Monday, March 29, 2010

Seba lalnu kha

¢ BCh-a

Bible-a Lalte Pakhatna bung 10-ah chuan Seba lalnuin (Queen of Sheba) Solomona thu khirhkhan tak tak a zawh thu leh Seba lalnu zawhna reng reng Solomona'n chhan theih loh a neih loh thu kan hmu. Mahse, he hmeichhe mak leh dangdai tak, Arabia lam atanga rawn kal hi tunge maw a nih chiah le? A nih leh Falasha, Seba thlah kal zel nia insawite hi tute nge an nih chiah?

Seba lalnu ti bakin Kristiante chuan a hming dang kan hre lo, hriat tur pawh a awm hek lo. Bible-ah a hming a lang ve tih mai loh chu a awm tak tak em tih finfiah theihna dang a awm chuang lo. Mahse, he Seba lalnu ni thei mai awm chanchin hi Middle East leh Africa vela mi chengte chuan thawnthu-ah an lo nei nual mai. Tunlai khawvela chengte tan chuan he Seba lalnu chanchin hi a mak ta telh telh a ni ber e.

Bible-ah hian Seba lalnu tiin tarlan a ni a, a hming tak tarlan a ni lo. Islam sakhaw lehkhabu thianghlim Koran leh Arabian leh Persian thawnthu-ahte chuan he Seba lalnu hi a hming Bilqis tia tarlan a ni. Ethopia lam thawnthu-ah chuan Makeda chhim lam lalnu (Makeda Queen of South) tia tarlan a ni thung. He lalnu hian literature leh Ethopian tradition-ah pawimawhna a nei thuk hle niin a lang a, Ethopia roreltute leh an tihduhdah thin Falasha (Ethopian Jews- Ethopia-a Juda hnamte) te chuan he lalnu hi an thlahtu niin an pawm a ni.

Thuthlung hlui lam lehkhabu 1 Lalte hi Seba lalnu chanchin kan hmuhna hmasa ber a ni. A thawnthu-ah chuan Seba lalnu hian Solomon-a finna chu lo hriain, thu khirhkhan tak tak zawta a finna chu enchhin tumin Jerusalem lam panin a zin chhuak ta a ni. Historian-te chuan Seba lalnuin Solomona hmu tura a zin chhuah hunlai hi BC 965-926 vel kha niin an ring.

Solomona hian Seba lalnu zawhna zawng zawng chu a chhang thei vek nia sawi a ni a, mahse, Seba lalnu hian eng zawhnate nge a zawh sawi a ni lo thung. Rindan tlanglawn takah chuan Solomona hnena Seba lalnu zawhna ni thei awm tak chu kum tam tak an inhlan chhawng zel nia sawi a awm. Seba lalnu hian a tlangpui thuin thil inan lohna leh danglamna lam a zawt tlangpui niin an ring. Entirnan, Seba lalnu chuan Solomona chu pangpar in ang tak tak pahnih, a tak leh a lem, an danglamna hriat theih reng reng loh a entir a. Solomona chu pangpar dik tak zawk a zawt ta a ni. Mahse chu lal fing tak chuan khuai (bee) hmang tangkaiin pangpar dik tak zawk chu awlsam tein a hrechhuak ta mai a ni (khuai hian pangpar dik tak zawk chu a rawn bawm a, pangpar lem chu a bawm duh lo). Seba lalnu hian zawhna dang a zawt leh a- pasarih a chhuak a, pakua a lut, pahnihin intur an siam a, pakhatin a in, tiin. Solomona chuan fing taka chhang lehin- Hei hi hmeichhe thla tin hunbi chungchang sawina a ni (ni sarih chhung a awh), naupaiin a zui a (thla kua a awh), nu hnute tui a entir leh a, nautein a nu hnute a hnêk thu a ni, tiin a a chhang a ni awm e. Mahse he'ng thute hi Bible-ah a lang lo.

Lalnu tak tak chu
He lalnu hi khawilam atanga rawn kal nge? He Seba lalnu lalram hi Arabian Peninsula chhimchhak lama ram pakhat, tun hnua Yemen ni ta hi niin mithiamte chuan an sawi. He thlaler lalnu hian a lalram atanga Km 2,000 zeta hla- Jerusalem hi Solomona finna hriat chian duh vang ngawr ngawra pan a ni thei ang em? Hei aia chhan pawmawm tak tak a awm niin an sawi. Juda lalte'n Middle East vela insumdawn tawnna kawng pawimawh tak tak chungah thuneitu nihna an hauh a, hei vang hian Seba lalnu sumdawnna hlawk tak- myrrh (mura kan ti a ni awm e, thing hnai atanga siam perfume atana hman chi) leh incense (hal rimtui) te chu dinhmun hlauhawmah a ding ta. Bible uluk taka kan chhiar chuan Seba lalnu hi a thil tumah a hlawhtling ni ngei tur a ni, Solomona nen hian sumdawnna lamah pawh inremna thûk tak neiin a haw leh ta a nih kha. Seba lalnu hian Solomona hi rangkachak talent 120 leh englo rimtui tam zet mai leh lunghlute a pe a, hemi chhan let nan hian Solomona pawhin Seba lalnu chu a duh zawng zawng, a dil apiang chu a pe a. Chuti chuan a awmna ram lamah a hawng leh ta a, a hote nen, tih kan hmu.

Lalnu thlahte chu
Thuthlung hlui-ah hian he'ng lal pahnihte hi an inzah tawn a, an inngaisang hle tih chauh kan hmu a, chutih laiin Ethopian national epic (Ethopia rama mi langsar te chanchin ziahna) Kebra nagast ('Lal chu chawimawiin awm rawh se' tihna a ni awm e) an tih mai, kum zabi 14-na lai vela an ziahah chuan Solomona leh Seba lalnu (Makeda) hi inhmel duhin, Seba lalnu hian Solomona lakah hian fapa Menelik a hring nia tarlan a ni a, Menelik hi Ethopia-a lal hmasa ber nia tarlan a ni bawk. Thlahtute lamah Davida thalbe atanga chhuak ve bawk an nih vang hian Ethopian emperors-te chuan Middle Ages lai vel atang khan lal an ban hma 1974 thleng khan 'Lion of Judah' tiin an invuah thin a, an national emblem-ah pawh arsi kil ruk nei (hexagonal star), Juda te'n Davida arsi (Star of David) an nei ang deuhin an hmang ve bawk.

Ethopia-a roreltute Solomona leh Seba lalnu-te thlah nia an inchhal bakah hian, Ethopian te'n an tihduhdah leh an hnuaichhiah em em thin Falasha-te pawh Juda niin an insawi ve tlat. He'ng- Falasha, Ethopian Jews an tih maite hi Bieta Israel (Israel inpui- tihna) tiin an insawi nghe nghe. Anni hi chuan Solomona'n a fapa Menelik-a Ethopia lama zui ve tura a tirh Juda puithiamte thlah kal zel niin an insawi ve thung.

Falasha-te lo chawrchhuahna hi chiang taka hriat theih a ni lo. BC 600 vela Juda-te Babulon sal-a an tân hmaa Arabian Peninsula kaltlanga Ethopia a Juda sumdawng veivakte thlah an nih a rinawm ber. Hei hian Falasha te serh leh sang lama Orthodox Juda-te aia an danglam deuh chhan pawh a hrilhfiah deuh kuar a ni. Entirnan- Falasha-te chuan Juda te'n an ngaih pawimawh em em Talmud an nei ve lo a, an Bible pawh Hebrai-a ziak lovin Falasha tawng thianghlim an tih mai Gee an tih mai hmangin an ziak a ni. Hetiangte a nih deuh nuai avang hian Falasha te'n Juda an lo inti ve ringawt pawh hi 1972-a Sephardic Higher Rabbinate te'n Falasha-te chu Juda-ah a pawm hma phei kha chuan inhnialna a ti tam hle a ni. Mahse, khawvel chuan he'ng Falasha-te hi 1985-a Ethopia rama tam nasa tak a tlak vak hma kha chuan a bengkhawn em em lo. Kha tam tlak lai khan Israel chuan Ethopian Juda, Ethopia leh Sudan rama awm 20,000 zet chu thlawhtheihna hmangin a thiarchhuak a, an ram 'Israel' lamah a phur haw a nih kha.

Lalnu atangin dawithiamnu
Seba lalnu hi Africa lamah chuan an chawisang hle a, chutih laiin ram dang leh sakhaw thenkhat chuan ngaihdan dang deuh an nei thung. Juda history lama miril thenkhat chuan he lalnu hi a taksa mawina leh duhawmna hmanga mi thlemthlu thin, dawithiam leh ramhuai ang hialin an chhuah tlat.

An sawi dan thenkhatah phei chuan a kete (leg) chu a hmul thur a, hei hi ramhuai chhinchhiahna angah tunhma lam chuan an ngai thin. He'ng historian-te sawi dan chuan, Solomona khan a lal in chhuatphah atan lungfim tak, thla pawh lang thei hial khawpa fim chu Seba lalnuin a rawn tlawh dawn tih a hriat khan a lo hmang a. Seba lalnu chuan chu lungfim chu tui emaw tiin a kawrfual chu a hlim sanga Solomona hian a ke chu a hmu ta a ni, an ti. An sawi zel dan chuan, he lalnu hi Jerusalem-ah hian ama duhthu ringawta kal a ni lo a, Solomona hian a hmaa inlan turin a ko a, he lalnu hian a tisa mawina hmangin Solomona chu mutpui turin a thlemthlu ta a ni, an ti leh zel.

He lalnu chanchin hi eng vanga a chhe zawnga inthlak chak viau mai nge maw a nih le? Solomona hunlai khan Middle East velah chuan hmeichhia lal atana neih hi thil thar a ni tawh lo, mahse Bible-a Seba lalnu a lan hnu hi chuan hmeichhe roreltu dang hriat tur an awm tawh mang lo. Chutiang a nih vang te pawh chu a ni mahna he lalnu thiltithei tak hi mipate khawvelah hlauhawm leh tihbaiawm taka a lan avang hian dawithiam leh ramhuai ang hiala an chhuah tak.

(Reader's Digest: Last Mysteries of The World atanga lehlin a ni)

Related Posts :



No comments:

Post a Comment