Mizo Footballer Tan FPAI Award-ah Hmun A Awm Lo Em Ni?

¢ Hmingsanga

FPAI (Football player association of India) chuan a vawi khatna atan Taj Bengal Hotel, Kolkata-ah Indian football-a hmingtha leh chethate hnenah chawimawina chi hrang hrang an sem a. Heng chawimawina an semchhuahte hi sawi leh sel a hlawh nghal hle. Sawiseltu tam takte sawiselna hi awm tak tak vek a ni. A bikin Mizote tan phei chuan he chawimawina sem hi lung tichhetu a ni pawh ti ila a dik awm e.

Mizo tlangval Robert Lalthlamuana chu Best Indian player leh Best Young Player chawimawina dawng thei turin a hming chhawpchhuah a ni ve a, result puan dawn hnaihah player hming pathum chhawpchhuah leh a ni a, Robert Lalthlamuana hming a lang zui ta lo. Hetia kan lo ral khat thlir ve dan atang leh Indian football tuipuitu India ram hmun danga media mi leh sate pawh be kualin, ngaihdan a siam zui theih. Best Indian player-ah hi chuan chawimawina hi dawng phak lo pawh ni se, amah a la junior deuh vangin a awm deuh pawhin a hriat theih a, Best Young Player-ah tal hi chuan chawimawina hi a lak ngei beisei a nih laiin Baljit Singh Sahni, JCT-a khel lai thlan a ni. Best Young player atana thlan hi season hmasa leh tun season-a a khelh dan leh a perfomance atanga thlir chuan a awm lo hle a ni.

Best Young player atana thlan tak JCT player Baljit Sahni hian nikum khan I-League-ah chuan goal 4 a thun ve ngei mai a, a goal thun zat hi chu engpawhnise, bike accident vangin hun rei tak chhung a inkhel thei lo a, chuti chung chuan Churchilll Brothers-a season tluana khel tha tluanchhuak zak, I-League, IFA Shield leh Goan Professional League khel tha em em Robert Lathlamuana te aia thlan awm a nihna hi hriatthiam a har hle.

Robert a hi an thlang lo a nih rau rau pawhin Subhash Singh, Rakesh Masih, Rowilson te pawh hi a dawng awm tak chu an la ni tho tho mai. Indian football tuipuitu, ziakmi thenkhatte pawhin Robert Lalthlamuana aia thlan awm an awm loh thu an ziak ve chuai chuai mai.

Best coach atan David Booth (Mahindra United) an thlang daih pawh hi a mak ang reng hle. David Booth hian a club enkawl Mahindra United hi tournament lian thamah champion nihpuina a nei miah lo. Sawi hnawk duh chuan sawi tur a tam hle awm e. Tun tumah hian Mizo tlangval, FPAI award dawng thei tur nei rih lo mah ila, engtikah emaw chuan heng chawimawina hi Mizo tlangval te'n an la hui vek mahna.

Related Posts :