Sunday, September 19, 2010

ZINMITE HIPNA’N

¢ HC Vanlalruata

Kan hotute hian Cheraw kan (an sawi danah bamboo dance) a World Record kan siam chuan kan ramah zinmi (tourist) tam tak kan hip ang an ti a. Chubakah chuan kar hmasa lamah khan Reiekah kum dang ang bawkin tourist hipna’n tiin Anthurium Festival ni hnih awh an buatsaih leh bawk a. Kei chuan heng avang ngawt hian Mizoramah tourist an lokal tam phah ka ring lova, pakhat pawh an rawn kal belh ka ring hranpa lo.

Hman deuhah tawh khan kan Tourism Ministerin press conference a koh tumin Tourist Lodge leh Highway Restaurant-ah te hian Mizo chaw leh chawhmeh-te hi siam ni ta zawk sela a that ka rin thu rawtna ka siam a. Chuta min chhanna chu, “Mizo chaw leh chawhmeh hi kawng dunga hotel-te anga kan chhawp chuan kan Highway Restaurant leh Tourist Lodge te a tawp ang,” tih a ni a. Tourism kan man loh tlan dan leh kan sorkar hnathawk atanga politician thlengin ngaihdan vawn ngheh tlat (mindset), hmasawnna lama ke pen tura thil kalphung thlak thei reng renglo khawpa kan chut dan hi a la ngai rengin ka hria.

Mi ram tourism lam ke pen dan ang tam tak hi kan ramah a hman ve theih loh tih kan pawm phawt a tul. Vura tleng nuamti-te lokal chakna turin kan ramah vur a awm ve lova; tourist ho bawh nasat berte zing a mi nuamtawlna tur tuifinriat kam kan nei hek lo. Kan ram a la naupan’ avangin hmuhnawm tham tur thil hlui (heritage/historical sites) kan nei miah bawk si lova. Tuikhawhthla kan neih chhun lah chu mi ram tuikhawhthla sang nena khaikhin chuan nep tak a ni a, ennawm tur pawh kan nei lo.

Kan ramin kan neih chu kawng chhe takte, lui khawkrawk tak tak te, a michengte nelawmna-te, ram ngaw tlem a zawngte a ni ber a. He’ngte hi kan hman thiam chuan tourism hmasawnna atan kan her rem thei ngei ang. Kan kawngchhiate leh kan tlang kham chhengchhe takte hi adventure sports leh adventure tourism atan te, eco-tourism atana hman tangkai theih a ni a. Kan lui khawkrawk tak pawh hlauhawm taka khawsak chak mingo-ho leh India mi dangte tan pawha thelret lawng hmanga infiamna atana hman tangkai theih a ni. Sawi tawh angin kan ram ngaw-a nungcha thenkhat, khawvel hmun danga awm velote zir chiang duh kan hip thei bawk ang.

Mizorama Tourism tih-hmasawnna atan chuan kan nih ang ang leh kan neih ang chin chin hi tangkai taka kan hman thiam a tul a. Kan hotute ngaihdan ang a sap nial nual vai nial nual eitur leh tihdan phung hi chuan kan hip hauh lovang. Ramdang atanga zinmi (tourists) lokal-te hian an ramah chenna in leh thil dang tha ber ber an nei tih hriat tur a ni a. Sum senga an lokal duh chhan chu kan chaw leh chawhmehte an ei chak a, kan hnam siam chhuah zu thlengin an in chhin duh a. Kan in tha vaklo, keimahni’n tunhma atanga kan lo chenna thin tura kan sak ve-ah te an khawsa chak zawk a ni.

Zu chungchang sawi ta i la Scotch Whisky kan neih ve tha ber ber lo chhawp mah la, an ramah a aia tha an nei a, an in tawh bawk. Eitur tha ber nia kan hriat, Indian emaw Chinese emaw Continental emaw pawh lo chhawp ve tum eltiang mah ila a aia tui leh changkang ei thin hlir an ni. Chuvang chuan kan zu tuitling emaw, rakzu emaw zufang emaw kha an temin an in chak tih kan pawm a tul a. Changkang nia kan hriat kan chaw ni hauhlo, thiam tawka an duh tur ang hnaih bera kan lo siam ve ai chuan kan bai leh bawl leh tlak-te, vawksa leh antam chhumte hi an tem chhin chak a, an ei duh zawk a ni. Chaw tui leh changkang nia kan hriata theih tawpa kan lo tih ve hi ei chakin helai thleng thlengin an lokal lul lovang, an ka-a a aia tui leh changkang an ramah, an inah ei tur a tam lutuka an ei rei tawh lutuk.

Chuvangin tourism ti hmasawna, tourist tam zawk an lo luhna tur chuan kan nihna angin awm mai i la, kan rama awmte hi hman tangkai i tum mai i la. Chumi atan erawh chuan kan intihlar thiam a tul ang a, khawvel media leh Indian Embassy te, Mizoram House te kan hman tangkai a tul hle ang.

Hmanni khan Baktawng Tlangnuam venga awm Chana Pawl te kan tlawh a. Chuta ka thu ziah chu internet atanga lo chhiar-in Europe ram atanga tlawhtu an lo nei nual a lo ni a. Highway Restauranta Omlette an siam leh Chinese siam dan niawm taka chow an siam eitur ni lovin khawvela chhungkaw hung ber zanriah kilnaa tel ve tumin an lo han tlawh a lo ni. Enge kan neih a, India ram hmundang leh ramdang atang pawha an rawn tlawh chak tur enge kan lo hlui theih tih hre chiang hmasa phawt a, chuta tanga kan nihna diktak hmanga zinmite hip dan kan thiam a tul a. Tuna kan kal dan ngawt hi chuan Tourist lodge te kan siam hnem leh kan hloh hnem mai dawn a ni.

Related Posts :



1 comment: