Monday, March 29, 2010

VIP-te retheihna ram- Mizoram

Em pakhat hi ni thum velah an tah zo tlangpui a, chu chu Rs 300 te'n an zuar thin. Chutianga chhungkaw chawm chu Mizoramah hian an awm nual ang.

Mizoramah hian sorkar hna ni lo hna dang thawktute dinhmun a chhe hle a, sorkar hnathawk awm miah lohna chhungkaw dinhmun phei chu a chhe hle. Mahse, vei a hlawh lem lo a, chutiang dinhmuna dingte ngei pawh chuan an dinhmun chu hrehawm ti hle mah se thil nihphung ve tur rengah an ngai ni te pawhin a lang.

March ni 19-ah finance changtu, chief inister Lal Thanhawla'n House-ah Budget a pharh a, Mizoram economy dinhmun sawiin, State Gross Domestic Products Service sector an sang ber, service sector-in 66% zet an thawh. A awmzia chu- Mizoram mipuite pawisa thawhchhuah zawng zawng atanga za zela 66 chu service sector-a mite thawhchhuah a ni tihna a ni. Industrial sector-a mite thawhchhuah chu 19.5% a ni a, agriculture sector-a mite thawhchhuah chu 14.5% a ni.

'Economic Survey Mizoram 2009-10'-a a lan dan chuan Mizorama hnathawktu za zela 45 chu loneiha eizawng an ni. Mizoram mipui thawhchhuah za zela 14.5 chu mipui za zela 45 thawhchhuah tihna a ni a, an thawkchhuak tlem mange!

Loneih hi Mizorama eizawnna lian ber a ni a, tun hnaiah loneitu an tlem hret hret chung pawhin a tam ber chu an la ni. 2001 chhiarpui-a a lan dan chuan Mizorama hnathawktu 60.6% chu loneihna eizawng an ni a, chu chu tlahniam hret hretin, 'Economic Survey Mizoram 2009-2010' chuan 45 % an nih thu a a lang ta.

Mizorama eizawnna pui ber- agriculture-ah hian tun hnaiah Mizoram a tlahniam hrim hrim. Economic Survey Mizoram 2008-2009-a a lan dan chuan agriculture and allied sector lamah Mizoram a tlahniam a, hei hi Economic Survey chuan Mautam vang niin a sawi.

2006-2007 chhunga buh tharchhuah chu 420,901 MT a ni a, 2007-2008-ah chuan hei hi 15,688 MT-ah a tlahniam. 2005-2006-ah phei kha chuan 1,07,740 MT lai Mizoram hian a tharchhuak nia tarlan a ni.

Tun hnaia tihchhuah, Economic Survey Mizoram 2009-10-ah pawh loneitu an tlem leh tawh tih a lang a, Mizorama hnathawktu 45% chauh an nih thu tarlan a ni.

2001 chhiarpui chuan Mizoram puma hnathawktu zawng zawng zinga 60.6% chu agriculture-ah an inhmang niin Survey chuan a tarlang a, leilet leh thingtlang loneiha eizawng chhungkua 88819 an awm niin a tarlang bawk. Chutih laiin 2006-2007 khan agriculture and allied sector hian GSDP (Mizoram gross state domestic product)-ah 16.02% lek a thawh thung. 2007-2008 chhung phei chuan 14% chauh a thawh a ni.

Loneitu an tlem hret hret chhan hi eizawnna hna dang tha zawk a awm vang a ni lo a, eizawnna hlawk lo leh hahthlak loneih-a inham tan loh hram hram mipuiin an duh vang a ni. Dik chiah chuan, vawiina loneiha eizawngte hi tlanchhiatna tur nei ve lo an nih a rinawm. Thingtlanga mahni khuaa chhungkaw kima khawsaka lo lam hna thawh ai chuan thla 1-a Rs 1000 bawr hlawha Aizawla mi dawr nghah pawh a thlanawm zawk. Mahse, tlanchhiatna tur nei lo emaw tlanchhuah dan tur pawh hre ve lo emawte chuan lo an la nei a, Mizorama hnathawktu za zela 45 zet an la ni. Mahse, an thawhchhuah tlem sizia hi!

Service sector-a mite hi Mizoramah chuan sorkar hnathawk leh bank-a thawkte an ni ber ang. Chu'ng mite chuan Mizoram mipui pawisa lakluh zawng zawnga 66% zet an chang a, mi tlemtein sum an lalut hnem hle tihna a ni.

A awmzia ni ta chu- mi tlemtein tam deuh an chang a, mi tam takin tlemte an chang ve tihna a ni.

"Kan population-ah kuthnathawktute an tam ber a, kuthnathawktute'n hma an sawn loh chuan kan ramin hma a sawn dawn lo. Ram hmasawnna kan duh a nih chuan kuthnathawktute dinhmun chawisan kan tum tur a ni," Dr James LT Thanga chuan a ti.

Dr James LT Thanga hi economist a ni a, 'A Study of Social Consumption Behaviour in Mizoram' tih thupui hmangin research a lo ti tawh a ni.

Thingtlangmi, loneih leh kuthnathawha eizawngte dinhmun a lo zirchian tawhnaah thingtlang mite 'standard of living' chu sorkar hnathawkte 'standard of living' aiin a let nga vel laiin a hniam tih a hmu a ni.

"Loneitute leh kuthnathawktute, miretheite tan pawh scheme te, project te kan nei ve thin a, mahse, sum za zela 60 chu a thlenna tur a thlen hmain sorkar hnathawkteah a kalral," tiin Dr James LT Thanga chuan a sawi.

"Sorkar hnathawkte chauh an ni lo a, politician, ram hruaitute'n an tidik lo, chung lam atangin ruahmanna an siam a, a grassroot an hre si lo. Eng ruahmanna pawh siam se politician-te hian 'planning for the people' an hria a, 'planning with the people' erawh an hre lo. Planning hi mipuite nena kal tur, a kalpuinaah pawh mipuite an tel ve tur a ni a, a target group - mipuite an tel ve chuan hlemhletna pawh a veng dawn a ni," a ti bawk.

"Kan economy drive-tu hi government expenditure a ni a, kan budget zawng zawng deuhthaw hi sorkar hnathawk hlawh leh an inenkawlna atan a kal a, thingtlangah pawh khawpuiah pawh sorkar hnathawkin sum an lalut tam. SOrkar hnathawk chu mi tlemte an ni a, a tam zawk- sorkar hnathawk ve lote chu an rethei a, chuti a nih chuan Mizoramah mipui an bet hle tihna a ni," a ti.

"Mi tam zawk fe- kuthnathawktute thawhchhuah chu Mizoram mipui sum thawhchhuahah pawh a tlem hle a, chu a hrisel lo khawp mai," tia sawiin, "Economic growth-ah chuan mi zawng zawng an leng tur a ni a, chutah chuan kan hlawhchham chiang hle a ni. Mi tlemte chauhvin hma an sawn a, mi tam zawk erawh an bet reng tihna a ni," tiin Zozam Weekly a hrilh.

"Mizoram dinhmun chu- sorkar a lian deuh deuh a, sorkar hnathawk an thang a, rethei an rethei deuh deuh," tiin Mizoram dinhmun a sawi.

"India sorkar target chu loneitute leh kuthnathawktute an ni a, rural development a ngai pawimawh bawk. Chumi atan chuan ruahmanna- scheme leh project engemaw zat a nei a, mahse, chu'ng mirethei leh thingtlangmite khaihchhuahna tura ruahmanna chu Mizoramah chuan kan hlawhchhampui zel si," a ti.

"Report-ah chuan hlawhtling tiin an lo ziak pawh a ni thei a, mahse, Mizoram gross state domestic product-ah loneitute leh kuthnathawktute thawhchhuah a tlem hian a hlawhchhamzia a lo lang ta a ni," tiin a sawi zawm a ni.

He'ng ruahmannate a hlawhchham thin chhan sawiin, "Ruahmanna chu an han kalpui a, a senso a tam nghal em em a. Chutah corruption a lo awm bawk a, chutiang a kaltlang hnu-ah chuan miretheite hnen a thleng chauh thin. A ruahmanna bawhzuitute senso sang lutuk leh corruption hi a hlawhchhamna chhan bul a ni," a ti.

Mirethei khaichhuahna scheme leh project, Mizorama thawh ve te hi ngun taka en chuan a mirethei-a te aiin a thawktute'n an hlawkpui zawk thin mai thei. A thawktute kha a JCB nei-a te an ni a, a nih loh leh a bungraw supply thei-a te an lo ni a, mahni hminga tih a theih loh avangin an chhungte hmingin an thawk mai thin niin a lang.

"Mizorama miretheite dinhmun hi a tha lo a, hetiang zela kan kal chuan kan society hi kan la inthliar ang," James-a chuan a ti.

Social worker Angela Ch Ralte pawhin Mizorama miretheite an khawngaihthlak tih sawiin, "Loneitute zingah pawh mahni eikhawp tharchhuak chu tlemte chauh an ni. Loneih hi a hlawk lo a, tin, security a awm lo bawk a," tiin Zozam Weekly a hrilh.

"Dawr nghaka inhlawhte dinhmun te hi a tha lo. Dawr neitute'n hnathawktu hlawh zat tura sorkar dan siam an zawm lo a, tin, hunawlah hlawh nei lovin thil dangah an chhawr bawk a," a ti.

"Thingtlang chu sawi loh, Aizawlah pawh in chhe tak tak a awm a, in te tak te-a tawt taka mu tlar put thinte an awm a, hriat an hlawh lo a ni ang," a ti bawk.

"Development hi mi zawng zawng tak a ni a, mi zawng zawng a huam loh chuan a tha lo. Mi tlemte chauhvin development an chhawr tur a ni lo," tiin Centre for Peace and Development hotunu Angela chuan a sawi.

Dr James LT Thanga chuan Mizoram budget atangin miretheite khaichhuahna tur emaw mi zawng zawngin hma an sawn theihna tur emaw, chutiang zawnga thawhna tur hmuh tur a awm ngai lo niin a sawi.

"Kan budget hi chu sorkar hnathawkte leh midang tlemte ta tur a ni mai a, a bak- Mizorama hmalakna hi chu India sorkar ruahmanna- central scheme leh project te hi a ni leh mai. Mizoram miretheite khaichhuahna tur hawia budget siam a awm lo khawp mai," a ti.

"Central-in pawisa min rawn pek belh chuan pawisa a pung kan ti leh ringawt a, pawisa kha pung eng ang mah se a kalhmangah a danglam ngai chuang lo a," a ti bawk.

Loneitute leh kuthnathawktute hian ngaihsak an hlawh lo a, ni tinin eichawp dapin a rem dan danin an thawk ve mawp mawp a ni ber. Chu'ng mite ngaihsaka enkawl turin labour welfare-in ngaihsak a hlawh si lo.

Mizoramah hian labour & employment deptt. a awm a, hna zawng laite inziahluhna tih chu he department-in hriat a hlawhna a ni. Mahse, an hnena inziahluh pawh hian awmzia a nei hlei lo!

He deptt. hnuaiah hian wing pathum - labour welfare, craftman training (ITI te hi) leh employment service (employment exchange tia hriat lar) te a awm. Khawi wing mah hi an indaih lo; indaih se chu unemployment problem hi a ziaawm ang a, labour welfare (kuthnathawktute hamthatna) pawh Mizoramah a awm ve ang. Lungrem chimin a thawktute a delhhlum lo mai thei a, a delhhlum palh a nih pawhin zangnadawmna te an dawng ve thin ang.

Labour welfare buaipui turin labour inspector an awm ang a, hnathawktute dinhmun an thlithlai thin tur a ni. Sorkarin lung a rem pawhin chu hmunah chuan hnathawktute an him em tih an enfiah ang a, an him loh chuan an chhan thin ang. Mi dawr nghaka inhlawhte, construction work lama inhlawh te, private hnuaia hnathawkte dinhmunte an thlithlai reng ang a, hnathawktute him leh him loh te, an hlim leh hlim loh te leh an pu te'n an tihduhdah leh tihduhdah loh te an enfiah thin ang. Mahse, Mizoramah chutiang ti tur an awm si lo!

2007 kum chawhma lamah khan L&E deptt.-ah hian labour officer pakhat chu lak a ni ve a, chu bak chu labour welfare buaipuitu tur an awm lo. Mizoramah kuthnathawktu mi engemaw zat an awm a, chu'ng mite chu labour officer pakhatin a vil a nih chu! Kuthnathawktute hian hrethiam se chu na an ti ngawt ang. Mahse, kuthnathawktute chu thil awmze hre lo tak tak te an ni a, a namnul duhtu tan chuan namnul theih tak an ni.

Kuthnathawktute thlavang hauhtu tur dan a awm neuh neuh a, lekkawh erawh a ni lo. "Tuin nge enforce ang? Dan a awm a, mihring an awm si lo a nih hi," tiin L&E deptt. officer pakhat chuan a ti.

Mizoramah hian "VIP"-te an rethei a ni e.

Read more...

BUDGET CHHUIZAUNA

¢ Lalthlamuana Ralte

March ni 19 khan chief minister, finance changtu chuan pawisa kum thar atana Mizoram budget a pharh a. Budget hian mi zawng zawng a huap a, ram hnuk khawih thil tak tak a nih avangin ngaihven nachang hriat a tha khawp mai. Budget leh a behbawma mimal ngaihmawh zawng tlem han tarlang ila

Public Sector Enterprises
public sector enterprise (PSE) te hi mipui mamawh phuhrukna atana sorkar din leh enkawl an ni. Mizorama public sector enterprise kan neih - ZIDCO, MIFCO, ZOHANCO, MAMCO, ZENICS, etc., te hi mipuiin kan tangkaipui tak tak em tih ngaihtuah chian a hun ta khawp mai. Chutih ruala ngaihtuah tel tur pawimawh tak mai chu heng PSE-te hian kum tin sum tam tak an hloh reng thin a, an vai deuhthaw hian hlep la nei miah lo an ni bawk.

Sumthuninu ni ringawt, mipui tana tangkaina nei tak tak lo kawl reng ai chuan huaisen taka hralh (sell off/privatise) emaw tihtawp mai emaw pawh a hun tawh viau a ni. Sorkar laipui pawh khuan 1991 atang khan PSE kalphung a siamtha a, sumdawng (private enterprise) kutah engemaw zat a hralh tawh a ni.

Sumdawng kuta hlan vek a harsa a nih pawhin sorkar laipui tih dana state sorkarin a neitu nihna engemaw chen la hauh thova sumdawngte enkawltir (disinvestment) ang zawng pawha hmalak chi a ni maithei.

Budget-ah hian PSE te'n an tum an tihhlawhtlin loh thu leh sum tam tak an hloh reng vanga sorkar tan pawha buaipuiawm an nih thu tarlan a ni. Chuvang chuan inchhunfin emaw hralh mai emaw hial ngaihtuah a nih tur thu tarlan a ni.

Thil man to chungchang
Thil man to zel (inflation) hian India ram a tibuai mek a, mipuiin an tawrh nasat tawh avangin thuneitute leh mithiamte'n hma an la mek a ni. Mizoramah pawh a kum telin thil man a sang tial tial a, mipuiin harsatna an tawk mek a, a rethei apiangin an tuar nasa a, hetiang zel a nih chuan rethei leh hausa kar hi a zau zel dawn tih a chiang reng mai.

Nikum hmasa kum tawp lama MLA inthlan zawha Congress siam sorkar a lo din tirh khan mi retheite vangin hruaitute hnuk a ulh a, an mittui a tla a, an tap hial a nih kha. Sorkar thar khan a tir te atangin thil man sang hi a buaipui nghal tura ngaih a ni a, miretheite tana hmalakna hmasa ber tur ni pawhin a lang.

Mahse, budget speech-ah hian thil man sang chungchang sawilan (address) a ni lo a, thunun tura hmalak an tum thu a lang hek lo. Retheite tawrhna thlentir mektu 'inflation' tihreh emaw tihnep emaw hi kan sorkar hian mutmawh hnar mawhah a nei tak tak lo niin a lang. Hemi chungchangah hian rorel lai mai bakah eptu lamte pawh hian thawm an nei ngai lo hi a pawi hle a ni.

Eizawnna hna siam
Tunlai huna Mizo thalaite mamawh ber pakhat chu eizawnna/hna siamsak hi a ni. Kum tin lehkha zir chhuak an pung a, eizawnna mumal nei lo thalai rualte dinhmun hi chhut thiampuia an tana ngaihtuahna seng chunga hmalak a hun tawh viau lai hian budget tharah hian chutiang beisei tur erawh a la awm ta chuang lo. A pawi khawp mai.

Graduate val, eng hnaah mah duai bik lo tur, lehkha thiam tak takte lo nei tura infuih ngawt mai te, mi hnuaia kut hnathawka inhlawhfa thin tura innawr ngawt mai te hi an dinhmun ngaihtuah chian loh vang a ni ngei ang. Kan hruaitu lu berin thalaite thatchhia leh hnathawk peih lo anga a chhuah thinte phei hi chu na an ti viau ngei ang.

Hna vang (employment problem) hi sorkar laipui pawhin a buaipui tawh a ni a, hemi atan hian ruahmanna hrang hrang pawh a siam thin. Chutiang rilru chu kan hruaitute hian an put a hun ve ta khawp mai.

Hmasawnna tluantling thlen tura pawimawh tak mai chu mi tinin an phu tawk eizawnna hna an neih hi a ni. Chutiang zawnga hmalak nachang ka hruaitute hian an hriat hunah 'thalaite khawvel thar' an tih fo hi kan thleng dawn niin a lang.

Chutihlaiin, lehkhathiam zawng zawng tan sorkar hna siamsak theih a ni ngawt lo a, heng eizawnna peng hrang hrang - loneih lam te, thilsiam chhuahna lam te, sumdawnna lam te leh a dangte hi hnemhnanpui tlaka siam thuai a ngai.

Ram hmasawnna kan tih fo pawh hi thalai thluak tha leh chak zawkte hmanga thlentir tur ni awm tak a ni. Ram pawna hna zawnga teichhuak tura kan infuih fo thinte hi ngaihtuah chian a ngai khawp mai. Ram hruaitu tha chuan ram mipuite tan ram chhunga ei tur a buatsaihsak tur a ni dawn lo'm ni?

Hetih ruala ngaihtuah chian ngai tak mai chu thalaite hma ngai tak anga kan lan lai hian an mamawh tak tak hi kan ngaihtuahpui ngai em, tih hi a ni. Khelmual tha leh infiamna hmunhma tha tak tak hi Mizo thalaite mamawh ber a ni em? Eizawnna mumal nei lo siamchhuahna mai a ni lo'ng maw? Politics hmanrua atan kan hruaitute hian an hmang laklawh mai mai a ni zawk em? Ngaihtuah zui tham a ni.

Fiscal policy leh leiba
Sum hmuh zawng zawng aia hmanral zawng zawng a tam thin avang hian sum indaih lohna a lo awm thin a, chu harsatna tihreh chu fiscal policy-in a tum ber chu a ni.

Sorkarin budget pawisa a hman danah hian ruahman ang lova thil kal a tam duh viau mai a, chu chuan sorkar zia thui tak a tarlang thin a ni. Budget tharah pawh hian buhfai leina atana sum tam tak hman a nih vanga chutiang harsatna (fiscal shock) a awm thu tarlan a ni.

Sorkar laipui pawhin sum indaih lohna pung zel hi a ngaimawh thin a, ruahmanna a siam a, a venna dan siam turin a tuk bakah state sorkar pawh a hrek thin a ni. Chuti chung chuan he harsatna hi a kiam tak tak thei thin lo. A pawimawh ber chu, a hma lama kan sawi tawh angin, hruaitute'n huaisen leh tumruh taka hma an lak hi a ni.

Kum thar budget-ah hian a lawmawm zawnga ngaih mai theih turin revenue account-ah sum hman bang cheng vbc 341.63 a awm dawn a, chu chu revenue surplus a tam ber tum a ni thei dawnin a lang bawk. Chuti a nih chuan a pum puia sum indaih lohna (gross fiscal deficit) pawh cheng vbc 41.48 a ni thei dawn nia chhut a ni.

Chutihlaiin, leiba tlingkhawm erawh kum hmasa lam aiin a pung a, cheng vbc 3346.83 lai a tling. Chu chu kum hmasaa state sum hmuh zawng zawng atanga chhuta 78.44% lai a tling. Leiba tlingkhawm tlakhniam tir hi tihmakmawh a nih laia a pung zel a nih chuan harsatna nasa zawk a thleng ang tih a hlauhawm hle a ni.

India economy a thang nasa a, 13th Finance Commission pawhin kum 50 chhung atan cheng vbc 8805.30 zet min dawntir dawn. Sorkar laipui atangin tanpuina leh thil dang atan sum tam tak a lo lut reng bawk. Heng pawisa lo luang lut zozaite hi dik tak leh felfai taka hman a nih chuan kan leiba hi a tlahniam ngei ngei ang a, sum indaih lohna pawh a tlem tial tial dawn a ni. Chu chu ram thuneitute tan chona a ni.

Hmasawnna
Budget hawi zawng hriatna pakhat chu hmasawnna atana hman tur leh hmasawnna hawi lem lova sum hman tur inthlauh dan atang hian a ni. Kum dang ang thoin hmasawnna hawi lova sum hman tur (non-developement expenditure) hi a tam uchuak leh khawp mai, non-plan expenditure pumpui cheng vbc 2134 atanga hmasawnna hawi lova sum hman tur zat chu cheng vbc 1104.47 (non-plan fund atanga 51.74 %) lai a ni.

Budget buatsaih lai hian annual plan peihfel a la ni lo a, ruahman chhinna chauh a la ni rih. Chuvang chuan hmasawnna atana sorkar ngaih pawimawh tur chiang faka tarlan a ni lo.

Chuti chung chuan sorkarin hmalakna tura a hmatheh ber NLUP chuan ngaih pawimawh a hlawh ber tur thu finance changtu hian a sawi lang. Kum khat chuang mipuiin NLUP hi an lo nghak tawh a, thuneitute hian engtin tak kalpui ang maw, tih hi an thlir reng a ni.

Plan sum hmanga hnathawh langsar zual tarlan World Bank puihna a kawngpui tha siam hi chai tham a tling. Sorkar hmasa hmalakna kha a ni a, zawh fel vek a hun tawh chungin an pawt fan zel a, zawh hun hin kumin December thla thlenga pawhsei an dil leh mek a ni.

IT leh thil dangte
Sorkar hmasa atanga sawikai tawh Information technology chungchang tarlan hian ngaihtuah a tithui khawp mai. Sorkar inrelbawlna leh hnathawhna atana computer leh a behbawm hman tangkai tumin e-governance hnuaia hmalakna tur tarlan a ni.

Information technology hi hman tangkai tak tak a hun tawh tih chu a vengva chin ngaihdan a nih a rinawm. Mahse, kan IT atana sum tam tak hman thin hi kan tangkaipui tak tak em?

Sang tak zuan nghal lo hian mawlmang te te-a kan tangkaipui theih dan tura hmalak a ngai khawp mai. Thingtlang loneituten an thlai thar khawpuia an hralh theih dan tur kawng kawhhmuhna atan te, sorkar hmalakna leh mipui tana pawimawh puanzarna atan te hian hmang ta ila kan sawtpui ngei ang.

Hmanraw tha pui pui nena khawpui leh khaw lian deuh an inbun thluahte hi hmang tangkai turin policy tha deuh duan ni ta se, sum tam tak a lo thlawna luangral hi a ven theih a rinawm.

Tlangkawmna
Kan state dinhmun han en hi chuan kan mamawh zawng zawng leh kan ngaih pawimawh zawng zawng funkim tur budget hi beisei rual kan ni lo tih chu a chiang. Chuti chung chuan hmasawn kan duh a, mipui nawlpui dinhmun chawisan tak tak kan duh a nih chuan kan phak tawka tha ber budget neih erawh kan mamawh tawh hle a ni.

Kum tina budget ngihventute chuan thil thar teh vak an hmu ngai meuh lo a, a hlui her danglam leh sorkar laipui ruahmanna zulzuia siamrem vel mai mai a ni thin. Finance changtute pawh hi budget buatsaih lai hian an inrawlh ve lo ni hiala ngaih theih tur a ni thin.

Chuvangin, budget tha leh rintlak, chhenfakawm leh awmze nei kan neih theihnan Planning Board mumal taka siam te, mi thiamte rawn chunga sorkar ngaihpawimawh zawng fun kim tura buatsaih te, ruahman lawk anga sum hman te hi thil pawimawh tak a ni ngei ang.

Read more...

Budget leh Mipui

Kum 1 chhunga Mizoram sum leh pai hman dan tur chu Assembly House-ah pharh a ni leh ta a, a neitu mipuite erawhin kan ngaihsak lem lo niin a lang.

Kan aiawha rorel tura kan thlante'n kan sum leh pai 'chalai' dan tur an ngaihtuah a, a neitute berin kan ngaihven lo a nih chuan thil pawi tak a ni ang. Ram changkang zawkte chu sawi loh, vai ramah pawh rickshaw-pu thlengin budget hi an ngaihven a, budget speech te hi radio hmangin an lo ngaithla ve thin. Chutih laia a ziak leh chhiar thiam state mipuite zawkin kan ngaihven lo viau mai hi a pawi khawp mai.

Engatinge mipuiin kan budget kan ngaihven loh? A chhan sawi tur a awm nual ang, thil chiang tak pakhat erawh chu budget hian mipui nawlpui nunkhua a nghawng lem lo, mipui tan han ngaihven hluah a tulna a awm hran lo. A tui leh a veite tan lo chuan lo tuipui viau tur a awm hran lo. Vai ramah chuan an ni tin eichawp man thlenga a nghawng thin avangin ngaihven loh theih loh thil a ni hial ang.

Mizorama kan budget ve hi chu kan nunkhua nen a inzawm lo ti ila thu kan uar deuh mai thei, mahse, mi tam zawk nunkhua nen hi chuan direct-in a inzawm lo tih chu a sawi ngam ang.

Hetiang deuh hi a nih a rinawm: India sorkar hnen atangin Mizoram sorkarin pawisa a dawng a, chumi hman dan tur chu roreltute'n an ziah fel a ngai ta. Plan leh Non-Plan-ah an then hlawk a, chutiang chuan kum tin an ti a, a pawisa zat a dang hlek hlek chauh a ni ber.

Sorkar hnathawk hlawh tur an thliar hrang a, chumi bak zawng chu mi tute emawin contract hna zawngin emaw, supply hna zawngin emaw, thil dangin emaw an hailut ve thung. Chutianga hman tur pawisa chu kan aiawha rorel tura kan thlante'n zahawm takin an buaipui ve kum tin a ni mai awm e.

Mahse, kum tin a ngai a rin theih ngawt loh; pawisa zat kha thlak a ngai ve reng. Krismas-ah kekawr Rs 200 man ka lei a, a kum lehah Rs 250 man ka lei a, chutiang chu a ni deuh mai awm e. Nikuma kekawr Rs 200 man leitu chuan, a kum lehah chuan thil man a lo pung a, a ngai ang chiah pawh lei dawn se Rs 250-a a lei a ngai ta thin. Chutiang deuh chuan kan budget pawh hi kum tin hian a figure a danglam hret hret e tih bak chu a ngai put mai.

Ram dangah chuan budget hi zir tham a ni a, mipui tan hriat makmawh thil a ni. 'Eng lamah nge sum kan hman hnem dawn? Chuti lamah kan hmang tlem a nih chuan chu chu a nghawng ang a, chu chu society tan a tha ang em? Heti lam hi kalsan hret hret kan tum a nih hi...chuti khati...' ti-a ngaihtuah tur a awm thin. Mithiamte tan 'analyse' tur a awm a, mipui tan lah an ni tin khawsak nghawng thei thil a nih avangin hriat a tul. Keini budget ve erawh economist leh finance expert-te tan pawh han 'analyse' tham a awm lo. Chutiang budget chuan mipuiah a chhe lam a tha lamin thil thar a thlen lo a, mipui nawlpui tan hriat chak viau thu a awm lo. Sorkar hnathawk hlawh tur leh tute 'bill' tur emaw hriat hi finance leh economics lama tui lem lo, ram kalsiam vei pha lem lo tan hriat a tul lo a, tin, ram kalsiam vei pha tan pawh hriat a chakawm loh thei hial zawk ang!

Chutiang chuan kan kal a, mipui sum (budget) ei phate chu an hausak thur thur em loh pawhin khawsak pangngaiin an khawsa thei a, a chang pha ve lote erawh an hrehawm kumtluan thung! A tawpah thutna nuama thu phate'n taima turin mipui min fuih hrep a, an tu leh fate thawh atana an duh hauh lo hna thawk tur te'n min han hrilh a! Kan khawngaih thlak teh e. Kan khawngaihthlak tih pawh hi hrilh chawp kan ngai emawni!

Chutiang chu kan ni a, he ramah hian 'VIP' an rethei telh telh mai a nih hi! Tun dinhmunah chuan 'VIP' nih loh a chakawm khawp mai!

Read more...

Mizoram Budget Bihchianna

¢ Lalremruata Renthlei

Mizoram chief minister, finance minister ni bawk Lal Thanhawla chuan 2010-2011 atana Mizoram Budget Rs 3577.91 crore leh sorkar kum kal laia Supplementary Demand Rs 642.8 crore chu March ni 19-ah House-ah a pharh.

Chief minister budget pharhah hian tax lak tharna tur sawilan a ni lo a, mahse, motor vehicle-a tax lak chungchang erawh tihsan tum a nih thu a sawi a, a rang lama tih a nih tur thu a sawi nghe nghe.

Chief minister chuan fiscal thara budget thar pharh rualin 2.62 crore closing balance a awm thu a sawi a, hei hi account hrang hranga surplus a awm vang niin a sawi.

Budget sawifiahnan chief minister chuan darkar 1: 35 a hmang a, a bikin New Land Use Policy (NLUP) chu sawilangin, sorkar flagship programme a nih thu sawiin, mipuite tana ei leh bara intodelhna tur niin a sawi.

CM chuan Sixth Pay Commission rawtna zulzuia sorkar hnathawk hlawh siamrem tum a nih thu sawiin, "Sixth pay revision vangin sum hmanna tur sang tur chu kawng tin rengah sum hmanna lama kan fimkhur a ngai dawn a, sum hmanna tam takah kan tih tlem a ngai dawn a ni," a ti.

Mizoram economy chu thang tura ngaih a nih thu sawiin, ""Economy thanna chu 7.2% ni turah ngaih a ni a, 2008-09 khan 7%-a thang angin kan ngai a ni," a ti.

Lal Thanhawla chuan service sector chuan Gross State Doemestic Product-ah hmun chungnung ber an la chan thu a tarlang a, Service sector-in 66% an thawh a, Industrial Sector chuan 19.5% thawhin, Agriculture chuan 14.5 % an thawh tih a sawi.

Chief minister chuan, "Sector pathumte rual zawka a kal theihnan sorkar chuan Industries leh Agriculture sector-ah a invest tam ang," a ti.

Lal Thanhawla chuan regular budget a present chu plan outlay 1250 crore hisap a siam a ni a, a chhan chu Planning Commission-in State Annual Plan 2010-2011 atan thutlukna a la siam loh vang a nih thu a sawi.

Finance minister chuan hlawh chungchanga sum sen tamna tur chungchang tarlangin 2010-11-ah salary expenditure sanna chu 10% vela sang chho tura chhut a nih thu a sawi.

Non-Plan hnuaia salary expenditure chu Rs 1136.89 crore leh Plan hnuaiah Rs 227.94 crore ni tura ngaih niin, a belhkhawma salary atana sum hman tur chu Rs 1364.83 crore lai a ni.

Pension chungchang pawh sawiin, 2008-09-a pension atana sum hman chu Rs 126.05 croe a nih thu leh 2009-10-ah Rs 163.11 lai niin, 2010-11-ah phei chuan Sixth Pay revision avangin Rs 205.40 crore a kai lawih tur thu a sawi. Chief Minister chuan pension chungchanga kalphung fel zawk a awm theihnan New Defined Contributory Pension Scheme siam tum a nih thu a sawi bawk.

Budget Speech-ah hian chief minister chuan Bru Refugees chunchang pawh sawi langin, 2009 November ni 16 khan Bru laklet leh tumna a awm tawh thu leh, mahse, beisei ang lova thil a kal vanga chhunzawm theih a nih loh thu a sawi. Sorkar chuan tha ber tura a ngaih angin hma a la ang, a ti.

Annual Plan 2010-2011
Tuna kan Annual plan size chu Rs 1250 crore a ni a, Planning Commission lamin 250 crore min dahbelhsak hnuah a vaiin 1250 crore a ni ta a, mahse, 250 crore erawh hi chu Assembly Session koh leh huna pass phawt hnua hman theih chauh tur a ni.

(i) Agriculture & Allied Activities - Rs. 59.46 crore, (ii) Rural Development - Rs. 48 crore, (iii) Special Areas Programme - Rs. 71.25 crore, (iv) Irrigation and Flood Control - Rs. 58.21 crore, (v) Energy - Rs. 69.11 crore, (vi) Industries and Minerals - Rs. 17,75 crore, (vii) Transport - Rs. 91.72 crore, (viii) Communications - Rs. 5.40 crore, (ix) Science, Technology & Environment - Rs. 2.04 crore, (x) General Economic Services - Rs. 162.68 crore, (xi) Social Services - Rs. 442.37 crore and (xii) General Services - Rs. 222.01 crore.

Chief Minister hlui ngaihdan?
Chief minister hlui, chief minister a nih laia finance chang thin, Zoramthanga chuan Mizoram budget chu thil pangngai reng ang a nih thu sawiin, “Nikum ang kha a ni rih mai a,” tiin Zozam Weekly a hrilh.

A ngaih pawimawh thil sawiin, “Kan kal dan system a dik lo a ni,” a ti a, “Vote on account-in budget kha ‘pass’ mai engvangin nge a nih loh le? Plan sixe hriat loh rau rau chunga budget pum pui pharh tum tlat kha ka hrethiam thei lo, a dik lo,” a ti.

Chief inister hlui chuan, “Vote on account-a an tih mai loh chhan hi session neih leh an peih loh vang mai niin ka hria. Thil rem lo leh fuh lo chung chungin normal budget angin an pass a, finance minister tan chuan thil zahthlak a ni,” a ti.

“Zirtawpni-ah budget pharh a ni a, a tuk Inrinni-ah finance changtu, chief minister ber Delhi-ah plan size chungchang meeting nei turin a kal daih bawk a, khatiang kha thil thiang lo a ni, budget sawihona neih laia CM- finance changtu a awm lo kha thil thiang lo a ni. A tel lova General Discussion neih kha a rem lo hrim hrim,” a ti bawk.

“India ram hi a zau a, state hrang hrang leh UT nen kan plan size siam vek nan hian thla hnih chhung vel tal hun a ngai thin. Plan size discussion pawh sawnsak an dil thei alawm, kei ngei pawh finance minister ka nih lai pawhin kan plan size sawi hun tum tam tak kan sawn tir alawm. ‘Min sawn sak mai rawh u’ kan ti a, min sawnsak mai thin,” a ti.

“Tunah pawh sawn dil mai se a tha tur a nia. Budget an pharh te te-a Delhi-ah finance minister ber a kal daih a,” tia sawiin, “Kei chuan session pumpelh duh hrim hrim vang emaw peih loh vangah emaw ka ngai,” a ti.

Chief minister hlui chuan, “Kan fate pasal nei tur ni ta se, a manah Rs 400 emaw 500 kan chhiar ang tih laia a manpui tifel hmasa lova a man tang tifel phawt ang kan ni,” a ti. “Tih dan phungah chuan manpui siam fel a nih hnuah man tang chu siam fel leh chauh tur a ni ngai.Plan kan neih zat hre lovin an rin sem mai mai a ni,” a ti bawk.

“Tunah pawh kan plan size chu 250 crore-in a puang a. House-a pass a nih hma chuan hman theih a ni lo bur a. Supplementary Demand siam leh a ngai ang a, plan size hre lova department tina pawisa lo sem ngawt kha a felhlel hrim hrim,” a ti.

Plan sum punna 250 crore hmanna tur chu an pass mai a rin loh thu sawiin, “Ka rin dan mai mai chuan October thla velah session an ko ang a, chutah chuan an pass chauh ang. Chutih hunah chuan fourth quarter kan luh a hnai tawh ang a, pawisa hman mamawhna tam takah kan hmang hman dawn lo a ni” a ti.

Vote on account a budget n passed loh chhan chu, “Pakhatanaah an ngam lo, pahnihnaah an hriatloh hrim hrim vang leh an peihloh hrim hrim vang a niang” tia sawiin, “Khimi pathum zinga a khawi emaw ber vag khi chu a ni ang” a ti zui.

Economic Survey a thil pawimawh zual te
n Kum 2010 chhungin Mizoram population chuan 11,26,067 a thlen rin a ni a, chenna in awm zat pawh 249092 a nih rin a ni.

n Kum 2009-10 inkar chhunga Economy thanna chu 7% a nih rin a ni a, kum 2009-10-ah chuan 7.2%-ah a kai chhoh rin a ni.

n Kum 2009-10-a Mizoram per capita income chu Rs 32,634 ni tura beisei a ni a, India ram pum per capita erawh Rs 43,749 ni tura ngaih a ni.

nMizoram Economy innghahna chu tertiary/service sector a la ni reng. Service sector hian 67% lai thawhin Industrial sector chuan 19% vel thawh vein Agriculture leh Allied sector te chuan 14% chauh GSDP-ah an thawh ve a ni.

n Kum 2001 -a Economic Classification of wrokers neihah khan 60.6% lai te chu Agriculture eizawnna atana hmang an ni a, kum tina loneih chu an eizawn dan ber a ni. Kum 2000-01 a Agricultural Census-ah loneihna atan 93,298 hectares hman a nih laiin kum 2005-06-ah chuan 1,16,645 hectares laia zau hman a ni tawh. Kum 2009-09-a loneihna atana hman hmun zau zawng chu 1,26,716 hectares a ni a, heta 32% lai hi Jhum cultivation atana hman nia chhut a ni.

n Horticulture crops chinna atan 1.099 lakhs ha hman a ni a, Mizoram-ah hian Horticulture thlai chin theihna 6.30 lakhs ha awm nia ngaih a ni a, tuna hman tangkai chin hi chu 17% chauh a ni. Sapthei, balhla, setthlum, balhla, lakhuihtheih leh grape te chu Mizorama chin deuh ber a ni a, vegetable, state pawna thawnchhuah tam ber erawh iskut a ni. Mahse, Mizoram sorkar chuan horticulture thlai zingah Anthurium leh Nauban hi-tech greenhouse hmanga thar chu duhsakna a pe san ber thung a. Kum 2008-09 chhung khan Anthurium hi 75 lakhs vel thawn chhuah nia sawi a ni.

n Sangha dehchhuah lamah kan la intodelh lo hle bawk a. Mizoram in Sangha a thar chhuah chu 3750 MT nia chhut a ni a, chu chu intodelh theihna atana mamawh 11kg per capita a nih laiin 3.70kg per capita chauh thar chhuah a ni a, mamawh belh zat ang chu 7.30kg per capita ni. Mizoram in intodelh khawpa a mamawh zat chu 13,000 MT a ni a, kum 2014-15 a intodelh hman tura beisei a ni a. Mahse, chumi atan chuan sangha dil 4700 ha tal siam belh mamawh a ni dawn a a. Mizoram-ah hian sangha khawi theihna 24000 ha awmah 12% chiah la hman tangkai nia chhut a ni bawk.

n Kum 2007-a livestock census neihah 3.17 lakhs awma chhut a ni a, kum 2003 aiin 14%-in a pung a ni. Vawk vulh an thahnem ber a, 2.67 lakhs vel awm chhut niin, 73.35% an hauh pha a, Bawng vulhtu erawh 0.35 lakhs vel nia chhut an ni. Mizorama bawnghnute per capita zawnga chhut chu 52gms a ni a, Indian Council of Medical Research recommendation-ah chuan mihringin ni tin 240gms bawnghnute a mamawh tih a ni.

n Kum 2008-09 a artui dehchhuah zat chu 411 lakhs nia chhut a ni a, chu’ng zinga 236 lakhsa chu Desi a ni a, 175 lakhs erawh improved variety hmang a ni. Nikum aiin kuminah artui dehchhuah hi 2.24%-a pung tura ngaih a ni. Kum 2008-09 chhunga artui ei zat chu 46 nia chhut theih a nih laiin nutritional expert te chuan mihringin kum khat chhungin artui 180 lai ei a mamawh niin an chhut.

n Kum 2008-09- a bawng, lawi, sial, kel leh vawk sa dehchhuah zat chu 12,480 tonnes nia chhut a ni a, heng zinga 7894.16 tonnes chu vawksa niin, 2201.92 chu bawngsa nia chhut a ni. Arsa pawh 2236 tonnes tharchhuah nia chhut a ni bawk.

n State Forest Report 2009-a a lan dan chuan forest-in a huam chin chu 19,240 sq.km niin an chhut a, chu chu state geogrophical area atanga chhutin 91.27% laia zau a ni. Mizoram hian ngaw tia sawi theih 134 sq.km a la nei a, ngaw ve tho 6251 sq.km leh ngaw lo 12,855 sq km a nei bawk. Mizoram in forest area 16,717 a nei a, chung zinga 47.31% chu reserv forest a ni. Forest venhim 21.34% a awm a, unclassified forest 31.35% a awm bawk.

n Mizoram-in power project hrang hrang a neih atanga kawlphetha a dehchhuah theih zat chu 40.77 MW a ni a, Gross Generation chu 10.93 MU a ni. Peak hour-a (power mamawh san lai ber) kawlphetha mamawh zat chu 90MW a ni. Mizoram hian Central power project 8 atangin share 70.56 MW a nei. Tun dinhmunah chuanMizoram-in kawlphetha a mamawh zawng zawng atanga 3% chauh hi Mizoram dehchhuah a a awm ve a, a dang 97% hi central sector projects atanga kan lakkhawm a ni ber.

n Kum 2008-09 kum tawp lam thlenga PWD hnuaia kawngpui kan neih chu 5783.31 Kms a ni a. National Highway, Border Roads Organization-in an enkawl thui zawng chu 558.00 Kms a ni a, PWD-in 328.00 Kms a enkawl ve bawk a, Mizoram-ah bridges 107 a awm a. PMGSY road construction hnuaiah khua 81 tlawh pawh tawh a ni a, khaw 83 chu tlawh pawh mai theih tura ngaih a ni bawk a. PMGSY hnuaia kawngpui sial thui zawng hi 1,186 Km a ni.

n Kum 2008-09 chhunga Mizoram a motor awm zat chu, sorkar leh private tiam vekin 69,130 a ni. Motor hi a pung thr thur a ni hawt a, motor punna hi kum kal ta nena khaikhinin 10.99% lai a ni a, kum khat chunga Motor nei thar 7596 lai an awm. MST Bus service lai 53 a awm bawk.

n BSNL, Airtel, Reliance, Aircel, Tata Indicom leh Vodafone ten Mizoram-ah cellular mobile phone an provide a. January 2010 thlenga Mizorama Cellular Phone nei zat chu 561,917 lai a ni a, nikum December thla khan mobile connection nei 517,724 an awm ni.

n February 2010 thleng khan Mizoram-ah financial institution branch hrang hrang 109 lai a awm. Commercial bank 38 a awm a, Rurual Bank branches 60 leh Co-operative Bank branch 11 a awm bawk. Heng Bank tena loans and advances an pek chhuah zat chu Rs 14009.55 lai a ni.

n Mizoram pumah fair price shop 1233 a awm a, chu’ng zinga 829 chu thingtlanga awm a ni a, 404 erawh khawpuia awm a ni. December 2009 thleng khan Mioramah ration card nei mi 2,47,062 an awm.

n Water supply pek lohna thingtlang khua 154 lai Mizoram-ah a la awm a. Town-a chhiar 13 lai water supply nei lo an la awm bawk.

n Mizoram-ah school 3432 a awm. Teacher pupil ratio chu Primary (1:17), Middle School (1:8), High School (1:11), Higher Secondary School (1:13) te a ni. School 3432 a 54% lai chu sorkar enkawl school a ni. Govet. Colleges 20 a awm a, Deficit colleges 2 leh law Colleges 1 a awm bawk a, Teacher’s training College 2 a awm bawk a. Kum 2008-09 chhunga Arts, Science, Commerce leh Law college student zat chu 6454 a ni a, chung zinga 2970 chu hmeichhia anni.

n Mizoram sorkar hnuaiah Hospital 10, CHCs 12, PHCs 57 leh Sub Centers 370 a awm a. Doctor awm zat hi 2913 nia chhut a ni a, Anganwadi Centers 1,692 awm bawkin naupang inziaklut zat chu 123,931 lai a ni bawk.

n Hna nei lo Employment Exchange-a inziaklut zat chu 65846 an ni.

n Sales Tax hman a nih lai khan firm 600 an inziak lut a. VAT hman a nih hnuah erawh 3600 an ni ta thung. Kum 2008-09 chhung khan VAT hmangin 7,757.46 lakhs lakluh a ni a, 2009-10 February thleng khan Rs 7,282.62 lakhs an lalut tawh bawk.

n State chhiah lak lamah pawisa a pung. Kum 2006-07-a a pum puia a punna chu 22.76% a ni a, 2007-08-ah 14.69% niin, 2008-09-ah 22.90% a ni a, 2009-10-ah pawh 20.60% beisei a ni. TFC-in growth rate punna a beisei zat 12% aiin a sang fe zawk a ni.

n Gross Fiscal Deficit pawh Rs 102.59 crore chauh a ni tawh a, chu chu GSDP atanga chhut phei chuan 2.34% chauh a ni. 2008-09 khan GSDP atanga GFD pawh 3% chauh a ni.

n State leiba erawh a la sang hle reng a, 2008-09-a leiba tlingkhawm chu Rs 3259.82 crore a ni. GSDP atanga percentagea lakin leiba hi 2008-09-ah 85.58% lai a ni a, mahse, hei hi 78.95%-a tihhniam a nih theih beisei a ni. State-in leiba a ngah thin chhan hi hun lo la kal tur thlir chunga capital asset siamna tur atana loan lak vang a ni.

n NLCPR hnuaiah project 55lai Rs 231.14 crores senna chu zawhfel a ni tawh. NLCPR project 33 kal mek Rs 395.96 crores senna a awm.

n 11th plan period chhung khan Mizoram sorkar in schems/project 101 lai Rs 352.03 crores senna tur NEC-ah a thehlut a, Chung zinga Scheme 12, RS 4369.83 lakhs senna tur chu phalsak kan ni a. Tun dinhmunah Mizoram chuan NEC scheme 33 a kal pui mek.


n MLA Local Area Development Scheme chu 2010-11-ah pawh chhunzawm tum a ni a, heta tan hian Rs 1000 lakhs dah niin, bial tinin MLALADS atan hian 25 lakhs an nei dawn a ni.

n Thirteenth Finance Commission-in Mizoram tana kum 5 chhunga pawisa hman tur min pek chu Rs 8805.30 crore a ni a, Twelfth Finance Commsiion-ah khan Rs 4660.91 crore pek kan ni a, tihian a punna chu 88.92% a ni.

n Lunglei High Power Committe tihchangtlunna tur leh hmalakna atan 6 crore pek an ni.

n Gross State Domestic Product factor cost, constant price-a (1999-200) chhutin 2009-10-ah Rs 2,80,891 ni tura ngaih a ni. Economy thanna tur chu 7% ni tura chhut a ni bawk.

n Tertiary/Service sector-in Mizoram GDP-ah an thawhhlawk ber a, 67% lai an thawh.

n Agriculture &Allied sector-in GDP-a an thawh chu 13.78% chauh a ni. Economic Survey report-a tarlan dan chuan mautam avanga tawrhna chhunzawm zel vang nia sawi a ni.

n Industry Sector-in 19% an thawh a, nikum aia an thawh tamna/punna chu 1.58% chauh a ni.
District Domestic product-ah Aizawl district a sang filawr hle a, Serchhip District a hniam ber.
Mahse, GDDP sector contribution-ah thung chuan Serchhip District-in 37.32% lai thawhin Aizawl chuan 10.26% chauh a thawh thung. Serchhip District hi district dang zawng aiin a sang a ni.

n Industry sector-ah pawh Aizawl-in a thawh hlawk ber a, Serchhip District a hniam ber. Mahse, Mamit District chuan percentage-a lak chuan sang ber nihna a chang a, Kolasib a hniam ber a ni.

n Tertiary sector-ah pawh Aiawl District a sang filawr hle a, Serchhip District a hniam ber. Saiha District erawhin GDDP-ah he sector-ah hian a thawhhlawk ber a, Mamit District a hniam ber.

n District wise per capita income-ah Aizawl District a sang ber a, Mamit District-in pahnihna a hauh daih thung. Mahse, a lawmawm tehchiam chuang lo, Mamit District per capita san chhan hi Bru ho raltlan vanga population-a an hniam vang a ni.

Thirteenth Finance Commission
Kum 5 chhung atan Rs 8805.30 crore Thirteenth Finance Commission-in min pe a, heng sum hmanna turte hi sawilan vek a ni.
Twelfth Finance Commission khan Rs. 4660.91 min pe a, a punna hi 88.92% lai a ni.
Thirteenth Finance Commission hnuaia sum hmanna turte chu State-in Central tax laka share a neih Rs 3901.30 crore a ni a, kum 2010-11-ah Rs 548 crore, 2011-12-ah Rs 679 crore, 2012-13-ah Rs 759 crore, 2013-14 – Rs. 895 crore leh 2014-15 – ah Rs. 1055 crore te a ni.

Non-Plan Revenue Deficit Grant
Commission chuan Mizoram chu revenue deficits nei turah a ngai. Chumi khuhna atan chuan grants-in-aid Rs 3991,40 crore pek turin a ruahman.
Non-Plan Revenue Deficit Grant atan hian 2010-11 ah Rs. 715 crore, 2011-12 ah Rs. 684 crore, 2012-13 ah Rs. 908 crore, 2013-14 – Rs. 882 crore leh 2014-15 – Rs. 804 crore. te a ni.

Disaster Relief
Commission chuan State Disaster Relief Fund (SDRF) din turin a ti a, hei hei Calamity Relief Fund awmsa zulzui a ruahman tur a ni. Chubakah, commission chuan capacity building atan hrim hrim sum dahsak a nei bawk. SDRF atan hian Rs 47.50 crore min ruahmansak a, chuta Rs 5 crore chu capacity building atan bika hman tur a ni.

Elementary Education
Right of Education Act, 2009 tih hlawhtlinnan leh zirnain mi tin a thlen theihnan Elementary Education chu ngaih pawimawh a ni hle a, hemi atan hian Rs 5 crore lai dah a ni.

Improving Outcomes
Grnats thenkhat, Commission-in tih chak leh thuam that ngai nia hriat a nei :-
n improvement in Justice delivery : Dan leh hrai kenkawh chungchanga mumal zawk leh tha zawka kalpui a nih theih nan Commission chuan a pumpuiin Rs 12.96 crore min pe a. Chu thensawm leh niin : - i) Morning/Evening Courts atan Rs. 6.27 crore, Lok Adalat and Legal Aid atan Rs. 0.75 crore, Training of Judicial Officers atan Rs. 0.63 crore, Training of Public Prosecutors atan Rs. 0.38 crore, Heritage Court Buildings atan Rs. 1.13 crore, ADR Centres atan Rs. 2.72 crore leh Court Managers atan Rs. 1.09 crore. te a ni.

Incentive for issuing UID : Commission chuan mirethei zualte tana Unique Identification (UID) siam ni se a ti a. mi pakhat tan Rs 100 zel ni tura ruahman niin, hemi atan hian Rs 1.20 crore dah a ni.

District Innovation Fund : Mizorama district kan neihte tihchangtlunna tur atan Commission chuan Rs 8 crore a ruahman a, district tinin Rs 1 crore zelin an insem dawn a ni.

Improvement of Statistical Systems at State & District Level: Commission chuan data system tha tawk kan neih theihnan ruahmanna siam ni se a ti a, chumi atan chuan Rs 8 crore dah a ni.

Employee & Pension Data-base: Sorkar hnathawk leh pension te chhinchhiahna mumal leh tha zawk a awm theihnan Rs 5 crore dah a ni.

Environment related Grants : Tunlai khawvel sik leh sa inthlak mek chungchangah ecology a pawimawh em em a, chumi atan chuan environment siamthat kawnga hmalakna atan Commission chuan pawisa tam tham tak min pe. Forest atan Rs 171.20 crore leh Water Sector Management atan Rs 4 crore min pe bawk.

Maintenance of Roads & Bridges : Twelfth Finance Commission hmalakna chhunawmna chi khat a ni a, kalkawng leh lei siamna atan Thirteenth Finance Commission chuan 2011-12 atanga 2014-15 inkar chhunga hman turin Rs 89 crore min pe.

State Specific Needs project State Specific Needs project atan liau liau Rs 250 crore pek kan ni. A hmanna turte chu Sainik School dinnan Rs 50 crore Raj Bhavan saknan Rs 30 crore, Jail saknan Rs 30 crore, Autonomous District Council pathuma infrastructure dinnan Rs 25 crore, Khatla-a playground siamnan Rs 2 crore, Border Area-a Police Sataton saknan Rs 31 Crore, Primary Health Care leh Health Sub-Centers saknan Rs 30 crore, Fire& Emergency Services atan Rs 20 crore Civil Secretariat sak belhnan Rs 20 crore
Thil hlui vawnthatna (Heritage Conservation) atan Rs 12 crore.

Read more...

NEITU NEILO MIZORAM!

¢ HC Vanlalruata

Kum 1998 khan kum khat dawn Delhi-ah ka khawsa ve a. A khaw lumzia leh ro dante sawi dawn pawha ngaihnawm tham sawi tur a awm laiin ka rilru-a riak reng chu New Delhi khu neitu neilo khawpui ni tlata ka ngaih thinna kha a ni a. Mahse, Mizoram dinhmun ka’n bih chian hian keini ai chuan Delhi chuan neitu a lo nei hle mai, a inti-tatu-te pawh an changkang e tih ngaihdan ka chhar thar a ni.

New Delhi-a khawsa thenkhat kan kawmnaah chuan neitu nihna an neilo hle tih ka hmu chhuak a. Sumdawnna, politics, lehkhazir leh sorkar hna thawh vanga awm ve mai mai an nih thu an sawi hlawm a. An MP nih hunte, an sumdawnna hmundanga hlawk zawk an hmuh hunte, an zirlai an zawh fel hunte leh hmun danga sawn an nih huna Delhi chhuahsan mai tur an nih avangin neitu nihna tak tak an pu theilo tih an sawi a. Ka thianpa Nirendra Dev phei chuan, “New Delhi hian refugee culture (pemkhawm zia) an kalpui a nih hi,” a ti fo thin.

Mahse, sorkarin a tak taka hna a thawh dan han hmuh erawh chuan rualawh a na thin a. Khuti khawpa ruahtui tlem si ‘Green Delhi’ movement avanga a lo hrin tak dup dan te, an thing phun an enkawl zui dante hmuh chiah chuan ngaihtuah a thui thin a. Neitu nihna neitu sorkar leh mipui khawsazia khu hmuhnawm ka ti fo thin. Mihring hlau hauh lova hleimualrang duhtawka khawsa ringawt pawh khuan rual min awhtir ngawih ngawih fo a ni.

Kan Mizoram dinhmun i han thlir teh ang. Sailo lal lai leh a hnu-a Kumpinu sorkar awpna hnuaia kan awm laite kha a ngaihawm ta hle mai a. Kan ram ngaw leh nungcha, a bikin lui-a awmte kan nghaisak dan hi chu tun ang kum zabi 21 hnu lamah chuan a zahthlak tawpkhawk a, hnam mawl (savage) rilru leh thinlung la pu reng angin kan awm a nih hi. Kan Mongolian pui, hnam mawl taka kan ngaih thin, America rama Red Indian hovin kum za thum chuang kal taa ramngaw leh ramsa humhalhna thuthlung an lo vawn thin pawh tunah hian kan pha lo chiang khawp mai.

Kawtchhuah leh feh kawnga thingtuai lian deuh ka fik theih leh theih loh, ka chem hriam leh hriam loh chhinna atana hman la ching hnam kan ni a. Lui kal leh ramvah haw lama kawng sira hnim ro lo awm nawalh emaw lighter emaw hmanga han deh kai thlazen ching hnam kan la ni bawk a. Mei kawng kan sial that tawkloh emaw kan sial miahloh vang emaw-a kan lo halin ram a tihkan hi a rapthlak rualin tute kuthlei emaw vanga ram kang leh ram ngaw kan chan hi a va rapthlak em! Hnam mawl, lehkha thiamlo chu sawiloh mahni tana pawi tur pawh hre pha hauhlo ‘Barbarian’ an tih thin kum za tam tak kal taa hnam mawl ang chiah kha kan la ni.

Kan ram luite lah chu tur hmangin kan hrai chamchi a, nimin lawk thleng khan he thil mawl tak hi kan la ti ta reng a. Kan man sen loh lui-a nungcha kan la suat burh burh reng mai. Hetiang kan chin avang hian kan lui-a nungchate kan tihlumin tute eizawnna emaw nasa takin ka tichhe satliah mai a ni lova, kan hriselna thlengin kan tichhia a. Kan rama cancer vei kan tam em em chhante hi zuk leh hmuam kan uar piah lamah sangha, chakai leh sava thlenga tura kan hrai kan zawrha kan ei vang a ni lovang tih sawi theih a ni lo.

Kan Naga unaute khi tribal ve tho an ni a, anni chuan lo an hal dawnin tunhma atang tawhin bengchheng siamin ramsa-te ‘warning’ an pe a, ramsa enkawltu pathian hnenah lo an hal tur thu leh ramsate insaseng tura hrilh turin an hriattir thin an ti. Keini chuan ramsa kan hlum pawi kan tilo khawp niin a lang thung. Ziak leh chhiar thiam tam kan inchhuan em em lai hian kan ram leh ram ngaw leh a chhunga cheng nungchate laka hlei kan len dan leh neitu nihna thinlung kan pu lo lutuk hi inenletin zaka kun ngawih ngawih tur kan ni a. Hetianga ram kang duai duai mai titawp tur hian sorkar hian dan dinglai hi khauh takin kengkawh tawh sela, ram humhalhlo VC te pawh hremin hrek ngei tawh teh se. Chumi atang chuan ram hal mai mai leh meikawng sial thalova lo halte chungah VC-te thikthu a chhe thei chauh ang.

Read more...

NLUP kawng chhuk chho

March ni 17-ah, Budget Session tannaah larsap MM Lakhera chuan thu sawiin, NLUP sum tur chu Planning Commission-in an buaipui mek a, an zo fel tep tawh niin a sawi a, 'final stage'-ah a awm mek tiin a sawi.

October ni 15, 2009-ah Mizoram sorkar ding lai hnuaiah Budget pharh a ni khan Budget pharhtu chief minister Lal Thanhawla chuan NLUP hi 2009-10 atanga tan tur a ni, tiin a lo sawi tawh a, March ni 17-a larsap thusawi nen chuan a inmil lo ta hle.

Nikum October ni 15-a chief minister-in a sawi dan chuan, NLUP hnuaiah kum 5 chhungin chhungkaw nuai 1.2 dinhmun chawikan tum a ni. NLUP hmang hian agriculture lama hmasawnna - 'second green revolution' thlen tum a nih thu a sawi nghe nghe. NLUP sumah hian cheng vaibelchhe 1,200 chu chhungkaw tinzawna hman tur a nih thu leh cheng vaibelchhe 1,250 chu hmanraw leina, inzirtirna leh a buaipuina hrang hrang atana hman a nih tur thu a sawi a ni.

March ni 17, 2010-ah larsap-in Planning Commission-in a hmawr an bawk tep tawh thu a sawi a, 2009-2010 chu March ni 31 thleng tur a ni. Chuti a nih chuan 2009-2010 chhungin bul tan hman a ni dawn ta lo a ni.

Nikum December-a Congress Bhavan- sorkar kum khat tlin lawmnaa chief minister thusawi nen pawh larsap thusawi hi a inmil chiah lo.

Thingtlang hmun thenkhatah NLUP sum dawng tur an thlang tawh tih sawiin chumi tum chuan chief minister hian, "MNF- inthlan hmaa lo sawichhe bawng bawngtute kha an tel a ni awm a. An tel dawn reng reng lo," a ti a, 'engah nge a sawichhetute'n in huan thei an lawh ve ngawt ang?' tia sawiin, "Chutiang veng tur chuan alawm tlema han tih khawtlai a ngaihna chhan," a ti a nih kha.

NLUP sum an sem thei tawh nia sawiin, "Kan hotute hian kan hlawhtlin pui theihna turin, kan dinchhuah pui ngei theihna turin an uluk a, chuvang chuan an muang a ni," a ti bawk.

March ni 17-a House address a neihah larsap hian NLUP chungchang hi a sawi ri fo a, a sorkar-in New Land Use Policy (NLUP) hmangin he ram ei leh bar dinhmun chawisan a tum tih sawiin, ram leilung hmang tangkai zawnga hmasawnna kumhlun thlen an tum tiin a sawi.

NLUP 'Action Plan' atan cheng vaibelchhe 2,527.20 a awm tur thu sawiin, "UPA chairperson leh prime minister zahawm tak duhsakna avangin Planning Commission-ah 'final stage'-ah a awm tawh a ni," a ti.

He ruahmanna hnuaiah hian kum nga chhungin chhungkaw 1,20,000 tanpui an ni dawn tih a sawi a, department pariat- agriculture, horticulture, veterinary, industries, forest, fisheries, sericulture leh soil & water conservation department hnuaiah thawh a nih tur thu a sawi.

NLUP hian thingtlang leh khawpui miretheite tihmasawnin, ramngaw leh nungcha humhalhna pawh a thlen dawn niin a sawi bawk.

Forest deptt. hmalakna a sawi pawhin NLUP hi a sawi lang a, "NULP hnuaiah ram hectare 21,480-ah chhungkaw 10,740 chhawr theih tur bamboo plantation siam a ni dawn. NLUP hian Mizoram pum pui 60% chu ramngawa khuh a tum a, a la bang 40%-ah ram leilung hmang tangkai zawnga hmasawnna thlentir a tum," a ti.

Soil & water conservation deptt. chungchangah pawh NLUP hnuaiah thelret, hmunphiah leh coffee chinte a tel tur thu a sawi a, sericulture deptt. chungchangah pawh silk siamchhuahna lam thawk turin NLUP hnuaiah chhungkaw 500 an lang phawt ang a, 2010-2011 chhungin chhungkaw 2,000 thlan belh an ni dawn tih a sawi.

Land revenue & settlement deptt.-in NLUP hnuaiah family land records an buaipui mek tih a sawi bawk. Agriculture chungchang pawh a sawi a, mahse, Mizorama eizawnna lian ber agriculture chungchangah hian NLUP a sawi lang lo.

Read more...

Internet-ah 'khawinge ka di ve kha?'

¢ Hmingsanga

Mizo te'n internet kan hmelhriat tan tirh lam khan MIRC a lar hle a, Aizawlah cyber cafe dawr an hawng sup sup a nih kha. Cyber cafe dawr lun deuh phei kha chu tlaivarin an hawng a ni deuh ber thin. A hman man lah darkar khatah cheng 100 emaw vel kha a ni a, chuti chung chuan khawi cafe mai pawh an lun em em vek mai.

Khatih laia cyber cafe-a hun hmang tam te'n an hun an hman tamna ber nia lang chu MIRC ( internet relay chat) kha a ni awm e.

Mirc chat-na atanga inchhara nupui pasala innei ta pawh sawi tur an tam mai. Mirc chat hi tun thleng pawhin a la awm reng a, hmangtu pawh an la tam tho. Mahse, hmana kan hmelhriat tan tirh lai ang luih luih kha chuan hman a ni tawh lo mai thei.

Aizawl khawpui leh Mizoram hmun dangah Cyber cafe dawr chu la awm bawk mah se hun hmasa lam kha chu a tluk tawh lo tih a chiang. A haw vanglai kha chuan veng thenkhat phei chuan cyber cafe dawr hawn theih hun chhung an bithliah sak tak hial te pawh a awm a nih kha.

Hun a kal a, mirc-a chat thin mipa thenkhatin hmeichhe hming lem (nick) invuahin mipa thenkhat an bawl phuan nasa thin hle. Hmel a hmuh theih loh a, thlalak inthawn zar zar te pawh hriat tur an tam. Mipain hmeichhe an biakin an 'dream girl' ang deuh ni turin an beisei a, hmeichhia pawhin mipa an biak chuan chuti tho chu a ni.

Mirc hmang regular deuhte phei kha chuan an addict nasa hle. An nunah darkarin awmzia a nei lo a, zan khat tlaivar tih ang te chu harsat lo tak tak vek an ni. Sawi thiang lo a awm lo tih theih deuh thaw a ni a, an duh duh an sawi a, an duh leh inhmuhna tur hmun te sawiin damlai par tlan chul ta hial te pawh an awm bawk.

Khawvel a thang zel a, awlsam taka kan ban phakah internet a lo awm ta. A awlsam piah lamah a man a lo tlawm tawh zawk bawk. Mahni inlum atangin duh tawka hman tur kan nei thei ta. Mirc hmanga chat thinte la awm bawk mah se inbiakna changkang zawk a rawn piang ve zel bawk.

Tunlai thalaite inbiakpawh tawnna lar ber pakhat chu Orkut leh Facebook a ni ve leh ta thung. Orkut leh Facebook-a account nei te'n an thlalak an dah tawh a, tunge an nih tih a chiang tawh. Mi thenkhat uang thuanga mahni thlalak ni lo dah chingte leh mahni nihna lo anga account lem lo siam awm bawk mah se mirc chat ai kha chuan engkim
chiang leh fel zawkin a inhriat theih tawh a ni.

Khawvel hmun danga thalaite ke pen rualin, orkut hmangin google neitute chuan 'bawm' khatah min khung khawmin, khawvel hmun hrang hranga thalai dangte nen sir kan sawn chhoh ta leh ta luih luih a nih ta ber mai.

Khawvela social networking lian leh hman nasat ber chu Orkut a ni a. Chutih lai erawh chuan Orkut ang deuh bawka siam Facebook, Twiter leh MySpace te chu USA-ah chuan a hmangtu an tam zawk.

Orkut hi Google ta leh enkawl a ni a. Orkut hmangtu te'n an thian leh lainate awlsam taka an inbiakpawh theihna tur te, thian tha inzawn chuah a nih theihna tur atantea duan leh remchang lo siamsak a ni. Google chuan a enkawl hna an thawk. Orkut tih hi Google employee Orkut Büyükkökten-a hmuhchhuah a nih avangin a hming chawiin Orkut tiin vuah a ni.

Mi pahnihin an duhthu ngeia rem an intih tawnna tel lo chuan inbiak theih leh intlunzawm theih a ni chuang lo.

India leh Brazil-ah an hmang nasa hle. Nikum December-ah khan Orkut hmangtu 51.09% chu Brazil-a mite an ni a, a dawttu chu India ram a mite niin 20.02% vel an ni a, dang chu 17.28% chu USA-a mite an ni.

Orkut hi January ni 24, 2004 khan hman theih tura duanchhuah a ni. 2008 August thla thleng kha chuan California atangin enkawl a ni. Mahse, hemi hnu lawk hian Orkut hi Brazil-ah an hman uar em avangin Brazil khawpui pakhat Belo Horizonte atangin tun thleng hian enkawl leh vil zui a ni ta a ni. Kumin Febuary thla thleng khan khawvel hmun hrang hrangah Orkut hmangtu hi mi maktaduai 100 vel an awm nia chhut a ni.

ORKUT HMUCHHUAKTU LEH A HMUHCHHUAH CHHAN
Ka hming chu Orkut Buyukkokten a ni a, Turkey khawpui pakhat Konya-ah kan cheng thin. Stanford University-a PhD Computer Science degree nei ka ni.

Tum khat chu ka bialnu chu khaw dangah hna tul dang avangin a zinchhuah a ngai a, ka thlakhleh em avang leh ka duh em avangin hmun danga min kalsan tur chu thih hreh takin ka hreh a. Awm hlen tur leh inhmu tawh ngai miah lo tur pawh kan ni lo a, rei lo te min kalsan tur chu ka ngaithiam lo ngang mai. Mahse, a kal a tul si.

Hreh takin, rei lo te chhung chu kan awm hran a ngai a.

A kal ni tura ruatah chuan hlim taka awm har ka ti a. Rel chawlhhmun lamah phur lo tak leh lung si lo zetin, ka vailiam a ni.

An tlan liam tur hmel ka hmuhin, rel station-ah chuan tah rawih rawih mai ka chak a. Mahse tlangval a pum pa chutiang ema han khawsak chu dik chiahin ka hre si lo. Rilru harhfim hman hlauh lo se ka bianga mittui luang min hruk fak sak theitu, ka ngaihzawng, ka hmangaih em em chhuanna rel kha sum eng zat pawh sen huamin hnuhkir leh ka duh ngei ang le.

Rilru pangkhing zetin keimahin kan in lam chu ka pan hnek hnek a. Ka pindan hnawk nuaih mai, computer thil leh lehkhabu darh neih nuaih mai chu hmuh kanin, ka mitthlaah ka hmangaih hmel hlir chu ka hmu a. Chutiang ringawta hun hman chu dikin ka hre lo a.

Rilru lak pen nan tiin ka room-a TV ka thlir a. Chanchin mak danglam tak mai an rawn puang ta tlat mai. Rei a ni lo, thu thinthawng takin min rawn deng chhunzawm nghal a. Kan khua atanga chhuak ka thiannute chuanna rel a chesual tih an rawn puang a ni.

Ka awih thei lo a. An rel number lah ka hrechiang si. TV meuha breaking news-ah dawt an puan ka ring bawk si lo. Thutak a ni chiang mai. Rang takin ka thawkchhuak nghal a. Rel thuneitute ka bepawp thei hlauh mai.

A chak thei ang berin ka lim chhuak a. Rel station chu ka thleng hma khawp mai. Rel chesual-a thite hming an tarchhuak a. Ka bialnu hming chu ka hmu zo lo. Min boralsan ka rin em avangin ka mitvai leh mittui vangin ka hmu phe ruai niin ka hria.

Ka ennawn leh thin. Ka hmangaih hming a tel lo. Ka ennawn hnu-ah pawh ka la hmu zo chuang lo. A hming reng reng ka hmu zo lo!

Ka be pawp thei tawh si lo a, a chhungte biak dan tur ka hre bawk si lo.

Amah zawk chu a dam a nih chuan min rawn biak ringin ni tin hun ka hmang a. Mahse chutiang thawm reng reng hriat tur ka nei si lo.

Ka zirna lam pawh rei tak chu mu leh mal nei lovin ka zir ve deuh mai mai a ni deuh ber. Ka hmangaih zawnchhuahna tur thil zir nia inngaiin IT technical architect pawh tha takin kum khat hnu-ah ka zo ve a. Ka rilru-a thi thei lo ka hmangaih ngawih ngawih zawnchhuah
dan chu ka dap tan ta a ni.

He khawvel khawlai hmunah emaw chuan a awm ngei awm si a, min han bepawp mai lo pawh chu ka thin a rim lek lek fo thin. Tichuan, khawvel hmun hrang hranga computer thiam developer te ka sawmkhawm a, internet site pakhat orkut tih hi kan lo siamchhuak ta a ni.

Beidawng duh hauh lovin kum thum chhung rim takin he web atang hian ka hmangaih chu ka zawng a, sum leh pai pawh maktaduai chuang ka lo seng ta reng mai.

Kum thum chhung rim leh hah takin ka bei a, a tawp a tawpah he orkut hmang hian khawvela ka hmangaih ber chu ka hmu leh ta a ni.

Hemi ni-a ka lawmzia chu in hrethiam kher awm lo e, ka lawmna kha engmah hian ka thleng phal lo a, ka sum sen leh ka tha sen, hun sen ve te zawng zawng kha ka hmuhchhuah a ropui em vangin engmah lovah ka ngai a. Ka thil zawn ber ka hmuh tawh avangin ka web pawh chu khar ka tum rilru ta a ni. Mahse, mi tam takin he site hi an hman tangkai avangin google CEO chuan leiah min dil a, kei chuan midangte tana tangkai a nih beisei vein ka remti ve mai bawk.

He site hi hmangaihna atanga chhuak, chhelnaa din, a hmangtute pawhin ka rilru ang hi min tawmpui ve thin se ka ti khawp mai.

Hmangaihna avanga ka thil siam avang hian engkim huam leh engkim seng hreh lo khan ka hmangaih ber ka hmuh theih phah a. Heng zinga ropui ber chu hmangaihna vanga beidawn lohna hi a ni.

ORKUT NEITU NEUH NEUH
1. Orkut Buyukkokten hian tunah hian amah puitu leh a scrapbook ching fel tur mi 13 a nei a, a thian nih duh avanga sawmna a dawn chingfel tur mi 8 a nei.

2. Ni khat chawhrualin thian atan sawmtu mi 20,000 a nei a, scrap-tu mi 85,000 a nei thin bawk.

3. Orkut-a mi pakhat an in-register apiangin Orkut Buyukkokten hi $12 zel Google neitute hian an pe thin.

4. |hian atana midangin sawma an lo pawm apiangin thian pakhatah $10 zel Orkut Buyukkoten hian a hlawh thin.

5. I thiante thian leh chhawngin thian pakhat dang an neih belh apiangin $8 a hlawh zel a, miin thian atana an rawn sawm zawk che a nih chuan $ 6 thian pakhatah a hlawh zel.

6. Mi pakhat i scrap apiangin $5 a hlawh ang a, midangin an rawn scrap che apiangin $ 4 a hlawh zel bawk ang.

7. Thlalak i upload apiangin thlalak pakhatah $ 200 a hlawh zel.

8. Mi fans i nih chuan fans pakhatah $2 zel a hlawh ang.

9. I fans neih pakhat zelah $1.5 a hlawh ang.

10. Orkut atanga i in-log out apiangin $1 a hlawh zel ang. n

(Tiang hian Orkut Buyukkokten chuan a ziak a, thutak phenah ngaihnawm turin thu thenkhat belh a ni.)

Read more...

Facebook Games

¢ Joseph Lalrintluanga

Zing vartianah loneitu maktaduai tel tak zet chu an lo lamah an fehchhuak a; zan a lo ni a - misual rualte chu mi thah tur zawngin an kalchhuak leh them them a; chutihlaiin - poker player-te pawhin pawisa man tumin an shuffle nasa mai bawk. Hengte hi tunlaia thil thleng lar tak an ni a, mahse, a tak rama mi ni lovin internet khawvel Facebook-a mi maktaduai telte thil tih thin a ni.

Hetiang social gaming an tih hi a bikin Facebook-ah hian a lar em em a, thiante nena inkhelh a ni ber mai a, 'tunlai video games khawvel kalphung hi a kaiher dawrh e' an ti.

Facebook-a game lar ber berte chu FarmVille leh Mafia Wars te hi a ni a, he'ng siamtu hi San Francisco-a Zynga company an ni.

Zynga dintu (founder) chu Mark Pincus a ni. Pincus hian a company hming hi a English bulldog thi ta hmingchawia a phuah a ni.

Facebook leh MySpace vela khelh tur games te hi an lar em em nachhan chu hei hi a ni — mawlmang tak, mite'n an ngainat tur, mahse awlsam taka kalsan mai theih an nih tho si vang hi a ni, an ti.

Facebook hi mi maktaduai 400 velin an hmang mek a, he social networking site-ah hian i tel ve a nih chuan thian engemaw zatin he'ng game khel tur hian an rawn sawm (invite) ve ngei tawh ang che (ninawm tiin i lo ignore ve fo tawh mai thei a, nia maw le tiin i lo accept tawh mai thei bawk). A engapawh chu ni se, mi tam takin an nin em em laiin, mi maktaduai tam tak erawh chuan heng - FishVille, Vampires, Café World, YoVille leh Zynga Poker te hi nitin, darkar tin an khel tluk tluk a ni.

Media tracking company Developer Analytics-in an chhut danin — FarmVille hi mi maktaduai 75 chuangin thla tin an khel a, Zynga games hrim hrim kheltu hi nitin mi maktaduai 65 chuang an ni bawk.

Mark Pincus chuan, "2007 khan internet kan kalpui dan hi a dik lo riauvin ka hria a, internet-ah games hian pahnihna emaw pathumna emaw tal a luah ka lo rin laiin a ni tlat lo," a ti.

Chutiang taka Internet-a hmun pawimawh chang pha tur chuan Pincus hian a Zynga company hmang hian heng game te hi a siamchhuak ta a ni.

Gaming expert Scott Steinberg chuan, "Pincus-a ngaihdan hi a dik chiah, ani zarah hian Pac-man leh Super Mario Bros. te vanglai 'golden era' ah khan kan kir leh ta a ni," a ti.

Read more...

Media-in tan lam a nei tur a ni lo

"Media-te hi sorkar khalh ngiltu leh mipuite hriat tura sorkar hmalaknate puangdarhtu in nih avangin in thuchhuahte chu a lai tha em tih te bih ngun a ngai hle," tiin information & public relations minister Zodintluanga chuan thuthar lakhawmtute a fuih.

March ni 23-ah Mizoram Journalists Association chuan I&PR Auditorium-ah General Conference vawi 37-na an hmang a, he hunah khuallian, minister Zodintluanga chuan thuthar lakhawmtute chu lai taka thil thlir tur leh theihtawp chhuaha hna thawk turin a fuih a ni.

"Khawvel thang chho zelah media pawimawhna leh mawhphurhna a zual zel a, Mizo hnam tlemte, ziak leh chhiar thiam tamna ramah phei chuan chanchinbute hian pawimawhna leh tangkaina an nei thuk êm êm a ni. Print leh visual media-te hi khawvel tukverha min dahchhuah tirtu a ni," minister chuan a ti.

"Communication technology a lo thang a, keini ram kilkhawr atang pawhin khawvel hmun hrang hranga thil thleng chi hrang hrangte kan hmuin kan chhiar zung zung thei tawh a ni. Chutiang chu kan tunlai media nihphung a nih tawh avangin thil tangkai tak a ni a, hmangsual duh tan erawh chuan hmanraw hlauhawm tak a tling a ni," a ti bawk.

"Tute emaw tihhmingchhiat duh hrim hrim avangin thu belhchian dâwl tawk lo te pawh chhuah theih a ni. A nih loh vek pawhin tute emaw lak atanga engemaw beisei neih vangin hman khawloh theih a ni bawk," tiin thuthar lakhawmtute chu tan lam nei lova lai taka thil thlir turin a fuih.

"Chutiang thil chi hrang hrang lak atang chuan media-te kan inthiarfihlim a pawimawh hle mai. Media te hi thudik chhuahtu in nih avangin in tan mar pât reng a ngai a, tha thlah a thiang ve lo a ni," tiin a sawi zawm.

"Khawtlang nun siamthatnan chanchin thar thehdarhtute hi ban pawimawh tak an ni tih kan hai awm lo e," tiin media pawimawhna a sawi a, "Thil tha tak pawh hi mipui vantlang hriat tura puanzar a nih loh chuan a thamral ve leh mai thin. Amaherawhchu, media atanga phurpuina a awm erawh chuan nasa takin hna a thawk thei a ni," a ti.

"Silchar-ah misual tute emaw awm that duh loh vangin emaw khawchhak lam atanga lo tlathla tute emaw suahsualna avangin mipui thinrim sosang kan che ta mai thin te hi a pawi hle. Hetiang hunah te hian media pawimawhna a lo lang thin. Buaina tipunlun lo zawng leh mipui thinrimna tikiang zawnga thu kan chhuah a pawimawh thinin ka hria. Mizoram hi state puitling kan ni a, sorkar a awm a, mahni duh dan ang anga tal mai lo leh sorkar zai ngaia mipuite pawh awm tura zirtir hi a pawimawh hle a ni," a ti bawk.

MJA president K Sapdanga pawhin thu sawiin, thuthar lakhawmtute chu tan bik neia thu chhuah lo turin a fuih.

"Media chu media a ni," tia sawiin, "Tlawmngaihnain emaw sakhuain emaw a dipdal a rem lo," a ti.

"Media-in hnam leh sakhua a do a ni lo a, media chu a laiah a ding a, thlek lam neih a rem lo. Hei hi kan hriat fuh loh chuan media meichher hi tui fim takah kan chiah hlum mai ang," a ti bawk.

Mizoram chanchinbumite chungchang sawiin MJA president chuan, "Mizorama chanchinbumite hian hmuhsit kan hlawh thinna chi hnih langsar tak tak a awm tih kan sawi thin," a ti a, chu chu ruihtheih thil leh journalist nihna hman dik loh tiin a sawi.

"Ruihtheih thil laka fihlim hi inphut chi a ni lo a, mahse ruihtheih thil tih vanga mualpho emaw, midangte tan hnawksak siam emaw, mi hmuhsit tur zawnga khawsak emaw chu pumpelh nachang hre tura vantlang beisei kan ni tih hi hre thar leh turin ka inchah nawn duh a ni," tiin mite'n chanchinbumite an hmuhsit phahna kawng khat a sawi.

"Hmuhsit kan hlawh thinna pakhat zawk, kan nihna hman dik loh ching kan awm thin hi thil serious tak a ni," a ti bawk.

"Mizoram chhungah leh pawn lamah pawh journalist inchhal ve ngat zingah pu chuam nei tlatte an awm thin. Pu chuamte laka hamthatna eng emaw beisei vang leh hmaizah vangin news reporting thlengin pawt sawi bawih bawih duhte pawh kan awm fo thin," tiin hemi chungchang hi a sawi.

"Journalist thenkhat ve thung chuan investigation ti vea inchhalin, a victim-te hnenah investigative report an zuar a, mi blackmail-na atana hman an ching bawk thin. Journalist rintlak kan nih chuan kan thlen chin apiangah mi an fimkhur thin a, chu zahawmna ber chu contract hna emaw, petrol hapta khat tla emawa kan hralh duh tawh chuan journalist-a inchhal tlak kan ni tawh lo," tiin a sawi zawm a ni.

Chawhma inkhawm chu MJA vice president Lalthanzama'n a kaihruai a, general secretary Zonunsanga Khiangte leh treasurer C Lalzamlova te'n report an pe. I&PR minister hlui, Dr R Lalthangliana, MLA, chu khualzahawm a ni.

Chawhnu lamah kum 2 chhunga MJA general headquarters hruaitu tur an thlang a, president atan H Zosangliana, Evening Post editor thlantlin a ni. Vice president atan Vanlalrema Vantawl, Zalen editor thlantlin a ni a, treasurer atan Zonunsanga Khiangte, Lenlaini editor thlantlin a ni.

He'ng mite hi executive committee member atan thlantlin an ni: Lalremsiama (Morning Post), Lal Rinmawia (Vanglaini), BK Renthlei (LPS), E Lalhleia (National Observer), R Lalhmangaihzuala (Romei/Hnehtu), Lalrinmawia Sailo (Zoram Thlirtu), C Lalhmachhuana (Youth Herald), Lalbiakzama (Entlang), C Lalduhawma (LPS), Sangzuala Hmar (Lunglen) leh C Lalzamlova (Chhawrpial) te.

Read more...

Lemziakin hlut hlawh zel

Hman ni lawk thleng te kha chuan Mizo zingah lemziak hian ngaihhlut a la hlawh lo hle a, tun hnaiah erawh ngaihhlut leh ngaihsan a hlawh ta hle niin a lang.

Tun hnai kum hnih/khat vel atang khan painting exhibition entu an thahnem ve ta hle a, lemziakmite pawh hei hian a tiphur hle a ni.

March ni 22 atangin Vanapa Hall bathlar chung zawkah Aizawl Art Gallery te'n From the Pallete of Mizo Artists' Painting Exhibition-2010 an buatsaih a, mipuiin an hlut hle.

Ehxibition hawngtu, MJA president K Sapdanga chuan, “Art hi mihring tawngka-a sawifiah theih loh khawpa ril a ni a, englai pawha chenchilhtute hian tawngka ringawt chuan a rilna hi in sawifiah thei bik awm lo . Arts hi remhriatna ril tak, mita hmuh theiha lo lang chhuak a ni a, khawvela indona leh muanna a lo awm tawhna hmunah te art-in a tha zawng leh a chhe zawnga hna a lo thawh tawh dan hi nilenga sawiho tham a awm a ni. Hringnun pawrhchhuak ril thei ber chu artist te hi in ni a, in kutchhuak hlutna hi suma chhut chi a ni lo a, a ziaktuin a hlawkna hmu tur erawh chuan a man chhiar a ngai chauh zawk a ni,” tiin art chungchang a sawi.

Exhibition-ah hian lemziakmi 19-te kutchhuak 124 pholan a ni. Lemziakmi 19-te zinga 15 chu mipa an ni a, hmeichhia 4 an tel. Hmeichhe zingah hian vai a tel.

Hmeichhe zingah hian Mizoram boxer tha pakhat a tel; SAI naupang, Krosshmangaihsangi kutchhuak pahnih pholan a ni. Boxer ni mah se a kutchhuak a pa lo hle, hmeichhe lem ve ve a ni.

'Lemziakmi zinga pakhat chu tawng thei lo a ni a, ani kutchhuak hian ngaihven a hlawh hle.

He lemziakmi hi Richard Thanmawia a ni a, October ni 17-23, 2009-a Aizawl Art Gallery te'n painting exhibition an neih tum khan a kutchhuak hi pholan a lo ni tawh a, duhsakna thilpek pawh a dawng nual a ni.

Tun tumah hian Richard-a kutchhuak 3 pholan a ni a, Krismas lam leh Isua rawngbawlna lam thupui a hmang a ni.

February thla tawpah khan Aizawl Art Gallery zirlaite hi Khawbung leh a chhevel fangin an zin kual a, Mizo thil hlui leh history-a thil pawimawhte an tlawh a ni. Chuta an thil hmuhte chu an ziak a, tun tum exhibition-ah hian hmuh tur a awm nual.

Aizawl Art Gallery te hian March ni 5, 1966-a Mizoram tawrhna hriatreng nan lemziak intihsiak huaihawt an tum a, From the Pallete of Mizo Artists' Painting Exhibition-2010 hawnna inkhawmah Aizawl Art Gallery neitu Laltanpuia chuan he thu hi a puang a ni.

March ni 5, 1966-ah hian Mizoram chu jet fighter hmanga beih a ni a, kuminah pawh MZP te chuan a champha hi Zoram Ni tiin an hmang a nih kha. MZP te chuan jet fighter hmanga Mizoram beih a nihna hriatreng nan, zirlaite pualin jet fighter hmanga Mizoram beih a nih lai lem inziahsiak an buatsaih a, mahse, March ni 4-ah Mizoram sorkar chuan thupek chhuahin, sorkar sikul naupangte tel an khap a ni. Chutiang boruak karah chuan Aizawl Art Gallery te hian nakum March thlain Zoram Ni pual hian lemziak intihsiak buatsaih an tum thu an puang ve leh a ni.

"March ni 5, 1966-a thil thleng khan ka rilru a luah hle a, tun hnaiah mithahnemngaite thuziakte ka'n chhiar leh a, ka rilru-ah a khat khawp mai. Lemziak hmanga puanzar leh dahthat theih tur neih ve hi tul ka ti a, Mizoram tan chu chu tul ka ti a, lemziak intihsiak hi neih ngei kan tum ta a ni," tiin Tanpuia chuan a sawi.

"Artist hrang hrangin March ni 5, 1966-a thil thleng kha a lem ziak se, hmun khatah phochhuak dul mai ila, chu chu mipuiin en bawk se a hlawk hle ka beisei a ni. Jet fighter hmanga Mizoramin beih a tawh kha thil ho mai mai a ni lo a, kan hrereng tur a ni tih hi ka ngaihdan a ni. Phuba lakna lam ni lovin inlungrualna leh dinchhuah tumna ni-ah hmang ila tiin, kan theih ve tawk lemziak intihsiak lamah tan lo lak ve kan tum a ni," a ti bawk.

Tun hnaiah painting exhibition-ah mipui an kal tha sawt hle a, Chapchar Kut pual- Art Festival-ah pawh khan mipui an kal tha hle. From the Pallete of Mizo Artists' Painting Exhibition-2010-in a'n zui leh a, hetah pawh hian tlawhtu an thahnem thin hle a ni. Naupang lam leh thalaiin an ngaihlu niin a lang.

Read more...

Seba lalnu kha

¢ BCh-a

Bible-a Lalte Pakhatna bung 10-ah chuan Seba lalnuin (Queen of Sheba) Solomona thu khirhkhan tak tak a zawh thu leh Seba lalnu zawhna reng reng Solomona'n chhan theih loh a neih loh thu kan hmu. Mahse, he hmeichhe mak leh dangdai tak, Arabia lam atanga rawn kal hi tunge maw a nih chiah le? A nih leh Falasha, Seba thlah kal zel nia insawite hi tute nge an nih chiah?

Seba lalnu ti bakin Kristiante chuan a hming dang kan hre lo, hriat tur pawh a awm hek lo. Bible-ah a hming a lang ve tih mai loh chu a awm tak tak em tih finfiah theihna dang a awm chuang lo. Mahse, he Seba lalnu ni thei mai awm chanchin hi Middle East leh Africa vela mi chengte chuan thawnthu-ah an lo nei nual mai. Tunlai khawvela chengte tan chuan he Seba lalnu chanchin hi a mak ta telh telh a ni ber e.

Bible-ah hian Seba lalnu tiin tarlan a ni a, a hming tak tarlan a ni lo. Islam sakhaw lehkhabu thianghlim Koran leh Arabian leh Persian thawnthu-ahte chuan he Seba lalnu hi a hming Bilqis tia tarlan a ni. Ethopia lam thawnthu-ah chuan Makeda chhim lam lalnu (Makeda Queen of South) tia tarlan a ni thung. He lalnu hian literature leh Ethopian tradition-ah pawimawhna a nei thuk hle niin a lang a, Ethopia roreltute leh an tihduhdah thin Falasha (Ethopian Jews- Ethopia-a Juda hnamte) te chuan he lalnu hi an thlahtu niin an pawm a ni.

Thuthlung hlui lam lehkhabu 1 Lalte hi Seba lalnu chanchin kan hmuhna hmasa ber a ni. A thawnthu-ah chuan Seba lalnu hian Solomon-a finna chu lo hriain, thu khirhkhan tak tak zawta a finna chu enchhin tumin Jerusalem lam panin a zin chhuak ta a ni. Historian-te chuan Seba lalnuin Solomona hmu tura a zin chhuah hunlai hi BC 965-926 vel kha niin an ring.

Solomona hian Seba lalnu zawhna zawng zawng chu a chhang thei vek nia sawi a ni a, mahse, Seba lalnu hian eng zawhnate nge a zawh sawi a ni lo thung. Rindan tlanglawn takah chuan Solomona hnena Seba lalnu zawhna ni thei awm tak chu kum tam tak an inhlan chhawng zel nia sawi a awm. Seba lalnu hian a tlangpui thuin thil inan lohna leh danglamna lam a zawt tlangpui niin an ring. Entirnan, Seba lalnu chuan Solomona chu pangpar in ang tak tak pahnih, a tak leh a lem, an danglamna hriat theih reng reng loh a entir a. Solomona chu pangpar dik tak zawk a zawt ta a ni. Mahse chu lal fing tak chuan khuai (bee) hmang tangkaiin pangpar dik tak zawk chu awlsam tein a hrechhuak ta mai a ni (khuai hian pangpar dik tak zawk chu a rawn bawm a, pangpar lem chu a bawm duh lo). Seba lalnu hian zawhna dang a zawt leh a- pasarih a chhuak a, pakua a lut, pahnihin intur an siam a, pakhatin a in, tiin. Solomona chuan fing taka chhang lehin- Hei hi hmeichhe thla tin hunbi chungchang sawina a ni (ni sarih chhung a awh), naupaiin a zui a (thla kua a awh), nu hnute tui a entir leh a, nautein a nu hnute a hnêk thu a ni, tiin a a chhang a ni awm e. Mahse he'ng thute hi Bible-ah a lang lo.

Lalnu tak tak chu
He lalnu hi khawilam atanga rawn kal nge? He Seba lalnu lalram hi Arabian Peninsula chhimchhak lama ram pakhat, tun hnua Yemen ni ta hi niin mithiamte chuan an sawi. He thlaler lalnu hian a lalram atanga Km 2,000 zeta hla- Jerusalem hi Solomona finna hriat chian duh vang ngawr ngawra pan a ni thei ang em? Hei aia chhan pawmawm tak tak a awm niin an sawi. Juda lalte'n Middle East vela insumdawn tawnna kawng pawimawh tak tak chungah thuneitu nihna an hauh a, hei vang hian Seba lalnu sumdawnna hlawk tak- myrrh (mura kan ti a ni awm e, thing hnai atanga siam perfume atana hman chi) leh incense (hal rimtui) te chu dinhmun hlauhawmah a ding ta. Bible uluk taka kan chhiar chuan Seba lalnu hi a thil tumah a hlawhtling ni ngei tur a ni, Solomona nen hian sumdawnna lamah pawh inremna thûk tak neiin a haw leh ta a nih kha. Seba lalnu hian Solomona hi rangkachak talent 120 leh englo rimtui tam zet mai leh lunghlute a pe a, hemi chhan let nan hian Solomona pawhin Seba lalnu chu a duh zawng zawng, a dil apiang chu a pe a. Chuti chuan a awmna ram lamah a hawng leh ta a, a hote nen, tih kan hmu.

Lalnu thlahte chu
Thuthlung hlui-ah hian he'ng lal pahnihte hi an inzah tawn a, an inngaisang hle tih chauh kan hmu a, chutih laiin Ethopian national epic (Ethopia rama mi langsar te chanchin ziahna) Kebra nagast ('Lal chu chawimawiin awm rawh se' tihna a ni awm e) an tih mai, kum zabi 14-na lai vela an ziahah chuan Solomona leh Seba lalnu (Makeda) hi inhmel duhin, Seba lalnu hian Solomona lakah hian fapa Menelik a hring nia tarlan a ni a, Menelik hi Ethopia-a lal hmasa ber nia tarlan a ni bawk. Thlahtute lamah Davida thalbe atanga chhuak ve bawk an nih vang hian Ethopian emperors-te chuan Middle Ages lai vel atang khan lal an ban hma 1974 thleng khan 'Lion of Judah' tiin an invuah thin a, an national emblem-ah pawh arsi kil ruk nei (hexagonal star), Juda te'n Davida arsi (Star of David) an nei ang deuhin an hmang ve bawk.

Ethopia-a roreltute Solomona leh Seba lalnu-te thlah nia an inchhal bakah hian, Ethopian te'n an tihduhdah leh an hnuaichhiah em em thin Falasha-te pawh Juda niin an insawi ve tlat. He'ng- Falasha, Ethopian Jews an tih maite hi Bieta Israel (Israel inpui- tihna) tiin an insawi nghe nghe. Anni hi chuan Solomona'n a fapa Menelik-a Ethopia lama zui ve tura a tirh Juda puithiamte thlah kal zel niin an insawi ve thung.

Falasha-te lo chawrchhuahna hi chiang taka hriat theih a ni lo. BC 600 vela Juda-te Babulon sal-a an tân hmaa Arabian Peninsula kaltlanga Ethopia a Juda sumdawng veivakte thlah an nih a rinawm ber. Hei hian Falasha te serh leh sang lama Orthodox Juda-te aia an danglam deuh chhan pawh a hrilhfiah deuh kuar a ni. Entirnan- Falasha-te chuan Juda te'n an ngaih pawimawh em em Talmud an nei ve lo a, an Bible pawh Hebrai-a ziak lovin Falasha tawng thianghlim an tih mai Gee an tih mai hmangin an ziak a ni. Hetiangte a nih deuh nuai avang hian Falasha te'n Juda an lo inti ve ringawt pawh hi 1972-a Sephardic Higher Rabbinate te'n Falasha-te chu Juda-ah a pawm hma phei kha chuan inhnialna a ti tam hle a ni. Mahse, khawvel chuan he'ng Falasha-te hi 1985-a Ethopia rama tam nasa tak a tlak vak hma kha chuan a bengkhawn em em lo. Kha tam tlak lai khan Israel chuan Ethopian Juda, Ethopia leh Sudan rama awm 20,000 zet chu thlawhtheihna hmangin a thiarchhuak a, an ram 'Israel' lamah a phur haw a nih kha.

Lalnu atangin dawithiamnu
Seba lalnu hi Africa lamah chuan an chawisang hle a, chutih laiin ram dang leh sakhaw thenkhat chuan ngaihdan dang deuh an nei thung. Juda history lama miril thenkhat chuan he lalnu hi a taksa mawina leh duhawmna hmanga mi thlemthlu thin, dawithiam leh ramhuai ang hialin an chhuah tlat.

An sawi dan thenkhatah phei chuan a kete (leg) chu a hmul thur a, hei hi ramhuai chhinchhiahna angah tunhma lam chuan an ngai thin. He'ng historian-te sawi dan chuan, Solomona khan a lal in chhuatphah atan lungfim tak, thla pawh lang thei hial khawpa fim chu Seba lalnuin a rawn tlawh dawn tih a hriat khan a lo hmang a. Seba lalnu chuan chu lungfim chu tui emaw tiin a kawrfual chu a hlim sanga Solomona hian a ke chu a hmu ta a ni, an ti. An sawi zel dan chuan, he lalnu hi Jerusalem-ah hian ama duhthu ringawta kal a ni lo a, Solomona hian a hmaa inlan turin a ko a, he lalnu hian a tisa mawina hmangin Solomona chu mutpui turin a thlemthlu ta a ni, an ti leh zel.

He lalnu chanchin hi eng vanga a chhe zawnga inthlak chak viau mai nge maw a nih le? Solomona hunlai khan Middle East velah chuan hmeichhia lal atana neih hi thil thar a ni tawh lo, mahse Bible-a Seba lalnu a lan hnu hi chuan hmeichhe roreltu dang hriat tur an awm tawh mang lo. Chutiang a nih vang te pawh chu a ni mahna he lalnu thiltithei tak hi mipate khawvelah hlauhawm leh tihbaiawm taka a lan avang hian dawithiam leh ramhuai ang hiala an chhuah tak.

(Reader's Digest: Last Mysteries of The World atanga lehlin a ni)

Read more...

Ka Tawrh Hi Lalpan A Phal...

1960 leh 1970 chho vela tennis star Arthur Ashe kha mi tam tak chuan kan hre kher lo ang. Mihang mipa zinga US Open leh Wimbledon-a champion hmasa ber a nih bakah tennis inelna khawvelah hian hmasa ber nihna dang engemaw zat a nei a. A khelh chhung hian major tournament bikah pakhatna lawmman vawi thum a la a, chungte chu - U.S. Open (1968), Australian Open (1970) and Wimbledon (1975) te a ni.

1980 khan tennis khelh a chawlhsan a, chumi hnuah, 1985 khan Tennis Hall of Fame-ah lakluh a ni. Vanduaithlak takin 1988 khan AIDS natna a vei tih hmuhchhuah a ni a, 1983-a a lung an zai tuma thisen an pek atangin he natna hrik (HIV) hi a kai a lo ni a.

1992 khan he thu hi press conference-ah a sawichhuak ta a, a kum lehah a thi ta a ni.

Tihdam theih loh natna rapthlak tak a vei tih a puanzar hnu chuan khawvel hmun hrang hranga amah ngaisangtute hnen atangin lehkha tam tak a dawng thin. Chu'ng zinga pakhatah chuan tihian a inziak a: "Eng vang kherin nge Pathian hian he natna rapthlak tak vei tur hian a lo thlan mai che le?" tiin.

Arthur Ashe chuan tiang hian a chhang leta:

"Khawvel pum puiah hian naupang maktaduai 50 zetin tennis hi an khel tan a, an zinga maktaduai 5 chuan a khelh dan an zir zui a, chu'ng zinga 500,000 chuan eizawnna atana hman tumin an zir leh a, an zinga 50,000 chu hmun hrang hranga inelnaahte an chhuak a, chu'ng zinga 5,000 chuan Grand Slam an khel pha a, chu'ng zinga 50 chuan Wimbledon an khel thei a, chu'ng zinga 4 chuan semi final an khel a, an zinga 2 chauhin final an thleng thei a. Pakhatna lawmman no mawi ka chawi lai khan Pathian hnenah 'Engati nge keimah kher min thlan?' tiin ka lo zawt ngai miah lo a. Chuvangin, tuna natna hrehawm tak ka tawrh lai pawh hian Pathian hnenah 'Engati nge keimah kher min thlan le?' ti-a zawh ka tum reng reng lo."

('One paragraph that explains life' atanga lak a ni - Lalthlamuana Ralte)

Read more...

Israel Ram Naupangte Sum Dawn Dan

¢ Lalthakimi

Israel sorkar chuan January 2010 atangin Kitzbat Yeladim (naupang tanpui/enkawlna, kum 18 an tlin thlenga a pek thin) a tidanglam nual a, hetiang hian:

May ni 31, 2003 hma lama nau piang tan:
FA NEIH DAN DINHMUN & SUM DAWN ZAT TUR
Fa pakhatnain 165 sekel
Fa pahnihnain 165 sekel
Fa pathumnain 251 sekel
Fa palinanain 446 sekel
Fa panganain 336 sekel

Tihian in hrilhfiah dawn teh ang: fa pakhat nei chuan 165 a dawng ang, fa pahnih nei chuan 165+165= 330 a dawng ang, fa pathum nei chuan 251+165+165= 581 a dawng ang, fa pali nei chuan 446+251+165+165=1027 a dawng ang, fa panga nei chuan 336+446+251+165+165=1393 a dawng ang, fa parukna leh a chunglamah 336 belh chhoh zel tur a ni.

June ni 1, 2003 hnu lama piangte chuan hetiang hian sum an dawng thung tawh ang"

FA NEIH DAN DINHMUN & SUM DAWN ZAT TUR
Fa pakhatnain 165 sekel
Fa pahnihnain 165 sekel
Fa pathumnain 219 sekel
Fa palinain 252 sekel
Fa pangana leh a chunglam 165 sekel belh zel tur

Tiang hian i'n hrilhfiah leh ila: fa pakhat nei chuan 165 a dawng ang, fa pahnih nei chuan - 165+165=330 a dawng ang, fa pathum nei chuan 219+165+165=549 a dawng ang, fa pali nei chuan - 252+219+165+165=801 a dawng ang, fa panga nei chuan 165+252+219+165+165 = 996 a dawng ang, fa paruk leh a chung lamah 165 belh chhoh zel tur a ni. (100 sekel hi Israel ramah chuan kawngro su pha tak a ni.)

Hetianga kum bi-a then fel a lo nih avang hian chhungkaw tina naupangte sum dawn dan pawh rem fel nghal vek tihna a ni. Tin, chhungkaw thenkhat engemaw rokhawlhna avanga sorkar tanpui mek, hnathawk hlei thei lo dinhmuna dingte zingah phei chuan fa pathumna leh palinaah a chunga tarlante bakah hian sekel 116 pek belh chhah zel an ni bawk ang.

Israel ramah hian naupangte hian ngaih pawimawh an hlawh em em a, nu pum chhunga an awm lai atanga duat tak leh uluk taka enkawl an ni. An lo pian hnu-ah pawh check-up reng an ni a, an thla tam dan a zira an khaw hmuh theih dan, taksa than dan, ri hriat dan leh awrawl chhuah dan thlengin, an lu, kut leh ke, taksa bung hrang hrang than dan uluk taka measurement laa check vek an ni thin. Hei hian naupang- rual ban lo tur tam tak mi pangngai-ah a chhuah phah mek zel a ni. An pian hlim hian an thla tin tanpuina dawn tur bakah naute thil mamawh zual lamna tur an dawng bawk thin.

He'ng sum an dawn zawng zawngte hi an nu leh pa account-ah a lut nghal vek thin. Kum 18 an tlin thlengin sorkarin a enkawl char char a, chumi hnu-ah chuan sipai-ah te tangin hnathawk thei, mahni kutkea ding zo tura ngaih an lo ni tawh a, an thawk char char a, pension kum an rah thlen veleh sorkar bawkin a lo dawngsawngin a chawm leh char char thin. Naupang leh kum upate tan nghenchhan tlak a nih rualin taksa leh rilru-a rualbanlote tan nu leh pa nih a tling zo em em a ni. An kum lama teh lovin taksa leh rilru lama rualbanlote chuan a hranin tanpuina thla tin an dawng bawk a ni.

Bible-a kan hmuh ang hi a ni mai, hmeithai & fahrah hi an ngaihsak thlawt a, kawng engkimah ngaihhnathiam an ni zel a, sorkarin a ngaihsak ang chiahin sakhawmite pawhin an ngaihsak em em a, an koh miah loh pawhin an lam an hawi reng thin a ni.

Hmeithaiin tanpuina an dawng a, nu leh pa nei lote tanpuina te a awm vek bawk. Keini ramah te kha chuan an duh avang renga hmeithai pawh ni lo, fahrah pawh ni bawk lo te'n ngaihnep, hmuhsit an hlawh a, an tan thenrual kawm thlengin a timawm em em thin kha a ni a. Mizo nih tinuamtu YMA hi awm lo phei sela chuan hmeithai leh riangvaite tan hian chhiat tawh te hi a va rapthlak lehzual dawn em! Chuti chung chuan Pathian tih kan inti em em bawk si, inkhawm kawnga fel leh that hmel tak kan lan ang tal hi chuan mi chanhaite tan nghenchhan tlak nih tum ve ta ila, kan biak Pathian pawh kan tih lawm zual sawt ka ring thin.

Read more...

MFA League Khelh Chhunzawm A Ni

¢ Hmingsanga

Mizoram Football Association hnuaia division sang ber I Div League thawh hnihna chu March ni 23 atang khan khelh chhunzawm leh a ni ta. I Div league hi season tan tirh lam khan season hawnna atana khelh a ni tawh a. Tunah hian a thawh hnihna khelh chhunzawm a ni leh ta a ni. Season kal mekah MFA chuan I Div club te tan tournament a siamtha viau a, hunawl nei mang lo khawpin tournament an buatsaih sak a, hei hian tualchhung football ah nasa takin hma a sawn tir kan ti lo thei lo ang. Chumi rual chuan Inter Village football tournament khelh a ni a, District FA lam pawh an che tha a, II Div club te pawh an inkhel deuh reng bawk. He'ng avang hian Mizoram football pawhin a hma a sawn nasa hle.

Vodofone MFA League thawh hnihna khelh chhunzawmah hian, a thawh khatnaa che tha tak tak te pawh an che tha chhunzawm zel thei ang em tih sawi lawk theih a ni lo. MFA chuan league thawh hnihna khelh chhunzawmah hian club-te hmakhua an ngaih vang nia sawiin, 'free man' player pasarih leh 'on loan'-in player pahnih tun league khelh chhung hian lak belh an phalsak a ni. Hei hian club thenkhat player phai lam club an zawm avanga harsatna an neih a phuhruk sak mai thei. Hei vang hian league thawh khatnaa che tha lem lote pawh a league hmawr bawkna tournament-ah hian an dinhmun an rawn siamtha thei mai thei bawk.

Luangmual FC, league thawh khatnaa hmahruaitu chu league khelh hmasak lamah an chet mawi loh deuh avangin MFA chuan league atangin a suspend a, Luangmual FC chuan an hremna hi hlihsak turin MFA hnenah an ngen a. He ngenna hi MFA chuan ngun taka ngaihtuahin Lungmualo FC an hremna hi hlipin, point 10 hmua hmahruaitu Lungmual FC te hi point 4 paihsakin ngaihdam an ni. Tichuan league-ah hian I Div league-ah hian club pangate chuan league hi an khel ta a ni.

Club hrang hrangte dinhmun, an point hmuh san dan indawtin i'n thlir thuak thuak teh ang.

SSA FOOTBALL CLUB: SSA Football Club te hi club ding thar an ni a, 1 div club-ah an season khatnaah a che tha pawl an ni thei zel.

League thawh khatnaah hmahruaitu Lungmual FC point 4 paihsak an nih tak avangin tunah hian hmahruaitu an ni ta. Vawi nga khelhah an khingpuite vawi hnih hnehin, vawi hnih an draw a, vawi khat an tlawm a, an khingpuite lamah goal 7 khungin, an lamah goal 4 a lut thung. Tichuan point 8 hmuin hma an hruai mek a ni.

Tunhnaia MFA Cup, Kolasib-a khelh zawh takah khan quater final an thleng a, tun season-ah Independence Cup-ah finalist an ni bawk.

DINTHAR FC: I Division club zingah a daih rei ber pawl leh a tha ber pawl an ni reng thei. Mizoram pawn lamah pawh record tha tak lo nei tawh thin an ni.

League thawh khatnaah khan vawi nga khelhah vawi hnih chakin draw vawi khat an nei a, vawi hnih erawh a tlawm zawkah an tang. An khingpuite lamah goal 7 thunin, an lamah goal 6 lai a lut. Tichuan Dinthar FC te hian point 7 hmuin table-ah pahnihna dinhmun an hauh mek a ni.

Season hmasa an chet that tehreng nen, season kal mekah beisei an pha lo deuh. League-ah hian champion thei turin chance tha tak an nei mek.

RC FC: RC Football club hi an ropui khawp mai. Mizoram football chanchinah mellung pawimawh tak tak 'phun' an nei nual.

I Div-a an season awm vawi khatnaah Independence Cup-ah an champion nghal a, MFA Cup-ah champion an ni zui leh nghal zat bawk.

League thawh khatnaah pawh an che tha ang reng hle. Vawi nga khelhah vawi khat chakin vawi thum draw an nei a, vawi khat an chak lo thung. An khingpuite lamah goal 8 an thun laiin an lamah goal 8 bawk a lut. Tichuan RC FC te hian point 6 hmuin pathumna dinhmunah an ding mek a ni. Beiseina sang tak nena thlir tur RC FC te hian MFA League title hi an chawi leh lo ang tih sawi theih a ni lo.

LUANGMUAL FC: Lungmual FC te hian sawi tak ang khan point paihsak an nih hma chuan point 10 hmuin hmahruaitu an ni a. Vawi 5 khelah khan vawi thum chakin, vawi hnih an draw a, vawi khat an chak lo thung. An khingpuite lamah goal 8 an thun laiin an lamah goal 4 a lut.

Point 4 paihsak an ni chungin point 6 hmuin pathumna dinhmunah an ding thei tho a. Luangmual FC te hian point an hloh zawng zawngte hmu kir leh turin an bei nasa dawn tih a chiang a. An hmabak hi sawi thiam a har rih ang reng viau.

COLLEGE VENG FC: Hman atangin team tha tia sawi hluai tur an ni lem lo, mahse tualchhung player-te khawma team pangngai tak din thei an ni. Season kal mekah Trophy chawi nei lo mah se team pangngai tak an ni chunzawm reng tho.

College Veng FC te hian vawi nga khelah vawi khat chakin, vawi hnih an draw a, vawi khat an chak lo a. An khingpuite lamah goal 4 thunin an lamah goal 7 lai a lut thung.

College Veng FC te hian league table-ah a mawng phah lama a awm hlen an tum lo ang. Point 5 an neih hi tih pun tumin an inbuatsaih ngawrh viau.

FC KULIKAWN: India ram pawn atanga player chahlut thei an ni. Club ding rei tawh leh I div club zingah chanchin tha sawi tur ngah an ni chungin league thawh khatnaah chuan beisei an phak lo deuh. MFA Cup khelh zawh takah finalist an ni a, a vanduai zawkah an tang. League thawh hnihnaah hian beiseina an nei sang a. Thawh khatnaah khan vawi nga khelah vawi khat chakin vawi khat an draw a, vawi thum an chak lo. An khingpuite lamah goal thum an thun laiin an lamah goal 8 lai a lut. Table-ah a mawng phah niin, he dinhmun atanga talchhuak tur hian theihtawp an chhuah a. Beiseina an nei sang hle.

MFA league a champion team hian Trophy, Medal, certificate leh pawisa fai cheng nuai khat an dawng ang a, pahnihnain Trophy, Medal, certificate leh pawisa fai cheng sing 5 an dawng dawn. Heng bakah hian Fair play trophy dawngtu hnenah trophy bakah pawisa fai cheng sing khat, Best player hnenah Rs 5000, Top Scorer hnenah Rs 5000 pek a ni bawk ang.

Inkhelh apiangin Man of the Match thlan thin a ni ang a, MoM hian Rs 500 a dawng zel dawn a, club khel apiangin a chak zawkin Rs 3500 an dawng a, an chak lo zawkin Rs 2500, an in-draw chuan Rs 3000 ve ve an dawng tel zel dawn bawk a ni.

MFA League hi 3rd Bn MAP Ground, Mualpui-ah khelh a ni dawn. League match khelh tawp ni April ni 5-ah erawh chuan a rual vekin khelmual hrang hrangah tlai dar 3-ah khelh a ni ang. Ni khatah match khat zel khelh a ni ang.

Read more...

COMMON BEAUTY PROBLEMS

¢ Debbie Chawngthu

Vun natna hi chi hrang hrang a awm a, thenkhatin arngeng an buaipui laiin thnekhatin hmai thak te an buaipui a, chi hran hran a tam em em a ni.

Whiteheads an tih mai, arngeng a hmur var chi hi hawlphum ang thovin a buaipuiawm thei a. Whiteheads hi chu a rawn landan chu a hmaa a awmna ngi lovah a rawn var thek a, deh awlsam takin a awm thin. Hmaih pawh vun nem laiah an awm duh bik a ni. A tihreh nan chuan 'beauty grains' an tih hi an hmang thin a,hmuh a harsa deuh maithei a, mahse mahni pawhin a siam ve tehih tho a ni. Chini dip tak i neih chuan i hmang nghal mai thei a, mahse a hra chi anih chuan han rawt dip hmase phawt la, i hmang thei nghal chu a ni mai. Bawnghnute nen tihnawmin i hmai massage nan hmang la, karkhatah vawithum tih a tawk a, minute 5-8 chhung hmai massage nan hman thin tur a ni. Tin, buhkem hi chiah hnip ila, hmai nuai nan a hman theih bawk a, vun a tifai tha em em a ni. Mahse, hmai massage reng reng hian pawng nuai ngawt tur a ni lova, vun a chhiat belh theih avangin dim theih ang berin nuai thin tur a ni.

Arngeng hi pawng deh tur a ni lova, vun a tichhiain a ti hmelhem thei a, ser a siam thei bawk. Arngeng nei tan chuan tui leh theitui in tam a pawimawh a, nitin thei leh thlai hnah hring ei a tha em em a, thisen tifai theitu tur kan taksa mamawh ang kan hriat a pawimawh bawk a ni.

Mitvun val hi mi tam tak chuan kan buaipui em em a. A lo awmna chhan chu mut tlem lutuk vangte, hah lutuk vangte, rilru hah vangte leh ei leh in dik loh vangte a ni thei a. Mi han ena mitvun val kuau mai hi chu mut theih loh nei nasa mi ti ia kan sawi sual tam lovang. Mut tam hi taksahriselna atan a pawimawh em em a, i mu theilo thin anih chuan a chhan hre turin doctor rawn nachang hria ang che. Mitvun lai bawr hi amaha mawmna neilo a ni a, a chuar hmain a ro hma em em a, enkawl ngun a ngai bik em em a ni. Zantin i mut hmain i mit chu thil mawm hnawih ziah la, minute20 hnu velah lapua hnawmin hrufai leh la, chumi hnuah under-eye cream hnawih ang che. Under-eye cream hi lanolin leh almond inpawlh chi hi a tha hle a, vun rawng a ti eng thei a, vun chawmtu tha tak a ni bawk. Cream hi minute 10 hnu velah lapua hnawm bawkin hrufai leh ang che. Cream reng reng mitvun bawrah reitak chiah loh tur a ni, chiah rei chuan reiloteah mit a bui duh hle tih hriat a tha.

Mawm kan vun atanga lo chhuah tum hi kan vuna kaw chek chekah hian chhuak mai lovin a tang tang ta thin a, hei hian vun kua tizau zual thei a, hei vang hian vun tihfai ngun a tul a ni. Vun mawmah hei hi a zual a, chuvangin, vun pawnlang tihfai nan pawh medicated cleanser hman a tha. Cleanser-a 'ginseng' tel hi a tha lehzual a, vun a tifai mai nilovin kaw zau tawhte a tiziam thei a ni. Vunkaw zua tan chuan skin tonic nitina hman a tha a, tonic ah hian rose atanga siam an tha lehzual. I skin tonic chu fridge-ah dah la, i vun i tihfai zawhah lapua va chiah la, chu chuan i hmai i hru thin rawh. Nikhatah vawi tam tak hru thin la, i vun mawm lutuk tur a ziaawm thei ang.

Vun rang hi a nalh lo hle a,a awmna chhan chu mi a thau thuta a cher lehin a vun mar thin kha a mar ta lova, a rang ta thin a ni. Hei vang hian naupai te an nau neih hnua an dul a lo rang thin. Dul vel chauh a rang lova, hnute, mal vel leh ban bul lai te pawh hi a rang thei a ni. Vun rang tur venna tha ber chu a ran hmaa ngu taka nitin dul leh hnute velah mawm ngun taka hnawih thin tur ani. Tin, stretch marks remover te pawh a awm tawh a, regular taka inhnawih chuan vun rang a ziaawm thei khawp mai.

Read more...

Nui Lawks 49


J An veng information centre aurinna a bo a, tlangval pakhat hian a chhar ta hlauh a, lawmmanah retailer-ah khawnvartui a lak theih tih an puantir!
- 9862357301

J Motor-in tui an chawi thei a, mahse, a buaithlak ve ang reng, home delivery an ti thei lo! Anmahni dawrtute chuan tuikhur kal pelin an inah an va chawi thin!
- 9612566920

J Zirtirtuin, "Homework ti lo ding rawh u," a tih chuan an ding sap sap a. Naupang pakhat chu kawi tawkin a lo ding a, zirtirtuin, "Kha nang kha i va ding kawi bik ve?" a tih chuan, "Sir, a chanve chauh ka ti a," tiin a lo chhang!
- 9612698042

J Pa: Tun tum MLA inthlan chu ka'n ding ve teh ang.
Nu: Awi!! I a ta elo?
Pa: Uai! MLA ni turin at a lo ngai a ni maw?
- 9612589095

J Nula senior pakhat pawh kha, amah a paukhauh leh fel chi a lo ni kher bawk a, a nu leh pa te ngei pawhin pa enin an en!
- 9862577575

J Tlangval pakhat pawhin a bialnu hnenah, "Ka rawn miss call che ang a, lo chhang rawh aw," te a ti vel!
- 9436159317

J Pitar pakhat pawh Sande Sikul-ah a inhlei lutuk a, Beginer-ah an sawn thla daih!
- 9612062366

J A sachek ei chak lutukin bawng dinglai mawng a fawp tawp.
- 9436142677

Read more...

Chanchin Maksak 68


Pa maksak Lalu-a
India ram politician lar Lalu Prasad Yadav-a hi, vawi khat chu, zirlai pawla a inhman laiin Patna khawpuiah sorkar nen an inbei a, an inbei nasa bawk a, an thawm a ring hle. Chutia an buai mangan lai tak mai chuan amah Lalu-a ber chu a bo ta daih mai. A thawhpuite chuan chutia thanhnemngaih lai taka a bo daih mai chu a ngaihna an hre lo hle a, tuman a chin an hre si lo. Chutah 'Lalu-a a thi' tiin thu a thang ta chiam mai; a thiante chu an bangbo em em mai a, an rin zawn ta ringawt mai a ni.

Nakinah chuan an zinga mi Nitish Kumar-a (tuna Bihar chief minister) chuan a unaupa ranvulhnaah a va hmu ta hlauh mai.

Ani lah chuan ei a lo siam hauh hauh mai a, engti zia nge tia an han zawh chuan, "Eitur ka siamsak che u mawle! Inhnawhpuar ka rawt dawn chuan in duh dawn si lo a," a lo ti sam et a! A thih thu pawh kha ama vawrhdarh tho a lo ni lehnghal!



Khuangruah
Thuziakmi Mark Twain-a leh thuziakmi ve bawk Dean Howells te inkawm khan, an inzui nasa bawk a, chanchin an ngah asin.

Vawi khat chu an inkhawm bang hi ruahin a chhu hrep mai a, Howells-a chuan Twain-a chu, "A hanin i ring em?" tiin a'n zawt a ni awm e. Twain-a lah chuan eng danga chhang ta lo chuan, "|um dangah chuan a han ziah chu a nih kha," tih zawngin a chhang!

Read more...