Monday, May 24, 2010

Lalsawta a lal lo sawt, a lal leh sawt

School education, higher and technical education, law and judicial leh parliamentary affairs te a chang a, mahse, May ni 11-ah banna a thehlut. Lalsawta ni mah se a lal lo sawt a, mahse, ni 17 atangin a lal leh sawt.

"A banna hi ka pawm dawn lo a, Thawhtan atangin a hna a zawm leh ang," tiin chief minister-in Inrinni, May ni 15-ah a puang a, a sawi ang chuan Thawhtanni atangin Lalsawta chuan a hna a zawm leh ta a ni. Sarva Shiksha Abhiyan (SSA) & Rashtriya Madamik Shiksha Abhiyan (RMSA) General Body Meeting vawi 7-na Chief Minister Office Conference Hall-a neihah pawh hemi ni hian a tel nghal.

Hemi ni vek hian minister Lalsawta ban chhan- technical entrance examination result tihsual chungchangah exam buaipuitute zinga mi 6 suspend an ni a, result hi May ni 24-a en that leh tura tih a nih thu pawh Mizoram sorkarin a puang.

Exam huaihawttu, higher and technical education deptt. hnuaia technical wing-a thawk, an wing hotupa joint director leh a hote, examination officer 1, training and placement officer 2 leh data operator 2 te suspend an ni a, anniho dahthain he wing hi chhui a ni dawn nia hriat a ni.

Entrance result hi May ni 24-a en that tur a nih thu sorkar chuan thuchhuah siamin hemi ni hian a puang a, hemi ni-ah hian chief minister Lal Thanhawla chuan a office chamber-ah technical entrance exam result ennawn that lehnaa tel tura ruatte- H Raltawna, IAS (Rtd), Dr LN Tluanga, Dr Hom Choudhury leh Rev Chuauthuama te a kawm a ni. Result ennawn tura ruatte pui tur hian lecturer-te appoint belh ni se an ti.

Result ennawn turte hian May ni 24-ah hna tan se an ti a, chemistry answer key chu siam dik hmasak phawta, chutah chemistry answer sheet zawng zawngte chu ennawn vek a ni ang. Hemi zawh hian 'tabulate' a ni ang.

Inhmuhkhawmah hian H&TE minister Lalsawta, parliamentary secretary Chawngtinthanga, H&TE secretary Esther Lalruatkima te an tel.


Ding lamah beram, vei lamah kel
May ni 15 a ni a, Chief minister Conference Hall-a thutthlengte chu a khat tha hle. Thuthar lakhawmtute'n press conference kotu, Mizoram chief minister an nghak a ni. Current a awm loh avangin air conditioner a hman theih loh a, a uap hle.

Chawhnu lam dar 2:37 velah current a awm a, dar 2:42 velah chief minister chu a rawn lut nghal; home minister R Lalzirliana leh parliamentary secretary Chawngtinthanga te'n an tawiawm. Official lam atangin secretary to chief minister LR Thanga leh higher and technical education secretary Esther Lalruatkimi te'n an rawn zui lut bawk.

Chief minister Lal Thanhawla a tawng ta: "Vawiinah 'rawn leng rawh u' ka tih nachhan chu, chief minister thingpui in zeuh zeuh in duh ka rin vang a nia..."

A sawi zawm leh a: "Tin, chu lo lehah chuan Inrinni leh Sunday-ah te hian news in van thin em a, chuvang a nia," a'n ti leh a, thuthar lakhawmtute chu an nui deuh hak a.

Inrinni-ah 'activity' a tlem thin avangin chanchinbumite hian Thawhtan issue atan news an van thin tak tak a! Chu chu chief minister hian fiamthu thawh nan a hmang a ni.

Press conference hi eng vanga ko nge a nih puanzar ni lo mah se minister Lalsawta banna a pawm leh pawm loh chungchang puang tura ko a nih erawh rin a ni. Mahse, UGC-in Mizoram college hrang hrangte tana sum a rawn sihchhuah dan sawiin bul a tan teh daih a!

Higher and technical education changtu a ni lo a, mahse, University Grants Commission hnen atanga March thla chhunga sum dawn zat, college hrang hrangte ta tur, women's hostel sakna tur te, college tihhmasawnna atana hman tur te a sawi a, a ding lama thu, higher and technical education secretary-in a tui hnih ve bawk.

Higher and technical education secretary chu he department hotu ber ni mah se technical entrance examination result tihdik loh chungchangah a him tih a chiang ta. A ding lamah a thu reng a ni!

Rei lo teah kel pawh a chiang nghal mai...

"Rulling party hmasaa rinawmte'n kan sorkar an timualpho ta a ni," tiin technical entrance test result dik loh chhan a sawi a, sorkar hnathawkte'n sorkar tihmualpho tumin result an tidik lo lui niin a sawi.

Sorkar tihmualpho an tum tih sawi nan hian 'sabotage' tih tawngkam hial a hmang.

Chief minister hian thil pathum, 'mak' tih em em a nei; minister leh parliamentary secretary leh deptt. secretary te'n an hriat hmain MZP te'n result dik lo an hre ziah niin a sawi a, thil dik lo a awm tih an hriatin press-a kal lova deptt. secretary emaw hnena an thlen lo thin chu mak a tih thu a sawi a, a tisualtu na taka hrem turin sorkarah an phut miah lo niin a sawi bawk. Chu'ng thil pathum chu mak a tih thu sawiin, "Inzawt ve mah ula engtinnge in chhan dawn?" tiin thuthar lakhawmtute a zawt nghe nghe.

Technical entrance exam buatsaihtu, higher and technical education deptt. hnuaia technical wing demin, thil dik lo a awm tih an hriatin he wing-a officer-te hian, minister an hrilh lo a nih pawhin secretary emaw tal an hrilh lo niin a sawi a, "MZP puan phawt kha an nghak tlat a ni," a ti.

Technical wing a dem thu sawi zawmin chief minister chuan, minister hnenah pawi an tih thu an sawi miah lo niin a sawi a, "Engatinge 'ka pu, heti khawp hian i lu kan tihai a' an tih loh?" a ti a, "puitling tak" leh "patling tak"-a a ban hnuah pawh pawi an tih thu an hrilh lo niin a sawi bawk.

Chutiang thilte a sawi hnu-ah: "Insider-te'n sorkar 'sabotage' an tum a, sorkar tihhminghliau an tum a ni tih hi ka chiangin ka hria," chief minister chuan a ti.

"A chhunga mite'n sorkar lu tihhai an tum avanga an tih a ni," tiin a sawi zawm a, "Rulling party hmasaa rinawmte'n kan sorkar an timualpho ta a ni," ti bawk. "A tirah ka chiang nghal," a ti a, hetiang hi department dangah pawh a tam niin a sawi nghe nghe.

Chief minister hian technical wing-a thawkte hming a lam ri diat diat a, technical wing hi an chhui tur thu pawh a sawi. An chhui hun tur chungchanga press mite zawhna chu, "A hun takah," tiin a chhang a, a hnu-ah erawh, "Chhui vak pawh a ngai lo ang, an tlem bawk a. A zim em mai an kar hi," a ti leh thung.

Minister Lalsawta'n a mawhah laa banna a thehlut chu fakin, "A puitling hle a ni...dikna a duhzia a tilang a ni..." a ti a, "A banna hi ka pawm dawn lo a, Thawhtan atangin a hna a zawm leh ang," a ti.


Tihpalh nge Tihluih?
Chief minister sawi dan chuan technical entrance examination result tihdik loh hi 'tihluih' a ni a, tihluihah pawh sorkar tihmualpho tumna a ni!
A changtu minister sawi danah erawh 'tihpalh' liau liau a ni.

Banna a thehluh ni, May ni 11-ah khan Zozam Weekly chuan minister Lalsawta hi a chenna inah a kawm a, "Ka mawhphurhna a ni a, he thil dik lo-ah hian moral responsilbilty ka la e," tiin a sawi.

"Kan tisual a ni," a ti a, chutih rual chuan result tihsual hi tihsual luih a ni lo tiin a sawi thung.

"Theihtawp kan chhuah a, amaherawhchu, tihsual palh a awm ta tho a. Tihsual luih ni lo mah se a pawi a, a nghawng pawh a lian tham a, chu chu pawi ka ti em em a ni. Chutah chuan a mawhphurtu chu ka ni," a ti.

"Kan fimkhurzia leh tisual lo tura kan inchah nasat dan hi sawi ta ila midang tan chuan thil ninawm te pawh a ni thei ang. Amaherawhchu, kan tisual miau a, chutah chuan moral responsibility ka la a ni," a ti bawk. Chief minister chuan he thil hi sorkar tihmualpho tumtute tihsual luih nia sawiin, a tirah a hre daih tawh niin a sawi a nih kha. Chief minister hian lo hrilh se minister tan 'moral responsibility' lak a ngai lo ang a, ban pawh a ngai lo ni mai tur! Mahse, minister hian banna a thehluh dawn hian midang a rawn lo niin a sawi ve bawk a, lo inrawn se chu engkim an hre dun ang a, ban kher pawh a ngai lo mai tur a nia!

Official emaw ministry emaw, technical entrance test buaipuitute emaw, tumah a dem lo a, "Theihtawp kan chhuah chungin tihsual kan nei a ni mai. Tumah dem tur ka nei lo. Kan tihsual chu a pawi em a, ka kian mai hi a tha a ni," tiin minister chuan a sawi a, chief minister erawhin sorkar 'sabotage' tumtute thil tih niin a sawi thung a, a dem hle bawk.

May ni 12-ah chief minister-in thuthar thehdarhtute kawmin, higher & technical education-in an brochure tihchhuahah answer sheets re-checking/re-evaluation theih loh anga dan an lo neih chu "dan chhe tak a ni," a ti a, "Result reng reng enthat a ni lo ang tih hi a tlanchhe saa kal, dik loh tum an ni a, engtikawng mahin ka pawm thei lo a, ka thiat nghal a ni," a ti. May ni 15-a thuthar thehdarhtute a kawm tum erawh chuan, amah tawiawmtu parliamentary secretary Chawngtinthanga chuan 'thiat' ni lovin 'relaxed' tiin a sawi thung.

May ni 12-a thuthar lakhawmtute a kawm tum hian chief minister hian higher and technical education brochure Rs. 400 man chu "Brochure to pawl tak a ni," tiin a sawi a, "Tu publish leh tu print nge tih hriat theihna pawh a awm lo a, department ang leh sorkar ang pawhin dik lo kan ti hrim hrim a, a hralhna sum hi khawnge a luh tih pawh kan en a ngai dawn a ni," a ti. He brochure hi Rs 400 man a ni lo a, exam fee Rs 400 pete hnenah he brochure hi a thlawnin an pe a ni zawk. Rs 400 atang hian sorkarah Rs 150 an chhung a, a la bang Rs 250 chu technical entrance examination buatsaih nan an hmang thin.

Read more...

Mawhphur ngam hruaitu kan mamawh

Chhangchhe in-a naupang inkhualtelem hi- an hlim viau emaw tih laiin an inhau a, an inhau bur bur emaw tih laiin an nui tlang leh ang rawih rawih a! Darthlalang te hi amahin a lo keh ringawt a, dawhkan te hi amahin a lo tlu ringawt thul, a chang leh kil khatah a dawih deuh an lo tap a, tu velh mah an lo ni lo tlangpui a! A titu hriat miah lohva thil thlengte hi a tam khawp a, a mak tak tak a nia!

Chutiang vel chu kan ni!

Mizoramah hian a titu hriat loh, thil thleng ngei si a tam ta em em a, a mawhphurtu hriat loh, thil thleng ngei si te... a tam mai!

Mi ramah chuan an football team chak lo se mawhphurtu, 'ka mawh a ni e' titu an awm a, rel chesual se 'ka thiam loh a ni' titu an awm, hlemhletna haichhuak se a titu leh a mawhphurtu an awm zel bawk. Keini-ah chuan chutiang chu kan nei ve ta thin lo; kan fel em vang leh kan thianghlim em avang tea chutiang chu nei ve ta thin lo ni ila a lawmawm dawn tehlul nen, chutiang ni hauh lo chunga mawhphurtu nei ngai chuang lo kan han ni hi a vanduaithlak ngawt mai.

Mizoramah hian corruption a tam em em niin an sawi thin; tin, media lamah pawh corruption chungchang hmuh tur a awm zeuh zeuh a, hlemhletna hailan te pawh a awm ve ta nual mai. Mahse, mak tak maiin a mawhphurtu an awm ngai lo a, a titu an awm loh chu thuhran, a mawh phurtu an awm khat khawp mai. Official level-ah emaw ministry level-ah emaw a mawhphurtu an awm lo deuh zel a, a makin a pawi khawp mai.

A tawi zawngin sawi ta ila- kan hruaitute zingah, kan miliante zingah, kan minister-te leh officer liante zingah hian 'keimah vang a ni' ti an awm ngai lo. Chu chuan thil pahnih a tarlang awm e.

Pakhatnaah chuan- ministry level leh official level-a kan hruaitute hian an hnaah neitu rilru leh thahnemngaihna rilru an pu lo hle tihna a ni. 'Kan ram inrelbawlnaah hetiang chanvo hi ka chelh a, a chhiat a thatah mawh ka phur a ni' an ti rilru hauh lo tihna a ni.

Pahnihnaah chuan- mahni inthiam lohna kan nei lo tihna a ni. Mihring chuan thil a tihdik lohvin pawi a ti a, mahni inthiam lohna a nei thin. Kan mi pawimawhte hian chutianga mahni inthiam lohna chu an nei ngai lo a ni mai thei. Tin, a mipui nawlpui pawh hian kan nei vak lo emaw'n chu aw a tih theih. Chu chu khawvel sawi dan ni se, a sakhua zawngin sawi leh ta ila, hetia thil dik lo kan tih chang te, thil kan tihsual chang te hian, "Ekhai! I ti dik lo tlat mai," tia hrilhtu Pathian kan nei lo tihna a ni ang. Trinity ringtute tan chuan, Thlarau Thianghlim-in thil i tihsual changin i tisual tih a hrilh tur che a ni a, chutianga hrilhtu che an awm lo a nih chuan Thlarau Thianghlim nen in inpawl ngai lo tihna a ni mai thei. Engpawhnise, chutiang chu kan hruaituteah hmuh tur a awm lo tihna a ni ang e, thil dik lo-ah a mawhphurtu an awm ngai loh danah!

Tunhnaiah kan minister pakhat chuan a department enkawl-a thil dik lovah mawh inbelin, 'keimah vang a ni e' tiin banna a thehlut a, mahse, pawm a ni lo. A hna ngai a thawk leh. Hei hi eng nge a awmzia ni ang? Dantewada District-ah Naxalite-hovin CRPF engemaw zat an thah kha India ram home minister chuan mawh inbelin banna a thehlut a, ani banna pawh kha pawm a ni lo. Mahse, India ram mipuiin an hrethiam niin a lang. Kan minister banna pawm a ni lo a, a hna a thawk leh. Mipuiin an hrethiam ang em aw? A chiang thuai ang.

Read more...

DIK DUH VANG A NI EM?

¢ HC Vanlalruata

Nikum leh kumin chu kan thalai technical lama zirna sang zawk zir tumte zinga an thiam dan ena thlanna tur technical entrance test kan tih mai result chhuah chungchang kan buaipui a. Hemi kum hnih chhung vek hian Mizorama zirna sang ber University-in zirtirtu tur a lak tum danah kan buai hle bawk.

Kuminah hian technical entrance test hi nikum lama thil fello awm tawh avangin an fimkhur hle tawh tura ngaih a ni a. Chutih laiin hmanhmawh lutuka result tar chhuah tum a ni si hi a mak hle. Zirlai 1,500 chuangin April ni 22-ah ekzam an bei chungin an result hi April ni 23-a tichhuak hman ngei turin hotu sang lamin an nawr a. Thawktute’n theihtawp chhuaha April ni 22 zanah tlaivar zaka zirlaite chhanna lehkha an endik hnu-ah a tukah result hi hmanhmawh taka buatsaih a ni chho a. Mizote chu hmanhmawh chi kan lo ni bawk nen thim hlimah chuan result ngaichangte thin a rim hman hial a. April ni 23 zan laiah Minister-n a hming a ziah hnan hnu-ah an tar chhuak ta a nih kha.

Result a chhuah hnu hian thil diklo a awm nia sawi a nih tak avangin a diklo ngei nia hria-in ennawn a ni leh ta vek a. Mahse Chemistry subject-ah answer key a dikloh vang nia sawiin result pawh ennawn that leh ngai nia sawi a ni a. Hemi thil avang hian Higher and Technical Education changtu Minister chuan banna a thehlut a. May ni 11-a banna a thehluh chu pawm a nih tak loh thu Chief Minister-in May ni 15 khan a puang a. Heta mawhphurtute hi he department-a Technical Wing-a thawkte nia sawiin an hming pawh puan chhuah a ni a. Chu’ng mite chu nimin mai khan an hna atanga chawlh lailawk tir (suspend) an ni ta a ni.

Hemi thil thleng, a bikin official-te hming puana suspend an nih tak thu-ah hian dikna duh vang a nih chuan a tha hle ang a. Hotu lian zawk lamin an himna atana an hnuai amite inthawina’na an hlan mai a nih erawh chuan a fello khawp ang. Engpawhnise hemi thil hi chhui a nih tur thu Chief Minister-in a puang a. Chhuitute report lo ngaihchan phawt chi a ni ang.

Mizoram University-a zirtirtu lak chungchang pawh hi ngaihtuah chian ngai a awm. Keima mimal ngaihdanah chuan autonomy nei University thiltih danah pawn lam mi, zirlai pawl ang chi inrawlh hi tha ka ti lova. Mahse, inrawlh ngai khawpin thuneihna pumbilhtute’n thil an tih chuan inrawlh a tul niah erawh ka ngai. A chhan chu thufingin ‘Power corrupts, absulute power corrupts absolutely’ a lo tih vang a ni a. Thuneitu-in a thuneihna sang tak kha thil tha tihna’n a hman chuan a tha hle thei a, a thalo zawnga a hman erawh chuan a pawi thui thei hle tlat a ni.

Zirtirtu laknaah hian academic record tha ber ber, naupang tet atanga thiam thei filawr lak hi chu a tha em em a. Chutih rualin mitinin opportunity inang tlang kan neihna palzut lutuka interview hmachhawn thei hauhlo tura tih hi a felhlel tho. Interview-ah a tha chu an tling mai ang. Chubakah state board leh India rama board hrang hrang leh University hrang hrang hi mark inren hleih tak an ni tih hre pha ve ruai ruai kan ni a. Ekzam ho naah graduate aia M.Phil leh Ph.D te an hniam zawk tawhna daihriata lo hre ve tawh ka ni bawk. A thiam lak kan duhna tak tak a nih chuan thil hi a tha mai a, khawi University chhuak emaw lak duar bik tumna emaw a nih erawh chuan a dik lovang.

India rama kan service sang ber IAS etc. ekzam tur pawhin graduate chin chu an phal vek mai a. Ekzam an phal sak veknaah khan a tha zual leh thiam filawr chauh an tling leh mai a. Kan ram sorkar hnungzang ruh a la mawih awm kan hre lo. Tuna zirtirtu laknaah pawh hian a hniam ber pawh MA nih ngai a ni a, NET/JRF neih ngei ngei a ngai bawk si a. Chutiang neite chu interview tir ve ni mai se, a tlinglo chu Mizo an ni emaw BHU chhuak an ni emaw tla ta mai se tih hi ‘natural justice’ zawk chu a ni.

Thil reng rengah hian kan duh fir a tha a. A tha leh dik kan duhna tak takah hian a saptawng takin ‘in good faith’ a kan tih chuan thil hi a fel thin. Chhan dang paipawn ru chunga thil tha duh anga lan tum hi miin min hre chhuak leh fo tih hi thudik a ni. A tha ber kan duhna kan kalpuina kawng reng rengah thinlung taka a dik leh tha duhna neia thiltih a nih phawt chuan miin min sawisel rei tak tak lovang. Thinlung diklo leh tum chhe tak (ulterior motive) nei kan nih erawh chuan kan mualpho leh thin zawk dawn a ni.

Read more...

Chhiarpui leh Sakawlh?

May ni 15 chawhma lam dar 8:30-ah khan Chief Minister Bangla-ah chhiarpui 2011 tan a ni. Mizoram bakah Jammu & Kashmir, Rajasthan leh Bihar-ah te pawh hian chhiarpui hi tan a ni. Tun tumah hian a vawi khatna atan National Polulation Register(NPR) chu chhiarpui ruala neih tum a ni.

Chief minister Lal Thanhawla leh a nupui Lal Riliani te chu chhiarpui lehkhabu-ah ziahluh hmasak ber an ni.

Chawhma dar 9:30-ah census official-te chuan chief secretary hmuin a Chhiarpui lehkhabu-ah a hming an ziak lut ve leh.

Chhiarpui 2011 hi thuang hniha thawh tur a ni a, thawh khatna chu kumin April atanga September thla tawp thleng neih tur a ni. Thawh hnihna chu nakkum February ni 9 atanga February ni 28 thleng neih a ni ang.

Chief Minister chuan Population Census of India 2011, February- March 2011-a neih tur chu a vawi 15-na a nih thu leh he hna hautak tak, 1872-a tan chu kum 10 dana neih thin a nih thu a sawi.

"Census tel lo chuan mipui dinhmun a hriat mumal theih loh a, sorkarin hmalak dan tur a ruahmanna kawngah harsatna a awm thei dawn a ni," tiin chhiarpui tangkaina a sawi.

Census Act 1948 (Census Dan) chuan mitinte chhanna kimchang puanzar loh tur a tih thu a sawi. Mizoram mipuite pawh Census felfai taka neih a nih theih nan Official-te tha taka tawiawm turin a ngen a ni.

Census 2011 thawh khatna, kumin April atanga September thla tawp thlenga neih turah hian Houselisting, Housing Census leh National Population Register te kalpui a ni ang.

Thawh hnihna, nakkum February ni 9 atanga February ni 28 thlenga neih turah chuan Population Enumeration neih a ni ang.

Mizoram-ah chuan a thawh khatna hi May ni 15 atanga June ni 30 thlenga neih a ni ang.

Official te chuan chhungkaw tinte chu a hnuaia tarlante chhang thei tur hian lo inring lawk se an duh; eizawnna, zirna lam, tawng hman, sakhuanna, pian leh murna, pian ni, in leh lo, rosum leh thil hlu kawlte, electric leh tui connection chungchang leh inthiarna neih leh neih loh chungchang te.

Chhiarpui ruala neih tur National Population Register hi Citizenship Act,1955 leh Citizenship Rules, 2003 tlawhchhana din a ni. NPR thil tum lian deuh deuhte chu; khua leh tui (citizen)te nihna kimchang (Identity) tha zawk neih, sorkar scheme hrang hrang, a dawng tur dik tak ten an dawn theihnan, planning-in hma a sawn nan, ram chhung venhimna kawnga sorkar a lo phuisui zawk nan te.

Chief minister-in hetianga chhiarpui pawimawhna a sawi lai hian thenkhat chuan an hlau a, a thawh hnihnaa neih tur, thlalak leh kutze (finger print) te tih tur a nih avangin sakawlh lo lanna turah an ngai a ni. Mi zawng zawng chhinchhiah an ni ang a, chhinchhiahna nei ve lote an tiduhdah dawn tih chu rinna lama ngaihdan pakhat a ni a, chu thil intanna chu ni-a hria an awm a ni.

Chhiarpui hnathawktute pawhin hemi kawngah hian harsatna an tawk nual. Kolasib-ah pawh nupa kut inthlak phah an awm tih thu dawn a ni.

"Nu berin chhiarpui-a tel hi a duh lo a, sakawlh lo lanna turah ngaiin a hlau a. A pasalin a ti lui a, an invaw ta alawm mawle," tiin Kolasib atanga thudawn chuan a sawi.

Aizawl khawpuiah pawh hetiang chhiarpui-a tel duh lo hi an awm nual niin a buaipuitute chuan an sawi a, sakawlh hlauh vang a ni tlangpui nia sawiin, a then chu sakawlh hlauh vang ngawr ngawr ni lovin sakawlh dodalnaa an ngaih avang zawkin an tel duh lo niin a buaipuitu, Zozam Weekly-in a biakpawhte chuan an sawi.

"Tunah chuan mihring zat inchhiar a ni mai a, a tih naw naw theih/ Sakawlh hlaute pawh an thenawmte'n an chhungkaw member zat te an lo hriat chuan an chhinchhiah theih mai a, thlalak leh finger print te lak a tul hunah chuan a buaithlak mai thei," tiin chhiarpui buaipuitu pakhat chuan a sawi.
Sakawlh an tih chu!
India sorkar chuan a khua leh tuite chhinchhiah a duh avangin chhiarpui pui tham tak a buaipui mek.

Unique Identification Authority of India (UIDAI) tia vuahin Planning Commission hnuaiah hemi buaipuitute hi an awm a, India ram mite chhinchhiah chu an hnathawh tur a ni.

Mi thenkhat chuan he thil hi sakawlh nen an sawi zawm mek. Tunlai khawvel him lo takah khua leh tuite hriat chian a ngai a, chutih rualin ram hmasawnna kawnga developemnt rualkhai lo lutuk pawh UID hmangin siam rem theih a nih rin a ni tih chu India sorkarin he thil a buatsaih chhan a ni.

India ram hmun tam takah NREG chungchangah te leh developemntal works tam takah dawt a tam hle a, hming ringawt awm, mihring awm lo tih velte pawh thil thar a ni lo. Chu’ng ang chi zawng zawng chu UID hmang hian awlsam tea tihtawp theih tur-ah ngaih a ni.

June ni 25, 2009-ah khan India sorkar chuan UDAI din hi a remti a, chairperson atan Nandan Nilekani chu ruat a ni a, he dinhmun hi cabinet minister tluk a ni.

Cabinet Committee on UID Authority din nghal a ni a, prime minister kaihhruaina hnuaiah minister of finance; minister of agriculture; minister of consumer affairs, food and public distribution; minister of home affairs; minister of external affairs; minister of law and justice; minister of communications and information technology; minister of labour and employment; minister of human resource development; minister of rural development and Panchayati Raj; minister of housing and urban and poverty alleviation; minister of tourism leh planning commission deputy chairman te chu member an ni a, an hraw hlawm khawp mai.

UIDAI tum ber chu India khua leh tuite chipchiar taka chhinchhiah a ni. Chumi atan chuan documents 'fill up' tur a awm a, India khua leh tui ngei chu chhinchhiah a nih hnuah number pek a ni dawn a, chu chu hun lo la kal tura thil pawimawh tak ni turah ngaih a ni.

India khua leh tui chu chhinchhiah a nih hnuah identity number pek tur a ni a, chu a number chu chhinchhiah a ni ang.

Sawi tawh angin India khua leh tui tu te pawhin UID hi an nei thei a, UID number nei duh lo te chu tihluihna a awm chuang lo.

Duha neih theih a, duha neih loh theih a ni. Mahse, a nei ve duh lo te tan chuan chet vel a khirh thung ang.

UID neite tan chuan fel taka chhinchhiah an nih tawh avangin identity verification paltlang vak vak tur a awm tawh lo ang.

Bank account, passport, driving license tih vel neih an duh pawhin identity verification paltlang ngai tawh lovin UID number an neih kha engkimah a hman theih tawh dawn a ni.

UID number neih dan
Application form a awm ang a, chu chu dah khah mai tur a ni. Chutah chuan thlalak leh finger print thlenga lak a ni dawn a, kutzungtang 10 i nei a, a vai khan chinchhiah vek tur a ni a, i mitmu kha an 'scan' tel bawk ang.

Chu chu lakkhawm a nih hnuah UID database-ah an thawn thla mai dawn a ni. Chumi hnuah i registration number chu an rawn thawn ang che. Card a awm ve dawn tawh lo a, i UID number chauh kha i hriat tur a ni mai.

Thil pawimawh atan lo chuan i bio-data vel chu hman a ni dawn lo, i bio-data a dik leh dik loh chu i duh chuan i chian thei ang a, chutiang tur atan chuan UDAI chu a inhawng ang.

UID database hi mi tlemte chauhin an enkawl dawn a, mihring leh khawl hmanga ven tlat tur a ni. Data zawng zawng hi a him thei ang bera vawn tum a ni.

Pianphunga rualban lo leh tawhsual tawh vanga kut-ke kim lote chu an finger print aiah an thlalak hmansak a ni dawn a ni.

UID pianchhuah dan
Unique identification project hi Planning Commission duah chhuah a ni a, welfare services lama hmasawnna rualkhai leh chak zawka kalpui a nih theihnana ruahmanna a ni.

2006-ah khan unique identification chungchang hi tan a ni tawh. March ni 3, 2006-ah khan department of information technology, ministry of communications and information technology chuan sorkar laipuiah “Unique ID for BPL families” tiin project an siam daih tawh.

Chu project chu BPL family tan niin thla 12 chhunga peih hman turin NIC-in a enkawl a, chu chu siamthat zel niin Unique ID for BPL familes project chu June ni 3, 2006 khan peih fel a ni ta a. He project hi chutih laia planning commissionprincipal adviser Dr Arvind Virmani hnuaia neih a ni.

Chumi hnuah “Strategic Vision on the UID Project” tih chu Wipro chuan an thehlut a, Wipro-ho design a ni deuh ber a, chu chu planning Commission chuan a thlir nawn leh a ni.

Hetih lai vel hian Registrar General of India chuan National Population Registrar leh Multi-purpose National Identity Cards chungchang vel an buaipui lai a ni.

Prime Minister chuan Empower group of ministers a din a, chu mite thukhawm chuan National Population Register leh Unique Identification chu kal kawp tir ni se tiin thu an titlu ta a ni.

UIDAI headquarter chu Delhi-a awm tura tih a ni a, mahse, technological center erawh Bangalore-ah a awm thung ang a, India ram hmun hrang hrangah regional office 8 a nei dawn a ni.

UIDAI staff-te hian field work kan tih mai ang hi an thawk dawn lo a, an tih tur ber chu data lakkhawm lo vawnhim vel a ni ber a, state te nen tawhhona tha tak hnuaia kalpui tur chi a ni.

Director general leh mission director chu thuneitu sang ber tur a ni. Deputy director general 6 an awm ang a, director 3 (director/deputy secretary rank), deputy director 3, desk officer 3 leh assistant 3 an awm ang. Headquarters hian finance wing a nei bawk ang a, chu chu chief controller of accounts a ni ang.

Regional Office erawh Deputy Director General (DDG)-in a ho thung ang a, regional office tinah DDG 8 an awm ang a, DDG tinin Director 3, deputy director 3, SAO 1 bakah senior systems analyst an nei vek bawk ang.

Read more...

Naga buaina leh Zofate

Naga buaina chu 'news' pawimawh a ni ve hrim hrim a, tun hnaia Meitei-ho nena boruak tha lo an neih hma pawhin ngaihven a hlawh ve hrim hrim. Chutah leh Meitei inkar chu tun hnaiah a'n chhe zual a, ngaihven a hlawh hle. He thil hian Naga leh Meite chang a nghawng lo, Zofate pawh a nghawng mek.

Naga leh Meitei inkar boruak a that loh avang hian Manipur-ah nitin mamawh thil a harsa a, hemi chungchangah hian Manipur chuan Mizoram puihna an ngen tawh nghe nghe. Mizoram chief minister chuan he buaina hian Zofate a nghawng theih avangin inralrin tul a tih thu a sawi tawh.

National Socialist Council of Nagalim (NSCN-IM) general secretary Thuingaleng Muivah (70) chuan kum 40 chhunga a vawi khatna atan a pianna khua, Manipur-a Somdal khua tlawh a tum a, Manipur sorkarin hei hi rem an tih loh avangin Nagaland leh Manipur inkar boruakah thil duhawm lo a thleng ta a ni.

Somdal khua hi Manipur-a Ukhrul District-a mi a ni a, Tangkhul Naga khua a ni. Imphal atanga Km 100 vela hla a ni a, Muivah hian May ni 6-ah khan a pianna khua hi tlawh a tum a, Manipur sorkarin rem a tih loh laiin Nagaland lam atanga kal-a Manipur khaw hmasa ber Mao-ah Ukhrul District-a Naga-ho chuan lungawi lohna an lantir a, Manipur Police te'n silai an hmetpuakin, Naga pathum an thi a ni. Manipur-a Naga MLA parukte chuan banna an thehluh phah nghe nghe.

Nagaland atanga Manipur panna kawngpui chu Naga zirlai pawlte thinrimin dangin lirthei tlantlang an phal lo a, an bungraw lakluhna kawng danchah a nih avangin Manipur-in harsatna a tawk ta a ni.

Manipur sorkar chuan Mizoram puihna a ngen ta a, "Ramchhung hmun dang atanga Manipur state panna kawngpui NH-39 leh NH-53 danchah a nih avangin Manipur sorkar chuan mipui nitin mamawh leh damdawite Silchar-Aizawl-Sinzawl-Churachandpur-Imphal kawngah phurh luh turin ruahmanna a siam a. Hemi chungchangah hian Mizoram sorkar puihna a ngen a. Mizoram sorkar pawhin Manipur harsatna tawh mek hi hriatthiam puiin Mizoram paltlanga bungraw phurhluh tur hi sorkar department-a thawkte leh mipuiten harsatna siam lova tanpui an ngaihnaah lo tanpui turin a ngen a ni," tiin Mizoram sorkar chuan hemi chungchang hi May ni 13-ah khan thuchhuah siamin a puangzar.

Mizoram chief minister Lal Thanhawla chuan Manipur-a thil thleng hian Zohnahthlak unaute a kankai palh theih avangin fimkhur a ngai a tih thu, May 12, 2010-a thuthar thehdarhtute a kawmnaah a sawi tawh.

"Meitei leh Naga te inkara inhriatthiam lohna awmah hian Manipur-a kan Zohnahthlak unaute a kangkai lovang tih a sawi theih loh a, Kuki hel leh ZRA te an awm a, Naga hel leh Kuki hel te hi inhal kumhlun an ni a, Zohnahthlak unau thahnem tak an awm bawk nen, Mizoram pawh inralringa kan awm a ngai a ni," Lal Thanhawla chuan a ti.

Manipur hmun thenkhatin harsatna an tawk a, Zohnahthlakte chen tamna Churachandpur leh a chhehvel pawh a nghawng. Amaherawhchu, hmun dang ai chuan an la harsa lo deuh nia thu dawn a ni. Manipur-a Zofate hian Mizoram atanga mamawh zualpui an lakluh theih avangin hmun dang ang em emin an harsa rih lo niin thu dawn a ni.

Petrol chu pump-ah litre khat Rs 50-a an zawrh laiin, Mizoram atanga lakluh hi litre khat Rs 60-in an zuar a, hei hi Zomi Revolutionary Army lamin a phurhluh leh hralh lam an khuahkhirh a, an khuahkhirh lohva lut pawh a awm tho nia sawi a ni.

Mizoram sorkar chuan Manipur-a lut tur motor-te tluang taka an kal theih nan additional secretary (home) TV Fambawl leh deputy secretary Lalzirmawia Chhangte te chu nodal officer atan a ruat.

Mizoram kaltlanga Manipur-in bungrua an chawkluh theih nan India ram home minister P Chidambaram chuan Mizoram chief minister a rawn be tawh.

Buhfaiah pawh Mizoram atangin supply buhfai a lut reng a, an harsa lutuk lo a, Imphal lamah te pawh buhfai leh petrol te hi Churachandpur atang hian an va zuar zawk niin thu dawn a ni.

NSCN-IM te hian Arunchal Pradesh, Assam leh Manipur-a Naga chenna ramte sat hek-a 'Nagalim' (Greater Nagaland) din an ngiat a, state pathumte hian hei hi an duh lo hle. Manipur-in Somdal-a Muivah zin an phal loh chhan pawh chu chu a ni a, Muivah pawhin tlawmngai pawlte ngenna avangin a zin tum hi a thulh rih. Muivah zin leh zin loh chungchangah hian Nilaini-ah khan sorkar laipui aiawhte leh NSCN-IM hruaitute an inbia a, thumum erawh an nei lo.


Naga independent
Naga independence rilru hi 1918-a Naga Club din atanga intan daih tawh a ni a; khatih laia khawthlang zirna dawng phaho khan he club hi an din a ni. Simon Commission-ah pawh memorandum thehlutin 'excluded area'-a awm an dil a ni.

Mahse, Naga Club hi thui tak chu a kal lo. Angami Zapu Phizo khan Naga Club boruak chu a rawn luahlan a ni ber. Ani hian NNC dinin Naga zalenna sual tak tak bul a tan a ni.

Indopui Pahnihna laia Allied force leh Japan sipaite'n Nagaland an thlen khan Phizo leh mi thenkhat chuan Indian National Army an lo pui a, 1946 khan Naga Club chu Naga National Council (NNC) tia thlak a ni ta a ni.

Phizo kaihhruaina hnuaiah Naga-ho hian August ni 14, 1947-ah khan 'independence' an puang a, India sorkar chuan hmeh mih tumin a bei let nghal. Helna chawkchhuakah puhin 1948-ah Phizo hi man a ni a, chhuah a nih hnu 1950-ah NNC president a ni chho ta a ni. 1952 khan Phizo hi khatih laia India prime minister Jawaharlal Nehru nen an inkawm a, mahse, awmzia a neih loh avangin ralthuam nen independence sualin Phizo chu a thawkchhuak ta a ni.

Buaina a chhuah hnuah Phizo hian East Pakistan (Bangladesh ni ta) a pan a, chuta tang chuan London lamah a kal ta zel a, 1990-a a thih thleng khan a awm a ni. Phizo awm loh hnuah pawh NNC chuan zalenna an sual chhunzawm reng a, 1975 khan India sorkar nen inremna an siam a, Shillong Accord tih a ni.

He Shillong Accord pawm thei lote'n NSCN (National Socialists Council of Nagaland) an din ta a, ramhnuai sorkar – Naga Federal government pawh din zui nghalin, prime minister kaihhruaina hnuaiah council of ministers pawh an nei ve thlap. Prime minister chu "ato kilonser" an ti a, minister-te chu kilonser an ti.

Mahse, 1988-ah khan India sorkar nena inbiaka, Greater Nagaland din rawtna chungchangah NSCN hruaitute thu a inhmu ta lo a, Isak Chisi Swu leh Thuingaleng Muivah te kaihhruai NSCN-IM leh SS Khaplang kaihhruai NSCN-K ahte an phel ta.

Isak Chisi Swu leh Thuingaleng Muivah te hian Greater Nagaland an duh laiin SS Khaplang chuan a duh lo a, an buai ta a ni.

An inthen chungchangah hian Konyak leh Tangkhul hnamte inngeih lohna hian awmzia a nei thui hlea sawi a ni bawk. NSCN-K hi Burma ramri hrul lamah an chak a, Burma rama Naga awmte zingah pawh kua an hreuh thukin thlawptu pawh an nei tha. An general headquarters pawh East Nagaland an ti a, Burma-ah a awm.

NSCN pawl pahnihte hian India sorkar nen inkahhai an puan ve ve a, anmahni erawh an inbei fo. NSCN-IM hian India sorkar nen inremna kawng dapa inbiakna an kalpui mek a, chumi kaihhnawihah chuan tunlai leh tunhma deuha Manipur buaina thleng thin pawh a lo chhuak ta a ni.

Read more...

Thuingaleng Muivah-a'n e-mail hmanga Deccan Herald zawhna a chhanna thenkhatte

"Nagalim for Christ" leh "Nagaland for Christ" tihte hi eng nge a awmzia" "God bless America" tih nen hian a inang nge thil dang a kawk tel em? Nagaland/Nagalim chu Krista lal berna ram a ni ang tihna em ni?

"Nagalim for Christ" tih hi Naga-ten Chanchin |ha hi thudik a ni tih an pawm tlatna atanga lo chhuak a ni. Kan sorkar chu sakhuaah hian a innghat ang tihna a ni lo a, mipui ta a ni tur a nih angin, mipui sorkar leh mipui ta a ni ang a, chu chu Kristian thuvawn pawimawh tak a ni.

"Nagalim for Christ" tih hi Naga-te hi Krista chhandamtu atangin an peng bo thei ngai dawn lo tih tarlangtu pawh a ni. Chuvangin Kristian-te'n hringnun an ngaihdan hi kan ngai pawimawh hle.

Mahse, hei hi midangte barhlui chi a ni lo hrim hrim a, society reng reng hian nunin awmzia a neihna turin innghahna thuvawn tha tak a neih a ngai a ni.

India nena kan buaina hi hnam leh politics thil a ni nain hun khirh tak paltlang tur chuan rinna lam thil hi a lang tel lo thei lo a ni.

Inremna tura inbiakna chungchangah hian eng emaw tia inphahhniam tawhna ang chite hi i duh ang em? Eng chin hi nge in pawm theih ang a, in pawm theih loh ang?
Hetiang zawhna hi awlsam taka chhan mai theih a ni lo a, inbiakna lo intan dante hi uluk taka kan enfiah phawt te pawh a ngai. Buaina laimu ber chu India sorkarin Naga-te harsatna leh an hnam dinhmunte a ngaithla duh lo hi a ni. Naga chu sipai chakna hmanga tukdawl mai tur tih ngaihdan chauh hi an nei a, chu chu kum 50 zet an kalpui.

1994 khan India ram hruaitute chuan, sipai general pawimawh ber ber pathum telin sipai chakna hman hi buaina chinfelna tur a ni lo tih an puang ta hlauh a ni.

Chu chu rin tlakah kan ngai a, inhriatthiam tawnna kan neihna tura hmasawnnaah kan ngai bawk. Inbiakna a kal chhoh takah hian India sorkar chuan thil awmdan a hrethiam chho ta a, July ni 11, 2002 khan thuchhuah intawm siamin Naga-te dinhmun leh an hun lo tawn tawhte pawh a pawm ve ta a ni.

Hei hi thil pawimawh tak a ni. India lamin harsatna a tawhte pawh hriatthiampui tumna kan nei. Mahse, India hi he thilah hian engtiang thlengin nge a kal ve theih ang? Chu chu tuna a harsa lai ber chu a ni.

New Delhi-ah kan inbiak tum khan Prime Minister Vajpayee hnenah, "India hian Naga-te dinhmun dik tak hi a zah chuan Naga-te hian a let 10 aia tamin India dinhmun dik tak chu a zah ang tih kan sawi.

Boruak ralmuang tak neia buaina chinfel kan duh a, mahse, India hi a insawi ang a ni lo leh thin. Eng pawh lo ni se, Naga luah ramte inzawmkhawm leh Naga-te chu hnam nihna nei a nihdante hi inphahhniam san theih a ni lo ang.

Greater Nagaland/Nagalim hi thil awm thei a ni tak tak em?
Khatiang zawngin kan ngaihtuah chhin ngai lo. Naga-te hi an chenna hmun nen lam British leh India sorkarte hian an duh duhin min then a. Naga-te'n chenho kan duh hi thil nih dan pangngai a ni a, do theih a ni lo. Naga-te'n kan duh dan, thil dik tak ni bawk si hi ngaih pawimawh a nih hma chuan inremna a awm lo ang. Naga-te'n kan duh dan nena inkalh, inthendarhna kalpui chunga buaina ching fel tura inbiakna neih hi inhmuhsitna a ni lawm ni?

Nagalim hi din ni ta se Ao leh K-faction te hi eng tin nge an awm ang? In sorkarah hian hmun an chang ve ang em?
Nagalim hian tribe leh chi peng nen inzawmna a nei lo. Kan society-ah hian inenhranna a awm lo. Hnam phatsantu inchhirna nei lo, mi rinawm lo leh buaina cho ar reng misualte chungchang chu kan ngaihtuah ngei erawh a ngai ang.

Nagaland-ah hian silai nena sum inchhuhsak chungchang sawi tur a tam hle. Hmun tam takah chuan hel pawl chi hrang hrang an awm tak avangin hel pawlin an khawn apianga pek a ngaih bawk si avangin chhiah hi vawi hnih vawi thumte kum khat chhungin an pe thin ni awm tak a ni. Hemi chungchanga i ngaihdan?
Sorkar kan nei a, kan mipuite hnenah chhiah kan khawn a, chu chu India sorkar hian mi pawisa chhuh lui tiin a sawi a ni. Mipuite hian chhiah an pe hnem lutuk tih chu a dik alawm. India policy dik lo tak avanga awm a ni.

Naga National Council hian 1975-a Shillong-a inremna rapthlak tak an neih hnu-ah India lakah hnam an phatsan tawh a, hnam sawi tur an nei tawh lo tih hi hriat tur a ni. Mahse, India sorkar chuan mipui leh ram leh hnam hmangaihtute tihbuai nan a la hmang reng tho a ni.

Khaplang pawlte pawhin 1988 khan India sipaite hi an hmelma an ni lo tih puangin hnam tana thawk an nihna chu an phatsan tawh. Chumi hnuah chuan India sipai thurualpuiin min bei ta a, tuna kan NSCN hi tun thlenga Nagalim vawng tlattu chu a ni.

Chuvangin hnam chungchangah chuan Khaplang pawlte pawhin sawi tur an nei tawh lo. Chuti chungin India chuan mipuia kan tlak nat loh dan tur ngaihtuah ranin silai nen hian zalen takin chhiah a la khawn tir tho a ni.

Hetiang khawpa dinhmun tha loa kan awm chung hian mipuiin min thlawp tlat a. Hun lo kal zel turah pawh kan innghahna ber an ni zel ang. Hnam tana thawk tak taktute chu an hria.

Tunhnai deuha din Naga People's Front I-M-in politics an rawn khelhna anga sawi a ni fo. IM hian candidate-te pawisain in pui ngai reng em?
He inpuhna hi… chief minister kalchhuak ta SC Jamir-a'n inthlana mualpho taka a tlak thupna tura a rawn tihchhuah a ni… NPF candidate tumah kan pui ngai lo a, India buatsaih inthlanah hian kan tel ngai hek lo. NPF candidate tumah pawisain kan tanpui ngai hek lo.

I-M hian silai a tung tawh em?
NSCN kaihhruaina hnuaiah Naga-te hian thil pathum thlah ngai loh tur an nei: an silai, an zalenna leh an ram. Inbiakna a kal mek hi.

Eng tikah hian in ram hi inthlak danglam tura i rin?
India sipaite'n Nagalim an luah chhung thil a tha zawngin a inher ngai lo ang. Chumi awmzia chu India hian Naga-te dinhmun dik tak a zah ve a, thudik thup tum tlat a bansan hunah thil a tha zawngin a kal chauh ang. Chutiang chu eng tik hunah thleng turin nge a beisei theih ang?

Kristianna lama i dinhmun min hrilh teh.
Chhungkaw rethei tak atang piang leh seilian ka ni a. Mahse, ka nu leh pate chu mawlin ziak leh chhiar pawh thiam lo an ni nain Pathian zarah Kristian nghet tak an lo ni hlauh mai.

Kum 7 mi vel lek ka nih lai, Bible pawh ka chhiar thei ve tawng tawng chauh tihah ka nu leh pate chuan Isua khenbeh a nih avanga chatuan chhandamna nei kan nih thu taima takin min hrilh thin a, chu chuan min hneh em em a ni.

Phur takin, "Isua ka phatsan dawn lo," tiin rilru ka siam ta a ni. Philosophy hrang hrang leng vel karah hetiang ngaihdan hi eng chen nge a daih dawn ka hre miah lo a, philosophy hrang hrangah awmze nei lova ka bo mai lohna turin ka hun kal tawh zawng zawngah hian mihring nuna awmzia nei ber hriat tumin ka bei a ni.

Ni khat chu ramngaw chhah tak hnuaiah hian chaw ngheiin ka tawngtai a; urhsun taka ka tawngtai lai chuan zela awmin Isua ka hmu a ni, meter 15 vela hlaah dingin hmangaih leh khawngaih tih hriat ngawih ngawih hian min lo en a. A bulah chuan rawlthar pakhat a ding bawk a, a kutah vuanin hlauhna chhe te pawh nei lo hmel a pu. Mahse, sipai rual indo tura inpeih at min rawn pan thup thup chu ka hmu thut mai a ni.

Sipai rual ka hmuh chuan ka hlau ta hle a, mahe, Isua chuan an lam a va hawi a, hlauin an tlanchhe ta a ni. Khatiang thil ka hmu kha mah ka ti hle a, engatinge khatiang sipai rual hlauhawm tak khan Isua an hmuha an hlauha an tlanchhiat tih ka inzawt nasa hle.

Khatiang thil kha vawi hnih lai a rawn lang a ni. Rei tak ka ngaihtuah hnuah Isua hian keima chakna ring lo turin min duh tih ka hre chhuak ta a ni. A tel lo chuan engmah ka ni lo ang tih a hria. Mahse, Ani nen chuan khawvel thil tihtheihna chu engmah a ni lo.

Krista-a ka innghah chuan sipai rual an lo lan pawha rawlthar che eih lo ang kha ka ni ang. Min kaihhruaina leh awmpuina chauhin thil ka paltlang dawn tih ka hre thar a ni. Pathian hian kan mite tan mi hmang duh tih ka hre chiang ta. "Kei Lalpa hian thinlung a ni ka zawn ni," a ti a, ka thinlung chhungril engkim a hria a ni. Thil siam tlaw tak ka nih tak loh avangin Pathian hnenah ka lawm. Khawvel hi ka hmu fiah tawh a, sualnaa tlukluh chauh lo chu hlauh tur ka nei ta lo. Sual erawh chuan min ti chhe thei a, khawvel tha tak pawh a tichhe thei a ni.

Awih harsa khawpin Pathian-in khawvel a siam chhan, chu a thil siamah chuan Nagalim pawh a tel ngei tih chu ka hre chiang ta a ni. Chuvangin, Pathian ka ring a, Nagalim pawh ka ring a ni.

Read more...

National Socialist Council of Nagalim — Isak-Muivah (NSCN-IM)

January ni 31, 1980-ah khan NNC (Naga National Council) leh India sorkarin 'Shillong Accord' an sign an pawm ve loh vangin mi pathum- Isak Chisi Swu, Thuingaleng Muivah leh SS Khaplang te'n National Socialist Council of Nagalim (NSCN) hi an din a, mahse, pawl pahnih NSCN-K leh NSCN-IM-ahte an phel ve leh a ni.

India sorkar nena an inbiak tur chungchangah an ngaihdan a inan loh avangin April ni 30, 1988-ah khan NSCN hi an phel a, SS Khaplang kaihhruaite hi NSCN-K tih an ni a; Isak Chisi Swu leh Thuingaleng Muivah kaihhruaite hi NSCN-IM tih an ni.

NSCN tumpui ber chu ‘Greater Nagaland’ (Nagalim/People's Republic of Nagalim) a ni a; Mao Tse Tung-a ngaihdan zuitute a ni. An pawl manifesto pawh 'ei leh bar leh khawtlang hmasawnna turin Socialism' tih a ni a; sakhuana lam thilah – 'Nagaland for Christ' an ti bawk.

NSCN-IM hi Tangkhul Naga-hovin an bawh ber a, Nagaland hmun thenkhat leh Manipur tlangrama cheng an ni. Manipur-ah chuan Senapati, Ukhrul, Chandel leh Tamenglong district-ahte hian awmzia an nei pha hle. Nagaland-ah chuan Wokha, Phek, Zunebhoto leh Kohima district-te hi an chakna bial a ni a; Mokokchung leh Tuensang district hmun thenkhatah pawh an chak ve hle. Assam-a North Cachar Hills leh Karbi Anglong district pahniha Naga-ho chennate leh Arunachal Pradesh-a Naga-ho chennaahte pawh an an intithu hle.

Thuingaleng Muivah hi general secretary a ni a; Isak Chisi Swu hi chairman a ni. An pahnih hian Thailand an behchhan.

Naga Army an nei a, brigade pakhat leh battalion paruk an awm. Mi 4500 vel ni-a Naga Army hi sawi an ni a, an commander-in-chief chu S Hungshi a ni. Naga Army hi Ao, Sema, Zeilang, Anal, Mao leh Manipur-a cheng Tangkhul-te an ni ber.

NSCN-IM hian ramhnuai sorkar Government of the People’s Republic of Nagalim (GPRN) an din a; pawl hrang hrang leh thuthar lakhawmtute pawh GPRN chuan a dawr thin. Hmun hrang hranga an hmalakna thlawptu tur leh sum zawng turin palaite pawh an tir ve thin a ni.

NSCN hian kumtin budget an nei ve thin a, cheng maktaduai 200-250 velte a ni thin.

Burma atanga ruihhlo tawlh hi an sum hnar ber pakhat nia sawi a ni a; sum an khawn thin a, sum an neihna turin bank rawk leh dan kalha chetna dang an nei thin nia sawi a ni. Hel pawl dang training pek leh ralthuam hralh ni an sum nia sawi a ni bawk.

Sum hi ralthuam lei nan an hmang deuh ber nia sawi a ni a, hemi atan hian Thailand leh South East Asia ram hrang hrangah zawmpui an nei tha hle a, Bangladesh leh Burma kaltlangin an tawlh lut thin nia sawi a ni.

China atangin AK 47 leh ralthuam chi hrang hrang an la lut nia sawi a ni bawk a, China ram Kunming province thuneitute nen pawh an indawr thui a, Kachin hel pawlten ralthuam an chawkluhna tur pawh thawk khat lai kha chuan an buaipui sak nia sawi a ni nghe nghe. February 2000 vel kha chuan China leh Arunachal Pradesh ramri velah NSCN-IM hi an inbun nghet viau ni te pawhin sawi a ni thin.

1971 thleng khan ralthuam, sum leh pai leh intelligence lamah US hi a tanpuitu ber a ni a; East Pakistan pawhin sum leh ralthuamah a pui thin. China pawhin 1980 chho tawp lam thleng kha chuan a pui. Pakistan enthlatu pawl Inter Services Intelligence (ISI) tunah chuan a puitu deuh ber nia sawi a ni. Pakistan hian training-te pawh a pe nia sawi a ni nghe nghe.

January 2000 khan Thailand sorkarin Muivah hi a man a, man a nih hma lawk khan Karachi-ah hmuh niin Bangkok a thlen rual khan an lo man a ni. Khami tum khan South Korea passport lem a hmang nia sawi a ni bawk. Hetih lai hian Bangkok-ah chuan thlawptu an nei tha hle a, travel leh tourism company, real estate leh toy siam thinte nen an inzawl hle niin an sawi.

UN Human Rights Organisation,Geneva; Unrepresented Nations People’s Organisation (UNPO), Hague leh UN Working Group on Indigenous People (UNWGIP)-ahte pawh mi leh sa an nei nia sawi a ni bawk.

Read more...

Mizoram University hna lakah zirlai pawl lungawi lo

May ni 17-ah Mizo Students' Union te'n Vanapa Hall kawtah Mizoram University vice chancellor lim an hal a, a tukah police te'n zirlai 60 vel an man.

Mizoram University-a zirtirtu hna lak turah, interview hmachhawn tura koh chungchangah zirlai pawlte chuan Mizoram University thil tih dan an duh lo a, university lam nen an thu a inhmuh theih loh avangin police lam an chet a ngai ta hial.

May ni 18-ah MSU te chuan vice chancellor chu pawnchhuak lo turin an ti a, hetia an tih chhan hi hemi ni-a interview neih tur chu tihtlawlh an duh vang a ni. Vice chancellor (VC) chenna bul velah an pungkhawm a, chuta an awm lai chuan police te'n engemaw zat an la ta a ni.

Police te hian mi 60 bawr an la nia hriat a ni a, tlai lamah an chhuah leh. Hemi zanah hian chief secretary kaihhruaiin MSU hruaitute leh university thuneitute an inbia a, MSU lam chuan VC leh Mizoram University Students' Union hruaitute an tel ve dawn a nih chuan anni chu an tel thei lo ang tih an sawi a, VC leh MZUSU hruaitute chu an tel ta lo a ni.

"Mizoram University Vice Chancellor Prof AN Rai hian naktuk Dt 19th, May, 2010 (Wednesday) dar 3:00 PM hma ngeiin Mizoram a chhuahsan tur a ni. A chhuahsan lo a nih chuan a chungah eng harsatna pawh lo thleng se MSU chuan mawh kan phur lo ang," tiin MSU te hian May ni 18-ah resolution an siam.

May 18-20 chhungin Mizoram University hnuaia School of Economics, Management & Information Science hnuaia subject hrang hrangah assistant professor (lecturer tih thin) atan interview neih tura ruahman a ni a, MZU hotu thenkhat te'n an duhzawng hnam dang thun tumin UGC norms leh central duh dan ang pawh lovin thil an kalpui a, chuvang chuan Mizo engemaw zatin interview an hmachhawn phak loh phah tih chu zirlai pawl hrang hrang ngaihdan a ni.

"Mizo chauh lak ni rawh se kan ti lo; an dan siamchawp hmanga Mizo applicant-te an hnawl hi kan duh loh zawk chu a ni. Mizo applican-te hi la rawh se kan ti lo a, dil pha ve rawh se kan ti a ni zawk," tiin zirlai pawl hruaitu pakhat chuan a sawi.

Mizo Research Scholars Association (MRSA) Gen.Hqrs. Shillong chuan Mizoram University-a zirtirtu hna thawk tura ruahman mekah Mizo qualify paruk tal, post khat zel atan ko tha leh turin University thuneitute a ngen.

Thuchhuah siamin MRSA chuan, "MZU Vice Chancellor leh a sangawizawnpui te'n academic record ‘four first class’ an chawivawng viau chu thu belhchian dawl lo niin a lang," an ti.

Mizoram leh abikin NEHU-ah te first class chu subject tam takah an pe duh mang lo a, hei hi an thiam loh vang ni lovin, marking system kalpui dan fel tak a awm vang a ni, an ti a, "Academic record tha a pawimawh rualin tehkhawng dang nen inrualkhaia kalpui ni se a hriatthiam theih," an ti bawk.

Zirchhuahna leh seilenna te thlirin Mizo candidate tam ber chu pawl 10 atanga MA/MSc thlenga first class-a pass vek turin zirna sikul thaa kal phak lo leh inhlawh chawpa zirna in sang kai hram hramte an ni tih sawiin, UGC dan angin Mizo zingah mark 50% emaw a lo berah 55% mark hmu chin an awm chuan interview tura ko ngei turin university hruaitute an ngen. An ko vek theih loh pawhin Mizo candidate qualify zinga a titha zual paruk tal chu post tinah ko ngei turin an ngen a ni.

Hnamdang te tha zawka a ngaihna rilru chu paih a hun tawh tih MRSA chuan an sawi a, "Tun generation tharah hian Mizo lehkhathiamte hi kan university neih chhun enkawl tur hian kan tha tawk a, hnam dang hrim hrim dahsanna rilru kalsan ve tawh turin kan ngen a ni," an ti.

Read more...

Thilpek Atan Nunna

Kum engemaw zat a liam tawh a, Stanford Hospital a volunteer-a ka thawh laia hmeichhe naupang pakhat natna khirh tak vei 'Liza' kha ka la hre reng mai. A natna avangin a thisen chu a unaupa thisena thlak vek a ngai a, a natna vei ang chiah lo vei tawh leh lo damchhuak tawh a unaupa thisen chuan a taksaa natna hrikte chu a do hneh thei dawn a ni.

Doctor chuan Liza-i unau, mipa naupang-te hnenah chuan thil awmdan chu a hrilhfiah mawlh mawlh a, a hnuah chuan a farnu damna turin a thisen a pek phal leh phal loh a zawt ta a. Chutihlai zawng chuan ka lo thlir ve reng a, mipa naupang hmel chu a buai deuh nak a, a han thaw halh a, a chhang hreh hmel khawp mai a. Chutah, "Aw, Liza-i damna tur a nih chuan ka thisen chu ka pe ang e," a ti ta a.

Thisen a pek lai chuan a farnu khum bulah chuan a mu ve ran a, chutia thisen thianghlim a dawn takah chuan Liza hmel chu a rawn nung leh tan ta a, a biang te chu a sen leh tan ta a, a farnu hmel chu a va en a, a nui ver ver a. Mahse, rei lo teah mipa naupang hmel chu a dang ta sawp sawp mai a, a nui hmel chu a tawp nghal chawt bawk a.

Chutah a kianga ding doctor chu a ko a, aw khur der der chungin, "Ti hian ka thi zui nghal mai dawn em ni?" tiin a zawt a. A hmelah chuan nasa taka zam hmel a lang a, doctor thusawi a hriatthiam loh avangin a thisen zawng zawng a nau a pe ang a, amah chu a thi zui nghal turah a inngai a lo ni a. n

(Gift of Life lehlin a ni, a ziaktu hriat loh - Lalthlamuana Ralte)

Read more...

Meizial do nan tha thar

Mizoram chuan tha thar-a meizial do a tum a, Anti-Tobacco Squad din fel a ni tawh.

Vaihlo leh a kaihhnawih chungchanga danin a khap tiluitute vai hna thawk tur Anti-Tobacco Squad chuan tun atanga hun rei lo teah hna an tan dawn.

Indian Society on Tobacco & Health Mizoram Chapter ISTH(M) hruaitute chuan May ni 17-ah Press Club-ah thuthar lakhawmtute kawmin Anti-Tobacco Squad din a nih thu leh an thawh tan thuai tur thu an sawi. ISTH(M) chu chak taka hma la turin a inpeih thawkhat tawh niin an sawi bawk.

Anti-Tobacco Squad-ah hian doctor te pawh an tel dawn a, police an awm bawk ang. ISTH(M) aiawh an awm ang a, Mizoram State Tobacco Control Society hnuaia thawkte an tel bawk ang.

Lal Riliani, ISTH(M) president chuan thu sawiin, thuthar lakhawmtute chu vaihlo that lohzia zirtirna thehdarhpui turin a sawm.

Zuk leh hmuam do hna chu kum sawmhnih kal ta atanga thawh a nih thu sawiin, mipui pawhin an bengkhawn chho ve zel niin a sawia, "Zuk leh hmuam do kawngah kawl a eng tan ta niin a lang," a ti.

Lal Riliani chuan vaihlo avanga Mizo mipuite tawrh nasat dan sawiin, "Hmun danga dam lo 'refer' zinga zaa sawmruk chu vaihlo leh a kaihhnawih avanga natna nei an ni," a ti.

Dr Jane Ralte, ECM, ISTH(M) chuan Vaihlo leh a kaihhnawih thil khapna dan hrang hrang a sawifiah a, vaihlo leh a kaihhnawih siamchhuaktute chuan a bawm pawn lamah "Health Warning" an tar vek tur a ni tih 'The Cigarettes and Other tobacco Products (Packaging and Labelling) (Amendment) Rules, 2010'-ah a inziah thu sawiin, he dan hi khauh taka kenkawh a nih tur thu a sawi.

Read more...

Pu Ditto-a ro hnutchhiah

¢ C Lalawmpuia

Thihna kut vâwtin a kaih mék lai chuan a khum sírah ka ding reng a. Lukham var thianghlim tak chunga a inkham pil käk leh a ruangam, naute lem dum të reuh të ang maia chër chhia chu ka thlir vawng vawng a. Tih theih eng emaw tak han neih ka va châk êm. A tàwpah zawng danglam deuh tak hian a rawn thaw sák sàk a. A hun a thleng tâ! Thih sual pawh a nei lo. Thihna meuh pawh Pu Ditto-a chungah chuan dam diaiin a lo thleng a ni ber mai.

Rev. William Howard, kan Damdawi In chaplain chu khum sír lehlamah chuan a thu bawk a. A Bible keu chu dim të hian a khup a. A lu kùnin, “Khawngaihnaa khat Pathian, i kutah a thlarau kan rawn hlàn e,” a han ti dam duai a.

A thutna atang chuan a tho chhuak a. Ka thinlung tawrhna rit tak chu min hriatpui ve a ni ngei ang, ka darah min rawn khawih a, “Läwm ila, nasa takin i hlim teh ang,” a rawn ti a. Chutah, a inher a. Engmah dang sawi lovin pindan kawngka chu dim të hian a pawt hawng a. Chhuah pahin dim të bawkin a nam khär leh ta a.

Nurse ka nih angin mitthi chunga ka tih tùrte chu ka ti zui ta nghâl a. Damlo khum sira dawhkan pawhdawh chu pawt hawngin, a chhunga Pu Ditto-a thil awm ang ang chu ka khâwm thuai thuai a. Tarmit hlui tawh tak, sawi bám mai te, bak meh chemtë, a then lai tuiêk tlar tawh leh Bible, khalh ngun avànga pawr fap tawh chu ka la chhuak a. A bâk thil dang a awm hauh lo. Mahse, beisei dang ka la nei tlat thung. Pu Ditto-a ro hlu ber, a tangkaraw pawisa tlang, a nun tihlimtu ber thìn kha. Chu aia ro hlu chu engmah dang a nei lo a nih kha. Eng emaw chen chu pawisa tlang chu ka hum vawng vawng a….

Veterans Administration Hospital hi Louisville, Kentucky-a awm a ni a. Ka thawhna TB ward lamah chuan Pu Ditto-a hi 1947 thlasik laia ka damlo enkawl hmasak ber a ni. Pu Ditto hi mi hang a ni a. America Tualchhung Indo lai khán New Orleans-ah piangin a nu leh pa pawh sal an ni nghe nghe. Naupang të a nih atangin fahrah enkawlna hmunah a awm a. Chu enkawlna hmun atanga a’n chhuak chu khawvêlah hian retheihna kawnga bul tan tha leh tùrin a se zawl chhuah a ni ber. Indo laia sipai hna rei lo të a thawk ve zauh tih loh chu ei khawp zawngin a inhlawh ni tin a. Amah lo khawngaihtu tu berin emaw bektë a zarsakah chuan amah chauha khawsain thawh tùr awm leh thawhna tùr a hmuh apiang a thawk zël thìn. Kum hnih kum thum liam tâah khán Louisville-ah a lo kal a. Vanduaithlâk takin a damlo chu a bawksawp ta reng mai a. TB chi khat avànga a kumkuruh bawr vêl pan hnai tuam chu Damdawi In a rawn luhpui ta a ni.

A awmna pindan ka va luh hmasak ber tum chuan a pan hnai rimchhia chuan min rawn bawh nghâl huk a. Pu Ditto-a mitmeng kha va hmu lo ila chuan tlan chhuah leh mai ka duh hial ang. “Good Morning, Pu Ditto, i inpeih emaw chu?,” ka han ti a. “Eng nge keiin ka hrethiam lo ve. |ül i tih chuan kei chu ka inpeih a nia,” a lo ti a.

Ka bual fai a, a mut puante ka thlâksak a. A taksa cher chhe lutuk tawh dim tëa ka’n kuai her vêl te chu rihna nei lo ni mai àwm hi a ni. A mitmengah na tak tuar tih a lang reng a. Mahse, thäwm engmah a chhuah hauh lo.

A pan tuamna ka phelh lai chuan insum zo lovin luak chhuak hian min rawn tur ut ut a. Mahse, hmai chuar nang chunga min rawn melhin, “Engtin chuan i tithei chu ni maw? Kei ngei pawh hian ka tuar thei lo a ni si a,” inthlahrung tak maia a rawn tih chuan ka dam hawk a. Hlim hmel pu takin ka lo nuih a, ka nui ri a hriat chuan ani pawh chu hlim takin a nui ve ta a. Bangbo takin kan inen dùn hé haw a. Chutah zet zawng rimchhia a bo zo ta. A hnu lamah pawh a pan rimchhia chuan min tibuai zui ta lo.

A puankawp sin chuan ka’n khuh tha a. A hmel a la hlim hlë. “Ka läwm e, tunah zawng ka dam huai ta mai,” a han ti a. A ban të reuh të chu sai hlak hlakin a rawn phar chhuak a. A khum bul pawhdawh chu a’n ban a. Pawhdawh atang chuan tangkaraw pawisa tlang pakhat hi a rawn phawrh chhuak ta a. “I thatnate ngaihtuah hian eng tham a ni lo ve. Mahse, tun ang khaw vâwt tawrhhlelhawmah hi zawng coffee sa ver vawr han lem pawh a châkawm viauin ka ring,” a han ti a. Pawhdawh chu a la inhawng reng a. A chhunga pawisa tlang 20 vêl, a thil neih dangte zínga darh niai pawh chu ka va hmu a. Chu’ng zawng chu he khawvêla a pawisa neihchhun a ni. Ka lawm e, tih paha han dawnsak mai ka hreh ta tlat a, “Ni lo, Pu Ditto, ka la thei lo vang. Khaw nawm loh hun atán tia i khâwl khâwmte an ni si a,” ka han ti a.

Chu veleh a mit meng a dul rawih a, lungngaihnain a hmel ëng a rawn hliah a. “Khaw nawm loh leh awm har ní a awm tawh dáwn hlei nem,” a rawn ti chuai rawih a.

Ka harh zawk mai. Tar chak lo leh rethei, engmah pêk chhuah tùr dang nei lo, thihna mai lo a hma lama hmabâk hlen tùr nei tawh lo chu, rilru nuam taka a mihringpuite chunga a tih theih chhun ka hlawhchhamtir ang maw. Rang takin, “Pu Ditto, a nih leh ka läwm e. Cofee sa tha tak han lem aia châk ka nei hlei nem,” tih pahin pawisa tlang chu a kut atang chuan ka lâksak ta a. A hmel pawh a rawn hlim leh ta.

Ni a liam zël a, ani erawh muangchangin a chau tial tial thung. Tûk tinin tih tùr tül ka va tihsak ziah a. Ani pawh dawhthei tak leh chhel takin a lo inpeih zël thìn. A pindan ka chhuahsan dáwn apiangin pawisa tlang a phawrh ziah a, “I thatna ngaihtuahin eng tham a ni lo ve,” a ti ziah bawk.

Pawhdawh chhunga pawisa tlang chu a tlem tial tial a ni tih ka hre reng a. Neih nei lo tawpa a awm hun chu hmuh ka hreh tak zet a ni.

Tunah zawng chakna rëng a nei ta lo. Mahse, a kut pawh amahin a chêt zo tawh lo tih thleng chuan pawisa tlang min pêk erawh a theihnghilh si lo.

Ni khat chu a pawisa tlang hnuhnung ber a thleng ta! A kut chu dim të hian pawhdawh lamah ka chawisak a, ka mittui tla tùr ka insum nasa ngei mai. A hmelah erawh chuan pawisa tlang dang a neih tawh loh avànga danglamna hmuh tùr a awm hauh lo. Pawisa tlang chu a’n lek chhuak leh a, a ngai tëa hlim hmel pu sang chungin zawi të hian a thu ngai bawk min hlàn leh ta. A rilru chuan engkim a dáwn zo tawh lo a ni ngei mai. Pêk chhuah hlimna chu a thinlungin a hre reng a, a neih lam leh a la bäng lam a ngaihtuah thleng tawh lo. Dim të hian a pawisa tlang min pêk chu pawhdawh chhungah chuan ka thlâk thla leh ta a.

Chawlhkár hnih dang a la dam a. Tûk tinin ka tih tùr ka va ti chhunzawm zël a. A mutbu te ka han thlâksak hnu chuan, “Vantirhkoh i ni e, ka tán Vantirhkoh i ni chiang e,” ti hian a phun sep sep a. Chutah, a kut chu pawhdawh lama chawisak a hun tih ka hria a. A ngai tëin pawisa tlang chu min pe a. A ngai têin ka dah kir leh ta thìn a ni.

A peih rei tawh dáwn lo tih ka hriat chuan Rev. William Howard, kan chaplain chu ka chah ta a. Ani chu a lo kal a. Naupang muhìl tan tawh thawnthu hrilh ang maia zawi leh dam hian Bible a chhiarsak ta a:

Tichuan, mipuite chu a hmuhin tlángah a kal chho va, tin, a thu a, a zirtirte a hnênah an lo kal a; tin, thü a sawi a, anmahni a zirtir a. Rilrua retheite chu an eng a tháwl e; van ram an tä a ni si a. Lungngaite chu an eng a tháwl e, thlamuanin an la awm dáwn si a. Thuhnuairawlhte chu an eng a tháwl e; lei hi an la rochung dáwn si a.

Ka rilru a kal thui ngei mai. Chu putar rethei tak, mi azawnga zawldawh leh thuhnuairawlh ber chuan natna tawrhhlehawm tak chu vuivaina nei hauh lovin a tuar a. Tunah, a hun tàwp tak takah hian chung lamin a chanvo tùra a zuatsak pawh chu a natna avàng chuan a bengkhawn thei lo maw? Ka thinlungah lungawi lohna a lo lian thut a. Chuti mai chu maw a chan tùr. Amahah hian chu mai chu em ni Pathian hian he khawvêla a nun chhan atán a ruatsak chu? A tawrhnate hi eng vang nge ni bîk le...?

Pawisa tlang hnuhnung ber hum chuan ka ding ngawi reng a. Chutah Pu Ditto-a thil dangte zíngah chuan ka vawm lût ve ta a. Chu’ng thilte chu ka fun khâwm a, ka funnaah chuan a hming ka ziak kalh bawk a. Chaplain hnêna an hlan chhàwn leh atán office lam ka panpui ta a ni.

Chu mi ni tläi lam, ka duty hun zawh dáwn têpah chuan kan chaplain, Rev. Howard chu ward-ah a lo kal a. Hmel hlim taka min melh chungin, “Pu Ditto khân ro tlem azawng a hnutchhiah che asin. I kawlsak ngei a duh ka ring,” tih pahin pawisa tlang kha a rawn phawrh a, ka kutah a rawn hmehbel ta a.

Pu Ditto-a hmel hlim sârh mai mittthla chungin tun tum zawng ihe lovin ka la ta. Chumi rual chuan chu thilpêk awmzia pawh chu ka hre chhuak ta nghâl a. A retheihna tilangtu mai nia hriain tum eng emaw zât he pawisa tlang hi lungngai takin ka dawng nawn ka dawng nawn a. Tunah erawh eng nge a nih ka hmu fiah ta chauh a ni. Awm thei pawha ka rin ngai loh, hausakna chhiar sen loh entirna a lo ni zâwk. Putar rethei të nia ka hriat thin, Pu Ditto kha a lo rethei hauh lo. A hausakna ram zau tak maiah chuan mihring thinlungin a neih theih zínga ro hlu ber ber, dawhtheihna leh tawrhchhelna te, inngaihtlawmna leh thuhnuairawlhna te, rinna leh hmangaihnate a nei vek a lo ni.

Damdawi In canteen lam ka pan a, coffee ka lam ta nghâl a. Tukverh bul dawhkan äwlah chuan thuthmun ka rem a. Khua a thim tan tawh. Tläi lam arsite pawh chung lamah an rawn de sep sep bawk. Chutah, cofee sa tha tak chu ka chawi a, ‘Pu Ditto, lei rochungtu pualin,’ ti hian tuma hriat tham lohin ka phun sep a (A legacy of Mr. Ditto by Doris Cheney Whitehouse).

Read more...

Sawi Tur Hre Loin I Ngawi Vung Vung Thin Em?

Ngaihzawng thar i nei a, inngaizawng hlim chauh in la nih avangin in la inhrechiang lo. Hlim taka inkawm in duh a, in la inzah ru deuh bawk si. In la inngaihzawn rei loh avangin in pahnih chauha in awmin sawi tur hre lovin in ngawi leh vung vung thin. Chutih hunah chuan sawi tur i hriat theih nan 'thil' kan han rawlruk teh ang che.

1. A pian leh murna khawi hmun nge?

2. A naupan laiin khawi hmunah nge a hun tam ber a hman?

4. A naupan laia a hun hman tawh zingah eng kha nuam a tih ber a, eng nge hreawm a tih thin?

5. Naupan lai chuan hlauh kan nei vek a, ani pawhin hlauh chu a nei ngei ang, entirnan thim hlau mi nge a nih?

6. Sik leh sa thu-ah eng hun nge nuam a tih ber? Engvanga nuam ti nge a nih?

7. I chhass chu zan lam men nuam ti mi nge zing thawh hma nuam ti mi? A chhan engvang nge?

8. Thilpek pe dawn ta la eng nge a duhzawng han thlan chhintir vel teh.
9. Khawi ram nge in pahnih chauhin kal dawn ta ula a kal duh? Engvang nge?

10. A mumang lamah eng thilte nge a hmuh thin?

12. Ramin hma a sawnna atan eng nge pawimawh hmasa ber a tih?

13. Engnge a tuizawng, eng nge nuam a tih?

In innel tawh viau a nih chuan hengte pawh hi eng nge a ngaihdan lo zawt ve leh ta la a sual awm lo e. Mahse heng zawhna kan han siam te hi a indawt ang thlap thap chuan zawh kher a tul lo a, sawi tur in hriat loh chang te, titi tui laklawha a karlaka han zeh deuh zeuh zeuh atan kan han chhawp chhuak mai a ni.

1. Hmangaihna dik hi eng tin nge a ngaih?

2. Khuannu samsuih hi awm thei ngeiin a ring em?

3. 'Love at first sight' hi a awm thei tak tak em ?

4. Inngaihzawnna kawngah hian thinrim leh tihtauh chang a awm lo thei lo a, chutih hunah chuan tu nge che chhuak hmasa thin ang?

5. Hmangaihna hian engkim tuar a huam a ni tih hi dik a tihzawng a ni em?
6. Lunglenna hi a nuam nge a hrehawm thlawn, eng nge a ngaihdan ?

7. In pahnih inkarah eng thil pawh a thleng thei, chutih hunah chuan 'lawm zel tang nge' ti thei zel tur chi a ni em?

8. Inhmuh zin hian induhna te hi a zual sawt an tih thin hi a pawmzawng a ni em?

9. Hausakna leh sum leh pai ngah ringawt aiin inhmangaih tawnna hi a pawimawh berin a hria em?

10. Innei ta chiah ula a tuna in iduhna ang hian in la induh tawn thei zel tho ang em?

Sawi tur leh inzawh tur a tam mai. Kan induhna te hi chhan leh vang mumal awm hlei lo hian sum leh pai kan it vang ngawt te, dinhmun tha zawka din beisei vang ngawt tein kan induh ang tih a hlauhawm. A pawimawh ber chu inhmangaih tawnna a ni. Mizote hian in ngaihzawn hi kan thiam lo tlangpui niin a lang. Mi zinga induh awm taka han lan vel te hi kan zah zawng a ni a, heng hunah tak te hian kan induhna hi lantir ngam a that chang a awm. Mahse a awm tawk leh mi dang mit tikham zawnga khawsak loh hram tum tur a ni.

Read more...

BEAUTY CARE

¢ Debbie Chawngthu

A hmasain zawhna chhanna ni pah fawmin facial hair lampang in sawi phawt teh ang. Hmeichhia ni si, hmuihmul nei an awm thei a, mahse mipa ang em chuan a tamin a dum ve ngai lo. A lan nep theih nan chuan bleaching hi a tha ber mai a. A thahtna chu hmul rawng a ti var a, hnawih rei hnuah phei chuan hmul rawn to na lai tichhiain hmul rawn to leh thei tawh lo turin a siam thei a ni.

Bleaching cream hi leitur a awm a, vun lam enkawl thiamte pawh a tih tir theih a ni. In lama mahnia tih dawn chuan a chhunga inziak chhiar ngai a ngai hle a, huat theih thil anih avangin vunin a hua nge haw lo tih enchhin hmasak ngei ngei tur a ni.

Facial hair hi khawihnun (wax) pawhin a tih tlak theih a. Mahse hetiangatih hi chu a na duhin a hnuah vun a thakin a sen duh a, a nuam vak lo. Hmul ziahna hi hman tam loh a tha a, electric hmanga hmul tih tlakna hi a hman tlak hle a, vun no lutuk tan erawh hman tam loh a tha thung.

Thu dangah han kai leh ta lawk ila, facial tih hi vun tan a that bakah rilru a nuamin a hlimawm a, chin tam tlak tak a ni. Facial tih lai chuan min tibuaitu awm lovin a thiamten duat takin min enkawl a, a hmaa nguai deuh pawhin a harh sawng sawng theih a ni. Pawisa neiha regular taka tih theih chuan vun hi a nung sarh mai a, inchei pawh a nuam sawt thin.

Facial tih hi a titu azirin a dang thei hle a. Facial tih hian deep cleansing te, steaming te, arngeng lak chhuah leh facemask te a huam a. A tih chhung a rei a, hahdam taka awm thiam phei chuan vun mai tan bakah taksa tan pawh a tha a ni. Tih dawnin fimkhur a ngai hle a, a titu tur kha vun lam thiam tak a ni em tih te hriat hmasak tur a ni. A thiam i tih tir hnuah enganga enkawl zui tur nge tih zawh theihnghilh loh tur a ni.

Mi tumah hi hmel lungawipui tak tak kan awm lova. Chuvangin, inchei dan thiam hi a pawimawh hle a ni. Foundation hi chi hnih - a dal deuh leh a tak neih kawp a tul a. Moisturiser i hnawih hnuah foundation i hnawih ang a, rual takin chul ang che. Vun chuar deuh laiah a dal hnawih hnawih tur a ni a, a chuar lo laiah a tak zawk. hnawih chhin zin a ngai a, i mawipui tur tak anih hma chu zir ang che.

I hnar a hlai anih chuan foundation rawng tak zawk kha i hnar ngul sir tluan chhuakah hnawih la, i kut hmawrin nuai rual ang che. A lai takah chuan hnawih tel tur a ni lova, foundation rawng dal zawk kha hnawih tur a ni. I hnar hmawrah pawh a rawng dal bawk hnawih ang che. Mahse i hnawihin rual takin nuai ang che. Mit hnuai val hi mut tlem vang leh hrisel loh avangtein a awm thei a. A val nasa anih chuan doctor inentir tur a ni. Hrisel loh vanga awmte anih leh loh chuan concealer stick hmangin a thup theih a. Concealer stick neih loh chuan foundation rawng dal hnawih mai tur a ni.

Khabe ruh kual lian tan chuan foundation rawng tak khabe ruh kualah hnawih den den a, chul rual tur a ni a, khabe zum lai takah erawh hcuan hnawih loh tur. Rual taka nuai a, nghawng thelgna nuai tur a ni. Hnar ruh kawi deuh tan pawh a ruh kawi laiah foundation rawng dal hnawiha a dangah a tak deuh hnawihin a ti lang ngil thei a, mahse zir tam deuh erawh a ngai thung.

Read more...

Nui Lawks 55


J Zawn hmuh harsat hmel: "Nilaini-ah khan ka fanu USA kal turin Khatla-Guwahati-Delhi-New Delhi-New York inkarah a purse a tibo a, a hmu chuan min han pe teh u. Mitvar man kan lo ang che u."
- 9436159317

J Hetia ngaih bik pawh nei lova kan lung a'n len vang vang hian Amitab Bachchan kan lo ngai tlangpui tih psychologist-te chuan an hmuchhuak.
- 9862507242

J Hrisel loh miau chuan rilru pawh a lo fim lo thei khawp mai; thawk khat lai khan kan nu hi ka'n ringhlel tlat mai pek a, kan fapa neichhun meuh pawh a fa a nih lo ka ring thin. "I fa a ni lo ang, min bum a ni," tiin patling ka'n ang phiar phiar thin mai chu, hetia ka lo hrisel leh tak hnu hian nuih a zain a zahthlak duh ang reng khawp mai!
- 9612698042
(Hetianga mahni chanchin dik tak tarlang ngamte hi fiamthu thiam, rilru zau tihna an tih thin kha.)

J Nula rim lai chuan sana aiin calendar zawk en ila len rei a awl!
- 9862375770

J Keini'n motor kan neih ve meuh chuan mi hian kea kal an lo intihhmuh hman tawh ang!
- 9612589095

J Thailand-ah khian Burma ram atanga raltlan an tam hle a, refugee camp-ah an dahkhawm thin a, chutiang chu 'Kawl Centre' an ti.
- 9612566920

J Technical entrance exam result pawh tidik thei lo sorkar hian chhiarpui-ah phei chuan tihdik loh an ngah ngawtin a rinawm!
- 9436140037

Read more...

Chanchin Maksak 74


Publisher chu suamhmang a ni
English literature-a hming dai tawh ngai lo tur Lord Byron-a kha pa fiamthu duh tak a ni awm e, a fiamthu hi a san pawh a sang hle.

Vawi khat chu a publisher John Murray-a khan thilpek a dawng a, Bible chhah tha tak, a kawm chhah chi ngat, Byron-a pek a ni.

John Murray-a chu a lawm khawp mai a, mahse, Chanchin |ha Johana ziak, Bung 18-na chang tawp ber tlar tawp ber a'n keu thleng chu, a inngaihtuah zui vang vang mai.

Chu tlar chu- "Barabba chu suamhmang a ni" tih a ni a, mahse, chu Bible-ah chuan a petu khan, "Tunah chuan Barabba chu publisher a ni," tiin a lo thlak pek a nih chu!


Misual ai pawha sual
Lawng suamhmang hmingthang Captain William Kidd (1645-1701) kha kan hre fur awm e. Sea captain tha tak a ni thin a, Madagascar ram tuipuia lawng suamhmangte man tura a thawkchhuak kha, suamhmangte man lovin a zawm ta hlauh a nih kha.

A hun laia suamhmang hnawksak ber pakhat a ni a, lawngmite nin leh tih berte zinga mi a ni. A hun tawp lamah khan England thuneitute nen an inberem thei ta hlauh a, 'a inpek (surrender) phawt chuan ngaihdam a ni ang' tiin.

A inpe ta ngei a, mahse, an ngaidam leh lo thut. Mahni inah thlamuang taka a awm laiin an man a, mi khaihlumna dawhsan (gallows) an hruai thleng ta mai. Tichuan, a nghawngah hrui an valh a, an khawihlum dawn ta. A thih hmaa a tawngkam hnuhnung ber chu- "Chhuan bengtla lo leh rinawm lo, Pathian tihna nei loho," tih a ni!

Read more...

Friday, May 14, 2010

Vanlalruati Ngilh Loh Nan Liau Liau



Edited by Joseph Lalrintluanga


Read more...

Sunday, May 9, 2010

Pawngsual kan awm tawh lo'ng Jerusalem tharah

April 20, 2010 zan dar 9 leh dar 10 inkarah hmeichhe naupang, kum 13-mi chu Laxman Ravi Das (24), Ranjit Ravi Das-a fapain a pawngsual a, Laxman hi April ni 20 zanah hian police te'n la nghalin, pawngsual thubuai - U/S 376 (2)(f) awrhtir a ni.

Laxman hi pheikhawk chhe siama eizawng, ILP nei lo niin thudawn chuan a sawi.

Pawngsualtu in luah hi pawngsual tawktu naupangte awmna in nen bang insi renga awm a ni a, naupang pa hian a hriatchhuah hnu hian police a laktir a ni.

He thil thleng chungchang ngaihtuahin April ni 21-ah MHIP Headquarters Office-ah MZP, MSU, CYMA, MHIP, PAMRA leh JACIT aiawhte an kalkhawm a, "He pawngsualna hi na takin kan dem a, Mizoram chhungah hetiang hi thleng nawn tawh lo se kan ti," an ti.

"He thil thleng denchhen hian hnam dang Mizorama khawsa mekte chungah harsatna thleng thei a nih avangin tun kar chhung dt.25 April 2010- ral hma chu mahni in chhunga lo tawm a, an sahimnan lo chhhuak rih lo turin kan ngen. Tin, ILP nei lo leh dan lova sumdawng hnam dangte chu Mizoram atanga thawn chhuak vek turin Mizoram Sorkar kan phut nghal a ni. Hetih rual hian dan lova khawsa leh ngenna ngai pawimawh lo chunga thil tha lo a thleng a nih chuan Mzote’n mawh kan phur lo ang," an ti bawk.

April ni 21 tlai lam atangin Aizawl khawpuiah vai hmuh tur an awm lo nghal deuh mai a, buaina chhuak palh thei vengin police thahnem tak khawlaiah hmuh tur an awm nghal thung.

Pawngsual chungchang chuan titi a luah nghal a, chanchin mak tak hriat tur pawh a awm nghal. A then chuan hmeichhe naupang khan a duh ve reng nia sawiin, pawngsual ni-a an hriat loh thu an sawi a, sawi tur hre fe fe pawh an awm. 'Hnam dang pawn chhuah loh' chungchang pawhin sawi a hlawh nghal a, phai lam chanchinbu-ah pawh hemi chungchang hi chhiar tur a awm.

He naupang tuamhlawma enkawl nghaltu NGO pakhat chuan mi thenkhatin pawngsual ni lova an sawi chu pawi an ti a, an rilru pawh a na.

"Amah kan kawm a, councelling te kan pe a, a tap zawih zawih reng. A hlau a, a thlabar a, a rilru a na em em bawk. A tirah phei chuan, 'I tah a chhuak a nih kha, min kuah la, tap tawp mai rawh,' kan tia, a tap zawih zawih mai," tiin chu NGO hruaitu pakhat chuan The Aizawl Post a hrilh.

"Mi thenkhat sawi dan hi a dik lo a, inngaizawng pawh an ni lo. He nau hian thil a hrethiam lo lutuk a, a hlau em em bawk," a ti bawk.

He nau hi kum tling lo a nih avangin, danah chuan ama duhthu ngeia mipa mutpui pawh lo ni ta se pawngsual a ni reng reng a, Mizo tlangval zingah, mahni ngaihzawngte mutpui, an duhthu renga mutpui, mahse, kum tling lo hmeichhia an nih avanga pawngsual case-a thiam loh chang ta, kum 10 lung in tang tura thiam loh chang te pawh an awm tawh thin nghe nghe.

"He nau hi a khawngaihthlak a, ama duhthu-a hetiang thil hi ti a ni lo. Pawngsual ngei a ni. Mizo hmeichhe naupangte hian venhim an ngai tak zet a, hmeichhe naupangin vanduaina a tawh hnu-ah pawh hetianga sawi duh kan tam hian Mizo hmeichhe naupangte'n venhim an ngaihzia a tilang a ni," tiin social worker pakhat chuan Zozam Weekly a hrilh.

"Mizote hian pawngsual tuarte dinhmun hi kan la hrethiam tawk lo hrim hrim a, kan khawngaih e kan ti na a, kan la khawngaih tawk lo. Damchhung nghawng thei khawpa sual huatthlala a ni a, inzirtirna leh intuamhlawmna lamah tan kan lak a ngai khawp mai," tiin social worker, pawngsual tuartu mi engemaw zat lo tuamhlawm tawhtu Ruatfela Nu chuan a sawi.

"Pawngsual tawk tawhte tan chuan khawvel hi a hahthlak a, Mizoram hi a hahthlak lehzual mai thei. Thup nachang te kan hre lo a, kan inti tlangthang chiam zel. Tin, an rilru hi a na a ni mai lo a, awmngaihna hre lo khawpin an tap thin. Chumi tuamhlawma enkawl zuina lamah chuan kan thanharh a ngai a, mipui pawh sorkar pawh heti lama kan thanharh a ngai. Pawngsual tawk tawhte hian phurrit an phur reng a ni ber," a ti bawk.

CID (Crime Branch) te chhinchhiah dan chuan, kum 3 chhung, 2007-2009 chhung khan Mizoramah hmeichhe puitling 69-in pawngsual an tawk a, kum tling lo mi 149-in pawngsual an tawk bawk.

2010 January atanga March thleng khan Mizoramah mi 13-in pawngsual an tawk tawh tiin an chhinchhiah a, mi 13 zinga 5 chu naupang, kum tling lo an ni.

Social worker-te chuan mipui tam zawng atanga chhutin Mizoramah pawngsual a tam an ti a, chutih rual chuan, tun hma lam aia media-in hetiang lam an tarlan that tak avang leh mipui nawlpuiin thil awmzia an lo hriatthiam tak avangin police hnena report nachang hria an lo tam ta a, hei vang hian pawngsual a pung angin a ngaih theih niin an sawi hlawm.

Human Right and Law Network te'n pawngsual tuar mi engemaw zat kawmin an dinhmun an zir a, pawngsual tuarte dinhmun hi a tha lo hle tih an hmuchhuak.

"A tirah kan ri hluai a, kan theihnghilh zui leh mai a. Pawngsual hi rei lo te chhunga do chi a ni lo a, a tuartu hi kum engemaw zat vil zui ngai an ni. Chu chu a nachang kan hre thin lo. Khawtlangin kawng te kan zawh a, mahse, kan kawmte chuan he'ngte hi rapthlak an tih thu leh pawngsual an tawh avanga mipuiin kawng an zawh mup mup lai an theihnghilh theih loh thu, rapthlak an tih ngawih ngawih thu an sawi hlawm," tiin Human Rights and Law Network hruaitute chuan an sawi.

"Pawngsual tawk tawhte hi mirethei an ni deuh zel," an ti bawk. A chinfel kawngah pawh a tuartute retheihna hian thil a tibuaithlak niin an sawi nghe nghe.

"Thenkhat chuan police leh court te an dem thin a, mahse, chutiang a ni ngawt lo. Pawngsual tuarte hi mirethei, insawn insawn kual thin te an ni a, police leh court-in an thubuai an buaipui pawhin kohna tur an hre lo thin. Insawn kual reng reng an nih hlawm avangin hian an address a lo danglam zung zung thin a, chu chuan thil a tibuaithlak khawp mai," an ti.

"An retheih avanga huai ngam lo, eng tin tin emaw ngawi tura thlemte an awm a, a pawngsualtu lamina an vau te pawh an awm," an ti bawk.

A zirchiannaa an mi kawm thenkhatah chuan police leh court hmaa engmah sawi lo tura a pawngsualtu lamina an vau pawh an awm nual a ni.

"Pawngsual tuar tawh kan kawmte hi an rilru a na ngawih ngawih reng a, kum 10 chuang liam hnu-ah pawh an thil tawnin a la tibuai reng. 'Chu chu ka hlau, chu chuan min rap' tia sawi tur an nei nawk hlawm," an ti a, pawngsual chu mi thenkhat tan khawtlang tihrehawmtu a ni tawh tih sawiin, tun ang zel a nih chuan rin aia nasain pawngsual hian khawtlang nun a tihhrehawm an rin thu an sawi bawk.


Kum 3 chhunga Mizorama pawngsual zat (Kum 16 chung lam)
2007 - 21
2008 - 25
2009 - 69
A vaiin - 69

Made for each other?
He thil thleng hian Mizo leh vai inzawmna thui tak a lantir tiin a sawi theih awm e. April ni 21 atangin vai an pawnchhuak ngam lo a, New Market velah chuan ruihhlo ngai (drug addict) an reh ve duak!

"A mah lutuk! Vai an chhuak lo a, proxyvon-a inchiu thinho an rawn lang lo ve nghal duak, ni dangah chuan an rawn tei an rawn tei thin a nia," tiin New Market-a dawrnghak pakhat chuan Zozam Weekly a hrilh.

"Eng tin nge proxyvon hi an inpek kual chu ka hre lo a, mahse, vai hi an lo inrawlh thuk hle a nih ka ring, ni khat an chhuah loh paw'n drug addict an rawn lang lo nghal," tiin dawrnghak dang pakhatin a lo sawi ve bawk.

Khaw chhunga a pe kualtu-ah an tang chiah lo a nih pawhin Mizorama proxyvon lakluhnaah vai an tangkai hle nia sawi a ni a, an tel lovin kan tlangvalte an rui thei mang lo niin a lang!

Ni 21 (Nilaini) atangin vai an pawnchhuak ngam lo a, Silchar driver-te an rawn tlanlut lo bawk. A tuk atangin chawhmeh thenkhat, phai atanga lakluh chu a vang deuh nghal mai a, Inrinni bazar-ah phei chuan tomato, zikhlum tih vel a vang hle.

Aizawl-ah traffic a thawl phah nia sawi pawh an awm. Vai hnathawk engemaw zatin hna an han thawh loh khan kawngpui a chep ta lo sawt tiin a sawi theih. A bikin 'mutia'-in hna an thawh loh chuan dawr bungrua kawngsira hlangthla te an tlem phah a, engemaw chenah traffic a thawl phah niin a lang.

Read more...

Mizoramah naupang an him em?

Hmeichhe naupang pakhat chu kum 6 mi a nih lai atangin ama pa ngeiin a pawngsual thin a, kum 15-mi a nihin hriatchhuah a ni!

He naupang hi nu leh pa inthen kara mi a ni a, thingtlang khaw pakhatah a pa bulah khawsain, a pi leh pute nen an chengho thin. A pi leh pu thih hnuah Aizawlah an pem a, Aizawlah an awm hnuah chuan a chunga thil thleng thin chu hriatchhuah a ni ta a ni.

Thingtlang khaw pakhat, Aizawl bul lawkah pawh hmeichhe naupang pakhat chu a pain a pawngsual thin tih tihpalh thil thuin hriatchhuah a ni.

He naupang hi kum 3-mi a nih laiin a nu leh pa an inthen a, a pain a enkawl a ni. An thenawm pain a duat hle a, kawr te, chithlum te a leisak thin. Mahse, thil a leisak mai ni lovin a lo khuaikhem thin hi a lo ni a, kum 6-mi a nih lai atangin chutiang chuan a lo khawsak pui thin!

An inmanchhuak ta; an khaw MHIP hruaitute hmalaknain he thil hi hriatchhuah a ni. MHIP hruaitute chuan "nangmah khawih tawhtu zawng zawng sawi rawh" an ti a, a'n sawi ta a, a pa pawh a lo tel! A pa chuan a ruih chang leh ruih loh chang te'n a lo mutpui thin a ni!

Social Welfare deptt. hnuaia mi, Child Welfare Committee chuan 2005 September atanga 2009 October thleng khan mipat hmeichhiatna lama naupang khuaikhem case 127 report an dawng a, case 127 zinga 107 chu puitlingin naupang a khuaikhem (sexually abuse) thu a ni. Naupang leh naupang inkara mi case 18 awmin, 'same sex' kara mi case 2 a awm. Physical abuse case 22 an dawng tawh a, child labour case 9 an dawng tawh bawk.

Child Welfare Committee hruaitute hnen atanga thu dawn dan chuan, sexually abuse-ah hian a tam zawk fe chu chhungkaw kara mi, an lamhnaite'na naupang an khuaikhemna a ni.

"Pain a fa a khawih te, pahrawn te, pate leh putea te, chhungkuaa an chenpuite'na an khawih te a tam ber. |henawm hnaia mite'n an khuaikhem pawh a awm a, hmelhriat lohte'n an khawih hi chu a tam lutuk lo," Child Welfare Committee hruaitu pakhat chuan a ti.

"Naupangte chunga hleilenna hi kan society-ah a nasa ta khawp mai. Keini'na kan dawn chin hi chu a sawichhuak ngam leh sawichhuak lo thei lote an ni mai a, sawichhuak ngam lo, inthup a tam ang tih a rinawm," a ti bawk.

Human Right and Law Network te'n pawngsual leh khuaikhem tuar tawh Mizo naupang 70-te dinhmun an zirchiannaah naupang vanduaite khawihtu hi an chhungte an ni tlangpui tih an hmuchhuak.

Human Rights and Law Network hruaitute chuan an zirchianna an thil hmuh sawiin, "Naupang pawngsual leh khuaikhem hi chhungkhat inhnaivai karah a thlen nasat avangin mualpho hlauva inthup an tam," an ti a, naupang 70 an kawmte zingah pawh hian police te hnena report lo an tam tih an sawi bawk.

"Zirtirna dawng tha naupang zingah chuan hetiang thil hi a thleng tlem nge nge tih kan hmuchhuak a, mipa leh puitling nel dan leh an bula awm dan zirtirna dawng thin te, fimkhur tura hrilh thinte chu an him nge nge," an ti.

Tun hnaia Aizawla thil thleng, vaiin hmeichhe naupang kum 13 mi a mutpui chungchanga Zozam Weekly-in a kawm social worker-te chuan kha naupang awmna veng thlenga mipuiin an hre ta luai mai kha pawi an ti a, media thenkhata an veng hming a lan avanga pawi an tih thu an sawi hlawm.


Kum 3 chhunga Mizorama pawngsual zat (Naupang- kum 16 hnuai lam)
2007 - 52
2008 - 50
2009 - 47
A Vaiin - 149

Read more...

Mizoram-ah foreigner an pung

Aizawl khawlaiah sap emaw khawchhak lam unaute emaw an tei lawp lawp fo a, khaw dangah pawh hmuh tur an awm leh nawlh thin. Tun hnaiah foreing atanga Mizoram tlawhtu an pung a, mipui nawlpui pawhin khawlai vela foreigner hmuh changin mak an ti vak ta lo niin a lang.

2010 January-March chhung khan foreigner 240-in Mizoram an tlawh a, kum dang ngaihtuah chuan Mizoram tlawhtu hi an tam hle. Tun hnai kum 5 chhung enin 2010-ah kum tir thla 3 chhunga Mizoram tlawhtu an tam ber a, a dawttu chu 2008 niin, hemi kum January-March chhungin foreigner 161-in Mizoram an tlawh a ni. Hemi kum hian mautam vanga Mizoram tlawhtu an tam ve reng reng tih thu dawn a ni.

2006 January - March chhungin foreigner 142-in Mizoram an tlawh a, 2007-ah 144, 2008-ah 161, 2009-ah 123-in Mizoram an tlawh a ni.

Kum 10 chhunga (1999 atanga 2009) Mizoram tlawhtu foreigner zat, Foreigner Registration Office-a an chhinchhiah danah chuan kum 10 chhung hian foreigner 3721, mipa 2344 leh hmeichhia 1377-in Mizoram an tlawh a, 2009 chu Mizoram tlawhtu foreigner an tam ber kum niin, mi 545-in Mizoram an tlawh a ni.

He'ng foreigner-te hi ram hrang hrang 82 atanga lo kal an ni a, American an tam ber. Kum 10 chhung hian American- mipa 598 leh hmeichhia 362-in Mizoram an tlawh a ni.

Australian-in an dawt a, mipa 245 leh hmeichhia 198-in Mizoram an tlawh. Mizorama Kristianna puluttu ran, sakhuana thil vanga Mizoram rawn tlawh reng reng thin British-in an dawt leh a, mipa 313 leh hmeichhia 199-in kum 10 chhungin Mizoram an tlawh.

Kohhran thilah an rawn lan ngun avangin British-ho hi tam ber turah an ngaih theih mai thei a, an tam ber lo hi thenkhat chuan mak an ti deuh mai thei. Mahse, an chunga mi- American leh Australian zingah pawh hian Kohhran thil avanga Mizoram tlawhtu an tam a, British dawttu Canadian leh German-ho zingah pawh sakhuana thil avanga Mizoram tlawhtu an tam.

American, Australian, British, Canadian leh German te tih lohah ram thianghlim (Israel) atanga rawn kal an tam ber a, hei hi Isua pianna ram-a mite'n "Kristian ram" Mizoram an tlawh chak vak ni lovin, Zofate zingah Israel rama pem an tam vang zawk a ni.

Mizoram atangin Israel hnam bo nia inhriaa Israel-a pem thla mi 1000 chuang an awm tawh a, chu'ng mite chu Mizoramah an rawn kal changin, passport leh VISA a ngaih avangin Foreigners Registration Office-a chhinchhiah an ni thin a ni.

Khawchhak lam unaute hmel hmuh tur Mizoramah awm ve ta fo mah se sapho nena khaikhin chuan Mizoram tlawhtu zingah an tam lo hle; India sorkarin Look East Policy hmangin khawchhak lam hawi tum mah se khawchhak lam unaute hian Mizoram lam an la rawn hawi lutuk lo a ni mai thei.

Kum 10 chhunga Mizoram tlawhtu zingah khawchhak lam unaute zingah Japanese an tam ber a, mipa 114 leh hmeichhia 13 an awm. Japanese zingah hian thil pawimawh ti tura Mizoram sorkarin a chahluh an tam. Korean 108 an awm a, mipa 63 leh hmeichia 45 an ni. Korean zingah hian Kohhran thila rawn kal an tam a, a huhova rawn zin an tam bawk. Mizoram tlawhtu Korean-te hi S Korea atanga rawn kalte vek an ni a, N Korea lamin Mizoram an la rawn tlawh ngai lo hrim hrim niin a lang.

Japanese leh Korean tih lohvah chuan Malaysian an tam leh a, mipa 114 leh hmeichhia 18-in 1999-2009 chhung khan Mizoram an rawn tlawh a ni. Taiwanese, Thai, Vietnamese, Chinese, Filipio, Indonesian, Singaporean leh Burmese te an awm bawk.

Mak ang reuh deuh chu- kum 10 chhunga foreign atanga Mizoram tlawhtu hnam hrang hrang zingah Burmese 8 chauh an awm hi a ni. Foreigner Registration Office-a an chhinchhiah dan chuan 2002-ah 1, 2005-ah 2, 2006-ah 2, 2007-ah 1, 2009-ah 2 Burmese-in Mizoram an tlawh a ni.

Mi 8 chauh chhinchhiah ni mah se Mizoramah Burma atanga rawn kal an tamzia chu tlang hriat a ni. Amaherawhchu, Mizoram-a rawn kal zawng zawng deuh thaw hi raltlan leh tlanchhia an ni a, dan zawma rawn lut tura beisei theih an ni lo. Chu lo rengah pawh India leh Burma-ah hian a lehlam lehlamah, ramri atanga Km 40 chhung chu passport leh VISA tel lova zalen taka kal theih a ni a, chu chuan Burma ram atanga Mizorama kal a tiawlsam bawk. Tin, Burma atanga Mizorama rawn kalte hi Zofa an ni tlangpui a, mahni unaute hnena tlanchhia an nih avangin dan an zawm diak diak kher lo ni pawhin a lang. Mizoram atang pawhin dan zawm lova Burma rama kal an tam ve tho. A thu hrimah Burma rama Zofate hian Burmese tih pawh an duh chiah lo, a la hmu lo zingah pawh Mizoram ngaia lungleng an tam mai. Chuvangin, Burma atanga Mizorama kal mi 8 chauh chhinchhiah an ni hi thil mak a ni lem lo, a that leh that loh chu thuhran ni se.

Mizoram thenawm- Bangladesh atang pawhin kum 10 chhungin Mizoramah mi 54 chiah an rawn kal! Bangladesh atanga Mizoram tlawhtu, Foreigners Registration Office-a an chhinchhiahte hi Buddhist puithiam an ni tlangpui a, Mizoram chhim lam Chakma-te hnena zin an ni tlangpui bawk. Mi 54 chauh ni lo, Bangladeshi tam tak Mizoramah an rawn kal nia sawi a ni a, dan zawm lovin an rawn kal nasa tihna a ni thei ang. Chutih rual chuan Bangladesh-ah hian Zofa engemaw zat an awm a, anni pawh hi Burma atanga rawn kalte ang deuh khan, dan zawm diak diak lo mah se "ka ram" tia an sawi thin- Mizorama zin an ni, Bangladeshi tih pawh an duh lo. Amaherawhchu, Zofa ni lo, Bangladeshi dik tak Mizorama dan zawm lova rawn lut hi chu an tam ang tih chu ngaihdan tlanglawn a ni.

Nepali pawh an tlem khawp mai; kum 10 chhunga Foreigners Registration Office-in an chhinchhiah chu mipa 2 chiah!

Kum 10 chhung hian Maradona te ram atangin mi 7, mipa 5 leh hmeichhia 2-in Mizoram an tlawh a, Ronaldinho te ram atangin mipa 3 leh hmeichhia 2 an rawn kal bawk. Christiano Ronaldo te hnam hi an reh khawp mai; 2008-ah khan mipa 1 a rawn kal ve a, chu chauh chu Mizoramin Portugese a mikhual a la ni.

"Switzerland of the West" atangin mi 57, mipa 18 leh hmeichhia 39-in kum 10 chhungin Mizoram an rawn tlawh a, Romeo leh Juliet-i te ram- Italy atang pawhin mipa 11 leh hmeichhia 1-in kum 10 chhungin Mizoram an tlawh. Romeo leh Juliet-i te ram atangin mi 12-in Romawia leh Zoluti te tual chaina ram an tlawh tihna! Heh!

Tun hnaia lirnghingin a sawisak zek- Haitian-ho pawh an 'nil' lo; 2002-ah mipa 1 a rawn zin ve e.

Arestotle-a te ram, democracy chingchhuaktu Greek-ho leh democracy ram lian ber-a state ralmuang ber inti Mizoram hi an intlawhpawh tawn vak lo khawp mai; kum 10 chhungin Greek hmeichhe 2-in Mizoram an tlawh a, chu bak chu philospher ropui tak tak chawrchhuahna ram Greece atangin ziak leh chhiar thiam ram-a zin an awm lo.

Indopui Pakhatna-a kan pute rammutna ram pawhin Mizoram an rawn tlawh nasa lo khawp mai; lawmthu rawn sawi te pawh tul an ti lo emaw'n teh reng ni! 1999 atanga 2009 thleng khan 'Feren' mi 40, mipa 28 leh hmeichhia 12-in Mizoram an tlawh.

Kumin chhungin, Foreigners Registration Office te'n an chhinchhiah dan chuan, April ni 26 thleng khan foreigner 319-in Mizoram an tlawh tawh a, he'ng mi 319-te hi ram hrang hrang 32-a mi an ni.

Kumin chhunga Mizoram tlawhtu foreigner zingah hian American an tam ber a, 84 an ni. Australian 47 an awm a, British 28, Thai 21, Canadian 19, Filipino leh Korean 18 ve ve an awm. Mizoram thenawm Burma atanga Mizoram tlawhtu an la awm lo a, Bangladeshi erawh 5 an awm tawh.

Isreal atangin kuminah mi 9-in Mizoram an rawn tlawh tawh a, anni hi Mizoram atanga pem thla, rawn haw/zin an ni tlangpui.

Ram danga inbengbel Zofa thenkhat chu an inbenbelna ramah khua leh tui nihna dilin, a ram mi an ni thin a, anni ang pawh hi Mizorama an rawn haw changin Foreigner Registration Office-a in-report zel tur an ni. Zikpuii Pa fanu Margaret Lallianpuii, Australia-a inbengbel erawhin, 'Mahni rama rawn haw changa foreigner nih ka duh lo,' tiin Australia-ah hian a theih chhung chu khua leh tui nihna (citizenship) dil a tum lo a, a inbenbelna ramah mikhual cham rei a la ni ta reng.


Kum 10 chhunga foreigner-in Mizoram an tlawh dan
1999 - 216
2000 - 256
2001 - 151
2002 - 187
2003 - 232
2004 - 386
2005 - 306
2006 - 470
2007 - 413
2008 - 568
2009 - 545

Total - 3721


Kum 10 chhunga Mizoram mikhual ngah deuh deuhte
American - 960
Australian - 443
British - 512
Canadian - 400
German - 194
Israel - 165
Japanese - 127
Korean - 108
Malaysian - 132


Kum 10 chhunga Mizoram tlawhtu khawchhak lam unaute
Japanese - 127
Korean - 108
Malaysian - 132
Chinese - 23
Filipino - 22
Thai - 18
Taiwanese - 11
Indonesian - 8
Burmese - 8
Vietnamese - 7



Mizo zingah chhinchhiahna ngai pawimawh lo

Mizoram hi Protected Area a nih avangin Mizoram tlawhtu foreigner reng reng Mizoram leilung an rah atanga darkar 24 ral hma ngeiin Foreigner Registration Officer/SP, CID (SB) hnenah an in-report tur a ni a, Mizorama an cham chhunga an awm dan tur, tih tur leh tih loh tur an permit-a inziakte an zawm ngei tur a ni. Dam zawm lote chu man-a hrem theih an ni. Chutiang a nih laiin Mizoram tlawhtu foreigner sponsor-tu zingah dan ngai pawimawh lo an awm thin.

"A foreigner-ate hi chuan an ngai pawimawh a, a sponsor-tu Mizote zawk hian an ngai pawimawh lo thin a, a buaithlak khawp mai," thudawn chuan a ti.

"Mizote hi kan ngaih a sam thin nge, mahni mikhualte emaw in-report kher tul ti lo an awm thin a, foreigner nupui/pasal-a nei zingah pawh an nupui/pasal te in-report kher tul ti lo te an awm thin. Hei hi hnam tan a pawi thei a, Mizorama foreigner rawn kalte uluk taka chhinchhiah thlap thlap loh hian thil tha lo a thlen thei a ni tih kan hriat tlan a tha khawp mai," thudawn chuan a ti bawk.

Foreigner Registration Office-a chhinchhiah zat hi sorkar laipui-ah thawn thlak a ni thin a, chhinchhiah kim a nih loh hian thil a tibuai chuar thei tiin a thawkte chuan an sawi.

Foreigner Registration Office te'n an chhinchhiah dan chuan kuminah Taiwanese 1 Mizoramah a rawn zin tawh a, chutih laiin Chapchar Kut-ah khan Mizoram sorkar mikhual Taiwanese panga vel chu Lammual-ah hmuh tur an awm si! Mizoram sorkarin present te pawh a pek nghe nghe kha.

Govt of India Order 1958 (Under the Foreigners Protected Areas Order 1958) hmangin he'ng hmunte hi Protected Area-ah puan a ni:

(i) Arunachal Pradesh pum
(ii) Himachal Pradesh hmun thenkhat
(iii) Jammu & Kashmir hmun thenkhat
(iv) Manipur pum
(v) Mizoram pum
(vi) Nagaland pum
(vii) Rajasthan hmun thenkhat
(viii) Sikkim pum
(ix) Uttaranchal hmun thenkhat.

Protected Area hi foreigner-in an tlawh dawn a nih chuan Protected Areas Permit (PAP) a ngai a, PAP dil tur hian a tlem berah mi 4 tal nih a ngai. Nupa tan a dil theih bawk. PAP hi sorkar laipui hnuaia ministry of home affairs-ah dil tur a ni a, chu chu state sorkar/sorkar laipuiin travel agency, PAP buaipui tura a tih (Mizoramah chuan Omega Travels) kaltlangin state sorkar hnuaia home department-ah thehluh leh tur a ni.

Phalsak an nih chuan home deptt. chuan ni 10 chhung atan PAP a lo siamsak ang a, chumi hnu-ah chuan Protected Area-ah an lut thei chauh a ni.

Mizoramah chuan Lengpui Airport an thlen veleh foreigner-te lo dawngsawng tura dah- police te hnenah an in-report nghal tur a ni a, motor-a an rawn kal a nih pawhin Vairengte Police Check Gate-ah an in-report tur a ni.

Mizoram leilung an rah atanga darkar 24 chhungin Foreigner Registration Office/SP, CID (SB) hnenah document kimchang nen an in-report leh tur a ni. Dan zawm lote chu dan bawhchhia, man-a hrem theih an ni.

Read more...

Hmarchhak tan sana hran

Hmarchhak hi Bangladesh chhakah a awm a, mahse, Bangladesh sana a chak zawk. A chhak zawk- hmarchhak aiin Bangladesh-ah kum a thar hma zawk!

Hmarchhak chu Central India atangin a hla lutuk, hun bi thuhmun hmanna chi a ni lo tih ngaihdan a awm. India ram khawthlang tawp Gujarat-a mite leh hmarchhaka mite'n hun bi thuhmun an hmang hi hmarchhak mipuite tan a tha lo tih chu mi engemaw zat ngaihdan a ni.

India hian hun bi chhiarna (time zone) pakhat, Indian Standard Time (IST) chauh a nei a, a ram a zau si a, khawchhak lama awm, hmarchhak tan chuan hei hi a tha lo hle a ni tih hi tun hma deuh atanga ngaihdan awm tawh a ni. Indian Standard Time hi Longitude 82.5°E mil-a siam a ni a, Longitude 82.5°E chu Allahabad bul a ni. Chu chu Allahabad chhak lama awmte tan chuan a thlang lutuk a, chumi mila sana siam chu a dik thei lo tih chu chutiang ngaihdan neite thu leh hla a ni. Hmarchhakin IST a hman hian hmarchhak mipuite'n chhun hun an nei tlem bik a, hmarchhak hian India independence hnu-ah electricity lamah ringawt pawh cheng vaibelchhe 94,900 a hloh tawh tia sawi a ni. IST hman a nih hian hmarchhak chu darkar 2/3 velin a hek a ni tia sawi an awm bawk.

January ni 23-ah khan Guwahati-a college pakhat, KC Das Commerce College te'n 'Separate Time Zone for the Northeast' tih thupui hmangin seminar an huaihawt a, he huna tel hi 'time zone' hran neih thu-ah an lungrual hle. Academician te, pa rawnkai te, danhremi te, thalai hruaitu te, zirlai pawl aiawhte leh hmeichhe pawl aiawhte he hunah hian an tel a, a tel zawng zawngin hmarchhak tana sana hran neih an duh niin chanchinbu lam chuan an tarlang.

Seminar-ah hian resolution pahnih an pass a- hmarchhak tan time zone hran neih a nih theih nan India sorkar leh hmarchhak MP tinte hnenah memorandum thehluh ni rawh se tih leh hmun hrang hrangah a zing thei ang berin sawihona hun huaihawt ni rawh se tihte. He seminar-a tel- NESO (North East Students Organisation) te chuan India sorkar lak-a an thil ngiat zingah an telh nghal bawk. Tin, NESO hnuaia mi, MZP te paw'n mipui nawlpuiin an tuipui theih nan seminar neih tul an ti a, April ni 23-ah Vanapa Hall-ah an huaihawt ta a ni.

He seminar-a resourse person- Jahnu Barua hi Indian Space Research Organisation (ISRO) scientist hlui, Assamese film siamtu hmingthang, Padma Shri chawimawina pawh dawng tawh a ni a, hmarchhak tana hunbi hran neih chungchangah kum 25 vel zet research a ti tawh. Tuman an la hnial hneh ngai lo a, a duh lotute pawhin a thusawi an ngaihthlak chuan a hmin zel ti hialin mi thenkhat chuan an sawi.

India ramah hmarchhakah ni a chhuak hmasa ber a, a tla hmasa ber bawk tih a sawi a, hmarchhak tan longitude 105°E-ah sana a innghat tur a ni, a ti. Chuti a nih chuan GMT aiin darkar 7 velin hmarchhak sana a chak dawn tihna a ni. IST hi GMT aiin darkar 5:30-in a chak a, IST aiin darkar 1:30-in a chak dawn tihna a ni.

"India ram khawchhak tawpa awm hmarchhak hian ni tin chhun hun darkar hnih emaw darkar thum emaw zel a hloh ziah," a ti.

Hmarchhakah IST hman a nih avang hian India zalen hnu-ah hmarchhak hi kum 25 leh thla 10 velin midang hnungah a awm ta niin a sawi a, hmarchhak hian India independence hnu, kum 62 chhungin darkar 55,800 a hloh tawh niin a sawi a ni.

Nikum June ni 19 atang khan Bangladesh chuan Daylight Saving Time (DST) an nei thar a, hetia DST an hman hian an sana a chak ta sawt a, chhun hun a tam a, chuvang chuan mipuite thawhchhuah pawh a pung niin a sawi. Singapore pawhin chutiang chuan an lo ti tawh bawk. A awmzia chu- Bangladesh hi longitude 90°E mila sana herh tur an nih laiin an ram aia chhak fe, 105°E milin an herh a, Singapore pawh 105°E mila sana herh tur an nih laiin an ram aia chhak fe, 120°E milin sana an herh a ni. Chutia an sana an herh hma chuan chhun hun an ngah a, mihring tan leh ram tan chu chu a tha tih ngaihdan a awm. Jahnu Barua thu leh hla pawh chu chu a ni a, 'Mi ramin mahni ram aia chhak daih mil-a sana an herh laiin hmarchhak mipuite chuan kan awmna aia thlang zawk mila herh sana kan hmang a, a dik lo,' a ti.

"India khawchhak tawp leh khawthlang tawp hi darkar 2-in a inthlau," a ti a, Kohima-ah zing dar 4-ah ni a chhuah chuan Mumbai-ah chuan zing dar 6 velah ni a chhuak tia sawiin, chuti chungin India chuan IST chauh a hmang a, hmarchhak chuan India ram hmun dang aiin darkar 2-in chhun eng a neih tlem phah tih a sawi a ni.

"India-in standard time pakhat chauh a nei hi khawthlang lamin an hlawkpui a, khawthlang lam chuan chhun hun an ngah bik," a ti a, "Hnathawhna hun an ngah bik avangin khawthlang lam apiang an changkangin an hausa a ni," a ti bawk.

Allahabad bul Longitude 82.5°E bul atanga tehin Indian Standard Time siam a nih thu sawiin, khawchhak lam, ni chhuah hmasakna hmarchhak tan chu chu a hla lutuk a, India ram khawthlang lam kal danin kan kal tho si a, hmarchhakin chhun hun kan neih tlem phah tiin a sawi a ni.

India ram khawthlang lamah chuan office banah chhun eng darkar 2/3 an la nei a, hmarchhakah chuan office ban rual rualin khua a thim zui thung. Tlai lam hun duhawm tak a awm ve thei ta lo a, chu chu mihring rilru leh khawtlang nunin a tuar tih chu a ngaihdan a ni.

Hmarchhaka ni chhuah hun milin India ram pum hian sana hmang ta se tiin khawthlang lam dinhmun tur a chhut a, chawhma dar 10-11 velah tukthuan an ei ang a, hnathawh hun chu chhun dar 12 atanga tlai dar 7 vel a ni ang a, chawchhun chu tlai dar 3-4 velah eiin, zan dar 12 leh dar 1 inkarah zanriah an ei ang a, dar 1 atanga dar 9 thleng an mu ang tiin a chhut a, "Delhi leh Mumbai te hian chutiang chu an peih ang em?" a ti a, an hun mil tur-a hmarchhak min dah hi a dik lo a ni, a ti.

Hawla'n India a Hawl
He seminar-a khuallian, Mizoram chief minister Pu Lal Thanhawla hi time zone hran neih duh a ni a, hunbi hran neih hi hmarchhak social thinker, journalist, academician leh hruaitu hrang hrangin an duh vek nia a hriat thu a sawi nghe nghe.

"Kan sawiho nasat poh leh a thatzia kan sawi nasa," tiin, India sorkarin hemi chungchang hi lo pawm lo tawh mah se "researcher-te chuan an duh" a ti a, "Ngaihdan thuhmun kan neih a ngai," a ti. "Dan siamtute'n kan ngaih pawimawh a tul," a ti bawk.

India sorkar hian 2001-ah khan hmarchhak tana time zone hran neih hi a lo pawm lo tawh; India sorkar chuan department of science and technology te chu hemi chungchang zirchiang tur hian a ti a, chu department chuan tha an ti ta lo a ni.

Chief minister chuan India ram hruaitute hnenah pawh hemi chungchang hi a sawi thin tih sawiin, tun hnaia AICC sub-committee an thutkhawm tum pawhin a sawichhuak niin a sawi a, "Inlakhran tumna a awm in hlau a nih pawhin Eastern Time tiin Bengal te pawh an tel thei a, Bihar ram hmun thenkhat pawh an tel thei ang," tiin a sawi niin a sawi. "UPA sorkar bengah pawh a lut," a ti nghe nghe.

'Inlakhran' chungchang sawi chhunzawmin chief minister Lal Thanhawla chuan India a hawl a, hmarchhak min ngaihthah vangin silai lek a ni thin tiin a sawi. India ramin hmarchhak mipuite hi India mi-ah a pawm lo hle niin a sawi bawk.

India chhim lamah Dravidian an awm a, hmar lamah Aryan an awm tih sawiin, "Hmarchhak mipui tam ber chu Mongoloid kan ni," a ti a, "Mi tlemte chauhvin India mi-ah min pawm a ni," a ti. "Hotel-ah te, airport-ah te passport min dil chut chut chhung chuan kan tan Indian nih a har a ni," a ti bawk.

"National leader-te" hnenah hmarchhak an ngaihthah vanga a lungawi loh thu a sawi thin nia sawiin, "Nangni hian min enkawl tha duh lo a nih pawhin min enkawl duh tur chu khawchhak lamah kan unau tam tak an awm tiin kan national leader inti, national outlook nei miah si lote hi vawi tam tak ka hrilh tawh thin a ni," a ti.

Mizoram chief minister thusawi hi seminar chhimtu, state dang zirlai pawl hruaitute'n an lawm hle a, kut ben pawh an phur hle. Banah pawh an la sawi laih laih mai.

Khualzahawm, Benjamina, Mizoram University registrar chuan University kaihhnawih ni lo, function danga a tel ve ngai loh thu sawiin, hmarchhak tana time zone hran hman hi a thinlunga a khah liam em avanga he seminar-a rawn tel a nih thu a sawi.

MZP vice president S Lalrinawma kaihhruai seminar-ah hian MZP president VL Krosshnehzova chuan hmarchhak tan hunbi hran neih an duh thu a sawi a, NESO vice chairman Lalmuanpuia Punte pawhin NESO-in India sorkar hnenah he thil hi an phut tih a sawi. He hun chhimtu hmarchhak zirlai pawl hruaitu thenkhat pawhin time zone hran neih an duh thu an sawi hlawm.

Read more...