Monday, October 5, 2009

Mimi! Why?

Sawisel a hlawh a, an sawisel luai luai a, Lengzem sak vangin an chuk ta luai luai mai.


Mimi Renthlei chuan Michael M Sailo leh SP te inneih a, a love song sak sawisel nasa tak chuan hrehawm taka a siam thu Zozam Weekly a hrilh.

Mimi chuan, “Khatiang kha ka beisei lo a ni” a ti a, “Ka beisei lo tak et a, a nuam lo lutuk” a ti.

Love Song sak chungchangah, “Biak In-ah ka sa lova, Hall-ah a nia ka sak zawk chu. Hun dangah pawh (Milar tak te inneihna) Hall-ah love song te chu ka sa tawh tho, midang pawhin an sa thin” a ti a.

“Chutiang turah chuan ka lo ngai mai a, tum danga kan sak ang bawk ni mai turah ka ngai a, min sawiselta daih a ni” a ti.

Mimi hian Michael leh SP te inneihnaah hian a hla lar tak, ‘Ka thlang tawh che Ainawn’ tih hla a sa a ni.

Michael leh SP te inneiha zaite khan sawisel an hlawh pherh hrep hlawm a. Love song sa an awm nual a, mahse, Mizo tawnga love song sa khan sawisel a hlawh bikta a ni.

Inneihnaah khan Mimi chauh ni lo zaithiam dangte pawhin love song an sa tho. Mahse, an love song sak kha English a nih bik vanga sawisel hlawh lo anni nge chu a hriat loh.

A thenin ‘Let It Be Me’ te an sa, a thenin Bryan Adam hla mawi tak tak te pawh an sa. Mahse, Mimi Renthlei hla sak ‘Ainawn’ khan sawisel a hlawh bikta hle a, sawi hat a nih phata a ni.

Mimi chuan, “Hun dangah pawh keimah chauh a ni lo, inneihnaah love song te chu sak a ni fo a lawm. Hetia min sawisel vak hi ka ring lo hrim hrim a, a nuam lo lutuk” a ti.

“Inneihna danga kan sak thinte khan min lo phalsak lo emaw chu nise ka hretham lutuk ang. Inneih inkhawm pawh a ni tawh lo, thiam lo chu ka inti lutuk a, mahse, min hrilh hria se chuan ka sa miah lo mai tur. Insawisel leh inchuk nuai nuai ai chuan sak loh ka thlang fe zawk” a ti.

“A thu hrimah keimah chauh a sa ka ni bik lova, midang pawhin an sa ve tho a” a ti bawk.

He zaithiam hian BA journalism a zo tawh. Tunah hian MA journalism and Mass Communication zir turin a inbuatsaih leh mek a, journalism chu nuam a ti hle.

Tunah chuan All India Radio-ah Radio Jockey a ni mek a, a hna nuam a tiin aw puam talha han tawng vel chu nuam pawh a ti.

He nula hian album siam leh pawh a rilruk thu Zozam Weekly a hrilh a, “Album siam leh ngei chu ka tum a lawm, a hun ka sawi thei lo. Ka buai ve em mai a, hman deuhte hi a ngai ve a” a ti.

Tichung chuan zai tura sawmna a dawng nasa hle reng a, “Chhuahna tur hi ka nei ve deuh reng a, khawi hmun hmunah emaw zai tura sawmna hi ka dawng a, chu chuan ka hun pawh a tichep zual a ni” a ti.

He nula nui mawi tak hi a nihna ang a lang chi na ni. A inti eng emaw ve lova, fel tak leh smart takin lady takin a awm mai thin.

Vacancy a awm loh thu pawh tlang takin a sawi mai a, “Vacancy a awm lo” nui sang chungin a ti a, “Mihring kan nia hmalam hun kan hre lova, tun dinhmunah erawh chuan nula hlim tak ka ni” a ti.

Related Posts :



6 comments:

  1. LO sawi ve mai mai.Comment a awm lo em a, in ti tha thei sia. In thuchhuah a ngaihnawm thin khawp mai.

    Hall-a zai chungchang kha chu a engapawh lo ni ta sela..a Hall neituten an lo duh lo a nih chuan an sawisel chu a thiang a. An demawm lem lo ka ti.Love Song kan ngaihdan erawh hi chu thlak chho hret hret thei ila a duhawm khawp mai. Love Song sa duh mizo zingah an awm lo mai ang tih te pawh a hlauhawm a lawm. Piang thar inti naranin suala an han ngai tlat mai te hi..an piangthar fuh lo ni maiah ka ngai. Love Song hi sual a nih ngai chuan, Hla Thlankhawm Te pawh hi kan Bible-ah hian a awm hauh lovang.

    In thu report-ah hian "pherh hrep" tih in hmang a..a tawngkam hi a mawi lo khawp mai..Journalist in ni a, tawngkam mawi zawk deuh, thu uar nan pawh hman a thain ka hria..in ngaihdan ??

    ReplyDelete
  2. Kohhran Hall-ah kher hian inneih lawmna hmang kher tawh lo ila a ni mai; Pathian thu vût lo deuha kan inlawmpui dawn a nih chuan Vantlang Hall dang hman mai chi.

    ReplyDelete
  3. Mizote hian Pathian hla duh mite leh leh Love song duh mite hi engatinge kan inhnial deuh ti tih ziah le. Ka ngaihdanah chuan Pathian Biakin leh a hung chhung hi chu zah tur a ni. Isua kan bulah a awmve laia kan tih ngam tur ang chi hi i ngaihtuah zawk ang u. Inhnial a ngailo, hla thlankhawm sawi a ngai hran lo... Engtinnge Isuan a ngaih? tih hi a pawimawh. Bible hi kan thil tih dik leh diklo kan tehna tur chu a ni mai.

    ReplyDelete
  4. He thuah hi chuan Mimi hi a thiam lohna a awm hran lo. A va zaina kohhran hian Hall-ah lengzem hla sak an phal loh thu an hrilh lawk chu ni se, a thiamlo kan ti thei ang.

    Khawchhak Zofate hi chuan kohhran Hall & Chapel-ah pawh lengzem & lenglawng hla te an sa thin a, concert pawh a tlangpuiin kohhran hall & chapel a neih a ni thin a, thil mak vak a ni lo.

    Zoram pawn a awm, Vai ram, ram dang a awm Mizo tam tak pawn Kohhran hall & chapel-ah fucntion hrang hrang neiin love song te pawh an sa a, insawisel a awm hran love, Mizoram chhungah heti takah an sawisel hi chu a bulpui ber chu inkharkhip lutuk vang leh mi nun phung hriat loh lutuk vang & rirul a zau tawk loh vang niberin a lang.

    Kohhran hall & chapel a love song sak an phal lo a ni chuan dan te pawh siam se, fucntion nei tur te pawh an phal loh thu hriat thin ni se a tha ang chu.

    ReplyDelete