, rin erawh ka nei. A bul vel, hnawk em em mai chu midangte'n an thianfai thei lo niin ka hria a, an theih loh chhan chu an tum tawk loh vang nge an tum lo hrim hrim zawk tih erawh ka hre lo.

"A nih leh i hla-ah hian eng nge i puanchhuah?" ka ti thut a, thil dang teh chiam a sawi ka ring lo. Ka ring dik! Mahse, a hla rawn sawichhuah chu ka rin loh deuh a ni thung.

"Hlaphuahthiam tia sawi tlak ka ni lo, tin, chutianga sawi tham pawh ka ni lo, kan kuthleiin pahnih/khat kan thai ve mai mai a ni," a ti a, mahse, ka zawh luih tlat avangin a sawi ta a ni.

"Lemziakah chuan chutiang khatiang chu ka puangchhuak," ti lova a kutchhuak pakhat sawichhuak maitu kha a ni a, chutiang bawkin hla-ah pawh "chu chu ka puang" ti lovin hla pakhat a sawi leh.

Chu hla chu ka naupan lai atanga ka hriat than a ni a, Zofate zingah hian a hre lo an tamin ka ring lo. A thu chu - 'tlang tin mual tin' tih te, 'va tin reng' tih te, 'Zo bawm dingdi' tih te, 'Vautuahpui' tih te, 'romei zam chiai' tih te a ni a, ramngaw leh nungcha vel vanga lungleng, 'nature' ngaina em emtu pa pakhat kutchhuak a nih ka lo ring mai thin. A lo ni hauh lo.

Ramhnuaia thil awm, thil hrang hrang a ngaihtuah a, thingkung leh ramngaw, pangpar hrang hrang leh a bawmtu sava te, tin, a tuam veltu romei te, chutiang vel chu a ngaihtuah a, an hlimzia a ngaihtuah chuan a awt ta a ni. John Keats-a'n khawvel lungkham buaina kalsana Nightingale nih daih mai a chakzia a puanchhuahna poetry - 'Ode to a Nightingale' kha ka hrechhuak zawk a, "Khawvel buaina leh harsatnain a tihbuai phak lohte i awh thu i puanna hla a lo ni maw?" ti rilru chungin.

Ramhnuaia thil chi hrang hrang - hlim taka sava han chiar nek nek mai te, thingkung a lo insawi siau siau te, dingdi, tlangsam par leh parmawi chi hrang hrang lo vul chek mai te chu a'n ngaihtuah thin a, a awt ta em em mai. "An leng e hlim lai chenin... An ngai lo, tlei dang par, he lei chinah... Ka nuam e, an ianga hmatiang dawn ngai lo hun nuam... Aw, awm ve ngai maw hringnun?" a ti ta a ni.

Chu hla chu 'Ka nuam ve e' tih kha a ni. Heta 'nuam' tih hi 'a nuam ka ti' tih-a 'nuam' tih thluk hian an sawi teh chawk a, chutianga sawi thinte chuan mipui hmaah te an han sa awl awl thin leh ta nghal! 'I puan kha suk a hun a nih kha' tih-a 'puan' tih thluka 'nuam' tih tur a ni reng si! Mahse, chutiang ngaihtuah hman ka ni lo.

Harsatnain a sawisak zek hnute tan chuan ramhnuaia Pathian thilsiamte chuti taka an han hlim mai chu an va han awhawm dawn em! Chutiang awt pha, chutiang vel ngaihtuah phate chu mi vannei tak niin ka hria a, literature hmangin a ni emaw, painting hmangin a ni emaw, rimawi hmangin a ni emaw, eng hmang pawhin inpuang se khawvel hian a ngaisang thinin ka hria. Pa nuamsate aiin mihring nun hi an hmu fuh a, chu chu an hlutna tak pawh a ni.

Chutiang hla phuahtuin mi lungngai em ema lem a'n ziak chu mak ka ti lo. A ziak tur takin a ziah tur tak a ziak a ni. Amah chu Buta - Lalbuta a nia, keini ang rual - Mizo naupang chuan "Lead Buta" kan ti thin.

Mahse, mi lungngai em ema tuam veltu harsatna kha, ama chhuah chhuaha rawn chhuak ni lova a mihring puite ngeiina an siam chawp ni tlatin ka hria a, chu mawlh chuan a ni ka thin khei ni. A sir velah te khan luruh ro ang tha-a nelawm lohin tute emaw an nui then tha tlatin ka hria a, theih ni se amah hung phui tlattu thil hnawk chu thenfai ka va han chak kher em!

Read more...

Damlai Hremhmun

¢ Er. Chhungpuia RHN

Khawchhiat vanga huh zawr hnup chunga "Khua a thal e ..Khuangruahpui sur tum si lo vawiin ni chuan...” tih hla YMA Day-a phur taka kan han sa thin hi chu(h)! Khawlum vanga thlan tla zawih zawih chunga Primary zirlaiten “Mizoram boruak chu a dai nuam hle...” tih sikul-a an zir tluk zeta thil inhmeh lo a ni awm e. Mumal takin ruah pawh a sur duh tawh meuh lo bawk nen, 'Damlai pialral i chen dun ang' tih hla sa thin te'n 'damlai hremhmun i chen dun ang' ti ni awm fahrana an lo inphelh ruak deuh a nih pawhin kei chuan ka dem hlek lo mai, tawngthuchhe lovah! Khua a lum em a ni e. Khawvel lum chak lutuk avanga tuilian, thlipui, khawkheng leh natna chi hrang hrang hi ni tin mai hian khawvel hmun hrang hranga chengte'n kan tuar a ni ber mai.

Khawvel sorkar lian tak takte chuan kan chenna khawvel lum chak lutuk hi mut mawh hnar mawhah an neih ta. USA chuan tun hnai mai khan carbon emission titlem tura intiamkamna thuthlung ziahpui turin ram hrang hrang a sawm kual hial a nih kha. California governor Arnold Schwarzenegger meuh pawhin , "We simply must do everything we can in our power to slow down global warming before it is too late. The science is clear. The global warming debate is over," tiin a sawi hial mai. US ram puma hman turin September ni 27, 2006 khan The Global Warming Solutions Act of 2006 a sign nghe nge a nih kha.

Mamawh aia tam fossil, carbon dioxide, greenhouse gases insiam te'n greenhouse effect nasa tak an awmtir avanga tunhnai kum 100-200 kal ta atanga vawiin thlenga kan chenna khawvel lumna lo sang zel leh nakin huna khawlum lutuk rawn thleng tur sawina hi Global Warming an tih ber chu a ni. Mihring tana hlauhawm ni eng zungzamte hian lei an rawn thlen loh nan ozone layer te hian lo dang letin vansang thengrengah an lo thawnbo vek thin. Ozone layer hi kan khawvel sik leh sa venghimtu ber tiin kan sawi lo thei lo ang. Hetih lai hian Atmosphere- ah boruak hrang hrang, methene, carbon dioxide, water vapour, nitrous oxide, hydroflurocarbons etc a awm ve bawk. He'ngte hi greenhouse gases tiin an vuah. Greenhouse gas te hian ozone layer nasa takin a eiral mek a, hmun thenkhatah phei chuan ozone layer hi a pan hlein, ni eng zungzam hlauhawm takte chuan khawvel a rawn thleng ta hial mai. Hei hi ozone pawp tiin kan hre lar hle. Ozone layer a lo chhiat avang hian ni eng lumna hi vansang boruak thengrengah a kal bo a. He'ng gas-te hian ni eng lumna te hi leiah an rawn thawn kir leh a, hei hi Greenhouse Effect an ti.

Greenhouse gas vanga Ozone Layer pawp te, hydroflurocarbons lo tam ta lutuk te, Industrial Carbon emission tam lutuk te leh lei tuamtu atmosphere lumna lo sang zel ni tin mai hian khawvel lumna a ti zual zel. Keini Mizoramah ngei pawh lirthei lo pung chak lutuk leh ramngaw tihchereu nasat avangin greenhouse gas a tam tial tial a, lei tuamtu boruakah 'Long lived greenhouse gases' an tih mai carbon dioxide leh methene gas tam tak kan chhekkhawl teuh mai. Chhawrpial run iang kan tih, kan lo chhuan ve em em kan Zotlang ram pawh a nuam ta lo, nipui lai ngat phei chuan ceiling fan tel lo chuan a khawsak theih meuh ta lo chu a nih tak hi.

Kum 2050-ah chuan a tlem berah 25% tala Greenhouse gases kan tihthlem a ngai dawn tih mithiamte'n an sawi. Intergovernmental Panel on Climate Change (IPCC) chuan a tlem berah khawvela kan ramgaw neih zawng zawng hmun thuma thena hmun khat lai mai hi climate lum zual mek hian a la tihchhiat vek an ring ta deuh deuh. Hadley Centre for Climate Change, UK Meteorological Office chuan CO2 hi climate tidanglamtu ber a nih thu sawiin kum 2050-ah phei chuan ramngaw hi CO2 siamchhuahna kawngah a bulpui ber a niin sik leh sa tidanglamtu ber a ni dawn a ni tiin an puang bawk.

National Environmental Satellite, Data, leh Information Service (NESDIS) data centers hi khawl changkang ber ber hmanga sik leh sa inthlak chhinchhiahtu ber leh mipui hnena information pe chhuaktu ber an ni. National Climatic Data Center (NCDC )-ah khaw awmdan hmanrua tha tak nen sik leh sa inthlak dan engtik lai pawhin an lo chhinchhiah reng a. National Oceanographic Data Center (NODC)-ah lei chung hmun hrang hrang khaw lum dan a chhinchhiahin hun kal tawha sik leh sa nen khaikhinin nakina kan khawvel lum dan tur an chhutchhuak zung zung thin. Kum 1990, 1995 leh 2001 khan IPCC chuan khaw awmdan zirhona hlawhtling takin an nei a, hetah hian scientist-te chuan ramngawin sik leh sa a nghawng dan chiang takin an sawi. 21st century tawp lamah chuan carbon dioxide concentration hi khawvel hmun hrang hrangah 490 to 1260 ppm ( 75-350% above the pre-industrial concentration) a nih ngei an ring. Khua tilumtu ber green-house gas emissions 20 % lai mai hi ramngaw kan tih chereu vang a ni tih fianfiah a ni bawk.

India ramah ni tin ramngaw kan hal mek a, hei hian ramchhungah greenhouse gas nasa tak tipungin khua a tilum tial tial mai. A tha zawnga kan thunun vat loh chuan sik leh sa danglam thut avanga vanduaina rapthlak tak coastal threats, tsunamis, monsoons leh cyclones te pawh hi kan la tuar leh ngeiin scientist te chuan an ring.

Himalaya vur tlang pawh tunah hian 20% laiin a tlem tawh tih hmuhchhuah a ni. Tun hma a 3391 sq. km kha tunah chuan 2721 sq. km chauh a ni tawh bawk. Hetianga vur tlang a tuiral zel chuan harsatna lian tham tak kan tawk ngei dawn.

BBC News South Asia, 1st February, 2007, 12:35 GMT-ah chuan ramngaw kan tih chereu vanga India sik leh sa lumna lo sang ta lutuk chungchang fiah taka tarlan a ni. Nikum khan BBC News South Asia-in global warming survey neia Ganges luikam an fan tum khan temparature 400 C chunglam a ni a, a lum hle tih bak sawi tur an hre lo. BBC palaite chuan duh ang tawka pawisa hman tur nei se eng nge an lei ang ti-a an zawhna chu, "Khawlum lutuk tihrehna bak kan rilru-ah a awm lo, fan leh fridge kan mamawh ber," tiin heng laia mi cheng te chuan an chhang. “Ramngaw kan tih chereu vanga khaw lumzia i hriat duh chuan, Calcutta atangin Ganges luipui zawh chhoh rawh," tiin IPCC scientists te chuan an sawi ve bawk. India hi a lum tawh tehreng nen, IPCC Third Assessment Report 2001-ah chuan 1990 leh 2010 chhung hian India ram temperature hi 1.4 atangin 5.8ºC- a a pun tur thu an la sawi ta deuh deuh!

Global Warming chungchangah India hmarchhak leh Mizoram bik dinhmun tlem han tarlang ila. Survey report of FSI & P. S. Roy & P K Joshi Indian Institute of Remote Sensing (NRSA) , Dehradun-ah chuan North East Region 2,55,168 Sq. Km. vel zeta zauvah hian 63,799 km2 (42.24% ) forest a niin India forest 25% lai a tling a ni. Annual rainfall: 250 cm. Average temperatures: 11°-21° C (winter) 20°-29° C (summer) a ni. Tunah hian kum tin mai 44,000 km2 forests hal a ni a, kan sik leh sa nasa takin a lo danglam a, tun hma lam nena khaikhin chuan khua a lum em em tawh.

Forest Survey of India report-a a lan danin Mizoram 21,081 km2 . leka zauvah hian kum 1980 hmalam khan 7,900 hectares laia zauvah thingphun a ni a, kum 1985-90 khan 20,500 hectares lai kum tin thingphun ang kan ni. 98% lai mai ramngawin a khuh a, sik leh sa a nuamin ruahtui pawh kum tin 2,640-3,900 mm lai kan dawng thin. Hun a kal zel a, kum 1987 leh 1997 chhung khan kan ramngaw 80% (0.38 million hectares) lai kan hal kangin tunah phei chuan ramngaw hmuh tur a awm ta meuh lo. Ruahtui kan dawng tlemin khua pawh a lum sawt em em a ni.

'Damlai pialral i chen dun ang' tih hla ngaithla thin te'n 'damlai hremhmun i chen dun ang' ti ni awm fahrana an inphelh ruah tak tak hma hian kan chenna Mizoram boruak lo lum zel tur hi thinlung takin i vei ang u.

Read more...

Thu Chawnpuar

¢ Marema Pachuau

E hemm!! Ka va han ui ang reng!! He’ng thu vahlah mai mai sawi tur hian tling tawk ka inti a ni lo, mite anga thu thiam a zeng lah ka ni lo a, ngaihnawm taka han sep rawtui turin chilphuan lah ka ngah tawk hek lo. Mahse,sawi lovah chuan a uihawm riauva hriatna zuk nei ve tlat iia mawle!

Eng atangin nge ka tan ang ?
Uhm. Dar a ri a, sikul chhungah chuan kan lut dam dam a, Devotion neih loh tuk a ni a; thiante chu homework kan thiam leh thiam loh kan inzawt sap sap a, a hun a lo thleng ta. saw le..

“Good morning, sir...”

Kan hotupa chuan “.....nang han sawi hmasa ber teh” min han tih chuan zam tak chunga dingchhuakin,

‘Aw, khawiah tuan che maw,
Rum vung vungin thangril laiah,
Zantiang chhawrthla pui eng hnuaiah,...
......Kan luhka pui rawn chhun la,
Kan khartung rawn sawn dim la,
Chutin i sakhmel mawi,
Zofa te’n kan chhing ngei ang’

ka han ti mai chu......,!! Sawi tha intih ve nak alaiin,.....a nui nasa lutuk, blackboard tukhum vaw chawrha a chair hnunglama eu chhuak, a rawn hawichhuak leh chu..... nuih zui chi a ni tawh lo...

“A bul atangin sawi tha leh rawh...”

Engtin tin emaw, chiang lo deuh chuan ka han sawichhuak ve hram a, kan pawlah chuan a sawi tha ber ka la nih tho avangin chawlhlawkah sikul theite chu min lawh tir thei hram a nih kha..

Engatinge Kurtai hi chhuatah in dah?
Kan chawfak bang hi thiante inah hian kan lut kual thin a, vawi khat chu kan thian pakhat Zohminga chawfak bang chuan , “Kan theihmu lo ang u”a ti a, kan zui lut dam dam a. An kurtai neih chu a hrereng ni tur a ni, chhuatah chuan a hmu fuh ta tlat mai, tifuh inti deuh hian, “Ngatinge kurtai te hi chhuatah in dah?” tih leh hmawm a han rual mai chuh!!

‘uuuuuaaakkkk!!!’

‘Tui, tui, tui,........’

A ngaihna kan hre lo lutuk... a nu chu rawn tlan lutin, “Awhawi!!! I nau Muantea ek a nih kha... ka la paih hman lo a, ..i lo ei a ni maw??”

Keiniho chu kan nuih a za si... kan ten bawk si.... a nu thinrim bawk... Zohminga thinrim bawk... Theihmu chu kan lo lo chiang teh asin..

Hrem ka tawk tlat :
Middle school han rah ve chinah chuan mahni aia pawl hniam zawkte chu kan lo hmu hniam ve ngei a, han auh duhdah vel chu chak sakhaiah kan nei a ni teh chek a ni ang chu.

Vawi khat chu thingtuai put tur a ni a, thianpa Hminga chuan kan sikul hlui kawmthlanga mi sat ang a ti a, kan kal ta a, kalkawngah chuan kan aia pawl hniamho chu auvin, “Pawl thum ek dum ho, sukbuk ler atanga kan vawih khum,” kan han ti a, hotupa chuan a lo hre hlauh mai. Chu mai a ni lo, kan thingtuai sahna kha sikul compound ni tawh lo tura kan ngaih kha a lo la ni si. Kan thingtuai sah nen chuan sikul chu kan helkual ta zak zak mai a, ka zak chem chem mai asin!!

Uah pa dënga :
Hindi kan han zir a, a har kan tiin, nuihzatthlak a tam ngei mai. Kan hotupa chu sipai pension tawh a ni a, a thiamin, a strict ngei mai. Kan thianpa Rema chu a tawng a fiah vak lo bawk nen, a thiam thei lo chi lo ni bawk nen, Hindi hun chu kan huphurh rual rualin, kan nghakhlel em em thin bawk; kan thianpa avang chuan.

Kan ding vek a; a mal te tein kan sawi a, a thiam thiam kan thu thin.

‘Uah pa’drengga’ (a chhiar ang)

Kan thianpa hun chu a lo thleng ve ta.

‘Uah Pa Denga’, nilo..... Uah ...iah.. uah ..... Pa...pa....Denga....

Kan lo chhunzawm sak a, Pa Denga nupui chu.nu Lawmi a ni a...

‘Uah Nu Lawmi...’

“Ka pu, Ka kha ga’ ka sawi zawk mai ang...?”

“I thiam thei thlawt na ng? Iah Uah che chuan!! A hmel nen chuan a inhmeh hi kan ti lutuk a... iah .. uah hian...

Kan nuih a za si, hotupa kan hlau bawk si, thianpa kan khawngaih bawk si...Hahthlak zawkin.

Kan Headmaster Pu Ruala chuan, “Kan thil hriatte kan sawi chhawn leh hian kan hriat ang chiaha sawi chhawn leh thin tur a ni a, belh tur a ni lo a, paih then tur lah a ni hek lo. Tin, kan hriatna hun leh hmun kha a theih hram chuan kan chhinchhiah tlat thin tur a ni,” a ti thin. Tichuan thil pakhat ho te, kan pawlah chuan min tih tir ta a. Tevala chu ko hrangin, engemawni hi a hrilhru ta a.

“I duh ber hnenah kha thu chiah kha hrilhru ve rawh”

An inhrilhru dan dan a, ka hun a lo thleng ve ta a, min hrilhtu chuan uluk tawp hian, “Sa um bur then nilh nelh hian nuih a ti za hle.”.

A ho hi ka ti lutuk a, ngaihtuahna thar ka nei ta. Ka bula mi Thangmawia chu ka han hrilh ve a.

“.... bawng then liak luak hian luak a ti chhuak hle...”

Hmeichheho chu an inhrilhru dan dan zel a, an nui tat tat hlawm a, a tawp ber a lo thlen chuan hotupa chuan a inhrilh tir leh ta a, a hnen a lo thlen leh chuan ni lo baksak a lo ni ta si. A hmel awm dan kha ka mitthlaah a la cham reng.

“Het! Tu hnen atanga lo chhuak nge?”

Kan ngawi thap. A tawpah chuan kan thu hriatna theuh atanga kan hriat dan kha min zawt ta dan dan a, min hrilhtu pawhin min la hrilh dik vek. Tichuan keimah atanga chhuak, ka hrilh pa hnen atang chuan a dik lo a ni tih a hre chhuak ta.. Chutah min ko chhuak, thiamthu sawi tur ka nei lo, ka nih nih ni tura inrin a ngai tih ka hre mai. Hhrem vawi hnihna chu.

He pa hi a ngaihna ka hre lo :
High school kan han chuangchhuak ve ta a, Mizo tawnga tawng an lo phal lo rawl nen, keiniho chu a buai pawlah kan tang chu a ni der mai. Classroom-ah kan lo thu bial thap a, a laiah Lalmawia a titi zuah zuah a, Sir Zawma lo kal hi a lo hmu reng ni tur a ni, a ngawi ta hmiah mai, kei chuan a thusawi chu ka lo chhunzawmsak.

“Sir Hluna taksaah hian Sir Chakraborty ke hi vuah ila, han um vak mai ila...”

Ka lu chu a ri ta fawk mai. Siama emaw ka ti, en pawh en lo chuan a tiang chu ka lo man sak, platform lamah chuan ka theh phei nghal. |hiante chu an ngawi thap. Chutah ka bengah chuan min han man a, min pawt nghal, kei chuan Siama emaw la ti fanin, “Zawnga, min thlah rawh...1...2...3...”

Min la thlah chuang lo, “Ehe heee... i va han...!!!

Ka han hawilet chiah mai chuh....ka tawng zui lo kher mai...

Office lamah min hruai phei a, Mizo tawnga tawng bawk, teacher zah lo awm taka tawngkhum bawk. CrPc section tih lam phei chu ni se, jail bang min zut tir hial lo’ng maw? “Naktukah mau pum 12, ft 12-a sei i rawn pu tur a ni.”

Tlaiah chuan ka inthlak sawk sawk a, mau pu tur chuan ka kal nghal a, ‘pum 12ft 12...’ Ka rilruah thil dang tih chakna ka nei leh ta, ka let thut a, kan hotupa khan mau pum len lam a sawi lo tak, kawngthlang maia mau chu ka sat ta.

A tuka ka mau put nen sikul ka kal chu thianteho an nuih a za nasa mai.

Dar a ri a, kan in-line ta. Sir chu a lo kal a,

“Khawnge i mau put chu?”

Ka mau dahna lamah chuan ka kal a, thangthleng ngul tiat lek lek, pum 12,ft 12-a sei ka put chu ka va hawl chhuak a, thiante chu an lo nui dar dar mai.

“Kha kha eng nge?”

“Mau.”

A hmelah chuan a lungawi lo tih ka hre nghal a; mahse, ka tuang ka tichhah lui a,

“Sir, a tha hlawm ti raw?”

“Rawn pu tha leh rawh.”

“Awle, Sir.”

Tlaiah chuan mau pu tur chuan ka kal leh ta. Tawlailir ka nawrchhuak a, kan thiante huan bula mi, kawngchhak lam atanga theh thlak theihnaah chuan ka kal a, phulraw hung lam chu ka pan ta a, a sah a lo awl phian a. Phulrua pum lian theh thawh, pum 12,ft 12 chu hah em em in ka sat ta. Tawlailir ka dahna kawngpui lamah chuan ka tleng thla a.

A tuk sikul ka va kal leh chuan tawlailir nen, phulrua pum 12,ft 12 chu thiante chuan min nawr pui laih laih mai a.

Dar chu a ri leh ta ngei mai.....

“Mau chu i rawn pu em?”

“Pu e, Sir.”

Mau awmna lama kan va kal chu...!!! Rem rem mai a....

Headmaster room-ah min hruai a, “He pa hi a ngaihna ka hre lo, classroom- ah Mizo tawnga a lo tawng avangin mau ka chawitir a,.niminah thangthleng ngul tiat, tunah phulrua a rawn pu leh a...”

“Engah nge chutianga i tih a?”

“Sir, mau pum len lam leh eng mau nge put tur a sawi si lo a, mau a ti ringawt a lawm.”

Khang hun te khan mual a liam a, kohkir leh theih an chang si lo; hringnun hi hlimna leh lawmna, lungngaih leh beidawnna, tahna leh nuihnaa a chan chang a awm a. He hringnun khawvel hian zirlai bung hrang hrang min kaipui a, thiam zawh vek hun a lo la thleng rih si lo.

Read more...