Unau boral tur, chhan ngai an awm e

September ni 10 kha intihhlum laka inven ni- World Suicide Prevention Day a ni a, Aizawl SP office-in an chhinchhiah dan chuan he ni thleng hian Aizawl District-ah kumin chhungin mahni intihlum mi 37 an awm tawh. An zingah hian patling, kum 71 mi pawh a tel. A naupang ber chu kum 9 mi a ni.

Hrangbana College-ah chuan Civil Hospital hnuaia deptt. of psychiatry te'n World Suicide Prevention Day pual hian hun an hmang a, zirlaite hmaah thu sawiin zawhnate an chhang bawk.

Hun an hman zawhah chu huna thusawitu Dr C Lalhrekima, psychiatrist chuan a phone a'n en a, sms a lo awm; 'Pu Hrekim, ka lawm hle mai, in thusawi avangin ka thil tum ka thulh nghal e,' tih a ni.

A zanah pawh: "Ka pu, vawiin HBC-a in rawn kal kha chu ka tan chuan vantirhkoh rawn kal ang in ni e, ka lawmin ka hlim tawh tak zet a ni. Duhsakna ka hlan che u a, theih tawkin tan ka lo la ve zel ange," tih a dawng leh.

Hrangbana College zirlaite hian ziakin zawhna an thehlut a, chungah chuan an harsatna leh beidawnna te, dam an thlakhlelh loh thute bakah mangangte tanpui theih dan tur kawnga zawhna a inziak tlangpui niin thu dawn a ni.

Nikum-ah khan Hrangbana College zirlai zingah inawkhlum 3 an awm a, NGO pakhat- NELICS (New Life Charity Society) te'n chumi hnuah hun an hmang ta a ni. NELICS te hian zirlaite chu fuihin thil awmzia an hrilh a, mi beidawng tan rawn theih an nih thu te an sawi bawk. Chutah programme an hmang zo, an han haw chu, he college zirlai 6, mahni intihhlum tum mi beidawngin an be nghal! Chu'ng mite nun chu chhan hman a ni ta.

NELICS hian kuminah Pachhunga University College-ah World Suicide Prevention Day hi an hmang a, he huna thusawitu Dr Zawmsanga Sailo, NELICS general secretary chuan he college zirlai pakhat inawkhlum a awm tawh nia a hriat thu a sawi a, "He thihna duhawm lo tak hian nangmah leh i thiante a man tawh lohna turin theihtawp lo chhuah la kan duh ngawt mai," tiin zirlaite a sawm. Zirlaite chu eng bawiha mah tang lo turin a chah bawk.

"Zirlai zingah he harsatna nei an lo tam hle a, nun beidawng leh intihhlum mai rilruk te, chutiang thian neite an lo awm tih kan hrechhuak a, he thil hi ngawrh lehzuala beih a tul khawp mai," tiin Pachhunga University College zirtirtu Paul Lalremruata, Students Welfare secretary chuan Zozam Weekly a hrilh.

"Heti khawpin kan zirlaite'n harsatna an lo tawk nasa ang tih ka lo ngaihtuah ngai lo. He harsatna hi ngawrh taka beih let a lo hun tawh tak zet a ni," a ti bawk.

Related Posts :